Niveli lokal dhe ai qendror të shtetit ende nuk kanë realizuar kërkesat e Sindikatës së Bashkuar të Arsimit, Shkencës dhe Kulturës (SBASHK) për të drejtat e mësimdhënësve. Këto kërkesa, që lidhen me kompensimin, janë bllokuar nga institucionet në mungesë të buxhetit, si dhe legjislacionit të papërshtatshëm.
Kryetari i SBASHK-ut, Rrahman Jasharaj, ka thënë se nëpër komuna kërkesa që ka nisur të trajtohet është ajo e tri pagave para pensionimit që duhet t’iu kompensohen mësimdhënësve me rastin e pensionimit, si dhe pagesa për udhëtimin.
Mirëpo edhe kjo kërkesë, sipas tij, nuk po zbatohet në praktikë. “Në disa komuna ka lëvizje teorike, por jo dhe praktike që të zbatohet kërkesa për tri paga të pensionimit dhe ajo për pagesën e udhëtimit”, tha ai.
Këto dy kërkesa që duhet të përmbushen nga niveli lokal i shtetit, sipas Jasharajt, nuk po realizohen për shkak se nuk është bërë planifikimi buxhetor dhe se premtimi i komunave është se do të planifikohen në Buxhetin e vitit 2016. Ndërsa, shqetësuese për SBASHK-un mbetet kërkesa tjetër, e cila i është drejtuar nivelit qendror të shtetit për rregullimin e pagesës së pensionit.
Një mësimdhënës pensionist tash gëzon pagë prej 75 eurove. Por kjo pagë, sipas SBASHK-ut, duhet të jetë 140 euro dhe mësimdhënësi të llogaritet me këtë rast kontributdhënës. Sipas SBASHK-ut, progresi mund të llogaritet tek Ligji për Benefitet e Periudhës 1990/99, i cili ka shkuar në Qeveri. Madje për këtë ligj, Jasharaj thotë se Ministria e Financave po shqyrton edhe koston pasi që përmes këtij ligji parashihet edhe rregullimi i pagës së pensionit. /Zëri