Gjykata Themelore në Prizren ia ka caktuar 30 ditë paraburgim drejtorit të Arsimit, Nexhat Çoçaj. Ndërkaq, pesë zyrtarëve të tjerë iu është caktuar masa e arrestit shtëpiak.
Prokurori i shtetit Sefer Morina kishte kërkuar paraburgim edhe për pesë të arrestuarit e djeshëm bashkë me Çoçajn, por atyre gjyqtari Xheladin Osmani ua caktoi një masë më të butë sigurie.
Reshit Kushaj, Elbasan Shoshaj, Ferdi Kovaq, Ruzhdi Elezkurtaj dhe Almir Sahitit do të qëndrojnë për një muaj në arrest shtëpiak.
Gjashtë të arrestuarit ditën e djeshme dyshohen për kryerjen e veprave penale të keqpërdorimit të detyrës zyrtare dhe autorizimit, si dhe të cenimit të drejtës në punësim dhe të papunësisë./kallxo.com/
Prokuroria e Prizrenit kërkon 1 muaj paraburgim për Nexhat Çoçajn
Prokuroria Themelore e Prizrenit ka kërkuar 1 muaj paraburgim për Drejtorin e Drejtorisë së Arsimit në Komunën e Prizrenit, Nexhat Çoçaj, si dhe 5 zyrtarëve të kësaj drejtorie, të arrestuar dje.
Çoçaj u arrestua dje bashkë me pesë kolegë të tjerë të zyrës që ai udhëheq. Ata dyshohen për kryerje të veprave penale të keqpërdorimit të detyrës apo autoritetit zyrtar, si dhe për cenim të drejtës në punësim dhe të papunësisë. Të ndaluarit tjerë, pos drejtorit Çoçaj janë,: S.A., R.K. E.Sh., R.E., dhe F.K., ndërsa dy të dyshuarit tjerë të cilët janë të përfshirë në kallëzimin penal janë A. Ç. dhe F.Z.
“Ne sot kemi nis zyrtarisht hetimet ndaj Drejtorit komunal të arsimit në Prizren, Nexhat Çoçaj, bashkë me pesë zyrtarë të tjerë komunalë. Ne kemi bërë kërkesën për një muaj paraburgim për të gjithë”, ka thënë për gazetën Express Kryeprokurori i Prokurorisë Themelore të Prizrenit, Sylë Hoxha.
Në anën tjetër zëdhënësi i Komunës së Prizrenit, Ymer Berisha, nuk ka dashur të komentojë se çfarë qëndrimi do të merr Komuna, nëse të dyshuarve iu vazhdohet masa e paraburgimit.
“Tani zyrtarisht nuk kemi njoftim zyrtar as për vendimin për 48 orësh mbajtje, dhe as për caktimin e masës së paraburgimit prej 1 muajsh. Sapo të marrim vendimin zyrtarë nga ana e Gjykatës, Komuna një ditë me vonë do të dal me qëndrim, se cilat masa do t’i marrë kryetari konform ligjit për vetëqeverisje lokale”, ka thënë për Gazetën Express, Berisha.
Kjo nuk do të jetë hera e parë që Çoçaj, do të përballët me drejtësinë. Plotë dy herë atij i janë ngrit aktakuza për keqpërdorime në pozitën që mban. Madje në procesin e dytë gjyqësor ndaj tij, ende po mbaheshin seancat, ku ai bashkë me dy arsimtarë të po kësaj komune, Bekim Thaçi dhe Bedri Çejku akuzohen se keqpërdorën për 5 vjet rresht manifestimin “Remzi Ademaj”, të mbështetur nga komuna e Prizrenit.
Ndërsa në gjykimin e parë ndaj tij në Qershor të vitit 2013, Gjykata Themelore e Prizrenit, e shpalli atë të pafajshëm bashkë me tre zyrtarë të drejtorisë që ai udhëheqë. Akuza i ngarkonte zyrtarët e DKA-së se më 9 maj 2009, me qëllim fitimi të dobisë pasurore, e shpërdoruan detyrën zyrtare, duke i tejkaluar kompetencat dhe duke mos i përmbushur detyrat. Rasti kishte të bënte me tenderët për dërgimin e maturantëve të shkollave të mesme të Prizrenit në bregdetin e Shqipërisë.
Por se a do të duhej, Çoçaj të vazhdonte të kryente punën e Drejtorit të Arsimit, Kryeprokurori Sylë Hoxha thotë se ajo është çështje e administratës komunale të Prizrenit, ndonëse rastet ndaj tij dihen botërisht.
“Ne sa kemi pas prova i kemi hapur hetimet, por nuk na takon të merremi me atë çështje. Ajo është çështje e komunës së Prizrenit, ndonëse rastet ndaj tij dihen botërisht”, ka thënë Hoxha.
E ndonëse drejtoria e arsimit mbanë në supe dy aktakuza dhe për të tretën herë po hetohet nga organet e Drejtësisë, zëdhënësi i Komunës, Ymer Berisha nuk e sheh të nevojshme masën e suspendimit të zyrtarëve të saj.
“Nuk kemi nevojë fare të mendojmë për gjera të tilla. Ne vendosim konform vendimeve dhe jo konform aktakuzave, secili zyrtarë komunal gjatë kohës sa akuzohet është i pafajshëm, deri në vendimin përfundimtar “ ka përfunduar Berisha
