Pas raportimit të mediave se kryetari i Kuvendit të Kosovës, Kadri Veseli, i ka kërkuar presidentes së Kosovës, Atifete Jahjaga, ti merret mandati deputetit Rrustem Mustafa – Remi, ky i fundit sot ka shkruar letër të hapur, nëpërmjet të cilës tregon se e dorëzon mandatin e deputetit, por shpreh mllef për prani të veprimeve autoritare të institucioneve.

Këtë letër të hapuar ai ia ka adresuar Gjykatës Kushtetuese të Republikës së Kosovës, kryeparlamentarit Veseli, presidentes Jahjaga, kryeministrit Isa Mustafa dhe zëvendëskryeministrit Hashim Thaqi.

Në këtë letër ai shkruan se autoritarizmi rrezikon lirinë dhe sugjeron që duhet munduar fort për të ndërtuar kulturë tek qytetarët, që besnikërinë ndaj shefit (individit) ta zhvendosin në besnikëri ndaj shtetit.

“Zyrtarët e shtetit, jo vetëm që duhet, por kanë obligim kushtetues që të jenë konformist ndaj ligjeve dhe besnik në mbrojtjen e interesave shtetërore. Duhet shumë punë për të çrrënjosur apetitet individuale karshi zhvillimeve sistematike institucionale. Ne duhet të besojmë në institucionet tona dhe politikëbërjen tonë. Unë, respektoj vendimet e gjyqësisë dhe kam respektuar nevojën për konformizëm ndaj rendit dhe ligjit.

Vendimi për dorëzim të mandatit tim të deputetit ishte rrjedhojë e besimit tim të palëkundur në shtetin tonë dhe institucionet e tij dhe kam pritur që edhe veprimet e institucioneve do të përgjigjeshin me po këtë ndershmëri. Sidoqoftë, institucionet nuk kanë vepruar në pajtueshmëri me ligjet dhe procedurat të cilat adresojnë këtë çështje”, shkruan, ndër të tjera, Rrustem Mustafa – Remi.

Kandidatit për president sipas marrëveshjes së koalicionit PDK-LDK, Hashim Thaçit, po vazhdon t’i ngushtohet kuorumi, për seancën në të cilën emri i tij do të jetë për votim.

Vjosa Osmani, Arben Gashi e Alma Lama nga LDK dhe deputeti i pavarur Gezim Kelmendi, kanë deklaruar tashmë se nuk do të marrin pjesë në seancën kur Thaçi do të votohet për president.

Por, kësaj listë së fundmi i është shtuar edhe emri i deputetit të LDK-së, Adem Salihaj, që thotë se nuk do të jetë pjesë e një séance të tillë.

“Jam deklaruar qysh herët për votën time kundër Thacit. Por, edhe që nuk do të jem pjesë e procesit të votimit fare për Thaçin President”, tha Salihaj për Radio Dukagjinin.

Salihaj shtoi se të gjitha partitë, përfshirë edhe ato të opozitës, duhet të ulen e bisedojnë për një emër konsensual për postin e Presidentit.

Pa qëndrime janë edhe disa deputetë nga radhë e Lidhjes Demokratike. Anton Quni dhe Besa Gaxherri, të kontaktuar nga radio Dukagjini, nuk e kanë bërë publike vendimin e tyre.

Ndryshe, për ta pamundësuar kuorumin, në sallë nuk duhet të jenë të pranishëm 41 deputetë.

Opozita, ka 31 deputetë.