Kryeministri i Kosovës, Isa Mustafa, ka ftuar opozitën për dialog dhe orientim të vërejtjeve në tavolinë.

Në një intervistë për “Zërin” Mustafa ka hedhur poshtë edhe kërkesën e fundit të opozitës për zgjedhje të parakohshme. Sipas tij, zgjedhje nuk do të ketë para vitit 2018

Mustafa është deklaruar kundër zgjedhjeve të jashtëzakonshme, ndërsa ka porositur opozitën që të përgatiten për zgjedhjet e vitit 2018, kur edhe janë të parashikuara me ligj. Në intervistën dhënë “Zërit” ai ka porositur opozitën që ata të punojnë më shumë gjatë kësaj kohe dhe ta bindin qytetarin se ata mund të qeverisin më mirë.

Ndërkohë, Mustafa duke folur për vendimin e Gjykatës Kushtetuese ka thënë se vërejtjet e saj janë të qëndrueshme.

“Është trajtuar shumë edhe statusi i saj sepse ka pasur keqkuptime lidhur me atë se çfarë është në esencë Asociacioni. Në bazë të këtyre sqarimeve do të jetë tani shumë më e lehtë që të bëhet statuti, i cili do t’i dërgohet përsëri Gjykatës Kushtetuese në shqyrtim. Çdo pikë e statutit do të jetë në përpikëri me Kushtetutën”, ka thënë kryeministri Mustafa. /Zëri

Asociacioni i Gazetarëve të Kosovës ka pranuar me shqetësim njoftimin se gazetarët Uran Haxha nga Koha.net dhe Brahim Thaçi nga TherandaPost, janë penguar nga kryetari i komunës së Suharekës, Sali Asllanaj për ta kryer detyrën e tyre.

Sipas ankesës që ka pranuar Asociacioni i Gazetarëve, Kreu i Komunës së Suharekës, Sali Asllanaj, përmes zëdhënësit të tij, sot, nuk i ka lejuar dy gazetarët që ta përcjellin konferencën për shtyp të fundvitit, por as të kenë qasje në ndërtesën e komunës, me arsyetimin se nuk e kanë pasqyruar drejt punën në komunë.

“Asociacioni i Gazetarëve të Kosovës e dënon këtë akt duke e cilësuar, shkelje flagrante të së drejtës për qasje në informacion dhe në kundërshtim me vlerat e përgjithshme të lirisë së shtypit dhe shprehjes”, thuhet në reagimin e këtij asociacioni.

AGK thekson se gazetarët duhet të jenë të lirë ta ushtrojnë profesionin e tyre dhe të raportojnë objektivisht për gjërat që janë në interes të publikut, pavarësisht nëse lajmi mund të mos i pëlqejë kryetarit të komunës.

“Përpjekja për t’ua imponuar gazetarëve se çfarë të shkruajnë, është tendencë për kontrollin e informatës dhe për mbytjen e fjalës së lirë. Mbyllja dhe jotransparenca në raport me gazetarët, cënon të drejtën e qytetarëve që të jenë të informuar lidhur me menaxhimin e taksave të tyre”, theksohet në reagimin e tij.

Asociacioni i Gazetarëve të Kosovës inkurajon kreun e komunës së Suharekës që për çdo pakënaqësi t’i drejtohet organeve kompetente, por assesi t’ua pamundësojë gazetarëve ta kryejnë punën e tyre, pasi kjo paraqet edhe shkelje të të drejtave elementare të njeriut.

Asociacioni inkurajon gazetarët që të mos heqin dorë nga e drejta e tyre për t’i informuar qytetarët për qeverisjen komunale.

Dy gazetarë u ndaluan sot ta përcjellin konferencën e fundvitit të kryetarit të komunës së Suharekës.

Kryetari i komunës së Suharekës, Sali Asllanaj, u ka ndaluar sot dy gazetarëve lokalë që ta përcjellin konferencën e tij për shtyp, të fundit për këtë vit.
Brahim Thaqi nga portali Theranda Post dhe Uran Haxha nga Koha Ditore u ndaluan që të hyjnë në ndërtesën e komunës. Për ta bërë këtë, Asllanaj kishte udhëzuar zëdhënësin e komunës.

Ai tha për KALLXO.com se gazetarët e Theranda Post janë të padëshirueshëm në zyrën e tij pasi që ky medium lokal, sipas tij, për dy vitet të qeverisjes “nuk e ka pasqyruar drejt punën në komunë.

Për këtë ka pësuar edhe Uran Haxha i cili, sado që aktualisht punon në gazetën “Koha Ditore”, më parë ka qenë pjesë e portalit lokal Theranda Post.

“Unë i kam sugjeruar shefit të zyrës për informim që të mos i lejojë ata që të marrin pjesë, për shkak se ata për dy vjet rresht, asnjë pasqyrim objektiv të komunës nuk e kanë bërë”, tha kryetari i komunës së Suharekës.

Ndërsa gazetari Brahim Thaqi tha për KALLXO.com se veprimi i Asllanajt është skandaloz.

“E drejta jonë është me u informu. Ne sot jemi provuar nga e drejta për informim, kjo e shkel të drejtën universale për të drejtat e njeriut, të drejtën për të marrë informata, të drejtën për të dhënë opinione dhe të drejtën që ta shprehim edhe mendimin tonë. Ne nuk shkuam as me zor. Ata vetë na ftuan edhe vetë na përjashtuan”, tha Thaqi.

Por, ai tha se do të vazhdojë punën në raportime nga komuna.

Gjatë konferencës për shtyp, Asllanaj e konsideroi “të suksesshëm” vitin 2015 për komunën e Suharekës si në rritjen e shërbimeve të administratës për qytetarët, ashtu edhe në ngritjen e të hyrave vetanake.