Ajo është një nga modelet më të nxehta braziliane.
Për këtë mjafton të shohësh këto foto të Lais Ribeiro.
Në këtë set super provokues, Lias shfaqet topless.
Deputetët kritikojnë Hasan Pretenin pse i ngriti kallëzim penal Duda Baljes
Rasti i deputetët Duda Balje nuk u la pa u përmendur edhe në mbledhjen e sotme të Komisionit për Buxhet dhe Financa.
Kryesuesi i këtij komisioni Naser Osmani akuzoi AKK-në se po ngrit kallëzim penal ndaj deputetëve pa pasur fakte të sigurta.
“Këto goditje të personave dhe zyrtarëve të lartë ju i bëni me shumë lehtësi duke mos marrë në bazë dhe konsideratë që ata përfaqësojnë dikë. Nëse nuk kemi pas argumente pse keni kallëzim. Fjala është për deputeten Duda Balje”, tha kryesuesi Osmani i cili pohoi se i del në mbrojtje deputetes.
Përgjigjen ndaj kësaj pyetje e dha kreu i AKK-së Hasan Preteni duke thënë se janë vetë deputetët dhe Kuvendi që e kanë bërë ligjin për deklarim të pasurisë dhe sipas tij duke u respektuar ky ligj është bërë edhe kallëzimi ndaj deputetes Balje.
E diskutimi mes kryesuesit të komisionit Naser Osmani dhe kreut të AKK-së, Hasan Preteni vazhdoi edhe më tutje dhe në një rast, Osmani pati një përgjigje interesante të cilën e dha duke buzëqeshur.
“Na nuk kemi qef fort që Duden me na u ngucë”, u shpreh Naser Osmani.
E në mbrojtje të deputetëve të prekur nga mosdeklarimi i drtejtë i pasurisë doli edhe edhe Besa Gaxherri.
Ajo u ankua në formularët e AKK-së për deklarim të pasurisë duke treguar se edhe ajo ka qenë “viktimë” e mbushjes së këtyre formularëve.
Në mënyrë alegorike, ajo tha se pavarësisht pafajësisë, deputetët që kanë kaluar nëpër procese gjyqësore të inicuara nga AKK do të mbesin të etiketuar.
“Krejt është në rregull të të lirojë gjykata, por puplat nuk kthehen më në jastëk”, tha Gaxherri.
Deputetja Duda Bajle, të mërkurën është liruar nga akuzat për mos raportim, ose raportim të rremë të pasurisë, të ardhurave, dhuratave, dobisë tjetër materiale ose detyrimeve financiar. Ajo është liruar nga akuza në mungesë të provave që të vërtetojnë se ajo ka kryer veprën penale me dashje.
Ndërsa Hasan Preteni, gjatë ditës, ka thënë se nuk është i befasuar që deputetja është shpallur e pafajshme ndaj akuzave të ngritura./Kallxo.com/
Thaçi kërkon përfaqësim diplomatik në Vatikan
Në vazhdim të qëndrimit në Selinë e Shenjtë në Vatikan zëvendëskryeministri Thaçi ka takuar sot sekretarin për Marrëdhënie me shtete në Vatikan, Monsinjor Paul Gallagher.
Sipas njoftimit për medie nga MPJ, zëvendëskryeministri Thaçi ka thënë se e çmon përkrahjen e Selisë së Shenjtë për Kosovën në ndërtimin e një shoqërie mbi vlerat e tolerancës dhe bashkëpunimit. “Pavarësia e Kosovës ka sjellë paqe e stabilitet në rajon. Kemi marrëdhënie të mira me fqinj dhe me Serbinë kemi nisur normalizimin e marrëdhënieve, një dialog ky për pajtimin mes dy popujve, si dhe kemi instaluar mekanizma që garantojnë të drejtat e komuniteteve jo-shumicë”, i ka thënë Thaçi sekretarit Gallagher.
Me sekretarin për Marrëdhënie me Shtete në Selinë e Shenjtë të Vatikanit, zëvendëskryeministri Thaçi ka folur edhe për instalimin e instrumenteve për mbrojtjen e trashëgimisë historike, kulturore e fetare të të gjitha komuniteteve. “Kemi Këshillin për Implementim dhe Monitorim që mbikëqyr mbrojtjen e kësaj trashëgimie të rëndësishme për Kosovën, por edhe tërë botën. Jemi duke përgatitur aplikimin për anëtarësim në UNESCO, që pritet të ndodhë në javët në vijim dhe kjo do të na ofrojë edhe një ombrellë tjetër për të ruajtur trashëgiminë fetare, historike e kulturore”, citohet të ketë thënë Thaçi.
Zëvendëskryeministri i Kosovës, Hashim Thaçi, për t’i thelluar marrëdhëniet me Selinë e Shenjë në Vatikan, ka shprehur gatishmërinë edhe për emërimin e një përfaqësuesi të Kosovës në Vatikan.
AGK e shqetësuar për përkeqësimin e lirisë së medias
Asociacioni i Gazetarëve të Kosovës mirëpret vlerësimin e fundit të organizatës “Freedom House”, dhe shprehë shqetësim për përkeqësimin e lirisë së medias në Kosovë.
“Kosova vazhdon të radhitet në mesin e vendeve pjesërisht të lira dhe këtë vit zë vendin e 100-të, që është për dy pozita më keq se një vit më parë”, thuhet në komunikatë të AGK-së.
“Kjo situatë shpërfaqë gjendjen e rëndë dhe kushtet e pafavorshme për ushtrimin e lirë të profesionit të gazetarisë në Kosovë. Ndërkaq, kërcënimet dhe dhuna ndaj gzetarëve në rritje kërkon vëmendje të posaçme nga organet e rendit për gazetarët”.
“Të vetëdijshëm se liria e shprehjes dhe e medies është një prej vlerave më të rëndësishme të një shoqërie demokratike, AGK u bënë thirrje insitucioneve të vendit që të kenë prioritet lirinë e shtypit dhe punën e gazetarëve dhe të marrin masa për krijimin e një ambienti të sigurtë për gazetarët”.
“AGK mbetet e përkushtuar në mbrojtjen e të drejtave dhe lirive të gazetarëve dhe iu bën thirrje gazetarëve që të vazhdojnë ta ngrenë zërin për problemet që hasin gjatë punës së tyre”. /PrizrenPress.com/
Vataj viziton Universitetin Bujqësor të Tiranës
Rektori i Universitetit “Ukshin Hoti” në Prizren, Prof. Dr. Rame Vataj i shoqëruar nga zv/kryesuesi i Këshillit Drejtues, Dr. Sc. Bekim Gashi dhe bashkëpunëtorë të tjerë, të mërkurën ka vizituar Universitetin Bujqësor të Tiranës, ku është takuar me rektorin e këtij Universiteti, Prof. Dr. Fatos Hajrizaj, Dekanin e Fakultetit të Ekonomisë dhe Agrobiznesit, Prof. Dr. Bahri Musabeliu dhe me dekanin e Fakultetit të Bioteknologjisë dhe Ushqimit, Prof. Dr. Renata Kongoli.
“Në takim është diskutuar për konkretizimin e marrëveshjes së bashkëpunimit që është nënshkruar kohë më parë në mes të këtyre dy Universiteteve, në hartimin e programeve të reja, shkëmbimin e stafit dhe të studentëve në fushat e veçanta, sidomos me fakultetet e sipër cekura”, njofton Zyra për Informim e UPZ-së.
Universiteti Bujqësor i Tiranës, është qendra e vetme në Shqipëri e formimit universitar, pasuniversitar, kërkimit shkencor, trajnimit dhe e ekstensionit në fushën e bujqësisë dhe ushqimit (Agronomi, Hortikulturë e Mbrojtje Bimesh, Ekonomi dhe Politikë Agrare, Agromjedis dhe Ekologji, Teknologji Agroushqimore, Zootekni dhe Biznes Blegtoral, Akuakulture dhe Menaxhim Peshkimi, Inxhinieri Pyjore, Përpunimi i Drurit dhe Mjekësi Veterinare etj.) I krijuar më 1 nëntor 1951 si Institut i Lartë Bujqësor (ILB), me statusin e një Universiteti, me 1991 u emërtua Universiteti Bujqësor i Tiranës (UBT). /PrizrenPress.com/
Hasan Preteni nuk çuditet me vendimin e gjykatës për Duda Baljen
Vendimi i Gjykatës Themelore në Prizren me të cilin deputetja e Kuvendit të Kosovës, Duda Balje, u shpall e pafajshme në akuzat për mos raportim, ose raportim të rremë të pasurisë, ose detyrimeve financiare, nuk e ka habitur kreun e Agjencisë Kundër Korrupsionit, Hasan Preteni.
Rasti i Baljes ka përfunduar në gjykatë pasi që AKK e udhëhequr nga Preteni ka vërejtur mospërputhje mes parave që deputetja boshnjake ka marrë dhe atyre që i ka raportuar në pasqyrat vjetore të të ardhurave.
Por Preteni tha sot për KALLXO.com se nuk pret që gjyqtarët dhe prokurorët e Kosovës të dënojnë ndonjë zyrtar për deklarim të rrejshëm të pasurisë apo mosdeklarim të saj.
“Unë mendoj se ose iluzore është të kërkojmë dhe të presim sot në Kosovë që një gjyqtar ta dënojë dikë për mosdeklarim të pasurisë ose deklarim të rrejshëm sepse nuk janë duke i dënuar as për korrupsion. Nuk do të jem avokat i tyre por them se ata nuk janë duke e bërë punën e vet”, tha Preteni.
Kreu i AKK-së tregoi se janë vetëm 12 raste të zyrtarëve publikë që gjykata ka shpallur dënim me gjobë nga 200 deri në 1 mijë euro si dhe burg me kusht.
Preteni tha se Agjencia që ai drejton nuk do të bëjë ankesë kundër vendimit të Gjykatës Themelore në Prizren për rastin e deputetët Duda Balje.
“Nuk do të ushtrojmë ankesë sepse kjo çështje është totalisht jo serioze dhe diferenca është bërë publike. Zyrtarët e AKK-së kanë qenë në prokurori, edhe në gjykim dhe i kemi dhënë argumentet tona”, tha Preteni./Kallxo.com/
Rona Nishliu këndon këngët e reja më 1 maj në Tiranë
Këngëtarja e mirënjohur Rona Nishliu, do të interpretojë këngë nga albumi i saj i papublikuar, “Me motive tona”, më 1 maj në parkun e Kryeministrisë së Shqipërisë në Tiranë.
“Ylli i Rona Nishliut do të shkelqejë në natën e 1 majit në parkun e Kryeministrisë ku do të këndojë albumin e ri”, ka shkruar Rama në llogarinë e tij në rrjetin social Facebook.
Ditë më herët, Nishliu mbajti një koncert në Prishtinë me ç’rast interpretoi disa nga këngët e reja të albumit të saj.
“Me motive tonat” fillimisht u paralajmërua në kuadër të një publikimi që falënderonte kryeministrin Edi Rama për mbështetje, meqë albumi i tërë do të interpretohet në Tiranë, në një koncert në lulishten e kryeministrit shqiptar.
Albumi është një tërësi e zhanreve free jazz, trip hop dhe soul, të kombinuara me motive shqiptare. Përpos zërit tejet të vlerësuar të artistes kosovare, bendi interpretues përbëhet nga Nesim Maxhuni, Kiril Tufekcievski dhe Edon Ramadani.
Albumi njëherit është pjesë e kalendarit të përbashkët kulturor mes Kosovës dhe Shqipërisë për vitin 2015.
Lahutari 105 vjeç, Gjok Nonaj në Festivalin e Gjirokastrës
Festivali i Gjirokastrës që do të prezantohet në mes të datave 10 e 16 maj do të ketë edhe dy specifika tejet të veçanta.
Sipas, faqes zyrtare të këtij festivali mësohet se në këtë edicion do të prezantohet lahutari më i moshuar, Gjok Nonaj, i cili është 105 vjec, ku në këtë festival do të interpretojë këngën epike “Fuqia e Mujit”.
Pos kësaj, në këtë edicion do të prezantohet edhe lahutarja e vetme femër në festival, Lumturi Nonaj.
Suharekë: Arsimtari rrah nxënësen me grushta dhe shqelma
Trembëdhjetëvjeçarja, nxënëse e klasës së shtatë në Shkollën “Dëshmorët e Kombit” të fshatit Vraniq është rrahur me grushte e shqelma nga arsimtari i saj i historisë Eqrem Buzhala, por këtij mësimdhënësi Drejtoria e Arsimit në Suharekë vetëm ia ka ndërruar vendin e punës.
Nxënësja tregon se si më 24 mars arsimtari ushtroi dhunë fizike ndaj saj në prani të nxënësve tjerë në klasë.
“Mësuesi na ka pru provimet, unë nuk kam qenë e kënaqur me vlerësimin dhe kam kërkuar që të më vlerësojë drejt, pasi kam punuar mirë dhe në këtë moment ka filluar të më ofendojë me fjalë fyese, se ik në vend se t’i nxjerri sytë,” shpjegon e përlotur nxënësja teksa e përlotur përshkruan ditën që ishte rrahur nga arsimtari.
Ajo thotë se ia bëri me dije mësimdhënësit se si nxënëse ka disa të drejta, ndërsa kjo sipas saj e tërboi arsimtarin.
“Pasi që më ofendoi arsimtari, unë i thashë që edhe unë kam të drejta dhe pas kësaj veç kur më ka goditur me shuplaka, grushte dhe për flokë më ka rrëzuar në dysheme, duke më goditur me shkelma në prani të të gjithë nxënësve tjerë të klasës,” thotë nxënësja.
Ajo rrëfen se ka marrë goditje të forta nga arsimtari i historisë.
“Më ka rrahur deri sa jam urinuar, ndërsa kanë ndërhyrë nxënësit tjerë për ta larguar nga unë,” thotë nxënësja.
Por edhe pse kjo dhunë ndodhi më 24 mars, mësuesi sulmues vazhdoi edhe për një javë të japë mësim në këtë shkollë, thuajse nuk kishte ndodhur asgjë, ndërsa nxënësja gjatë kësaj jave mungoi nga frika prej mësimdhënësit.
Nëna e nxënëses së rrahur tregon se shkolla dhe Drejtoria e Arsimit i kërkuan të mos e lajmërojë rastin.
“Atë ditë kanë kërkuar nga unë, si nga shkolla, po ashtu edhe nga Drejtoria e Arsimit që ta heshti rastin pasi mësuesi është para pensionimit, por unë e kam rritur vajzën jetim pa babë dhe nuk mundem me fshehë një skandal të tillë,” tha nëna e nxënëses.
Por drejtoresha e shkollës “Dëshmorët e Kombit” Irmete Basha mohon se rasti i dhunës së arsimtarit ndaj nxënëses u tentua të heshtej.
“Është e vërtetë që mësuesi Eqrem Buzhala e ka rrahur nxënësen dhe menjëherë e kam lajmëruar drejtorin e Arsimit për këtë rast, pasi nxënësja ka qenë në gjendje të keqe psikologjike,” thotë drejtoresha Basha.
Komisioni Disiplinor i Drejtorisë së Arsimit në Suharekë një muaj pas kësaj dhune, pas intervistimit të të gjitha palëve mori vendim që arsimtarit Buzhala t’ia ndërroj vendin e punës.
Drejtori i Arsimit në Komunën e Suharekës Sherif Berisha thotë se kjo komunë reagoi me kohë.
“Është e vërtetë që mësuesi ka ushtruar dhunë ndaj nxënëses dhe ne menjëherë e kemi dërguar në komision disiplinor, duke e marrë masën e ndërrimit të vendit të punës,” thotë drejtori i Arsimit që e arsyeton këtë masë me faktin se mësimdhënësi është para pensionimit.
Arsimtari Eqrem Buzhala për KALLXO.com pranon se rrahu nxënësen, por thotë se nuk e ka sulmuar deri në atë masë, por vetëm ia ka dhënë dy shuplaka.
Sipas Buzhalës kjo punë është bërë e madhe më shumë nga disa fshatarë që dëshirojnë ta largojnë nga shkolla e fshatit, sesa nga familja e vajzës.
Buzhala tregon se është marrë vesh me nënën e nxënëses.
Por kjo nënë nuk është e kënaqur me ndëshkimin që mori mësimdhënësi, pasi sipas saj Buzhala më nuk e ka vendin në asnjë shkollë.
Rasti i dhunës është paraqitur në polici tri ditë pasi ndodhi dhe me urdhër të prokurorit arsimtari është intervistuar.
Edhe disa nxënës të tjerë arsimtarin e historisë Eqrem Buzhala e përshkruan si të dhunshëm dhe agresiv, duke treguar se edhe më parë ka rrahur nxënës, por asnjëherë deri në atë masë si më 24 mars.
Për shkak të ndjeshmërisë së rastit nuk janë përmendur në artikull emrat e vajzës që u rrah nga arsimtari dhe nënës së saj. /Kallxo.com/
Haradinaj demanton Blerim Shalën: S’ka qenë i autorizuar të flasë në emër të AAK-së
Kryetari i Aleancës për Ardhmërinë e Kosovës, Ramush Haradinaj, theksoi të mërkurën se që nga dita e krijimit të koalicionit LAN, e pastaj VLAN, e deri në takimin e fundit të këtij koalicioni, asnjë zyrtar i Aleancës nuk ka pasur asnjë autorizim të komunikojë, negociojë apo të diskutojë çështjen e mundësisë së koalicionit me PDK-në me asnjë zyrtar të PDK-së apo të tjerë.
Deklarata e plotë e Haradinaj në Facebook:
Për hir të informimit të drejtë të qytetarëve të Kosovës, strukturave dhe anëtarësisë së AAK-së, deklaroj se që nga dita e krijimit të koalicionit LAN, e pastaj VLAN, e deri në takimin e fundit të këtij koalicioni, asnjë zyrtar i Aleancës nuk ka pasur asnjë autorizim të komunikojë, negociojë apo të diskutojë çështjen e mundësisë së koalicionit me PDK-në me asnjë zyrtar të PDK-së apo të tjerë.
Asnjë autorizim nga unë apo Kryesia e AAK-së nuk ka pasur as z. Blerim Shala, që në atë kohë ishte nënkryetar i AAK-së.
Si kryetar i AAK-së, përveç që nuk e kam autorizuar askënd, unë nuk kam qenë as në dijeni që takime të karakterit të tillë të kenë ndodhur. Jam në dijeni vetëm për kontakte të z. Shala me PDK-në, pas prishjes së koalicionit VLAN, por në asnjë mënyrë gjatë koalicionit VLAN.