Pas ndryshimeve në menaxhmentin e Agjencisë së Zhvillimit Rajonal-Jug, tashmë është në vijim edhe nisma për ndërrimin e adresës së saj, shkruan sot Koha Ditore.

Nënkryetari i KK të Prizrenit, Lulzim Kabashi, në bashkëpunim me autoritetet e Zyrës së BE-së, në Kosovë, janë duke shqyrtuar mundësinë që AZHR-Jug të ketë selinë në qendrën “Europa” dhe njëherësh ta marrë përsipër menaxhimin e përkohshëm të tërë kësaj hapësire.

“Kemi çështje të pambyllura me zyrën e BE-së. lidhur me qendrën “Europa”. Prandaj ideja është që AZHR-Jug të vendoset në këtë kompleks dhe ta marrë nën menaxhim të përkohshëm, që në rrethanat aktuale do të ishte zgjidhja më e mirë”, ka thënë Kabashi, teksa ka kërkuar miratimin e kryetarit të Komunës, Ramadan Muja për miratimin e një vendimi gjatë mbledhjes së fundit të Qeverisë lokale.

Nga ana tjetër kryetari Muja ka shfaqur rezervat e tij në këtë drejtim, pasi që sipas tij kontributi i deritanishëm i AZHR- Jugu në zhvillimin ekonomik të Prizrenit ka qenë mjaft i ulët./Koha Ditore/

Ministri në detyrë i Integrimeve Evropiane, Gëzim Kasapolli, gjatë muajit të fundit ka dhënë deklarata kundërthënëse sa i përket lëvizjes së lirë të kosovarëve në vendet e Bashkimit Evropian (BE).

Kasapolli ishte zyrtari i lartë qeveritar, i cili e vlerësoi si të ngutshme deklaratën e ambasadores gjermane, Angelika Viets, e cila pati deklaruar, gjatë një interviste për “Zërin”, se kosovarët nuk do të mundë të lëvizin pa viza as gjatë vitit 2015…

Lideri i PDK-së, Hashim Thaçi, ende nuk i ka mohuar e as pohuar deklaratat e zyrtarëve të LDK-së se këtyre të fundit u takon posti i kryeministrit, pavarësisht se që disa javë kanë arritur marrëveshje për bashkëqeverisje.

Kanë mbetur vetëm edhe dy ditë deri në mbajtjen e seancës konstituive të Kuvendit, derisa askush në PDK nuk po deklaron zyrtarisht nëse janë pajtuar që ta votojnë Isa Mustafën për kryeministër, më 8 dhjetor…/zeri/

Vetëm katër njohje i ka përfituar Kosova në vitin 2014, pavarësisht deklaratave shpresëdhënëse nga Ministria e Punëve të Jashtme se Kosova këtë vit do të përfitojë disa njohje të rëndësishme.

Mungesa e njohjeve, sipas njohësve të marrëdhënieve ndërkombëtare, po ndodh për shkak të moskrijimit të institucioneve edhe pse sipas tyre pavarësisht mungesës së institucioneve, Ministria e Punëve të Jashtme është dashur të punojë në drejtim të njohjeve, shkruan Tribuna.

Afrim Hoti, njohës i marrëdhënieve ndërkombëtare mendon që në uljen e intensitetit të njohjeve për shtetasin e Kosovës ka ndikuar dhe po ndikon mungesa e institucioneve e që për më shumë se gjysme viti Kosova është në bllokadë institucionale.

“Përveç kësaj, ka ndikuar edhe diplomacia kosovare që ka probleme të konsiderueshme, mos të them është para kolapsit dhe kjo është një arsye tjetër që nuk kemi marrë njohje” ka thënë Hoti.

Sipas tij, MPJ së pari është dashur me u ristrukturua dhe me caktua njerëz të duhur në punë të duhura, pasi kjo do të ndikonte në një punë më të suksesshme të kësaj ministrie dhe do të sillte njohje.

Rrjeti i Grupeve të Grave të Kosovës (RrGGK), organizon Kuvendin vjetor (të 12-tin), të anëtareve të RrGGK, i cili këtë vit do të organizohet me moton “Me Shyhreten”.

Në këtë mënyrë gratë duan të konfirmojnë përkrahjen për, Shyhrete Berisha, e cila humbi bashkëshortin dhe fëmijët e saj gjatë luftës dhe aktualisht është duke kërkuar të drejtën e saj në pronë.

“RrGGK qëndron pranë saj dhe të gjitha grave që ende përpiqen për të realizuar të drejtën e tyre ligjore për pronësi në Kosovë”, thuhet në një komunikatë për medie të Rrjetit.

RrGGK ka filluar të mbajë Kuvendin vjetor të anëtareve në vitin 2003, si pjesë e përgjegjësisë së anëtareve të stafit për të raportuar tek Kuvendi i Anëtareve të RrGGK çdo vit.

Në përputhshmëri me Statutin e RrGGK-së, Kuvendi i Anëtareve është organi më i lartë qeverisës, përgjegjës për zgjedhjen e Anëtarëve të Bordit të RrGGK, që mbikëqyrë dhe vlerëson punën e RrGGK-së.

Gjatë Kuvendit Vjetor prezantohet suksesi i RrGGK drejt implementimit të Planit Strategjik 2011-2014, duke u fokusuar në aktivitetet gjatë vitit 2014.

Mbi të gjitha, RrGGK shfrytëzon këtë kohë për reflektim dhe për të shprehur mirënjohje ndaj atyre që kanë dhënë kontribut thelbësor drejt avancimit të të drejtave të grave dhe barazisë gjinore në Kosovë dhe jashtë saj.

Partia Demokratike dhe Lidhja Demokratike pritet të firmosin më së largu të dielën marrëveshjen për koalicionin qeverisës, për mandatin e ardhshëm katërvjeçar.

Një burim i “Kohës Ditore” ka treguar se grupet punuese tashmë kanë finalizuar draftin e Programit qeverisës, një kopje të të cilit e ka siguruar edhe gazeta.

Po kështu, subjektet janë akorduar edhe për ndarjen e pushtetit. Sipas tij, marrëveshja mund të firmoset edhe gjatë ditës së shtunë nga liderët e të dyja partive, Hashim Thaçi e Isa Mustafa. Kësisoj, të hënën do të mund të zhvillohet seanca konstituive.

“Do të ketë një takim ndërmjet liderëve politikë gjatë ditës së nesërme dhe në fund janë planet që edhe të nënshkruhet marrëveshja që ka të bëjë me ndarjen e përgjegjësive institucionale”, ka thënë ky burim, shkruan Koha Ditore.

“Emra titullarësh nuk do të përmenden në marrëveshje”.

Thaçi, kryeministër në detyrë, nuk ka qenë thuajse gjatë gjithë javës në Kosovë. Ai ka qëndruar në New York, ku e ka prezantuar Kosovën në sesionin e Këshillit të Sigurimit të OKB-së. Do të kthehet paraditen e së shtunës dhe zyrtarët e partisë së tij nuk e kanë mohuar faktin se po këtë ditë edhe do ta firmosë marrëveshjen me Mustafën.

“Nesër vjen kryeministri. Ai i sqaron gjërat brenda ditës”, ka thënë shkurt Hajredin Kuçi, nënkryetar në PDK.

Kryetari i AAK’së Ramush Haradinaj tha se Blloku filloi të lëkundej në momentin kur Gjykata Kushtetuese mohoi mundësinë që Isa Mustafa të ishte Kryeparlamentar. Në këtë kohë sipas Haradinajt, LDK nisi të kërkonte mënyra për të përmbushur ambiciet e tyre politike.

“LDK ka qenë dashtë me qenë me e qartë. Nëse e kanë dashtë veç postin e Kryeministrit ose me ne ose me tjerët është dashur të tregonte se duan pushtet”, tha Haradinaj.

Haradinaj në emisionin ‘Argument Plus’ tha se pavarësisht se kishin njohuri për ndryshimin në LDK nuk kishin arritur të ndryshonin qeverisjen në vend.

Tha se nuk ka rëndësi nëse do të jetë Kryeministër Hashim Thaçi ose Isa Mustafa, sipas tij qeverisja e këtyre dy partive do të jetë e dobët.

Haradinaj tha se nuk mund t’i linte postin e Kryeministrin Isa Mustafës, pasi tha se kjo do të ishte një Qeveri e dobët.

“Me ia pranue mandatarin gjatë asaj kohe sa isha i propozum prej tyre do t’i pranojsha mandatarin dikujt që udhëheqke me 47 deputetë për një Qeveri edhe sikur të rrinte në Bllok pra për një Qeveri 47 deputetë plus komunitetet etnike që do të ishte një Qeveri çdo herë e mvarne nga votat e listës serbe, pa të keqe se ne i kemi partnerë janë qytetarë të venit, por atëherë unë do të shkojsha për një variantë të një kryetari të Qeverisë për të cilin mendoj se është i dobët për kryetar të Qevrisë”, tha Haradinaj.

Burime të portalit Koha.net kanë dhënë emrat që nga radhët e LDK-së mund të jenë ministra në kabinetin qeveritar që kjo parti do të ketë me PDK-në e Hashim Thaçit.

Qeveria, që me gjasë do t’i prijë Isa Mustafa, për Ministër të Financave do të ketë Abdullah Hotin, për ministër të Zhvillimit Ekonomik do të ketë njohësin e çështjeve ekonomike, Muhamet Mustafa.

Në dikasteret që kanë të bëjnë me ekonominë, e që sipas gjitha gjasave do t’i takojnë LDK-së, ministre e Tregtisë dhe Industrisë do të jetë Hikmete Bajrami.

Ministrinë e Kulturës, Rinise dhe Sportit do ta drejtojë Kujtim Shala, ndërsa atë të Administratës Publike, Arben Gashi. Mbetet i padefinuar emri i ministrit të Diasporës, e cila do t’i takojë LDK-së, ndërsa janë dy emra që po përmenden për të qenë në krye të Ministrisë së Shëndetësisë. Ata janë Teuta Sahatqija dhe Valbon Krasniqi.

Sipas këtij burimi, shef i kabinetit të kryeministrit Mustafa do të jetë Bajram Gecaj, ndërsa Arban Abrashi zëdhënës i Qeverisë.

Më parë kryeministri në detyrë Hashim Thaçi ka thënë se marrëveshja me LDK-në do të finalizohet gjatë vikendit.