Deputetit të Vetëvendosjes, Albin Kurti, ka deklaruar se Opozita vazhdon të jetë e vendosur në qëndrimet e saj për anulimin e marrëveshjesve për Asociacionin dhe Demarkacionin.

Në një intervistë për Opinion.al, ai ka thënë se për të jetuar Republika e Kosovës – duhet të bjerë “Zajednica” ose Qeveria.

Kurti është shprehur se agjenda e tyre nuk është kundër integrimit, por nuk mund të pranojnë gjithçka dhe se ka vija të kuqe të cilat asnjë shtet nuk mund t’i shkelë.

Ai, po ashtu, ka thënë se të protestuarit nuk është virus ose sëmundje, por është shenjë e shëndetit dhe e jetës në një shoqëri.

“Të protestuarit është një nga mënyrat e të qenit europian. Të shtypurit e protestave është mënyrë e të qenit pjesë e ndonjë monarkie absolute”, ka thënë Kurti.

Intervista e plotë:

A mund te konsiderohet i mbyllur aksioni i opozitës në Kosovë?

Albin Kurti: Jo. Opozita vazhdon të jetë e vendosur në qëllimet e saj për të ndaluar marrëveshjet e dëmshme për ‘Zajednicën’ e Komunave Serbe dhe atë për demarkacionin e kufirit me Malin e Zi i cili ia fal atij 9.000 hektarë tokë të Kosovës. Nuk do ta ndalim aksionin opozitar deri në momentin kur kryeministri të vendosë të tërhiqet, e nëse jo, do ta detyrojmë ta sjellë ligjin për referendum në Kuvend ose ta çojë vendin në zgjedhje. Që të rrojë Republika ose duhet të bjerë ‘Zajednica’ ose Qeveria. Nuk mund të ketë vijim të rutinës institucionale, a thua se asgjë s’ka ndodhur, ndërkohë që Kosovës i cënohet integriteti i saj territorial dhe e ardhmja e saj si shtet sovran. Është dashur që Kuvendi të jep leje për kryeministrin e Kosovës Mustafa me 25 gusht që ai të bisedojë më kryeministrin e Serbisë Vuçiq psh. me 11 shtator 2015. E jo anasjelltas: Mustafa të bisedojë, negociojë e të merret vesh me Vuçiqin me 25 gusht, ndërsa neve të thotë se me 11 shtator do të vijë për informim në Kuvend! Në një shtet demokratik edhe mund të mjaftojë debati, por në një vend gjysëm autoritar si Kosova, qartazi nuk bën pa aksione simbolike e demonstrata popullore. Në fakt, në shtetet demokratike as nuk vie një situatë si kjo e Kosovës tani.

Çfarë kushtesh u plotësuan që tashmë seanca zhvillohet normalish?

Albin Kurti: Nuk u plotësua ndonjë kusht. Vendosëm si opozitë që të lejojmë zhvillimin e seancës ku u votua MSA-ja mes Kosovës dhe BE-së. Ne ishim shumë kritikë ndaj kësaj MSA-je, pasi është tepër e ndryshme nga MSA-të e vendeve të tjera dhe e bën integrimin e Kosovës në BE të varur nga Serbia. Avionit Prishtinë-Bruksel, MSA-ja ia bën një ‘connecting flight’ në Surçin të Beogradit! Megjithatë, vendosëm të mos e bllokojmë këtë seancë, për t’i dhënë një sinjal të forte partnerëve perëndimorë të Kosovës se ne, si opozitë, po ashtu jemi të përkushtuar për marrëdhënie të mira me ta dhe për forcim të shtetit e të institucioneve në Kosovë. Agjenda jonë nuk është agjendë kundër integrimit.
Por, nuk mund të pranojmë gjithçka, ka vija të kuqe të cilat asnjë shtet nuk mund t’i shkelë sepse dëmton vetveten. Ky është edhe rasti ynë.

Duket se virusi ‘veza’ preku dhe Shqipërinë. Është ky një frymëzim nga VV?

Albin Kurti: Të protestuarit nuk është virus apo sëmundje. Përkundrazi, është shenjë e shëndetit dhe e jetës në një shoqëri. Sipas meje shoqëritë ku nuk protestohet janë shoqëri të sëmura.

Të protestuarit me vezë apo gjëra të ngjashme fillimisht i kemi parë në televizione, nga vendet perëndimore. Edhe sot e kësaj dite ngjarje të tilla ndodhin në vendet të cilat i marrim shembull për demokracinë, qytetarinë dhe për zhvillimin e tyre. Kështu që, nuk është VETËVENDOSJE! ajo që shpik apo frymëzon, mendoj se shembuj protestash, me vezë apo edhe me gjëra të tjera, sidomos kohët e fundit, ka me shumicë në perëndim.

Sigurisht, nuk dua të them se protesta është gjithnjë e vetëjustifikueshme, apo që është një farë cirku demokratik. Protesta është mjet demokratik, por nuk është legjitime të protestosh për gjithçka e gjithnjë. Protesta legjitimohet vetëm atëherë kur pushteti nuk të dëgjon, nuk të përfshin, të përjashton dhe vendos për ty pa të marrë parasysh. Kjo psh. ka ndodhur në Kosovë, ku pushteti ka vendosur për këto dy marrëveshje kaq të dëmshme që prekin gjithë popullin e Kosovës, madje prekin edhe ata që ende s’kanë lindur, e megjithatë nuk e ka përfshirë në vendimmarrje as qytetarinë e gjerë, as opozitën parlamentare. Po flasim për kantonizim e federalizim sipas modelit të Bosnjës, e cila 20 vjet pas luftës vazhdon të jetë shtet i dështuar që pritet të pëlcasë. Një kantonizim e federalizim i tillë nuk mund të bëhet pa pyetur se ç’mendon populli. Normal që vendime të tilla despotike do të hasin në protesta, kjo do të kishte ndodhur kudo në botë dhe është tërësisht legjitime.

Ka pasur akuza që disa nga aktivistët që u përfshinë në hedhjen e vezëve në Tiranë ishin të VV…

Albin Kurti: E kemi sqaruar se nuk ka pasur asnjë aktivist të VETËVENDOSJE!-s pjesëmarrës në atë akt. Po ashtu e kanë sqaruar vetë protagonistët, që nuk kanë patur lidhje me VETËVENDOSJE!-n. Është e kotë të zgjatemi në sajesa e shpifje mediatike të nivelit të ulët, të cilat janë bërë me qëllimin e vetëm që të provokonin një mosmarrëveshje mes kryeministrit të Shqipërisë dhe VETËVENDOSJE!-s në mënyrë që pastaj të thoshin “ja, VETËVENDOSJE! ka probleme edhe me kryeministrin e Shqipërisë”. S’ke ç’komenton për lojëra të tilla, që as fëmijët nuk i luajnë më.

A mund të krijohet një epidemi ‘hedhjesh vezësh’ si përpjekje për të luftuar klasën politike në Shqipëri dhe Kosovë?

Albin Kurti: Edhe një herë, nuk më duket që ka ndonjë ‘epidemi’, madje nuk besoj se kjo është mënyra më e mirë për të etiketuar protestat. Ne shqiptarët jemi popull me kulturë përgjithësisht më konservatore, dhe si pasojë protestojmë shumë më pak se popujt e tjerë. Nëse sheh vetëm muajin e fundit, protestohet në Londër, në Lisbonë, në Athinë e Berlin. Në Shqipëri e Kosovë, po të gjykosh nga varfëria, nga mungesa e zhvillimit, nga mungesa e perspektivës, e po të krahasosh me Evropën, protestohet shumë pak. Kjo tregon se jemi shoqëri ende e paçliruar, e nënshtruar, madje e ndrydhur, e cila prodhon dhe fuqizon pushtete autoritare. Kjo gjë i pengon demokracitë tona. Ndoshta protestat mund të jenë një lloj kritike e ashpër për udhëheqjet politike në vendet tona, por mungesa e protestave është një luftë ndaj demokracisë.

Në Shqipëri grupimi që ndërmorri këtë aksion njihet për qëndrimin pranë ekstremit majtas. Ndodh kjo dhe në Kosovë?

Albin Kurti: Shpeshherë pushtetet autoritare përdorin etiketa e kategorizime ndaj kundërshtarëve për t’i përjashtuar ata e për të mos iu përgjigjur argumenteve të tyre. Të tilla etiketa shpesh janë ato të ekstremizmave të djathtë e të majtë e kështu me radhë. Mua nuk më pëlqejnë këto etiketime, dhe mendoj se një politikë mendjehapur është ajo që dëgjon argumentin e
tjetrit, dhe jo ajo që përpiqet të kategorizojë tjetrin për ta skualifikuar.

Në Kosovë nuk ka parti ekstremiste. Lëvizja VETËVENDOSJE! është një parti socialdemokrate, e qendrës së majtë. Ka njerëz dhe grupime jashtë VETËVENDOSJE!-s që janë më të majtë se ne dhe që na kritikojnë për centrizmin tonë, por nuk mendoj se ka ekstreme as midis tyre.

Kjo është edhe çështje e ideologjisë që i përket ai që kategorizon. Sigurisht, të kërkosh arsim të lartë publik edhe falas sot, për një neoliberal dogmatik, mund të duket ekstremizëm. Por në fakt është një kërkesë tipike socialdemokrate, kejnsiane apo neokejnsiane. Arsim të lartë publik falas sot ka edhe Gjermania, edhe vendet skandinave. Asnjëri prej këtyre vendeve nuk mund të quhet “ekstrem i majtë”, nëse duam të ruajmë një farë serioziteti në përdorimin e termave. Por për fanatikët e neoliberalizmit, ekstrem është gjithçka që nuk përkon me dogmën e tyre.

Është kjo një nga mënyrat e bashkëpunimit mes shqiptarëve mes dy kufijve?

Albin Kurti: Të protestuarit është një nga mënyrat e të qenit europian. Të shtypurit e protestave, frikësimi i protestuesve, sharja dhe ofendimi i tyre nëpër media, apo përqeshja e argumenteve të tyre janë më shumë mënyra të të qenit pjesë e ndonjë despotati apo monarkie absolute, nga ato që sot numërohen me gishta në gjithë botën, e që në Evropë nuk ka më të tilla.

Shqiptarët do të kenë një demokraci më të shëndetshme dhe një spektër më normal politik kur ta tejkalojnë tërësisht ndarjen. Në të gjitha aspektet e në të gjitha mënyrat.

Publikimi i raportit të Agjencisë së Statistikave të Kosovës, ku mes tjerash konstatohet se cila është mosha e femrave të virgjëra në Kosovë, ka nxitur debat të ashpër.

Vetë pyetësori, ku direkt kërkon nga vajzat që t’i përgjigjen pyetjes nëse janë apo jo të virgjëra, pa marrë parasysh qëllimin e anketës, është vlerësuar si “përdhunim i dinjitetit” të femrave dhe e papranueshme nga një institucion që s’ka të bëjë me hulumtime shkencore.

Ky publikim, i financuar nga UNICEF-i, ka konstatuar me përqindje se nga 15 deri në moshën 24-vjeçare gati qind për qind e femrave nuk kanë kryer asnjëherë marrëdhënie seksuale.

Këto statistika, që u nxorën nga pyetjet e drejtpërdrejta që u janë bërë të rinjve e të rejave kosovarë nëpërmjet një pyetësori, kanë ngjallur debat.

Ka sociologë të cilët mendojnë se të dhënat e tilla në çdo fushë që ka të bëjë me jetën sociale janë të mirëseardhura, por të tjerët kanë shprehur dyshimet rreth metodologjisë së anketimit dhe kanë konsideruar se studime apo anketa të tilla mund të kërkoheshin nga Instituti i Shëndetit Publik.

Por prapë vetëpyetja direkte e parashtruar në pyetësor se “a je apo jo e virgjër” ka nxitur reagim të ashpër.

Fuqishëm kundër mënyrës së pyetësorit është shprehur aktivistja për të Drejtat e Grave, Igballe Rugova.

Ajo ka thënë se pyetjet e tilla direkte cenojnë intimitetin dhe se nxjerrin të dhëna të pasakta. Rugova ka thënë se për këtë do të kërkojë sqarime shtesë nga UNICEF-i. /Zëri

Pas disa ditësh armëpushimi, ata priten të kthehen në pozicionet e tyre barrikadues këtë javë.

Të hënën (sot) pritet të mblidhet Kryesia e Kuvendit për të vendosur nëse të enjten apo të premten do të jetë seanca e radhës.

Por, opozita është e bindur se nuk do të ketë seancë. Të paktën ata kanë thënë se do të bëjnë gjithçka që të pamundësojnë një gjë të tillë.

Pozicionet e tyre për tërheqjen e nënshkrimeve në marrëveshjet për Asociacionin dhe Demarkacionin nuk kanë lëvizur.

Madje, këtë herë thuhet se ekziston edhe mundësia e eskalimit të situatës.

Këtë gjë opozitarët nuk përtojnë ta potencojnë sa herë që flasin rreth seancave të Kuvendit.

Zëdhënësi nga Lëvizja “Vetëvendosje”, Frashër Krasniqi, ka thënë se përpjekja e kryetarit të Kuvendit për të organizuar seancë të rregullt do të shkojë huq edhe këtë herë.

“Ne do të pengojmë çdo seancë parlamentare, të cilën do ta organizojë Qeveria e Kosovës. Nuk do të lejojmë që të mbahen seancat e rregullta parlamentare deri në tërheqjen e nënshkrimeve të marrëveshjeve të arritura në Bruksel, si të dëmshme për Kosovën”, ka thënë Krasniqi për gazetën “Zëri”.

Mehmet Çoçaj: Shumica e banorëve merren me zanatin e bukëpjekësit

Kryetari i fshatit shprehet se një mori kërkesash i ka paraqitur para organeve komunale dhe janë në pritje që ato të merren parasysh

Fshati Tpec aktualisht i ka 83 shtëpi dhe ajo që e brengos këtë fshat vazhdon të mbetet ende infrastruktura e papërfunduar. Kryetari i fshatit, Mehmet Çoçaj, u shpreh për gazetën se ankesat e fshatit i ka paraqitur para organeve komunale.

“Janë tri kërkesa primare. Ende nuk ka asnjë llambë të ndriçimit publik, e që shumë i duhet këtij fshati, sepse janë mbi 30 shtëpi që nuk kanë banorë të përhershëm dhe ndriçimi publik është mbrojte për këto shtëpi. Kanalizimi ka mbetur i përgjysmuar, sepse janë një numër i konsideruar i shtëpive të Tupecit që s’kanë mundur të kyçen në këtë kanalizim. Kurse kërkesa e tretë është se kemi disa rrugica që kanë mbetur pa u shtruar me kubëza. Kjo na krijon moskuptim ndër veti”, pohon ai.

Numër i vogël i nxënësve

Çoçaj shprehet për tradita të lashta të hasjanëve, edhe pse Tupeci gjeografikisht nuk i përket Hasit, por është i banuar me hasjanë. Ai shprehet se Tupeci gjeografikisht është këtej Drinit të Bardhë dhe i përket Përdrinisë. Sipas tij, fshati ka katër klasa të nxënësve në ciklin e ulët, për shkak të numrit të vogël në nxënësve këtu nga klasa e parë deri në të pestën janë klasë të kombinuara. Shton se pjesa tjetër shkon në shkollën e fshatit Gjonaj. “Tupecasit profesion të vetëm pothuajse e kanë zanatin e bukëpjekësit”, tregon Çoçaj, duke shtuar se me këtë mbiemër janë pothuajse 90 për qind e fshatarëve. Kryetari i fshatit thotë se problem e kanë edhe emërtimin e rrugëve, duke thënë se kanë dërguar./kosova sot/