Me një shqiptar të Kosovës që luan Romeon dhe një serbe që luan Zhulietën, kjo kryevepër klasike e Shekspirit, e vënë në skenë nga regjisori Pedrag Miki Manojloviç, ka për qëllim të sjellë më pranë Beogradin dhe Prishtinën.
Vënia në skenë e Manojloviçit e “Romeos dhe Zhulietës” do të shfaqet për herë të dytë në Beograd në Teatrin Kombëtar të Beogradit nga 13-15 nëntor dhe regjisori beson se kjo vepër tashmë e ka bërë një ndryshim.
“Jam i sigurt se do të ndërtojmë një urë midis jush në Beograd që patë veprën dhe e pëlqyet dhe dikujt në Prishin që gjithashtu e pa dhe e pëlqeu,” tha për BIRN Manojloviç, i cili është gjithashtu një aktor i njohur serb.
Në shfaqje luajnë edhe aktorë shqiptarë të Kosovës që luajnë Romeon dhe Montagin dhe aktorë serbë që luajnë Zhulietën dhe kapuletët.
Ajo performohet në gjuhën serbe dhe shqiptare, me disa pjesë të shkurtra në anglisht, por pa përkthim.
Kjo është për të treguar se aktorët dhe anëtarët e të dy komuniteteve “mund ta kuptojnë shumë mirë njëri-tjetrin” pavarësisht pengesave gjuhësore, shpjegoi Manojloviç.
Një prodhim i përbashkët nga “Radionica Integracije” me bazë në Beograd dhe “Qendra Multimedia” e Prishtinës, e pati premierën e saj në teatrot kombëtarë serbe dhe kosovare respektivisht në prill dhe maj.
Ishte gjithashtu e rëndësishme se aktorë të mirënjohur nga të dy komunitetet punuan bashkë, u shpreh Manojloviç.
“Nuk e mbaj mend herën e fundit që gjuha shqipe u dëgjua në skenën e teatrove më të mëdhenj në Beograd,” vëzhgoi ai.
16 vjet pas luftës, marrëdhëniet midis dy vendeve mbeten ende të trazuara, me Beogradin që refuzon të pranojë pavarësinë e Prishtinës, të shpallur në vitin 2008.
Por ka pasur një sërë përpjekjesh për të rivendosur urat kulturore midis Kosovës dhe Serbisë.
Një prej tyre është e përvitshmja “Mirdita, Dobar Dan” (që do të thotë “mirëdita në gjuhën shqipe dhe serbe) e cila sjell filma shqiptarë të Kosovës, ekspozita dhe koncerte në Beograd.
Megjithatë, Manojloviç e pranoi se ai ishte paksa në ankth për mënyrën se si do të shkonte premiera në Beograd dhe Prishtinë.
Ai tha se kishte frikë se grupe të krahut të djathtë mund të përpiqeshin të organizonin trazira, por në fund gjithçka shkoi mirë.
I vetmi incident i vogël ka ndodhur para teatrit të Prishtinës, ku dikush vendosi një banderolë ku shkruhej se aktorët serb nuk ishin të mirëpritur atje, por e cila u hoq menjëherë pak më vonë.
“Ka njerëz që ndërtojnë vazhdimisht ura, e bëjnë vërtet këtë gjë. Më pas vjen një idiot, shpërthen lufta dhe ata shkatërrojnë gjithçka,” tha Manojloviç.
Por vepra ia doli mbanë të bashkonte dy komunitetet, edhe pse për pak kohë, këmbënguli ai.
“Mendimi im është se për se një orë e 52 minuta, që është edhe kohëzgjatja e veprës deri te duartrokitjet, ajo shuan definitivish kufijtë. Atë që ndodh pas shfaqjes, nuk e di,” tha ai.
Në muajt e ardhshëm, “Romeo dhe Zhulieta” e Manojloviçit do të shfaqet gjithashtu në teatrot në Prishtinë, Sarajevë, Tiranë dhe Zagreb.
“Ajo do të vihet gjithashtu në skenë në Kosovë ku jetojnë serbë, por gjithashtu në vende ku nuk ka serbë,” shtoi regjisori.
Është duke u realizuar gjithashtu një dokumentar mbi procesin e vënies në skenë të “Romeos dhe Zhulietës” me aktorë serbë dhe shqiptarë të Kosovës, i cili do t’u ofrohet kompanive televizive në të gjithë rajonin.
“Ne do ta realizojmë dhe do t’ia ofrojmë të gjithëve,” tha Manojloviç. “Kushdo që e pëlqen, do ta transmetojë. Ata që s’e pëlqejnë, s’kanë pse ta transmetojnë.” /BIRN