Lufta e Tretë Botërore, doni ta besoni apo jo, ka nisur tashmë. Ajo po përshpejtohet dhe Europa është teatri i saj. Kontinenti i Vjetër, siç na quajnë, është bërë edhe një herë vendi më i rrezikshëm në Perëndim. Duhet të jemi gati për çdo gjë.

Mes tmerrit, gjakut, ankthit që ka mbërthyer tashmë Parisin, një vendim të lëndon shpirtin, si një rrëfim i brishtë, patetik, emocional i pafuqisë: kufijtë e Francës janë mbyllur.

Një gjest i vogël policor që pezullon shekuj të tërë pushtimesh nga liria më e madhe e lëvizjes në kohët moderne, e shpërndarë nëpër botë nga vetë Franca, nga Franca e të drejtave të individit: e drejta për të lëvizur lirisht nëpër botë. Një gjest i vogël policor, të ngjashmit e të cilit janë zbatuar në Europë vetëm gjatë luftërave botërore.

I reduktuar në thelbin e tij, përtej dhunës dhe frikës, akti më i fundit i terrorizmit që ka goditur Parisin, mund të rrëfehet, në esencë, përmes këtij gjesti të vogël.

Ne të gjithë mund të mbyllim dyert, të fshihemi në shtëpitë tona, mund të bëjmë më të mirën për të kontrolluar territorin tonë, me qëllim që të identifikojmë dhe godasim ata që na sulmojnë; por ata që na sulmojnë janë tashmë këtu. Ata janë burra dhe gra me pasaporta të ligjshme në vendin tonë, burra dhe gra që janë rritur këtu, apo që kanë hyrë duke u futur mes mijëra viktimave, imigrantë që largohen prej dhunës që ka mbështjellë vendlindjet e tyre. Këta burra dhe gra dinë gjithçka për Shengenin, për Europën, për zakonet tona, vendet që na pëlqen të shkojmë për pushime, baret, restorantet dhe kinematë, apo diskot ku kalojmë mbrëmjet dhe fundjavat. Dhe ata duken tamam si ne: vishen dhe veprojnë si ne.

Në këtë mënyrë, atyre as nuk u duhet të mbajnë maska. As nuk kanë nevojë të organizojnë sipërmarrje të mëdha, si sulmet kundër Kullave Binjake. Gjithë sa u nevojitet, është që t’u jepet apo të blejnë një automatik, më pas të dalin në rrugë dhe t’i marrin jetën dikujt që po pi kafe. Gjithë sa u nevojitet është një mik në aeroport. Apo pak eksploziv, për t’u hedhur në erë, në vendin me më shumë njerëz që mund të gjejnë.

Kjo është marka më e fundit e terrorizmit, ku ka evoluar ISIS. Këta nuk janë më ujq të vetmuar, por nuk janë as organizata të mëdha. Janë grupe të vegjël, me organizime të vegjël e të thjeshtë, të vendosur për të vrarë sa më shumë njerëz që të munden dhe të vdesin duke bërë këtë – thjeshtë duke u shfaqur, kudo ku mund të gjejnë numrin më të lartë të viktimave.

Lloji i operacionit që pamë në Paris është i njëjti që kemi parë prej muajsh. E kemi parë në mënyrë të përsëritur, të njëjtin kombinim. Të rinj me automatikë, me fytyrat të pambuluara, që dalin dhe vrasin këdo që u del përpara në trotuarët e Parisit, janë të njëjtët që pamë në plazhin e Egjiptit, që qëllonin kundër turistëve me rroba banje, apo kundër turistëve në Muzeun Kombëtar Bardo në Tunizi. Eksplozivë të thjeshtë, të vendosur nga duar të panjohura në një avion rus që shpërtheu mbi Sinai, janë të njëjtët eksplozivë që kamikazët kishin në trupin e tyre, teksa i afroheshin stadiumit të Parisit. Grupe të vegjël, hapa të shpejtë, të vdekur që përpara se të fillojnë të qëllojnë, pikërisht si ata që sulmuan Charlie Hebdo.

Eshtë një evoluim i jashtëzakonshëm i terrorizmit, krahasuar me operacionet masivë që ëndërronte Osama bin Ladeni.

Evolucione tejet të rrezikshëm, sepse në fund të ditës, Osama mendonte dhe planifikonte si një takticien ushtarak, e si pasojë ishte i identifikueshëm dhe i luftueshëm. Ky lloj i ri terrorizmi është thjeshtë një rrjedhë masive pa një definicion fizik, një lumë nëntokësor që shfaqet dhe zhduket sepse është tashmë brenda shoqërisë sonë, ashtu si edhe jashtë saj, pa kufi, pa strukturë, pa edhe dëshirën më themelore për të jetuar dhe riprodhuar.

Eshtë forma më e rrezikshme e organizimit që kemi ndeshur deri sot. Dhe është një fenomen pothuajse i gjithi europian: sepse rrënjët e tij janë këtu; ka studiuar këtu, në shkolla europiane; dhe sepse në fund, pikërisht këtu, terrorizmi do e shkarkojë urrejtjen e tij. Lufta e Tretë Botërore, doni ta besoni apo jo, ka nisur tashmë. Ajo po përshpejtohet dhe Europa është teatri i saj. Kontinenti i Vjetër, siç na quajnë, është bërë edhe një herë vendi më i rrezikshëm në Perëndim, transmeton bota.al. Duhet të jemi gati për çdo gjë.

Masat e Shqipërisë për të parandaluar apo përballuar sulme terroriste si ai në Francë, janë pothuajse inekzistente. Ndonëse me dhjetëra shqiptarë janë bërë pjesë e Shtetit Islamik dhe ka pasur disa kërcënime për sulme ndaj vendit tonë, sipas ekspertëve, sërish masat janë minimale.

I pyetur, Arjan Dyrmishi, ekspert i lartë i çështjeve të sigurisë, pranë Institutit për Demokraci dhe Ndërmjetësim, ka deklaruar se xhihadistët e Shteti Islamik e kanë shumë të lehtë të kryejnë sulme në vendin tonë, por tha gjithashtu se ata nuk kanë asnjë interes të kryejnë akte të tilla në Shqipëri. Dyrmishi u shpreh se përveç masave të ulta parandaluese, nuk ka dhe kapacitete për të përballuar një rast sulmi ku mund të ketë viktima dhe të plagosur. “Ne jemi objektiv i butë, ata mund të bëjnë çfarë të duan. Sa i përket masave tona, nuk ka asnjë plan. Mund të jap shembullin e spitaleve. Vende të tjera kur ndodh një gjë e tillë kanë një plan që i transformojnë spitalet në spitale me kapacitet lufte. Nëse ndodh një kasaphanë e tillë këtu, me qindra të plagosur, a mund të merren masa të tilla? Nuk ka asnjë masë sistemi shëndetësor që të shndërrohet në kapacitete të tilla. Pra rreziku si teori është, praktik nuk është sepse nuk kanë leverdi. Masat tona janë pothuajse inekzistente”, deklaroi Dyrmishi.

I pyetur mbi kërcënimin që ju bë dje ministrit të Brendshëm, Saimir Tahiri, nga përfaqësues të ekstremistëve, ai deklaroi se të tilla kërcënime janë boshe dhe pa rrezik, pasi në vende të ndryshme të Evropës sulmet terroriste janë bërë pa paralajmërime. Dyrmishi tha se kërcënime të tilla ka pasur për shumë liderë botërorë, por që ata nuk janë ndjerë të rrezikuar. Rreziku për Shqipërinë Eksperti i çështjeve të sigurisë, pranë Institutit për Demokraci dhe Ndërmjetësim, Arjan Dyrmishi, ka deklaruar dje për gazetën se nuk ka asnjë kërcënim real terrorist për Shqipërinë.

Eksperti u shpreh se xhihadistët e ISIS synojnë të godasin në shtete të mëdha me qëllim rritjen e famës së tyre, ndërsa në Shqipëri nuk e arrijnë dot këtë gjë. Megjithatë ai u shpreh se nga ana teorike, si çdo vend tjetër në Evropë dhe më gjerë edhe Shqipëria mund të jetë e kërcënuar, por nga ana praktike një gjë e tillë është e largët. “Si shumë vende të tjera edhe Shqipëria mund të quhet e rrezikuar. Por ata kur i kryejnë të tilla veprime, i bëjnë për t’u dukur. Nëse sulmohet Shqipëria nuk përbën ndonjë impakt të madh. Ata të gjitha këto veprime i bëjnë për qëllime politike, i bëjnë për qëllime që t’i rrisin pjacën vetes dhe të inspirojnë rekrutimet. Që ata që janë kandidatë të thonë shiko sa të zotët janë këta. Në këtë aspekt, ne nuk kërcënohemi për këto rrethana. Nga ana praktike, Shqipëri nuk përbën leverdi për ta”, u shpreh Dyrmishi.

I pyetur nga gazeta ‘Sot’ dhe për masat që mund të ndërmarrë Shërbimi Informativ, ai deklaroi se pavarësisht rolit të tij, depërtimi i ekstremistëve në Shqipëri është i lehtë. Pas sulmit të së premtes në Paris ku u vranë rreth 130 persona, pjesëtarët e ISIS kanë kërcënuar se do të ketë sulme të ngjashme dhe në vende të tjera të Evropës. Pak kohë më parë, përmes një video mesazhi, disa xhihadistë shqiptarë që luftojnë në Siri, deklaruan se pjesë e sulmeve mund të jetë edhe Shqipëria. Ndërkohë dje strukturat e shtetit nisën përgatitjet për marrjen e masave.