Këshilli i Sigurimit i Kombeve të Bashkuara do të shyqrtojë sot raportin tremujor të Sekretarit të Përgjithshëm Ban Ki Moon mbi zhvillimet në Kosovë.

Gjithashtu do të dëgjojë vlerësimet dhe komentet e përfaqësueve të Kosovës, të Serbisë, dhe të vendeve anëtare të cilët do të reflektojnë për raportin si dhe për zhvillimet e fundit në Kosovë dhe në rajon.

Një nga vlerësimet që dallohet në raportin më të ri i cili përfshin periudhën nga 15 janari deri më 15 prill është ‘marrëveshja për integrimin e gjyqësorit në veri’ e arritur në kuadër të dialogut midis Kosovës dhe Serbisë, të cilën Sekretari i Përgjithshëm e konsideron ‘të një fryme të bashkëpunimit konstruktiv ku theksi vihet mbi interesat e përbashkëta’.

“Një çështje thelbësore për të ardhmen e Kosovës”, Sekretari Ban e quan themelimin e Gjykatës Speciale dhe në këtë kuadër ka përshëndetur hapat e autoriteteve të Kosovës drejt themelimit të saj.

Çështje të tjera që përmenden në observimet e Sekretarit të Përgjithshëm të Kombeve të Bashkuara janë ato rreth stabilitetit në veriun e Kosovës, për nevojën e krijimit të asociacionit të komunave, për kthimin e deputetëve serbë në Kuvendin e Kosovës si dhe për nevojën e përmirësimit të raporteve midis pushtetit lokal në komunat e veriut me atë qendror në Prishtinë.

Diskutimet e sotme pritet të orientohen edhe kah ngjarjet e fundit në Kumanovë ku sigurisht nga vendet jo shumë miqësore ndaj shtetësisë së Kosovës nuk do të kursehen akuzat për rolin e shtetasve të saj. Rreth këtyre ngjarjeve ekziston edhe një shpresë e një iniciative për një hetim të paanshëm ndrkombëtar dhe këtu sigurisht se nuk do të mungojë qasja konstruktive e vendeve perëndimore.

Seanca do të fillojë në ora dhjetë paradite sipas kohës në New York ndërkaq kryesuese për këtë muaj e Këshillit të Sigurimit është Lituania, anëtare me një mandat rotativ dyvjeçar. /RTK/

Policia e Kosovës dhe Misioni i OSBE-së në Kosovë sot do të fillojnë konferencën tri ditore, e cila ka të bëjë me “Zvogëlimin e kërkesës për drogë dhe dëmit nga droga”.

Në këtë seminar pritet të marrin pjesë përfaqësues të ndryshëm nga institucionet vendore dhe ndërkombëtare.

Sipas agjendës në këtë konferencë do të diskutojnë Jean Claude Shaumberger, kryesues i OSBE-së në Kosovë, ministri i Shëndetësisë Imet Rrahmani, ministri i Arsimit, Arsim Bajrami, përfaqësues nga policia dhe diskutues tjerë.

Drejtori ekzekutiv i Këshillit për Mbrojtjen e të Drejtave dhe Lirive të Njeriut (KMDLNj), Behxhet Shala pret nga Departamenti i Mjekësisë Ligjore i Kosovës të japë një raport objektiv rreth vdekjes së qytetarëve të Kosovës në Kumanovë.

Ai ka thënë për ‘Epokën e re’ se autoritetet maqedonase nuk kanë treguar transparencë në këtë drejtim sepse nuk kanë lejuar të vizitohen të arrestuarit, por as nuk është ftuar një ekip i ekspertëve mjekoligjorë nga Kosova që të marrë pjesë në obduksionin që është bërë në Shkup.

“Nëse Kosova ka të gjeturat të cilat kontestojnë raportin e palës maqedonase, atëherë natyrisht se duhet të kërkohet një super ekspertizë ndërkombëtare e një trupe të pavarur”, është shprehur Shala./Epoka e re/

Gjykatës Speciale, e cila do të merret me hetime ndaj disa ish-luftëtarëve të UÇK-së të dyshuar për krime lufte gjatë vitit 1998 dhe 1999, do të dërgohet për votim këtë të premte në Kuvendin e Kosovës.

Mirëpo, këtë gjykatë përveç deputetëve të opozitës po e kundërshtojnë fuqishëm edhe shumë deputetë të pozitës, veçanërisht të PDK-së, të cilët kryesisht janë të rajonit të Drenicës.

Burime të sigurta të Veriu.info bëjnë të ditur se kundër themelimit të kësaj gjykate do të votojnë Ganimete Musliu, Nait Hasani, Fadil Demaku, Nuredin Lushtaku, Bekim Haxhiu, Flora Brovina, Raif Qela, ndërsa të pavendosur janë Xhehvahire Izmaku, Blerta Deliu e Rafet Rama.

Deputetja e Kuvendit nga radhët e PDK-së, Xhevahire Izmaku, në një prononcim për Veriu.info ka thënë se ende nuk ka vendosur se a do të votoj për apo kundër themelimit të Gjykatës Speciale.

“Sa i përket votimit, unë ende nuk jam e sigurt në votimin që do të bëjë, sepse nuk e kam parë asnjë draft të ligjit, asnjë nen te tij. Mirëpo, kjo mbetet të premten të dihet për publikun. Mendoj se kjo gjykatë është fitore e armiqve tanë ndaj Kosovës si shtet, pasi që kjo gjykatë është gjykatë politike, dhe duke u bazuar në veprimet e deritashme të drejtësisë ndërkombëtare në Kosovë, pak besoj në vlerat e drejtësisë reale në të”, ka thënë Izmaku, duke treguar se fakti që ajo vjen nga Vushtrria ku është kryer masakra e Studimes e bënë më të vështirë këtë votim.

“Për 4 vite rresht e kam ngritur çështjen e masakrave të kryera në komunën tonë, e veçanërisht të masakrës së Studimës. Ju kam drejtuar edhe Eulex-it, duke u referuar në hetimet dhe dëshmitë që KMLDNJ në Vushtrri i ka bërë me vite radhazi, në dokumentet me faktografi që ky këshill i ka dorëzuar në prokurori vendore e ndërkombëtare, dhe asnjë kriminel nuk është dënuar për to. Unë mendoje se edhe partnerët tanë të cilët na ndihmuan në çlirim dhe bërje të shtetit, e bënë shumë joracionale kërkesën ndaj nesh, duke kërkuar të votojmë një trup i cila do ti gjykoj shumë luftëtarë të lirisë, derisa drejtësia ndërkombëtare nuk do gjykoj ende Serbinë, e cila bëri luftë me ombrellë shtetërore. Ndërsa në rastin tonë, flitet për aktivitete të këqija të cilat eventualisht mund t’i kenë kryer individ, mirëpo kjo dallon nga një luftë e një pushteti hierarkik i cili përdori gjithë forcën ushtarake kundër një popullate civile”, tha Xhevahire Izmaku.

Edhe deputetja tjetër e PDK-së, Blerta Deliu, ka treguar për Veriu.info se ende nuk ka vendosur se a do të votoj për apo kundër themelimit të kësaj gjykate. “Unë ende nuk ka vendosur se si do të votoj. Ne ende nuk kemi marrë kurrfarë materiale për seancën e së premtes, mirëpo nesër e kemi mbledhjen e Grupit Parlamentar dhe aty do të vendosim se si do të votojmë”, ka thënë Deliu.

Ndërkaq, deputeti i LDK-së, Arben Gashi, ka thënë se parimisht është që ta votoj themelimin e Gjykatës Speciale, por që mendon se ka nevojë që kjo gjykatë t’i hetoj edhe vrasjet e pasluftës. “Unë parimisht jam për. Por mendoj që kjo gjykatë duhet ti hetoj edhe vrasjet politike të pasluftës”, ka thënë Gashi.

I pyetur se a ka kërkuar nga ministrat e Ministrisë së Drejtësisë në periudhën 2001-2007 që të bëjnë presion për ndriçimin e këtyre vrasje, ai ka thënë: “Po, por si duket kjo ka qenë e pamundur”.

Në anën tjetër, ish deputeti i PDK-së, i cili tash është deputet i pavarur, Shaip Muja, është përgjigjur me ironi se a do të votoj themelimin e Gjykatës Speciale, duke aluduar se do të votoj kundër.

“Shikoni deklarimet e mia prej raportit të Dick Martyt e deri më sot, e pastaj ma bëni pyetjen”, ka thënë Muja për Veriu.info.

Burime të Veriu.info bëjnë të ditur se themelimi i kësaj gjykate në seancën e së premtes është shumë në rrezik, pasi që edhe 3-4 deputetë të LDK-së do të votojnë kundër. /Veriu.info/