Katër persona në Malishevë mbrëmë janë rrahur në mes veti pas një mosmarrëveshje.
Sipas policisë, përveç dëmeve materiale të shkaktuara në automjete, dy prej tyre kanë pësuar edhe lëndime të lehta trupore.
Me urdhër të prokurorit rasti shkon në procedurë të rregullt. /PrizrenPress.com/
Një aksident trafiku ka ndodhur në Dragash.
Sipas policisë, i dyshuari përderisa ishte duke lëvizur me veturën “Opel Corsa”, për shkak të mospërshtatjes së shpejtësisë së lëvizjes me kushtet e rrugës humb kontrollin mbi veturën dhe del jashtë rruge.
Si pasojë e aksidentit përveç dëmeve materiale lëndime trupore kanë pësuar drejtuesi dhe një pasagjer, të cilët dërgohen për tretman mjekësor në spitalin e Prizrenit. /PrizrenPress.com/
Ministria e Arsimit, Shkencës dhe Teknologjisë (MASHT) ka marrë vendim që Provimi i Maturës sivjet të organizohet në ambiente të mbyllura, me qëllim që të eliminohen keqpërdorimet e mundshme.
Madje, nëpër klasa do të lejohen vetëm 15 nxënës, ndërsa edhe monitorimi do të jetë ndryshe nga vitet e kaluara.
Në gjithsej 250 qendra të testimit, kryetarët e të cilave janë caktuar të jenë nga MAShT-i si dhe universitetet publike, për sigurimin e ambientit do të kujdeset Policia e Kosovës. Numri i administruesve, sipas të dhënave të deklaruara nga Ministria në takimin e organizuar të martën me kryetarët e komunave, drejtorët komunalë të arsimit dhe drejtorë të shkollave të mesme, do të jetë në këtë provim 2500 administrues, si dhe 500 mbikëqyrës.
Për çdo pesë administrues është caktuar të ketë një monitorues./Zeri/
Drejtori i Agjencisë Kundër Korrupsionit (AKK), Hasan Preteni, druan se në rast se Prokuroria dhe gjyqësori vazhdojnë të jenë pasive në luftën kundër korrupsionit, qytetarët nuk do të raportojnë aferat korruptive tek institucioni që ai drejton. Kësisoj, sipas tij, korrupsioni do bëhet fenomen i pranueshëm.
Këtë dyshim Preteni e ka ngritur me arsyetimin e tij se qytetarët e Kosovës duhet të dinë rezultatet finale të Prokurorisë dhe të gjyqësorit, sa herë që ndonjë zyrtar i lartë apo ndonjë individ dënohet për shkelje ligji apo keqpërdorime – bazuar në faktet dhe dëshmitë që ndonjë qytetar i ka dërguar në AKK.
“Kosova qëndron dobët në luftën kundër korrupsionit”, ka thënë Preteni për televizionin Dukagjini.
Edhe këtë vit, sipas Pretenit, prokurimi publik vazhdon të jetë segmenti që prodhon më së shumti korrupsion në Kosovë.
“Kjo ndodh sidomos në fund të vitit, sepse në gjashtëmujorin e parë nuk ka shumë investime kapitale. Ndërsa, korrupsioni në Kosovë bazohet pikërisht tek këto investime kapitale. Dihet, korrupsioni nuk ka të bëjë me 10-20 euro, po aty ku ka shuma e parave është e madhe”, ka theksuar Preteni.
Përveç rasteve të korrupsionit e të mosdeklarimit të pasurisë, mision i AKK-së qëndron edhe tek parandalimi i këtij fenomeni negativ.
Preteni ka thënë se ka pasur raste edhe në këtë gjashtëmujor, nga një Ministri e Qeverisë së Kosovës që kanë parandaluar tenderët në ndërmarrje publike.
“Kemi kërkuar të stopohet një tender dymilionësh në MFSK, në KOST dhe Trankos”, ka thënë Preteni.
Sa i përket deklarimit të pasurisë së zyrtarëve, Preteni shprehet se kanë filluar reagimet e para të qytetarëve të Kosovës që i janë drejtuar Agjencisë, duke raportuar se ka zyrtarë të ndryshëm që kanë fshehur ose nuk kanë deklaruar pasurinë tamam si është.
“Qysh dje kemi pranuar katër e-mail nga qytetarët e ndryshëm që shprehin dyshimet e tyre për zyrtarët e caktuar, se ata kanë fshehur pasurinë dhe se nuk e kanë deklaruar si duhet”, ka thënë Preteni, i cili ka bërë thirrje që Prokuroria të ngre padi dhe që qytetarët të njoftohen se për cilin zyrtar në fjalë ka të bëjë padia.
Janë të njohur si persona VIP dhe me ndikim në Kosovë, madje udhëheqin dikasteret qeveritare, të cilët janë kujdesur mjaft mirë që prej kohësh t’i rehatojnë gratë e tyre nëpër institucione shtetërore.
Universiteti i Prishtinës dhe kolegjet private janë vërshuar kryesisht nga bashkëshortët e bashkëshortet e udhëheqësve të Qeverisë së Kosovës. Puna e mësimdhënësit është mjaft e pëlqyeshme edhe për ligjvënësit e Kuvendit të Kosovë.
Deklarimi i pasurisë, që po publikohet nga Agjencia Kundër Korrupsionit, pos deklarimit të pasurisë ka nxjerrë në pah edhe punësimet familjare në institucionet publike e private të ministrave e deputetëve të Kuvendit.
Ish-kryeministri, tash ministër i Jashtëm, ka deklaruar se bashkëshortja i ligjëron në Kolegjin “Fama” nga ku paga vjetore i arrin në 18 mijë euro. /Zëri/
Pas zbardhjes së raportit konfidencial të EULEX-it dhe lidhjeve të zyrtarëve të lartë të shtetit, nga radhët e PDK-së, me skandalin e ri: Thaçit, Veselit e Kuqit, opozita, analistët politikë dhe ekspertë të sundimit të ligjit theksojnë se është e domosdoshme që Kuvendi urgjentisht të debatojë dhe të ndërmarrë hapat e nevojshëm.
Shefi i grupit parlamentar nga radhët e Lëvizjes Vetëvendosje, deputeti Glauk Konjufca, i deklaroi gazetës Kosova Sot se ky grup parlamentar i ka mbledhur 6 firma të deputetëve për ta debatuar në Kuvendin e Kosovës temën e EULEX-it dhe lidhjet e tij me mafinë politike. Ai ka pohuar se trajtimi do të jetë gjithëpërfshirës, do të shtjellohet tema e skandaleve në EULEX, duke e ndërlidhur atë edhe me çështjen e Gjykatës Speciale, e cila sipas kornizës ligjore është paparë që të jetë ekskluzivisht nën autoritetin mbikëqyrës dhe menaxhimin nga ana e këtij misioni.
“Përderisa ne kemi krijuar, këto dy vitet e fundit, një koncept që quhet kapja e shtetit, tash po më duket që kemi të bëjmë me të njëjtën analogji, me kapjen e EULEX-it nga politika në Kosovë dhe kapjen prej krimit të organizuar. Kjo është për arsyen se kemi të bëjmë me zyrtarë ndërkombëtarë të cilët kur kanë ardhur këtu kanë pasur imunitet prej ligjit dhe nuk janë llogaridhënës ndaj institucioneve të Kosovës, prandaj paraqesin njëfarë organizmi politik sikur që është EULEX-i, i cili nuk po kontrollohet as prej vendorëve, por në të vërtetë nuk është se kontrollohet shumë as prej vendeve evropiane, prej nga vjen ky mision”, tha Konjufca./Kosova Sot/
Deputeti Shaip Muja ka vendosur ta votojë themelimin e Gjykatës Speciale në Kuvendin e Kosovës, ndonëse është personi më i apostrofuar në raportin e senatorit zviceran, Dik Marty, për trafikim organesh.
Muja thotë se ka 6 vjet që terrorizohet si person dhe si familje, njësoj, siç thotë ai, si në filmat horror të Alfred Hiçkokut. Sipas tij, raporti i Marty-t fund e krye është i ndërtuar në bazë të shpifjeve dhe spekulimeve për ta dëmtuar UÇK-në, prandaj, siç thotë ai, është koha e fundit që të hiqet njëherë e përgjithmonë kjo njollë për shtetin e Kosovës.
Shaip Muja gjatë kësaj interviste për “Zërin” sqaron se vetëm në Kuvend vazhdon të jetë i pavarur, megjithëse ende është pjesë e PDK-së./Zëri/
Sali Asllanaj ka vlerësuar se procesi i brendshëm zgjedhor në LDK ka qenë demokratik dhe nuk ka pasur shkelje të statutit e të procedurave.
Ai ka thënë se Isa Mustafa e ka marrë besimin e plotë të delegatëve në Këshillin e Përgjithshëm për të drejtuar edhe një mandat LDK-në dhe e ka kundërshtuar deklaratën e Fatmir Sejdiut se Mustafa e ka kapur LDK-në.
Kryetari i komunës së Therandës, Sali Asllanaj tha për ‘Epokën e re’ se disa deputetë nuk janë pjesë e Këshillit të Përgjithshëm të LDK-së për shkak e nuk i kanë respektuar vendimet e partisë në Kuvendin e Kosovës.
Ai beson se brenda kësaj jave do të zgjidhet kryesia e re.
Publicisti Veton Surroi thotë se prezantimi i Kosovës nga Presidentja Jahjaga si vend mysliman, nuk duhet të qëndrojë.
Surroi, në emisionin “Click” të RTV 21, tha se ne jemi shqiptarë, dhe si të tillë jemi myslimanë, katolikë e të tjerë.
“Identiteti ynë nuk është fetar. Ne jemi shqiptarë dhe duke qenë shqiptarë, jemi myslimanë, katolikë, bektashinj, ateistë etj.”, tha ai.
Ai ka kritikuar të parën e shtetit, Atifete Jahjagën, në shumë aspekte, duke e quajtur të pa ditur.
Surroi ka thënë se Jahjaga ka probleme me fjalë e me nocione, ndërsa ka shtruar pyetjen se përse nuk është zgjedhur dikush tjetër më i ditur në postin e saj.
“Po ta shikosh cila është arsyeja që të zgjidhet një njeri pa ndonjë dije pa ndonjë përvojë siç është zonja Jahjaga në krye të Kosovës. Cili është motivi i ambasadorit amerikan? Pse të merret dikush i cili nuk është i ditur për shembull si ajo e cila ka telashe shumë të mëdha me fjalët, me fjalët e shkruara dhe të shqiptuara me nocionet pse mos të zgjidhet dikush pak më i avancuar”, tha Surroi.
Surroi përmendi edhe trendët negative në rritje, sidomos atë ekonomik, duke thënë se si problem kyç është identifikimi asaj se kur është boll.
Pas tetë orë bisedimesh, Komisari për politikë fqinjësore evropiane dhe negociata për zgjerim, Johanes Han, ka thënë se është arritur marrëveshje ndërmjet liderëve për organizimin e zgjedhjeve të reja në Maqedoni.
Ai u thënë medieve se ka mundësi që në prill të 2016-s të mbahen zgjedhjet e parakohshme. Sipas tij, detajet për atë se kush do t’i organizojë zgjedhjet dhe kush do të jetë në krye të Qeverisë, do të diskutohen në një takim të radhës që do të zhvillohet në Bruksel gjatë javës së ardhshme.
Hahn ka deklaruar se takimi ka qenë konstruktiv dhe se sipas tij, deri në mbajtjen e zgjedhjeve do të pastrohet lista zgjedhore, dhe do të mundësohet një atmosferë për zgjedhje të lira dhe demokratike.
Pas deklaratës, Hahn ka lëshuar rezidencën e BE-së, ndërsa liderët e katër partive gjithashtu janë larguar duke mos dhënë detaje nga takimi.
Edhe këshilltari i Ali Ahmetit, Artan Grubi, ka konfirmuar përmes profilit të tij në “Facebook” se ndërmjet katër liderëve më në fund është arritur një marrëveshje për të cilën nuk ka dhënë detaje.
“Ditë shumë intensive dhe e vështirë, por me rëndësi në fund u arrit marrëveshje midis katër liderëve, me ndërmjetësimin e Komisionarit Hahn dhe ambasadorit të ShBA-së, Bailey dhe atij të BE-së, Orav. Përveç zgjidhjes së ngërçit të tmerrshëm politik, jam i sigurt që kjo marrëveshje, e cila i referohet rëndësisë së Marrëveshjes së Ohrit, marrëdhënieve ndëretnike, marrëdhënieve ndërfqinjësore dhe procesit integrues euroatlantik, do të paraqesë një obligim për të gjithë ne që me përgjegjësi t’i rrekemi punës dhe ta rikthejmë vendin në agjendën prioritare”, ka shkruar Grubi.