Arrestimi dhe paraburgimi i deputetes së AAK-së, Donika Kadaj-Bujupi, është vlerësuar si antikushtetues dhe antiligjor, për shkak të imunitetit që ka deputeti.

Madje, njohësit e çështjeve kushtetuese ka thënë se organet e drejtësisë do të duhej të kërkonin sqarime nga Gjykata Kushtetuese dhe të mos nguteshin me arrestimin e deputetes opozitare. Ata thonë se Kushtetuta e përcakton qartë se deputeti i Kuvendit nuk mund të arrestohet përderisa është duke kryer detyrat e tij si deputet, pa pëlqimin e shumicës së të gjithë deputetëve të Kuvendit.

Ish-kryetari i Kuvendit, Jakup Krasniqi, ka thënë për “Zërin” se shumë veprime që po ndodhin rreth nesh po dëshmojnë se institucionet e shtetit, duke përfshirë edhe Prokurorinë dhe gjyqësorin, madje edhe Odën e Avokatëve, kanë një deficit të madh profesional. Pasi, sipas tij, në të kundërtën nuk do të ndodhte arrestimi i deputetes së AAK-së.

“Sikur të kishim ekspertë të mirë, njohës të Kushtetutës, të ligjeve edhe të Kodit Penal të Kosovës, as fletarresti, as ndalimi e dënimi nuk kanë guxuar të ndodhnin. Deputetët kanë imunitet me Kushtetutë e me Ligjin për Deputetët. Kështu siç është bërë arrestimi, është antikushtetues dhe antiligjor. Deputetët nuk kanë imunitet për ndjekje penale, por kanë imunitet që të mos ndalohen dhe arrestohen në mënyrën si është vepruar me deputeten, Kadaj-Bujupi”, ka vlerësuar Krasniqi. Madje, sipas tij, do të duhej të kërkohej edhe sqarim nga Gjykata Kushtetuese rreth imunitetit të deputetes.

Sipas ish-kryeparlamentarit të Kosovës, imuniteti i deputetit nuk vlen vetëm në akuzat për krime lufte. /Zëri

Kryetari i Komunës së Prishtinës dhe anëtari i Lëvizjes Vetëvendosje Shpend Ahmeti është i ftuar në Zona e Debatit të Klan Kosovës ku po diskutohet për situatën aktuale politike në vend dhe qëndrimet e Lëvizjes, pjesë e të cilës edhe është.

Ai është shprehur se opozita qëndron e bashkuar.

“Ramush Haradinaj dhe AAK-ja kanë ndryshuar disa qëndrime për marrëveshjet e Serbisë. Jemi të bashkuar në këto çështje”.

Ai është shprehur gjithashtu se i pari i AAK-së Ramush Haradinaj nuk po lëshon pe përkundër presionit të madh të ambasadave.

Ahmeti është shprehur se para se të jetë kryetar i Prishtinës ëhstë qytetar i këtij vendi andaj do të reagojë ndaj ngjarjeve, njofton Klan Kosova.

“Unë kurrë nuk kam thënë që do të bëhem kryetar dhe do të mbyllem në zyrën time dhe tani do t’i përcjellë të gjitha ngjarjet dhe do të jem vetëm kryetar qyteti. Nuk është fakti pse unë jam Vetëvendosje që unë dal në protestë, është fakti që unë e konsideroj padrejtësi këtë që po ndodhë”, tha Haradinaj.

Ai ka thënë se ka momente në historinë e vendeve të ndryshme që demokracia ka përjetuar mënyrë më të vrazhdë.

“Ka momente në historinë e Amerikës që e kanë sjellë Amerikën në këtë nivel që është tani. Ka momente në histori të shteteve ku demokracinë e kanë përjetuar në mënyrë më të vrazhdë”,tha ai.

Ahmeti ka thënë se Vetëvendosja nuk është futur në politikë për pushtet.

“Shumë njerëz nuk po e kuptojnë që Vetëvendosja nuk ka hy në politikë për pushtet që lëshon pe për Asociacionin dhe hyn në pushtet. Vetëvendosja ka hyrë në politikë për ta ndryshuar gjendjen”.

Ahmeti është shprehur se Asociacioni do të ishte i mirë kur Serbia të njihte Kosovën.

“Mendoj që kemi arritur në një moment kur është rrezik të bëhemi Bosnje, ky është edhe dallimi mes Bosnjës dhe Kroacisë”.

“Asociacioni do të ishte i mirë kur Serbia do ta njihte Kosovën dhe do të thoshte se jam e shqetësuar për të drejtat e serbëve. Në këto kohë Serbia nuk të njeh dhe të sulmon”, tha Ahmeti.

Ai gjithashtu ka thënë se ai dhe Lëvizja Vetëvendosje janë për një Kushtetutë të re.

Ish kryetari i Kuvendit, Jakup Krasniqi i është drejtuar përmes një statusi në Facebook, ministrit të Punëve të Brendshme Skender Hyseni me fjalët “Ministër se jo mahi”.

Kraasniqi thotë se “ministri Hyseni pa fije turpi ka deklaruar se Qeveria e Kosovës përkatësisht Ministria e tij e Punëve të Brendshme, e Policia e Kosovës nuk guxojnë të veprojnë në Mitrovicën përtej urës”.

“Kjo do të thotë se shteti ynë nuk ka sovranitet në një pjesë të tij. Aty ku ka sovranitet Vulini, për shkakun e të cilit dënohen policet që mbrojtën shtetin. Për paradoks, Ministri nuk ditka për ketë rast?! Ministër se jo mahi! Kurse Kryeministri i tij se bashku me vartësi e tij, deklarojnë se nuk i tërheqin marrëveshjet e dëmshme që kanë arritur ne Bruksel”, ka shkruar Krasniqi në Facebook.

Dy protestat e fundit të opozitës së bashkuar gjatë ditëve të fundit, prapa lanë edhe shumë dëme, qoftë në njerëz, por edhe në objekte publike dhe private.

Zëdhënësi i Policisë së Kosovës, Baki Kelani, tha për Tribuna Channel se referuar dy protestave të fundit ku është shfaqur dhunë ndaj policisë së Kosovës, ka pasur dëme të mëdha.

“Gjatë dy protestave të fundit janë lënduar gjithsejt 24 policë dhe dy qytetarë. Ndërsa sa i përket veprimeve policore, policia ka shoqëruar 26 persona të dyshuar, ku 19 prej tyre janë dërguar në mbajtje. Janë dëmtuar 25 vetura zyrtare duke përfshirë të policisë, qeverisë dhe ministrive, janë dëmtuar 10 vetura civile si dhe janë dëmtuar edhe objekte të qeverisë, ministrive duke përfshi edhe shtatoren e ish-presidentit Ibrahim Rugova”, tha Kelani.

Eksperti i sigurisë Drizan Shala thotë se Policia e Kosovës është sjellë konform rregullave dhe procedurave të brendshme që i ka policia, dhe se policia asnjëherë sipas Shalës nuk ka përdorur dhunë por i është përgjigjur dhunës.

Shala shtoi se perimetri i sigurisë kërkon që protestat të mbahen aq larg objekteve publike sa nuk mund të dëmtohen ato, pasi ne në çdo protestë kemi dëmtim të pronës publike dhe taksapaguesve.