Prokurorët e misionit të Bashkimit Evropian për sundimin e ligjit EULEX nuk e kanë respektuar mandatin e ri të cilin e kanë tash e një vit. Që nga data 15 prill e vitit të kaluar, ata nuk kanë pasur të drejtë që të fillojnë asnjë hetim, ndërsa i kanë ndërmarrë 42 aktvendime për fillimin e hetimeve. Tërë këto vendime, prokurorët e misionit evropian i kanë ndërmarrë brenda dy javëve, që nga data 15 prill deri më 30 prill të vitit të kaluar, shkruan Zëri.

Për këto aktvendime të marra në duar të EULEX-it është konfirmuar zyrtarisht nga zëdhënësja e EULEX-it në Kosovë, Dragana Nikoliq Solomon. Por ajo nuk është përgjigjur nëse këto vendime edhe për vetë misionin konsiderohen të paligjshme.

Kryeministri i Kosovës, Isa Mustafa në Ditën Kombëtare të Pagjeturve, tha se për familjarët, por edhe për Kosovën, janë shumë vite të ditëve të ankthit dhe të pritjes për më të dashurit e tyre.

Në një postim në rrjetin social Facebook, kryeministri Mustafa thotë se “Serbia duhet të jap përgjigje për zhdukjen e njerëzve tanë, për krimet monstruoze që forcat ushtarake e paramilitare të saj i kryen në Kosovë’.

Ata që bënë krime, sipas Mustafës, duhet të dalin para drejtësisë.

“Qeveria e Republikës së Kosovës do të shfrytëzojë të gjitha institucionet ndërkombëtare për të kërkuar zbardhjen e të pagjeturve, kthimin e tyre dhe dorën e drejtësisë ndaj kriminelëve”, shprehet Mustafa.

Ditën kur do të duhej të paraqitej si i pandehur në Prokurorinë Speciale, kryetari i Gjykatës Kushtetuese, Enver Hasani ka udhëtuar në Turqi, në një vizitë zyrtare.

Hasani hetohet për dy vepra penale: keqpërdorim të detyrës zyrtare dhe falsifikim, shkruan Zëri.

Për lëndën e parë, Hasani është ftuar nga Prokuroria Speciale, që të paraqitet të hënën (sot), si i pandehur, mirëpo, ai ka shpërfillur Gjykatën, duke udhëtuar drejt Turqisë.

Prokurorja Drita Hajdari, e cila merret me rastin e Hasanit, nuk është përgjigjur të dielën në telefon. /Zëri/

Deputetja e Partisë Demokratike të Kosovës, Ganimete Musliu ka kërkuar nga deputetët serbë, që Serbia edhe de jure ta njohë pavarësinë e Kosovës.

“Kërkova nga deputetët serbë mos t’i mashtrojnë qytetarët e tyre, por t’u tregojnë atyre që Kosova është shtet”, ka thënë Musliu për ‘Epokën e re’.

Ajo ka bërë me dije se në muajin qershor një delegacion i Kuvendit të Serbisë pritet ta vizitojë Kosovën.

Ndërsa, duke folur për veshjen e saj kuq e zi dhe bartjen e simbolit të Republikës së Kosovës në Beograd, Musliu ka thënë se ka pasur dy simbolika: e para, se është shqiptare, dhe e dyta, sipas saj, për t’i treguar Serbisë se përfaqëson shtetin e Kosovës.