Një ditë pasi u përballë me demonstrata nga veteranët e luftës së UÇK-së, rektori i Universitetit të Prishtinës, Ramadan Zejnullahu, të premten është mbështetur fuqishëm nga zyra e Bashkimit Evropian.
Ky mision ka lëshuar një komunikatë për shtyp përmes së cilës ka dhënë mbështetje të madhe për rektorin. Ata vlerësuan përpjekjet e tij dhe e inkurajuan atë që të vazhdojë me qëndrimet se vetëm nëpërmjet kritereve të caktuara do të mund të pranohen studentët në UP.
“Zyra e Bashkimit Evropian dhe krerët e misioneve të shteteve anëtare të BE-së në Kosovë i përkrahin plotësisht përpjekjet e Rektorit të Universitetit të Prishtinës për të mbrojtur cilësinë e arsimit të lartë dhe të drejtat e barabarta të të gjithë studentëve”, thuhet në një deklaratë të përbashkët për media të Zyrës së BE-së dhe shefave të misioneve të shteteve anëtare të BE-së që janë të pranishme në Kosovë, shkruan Tribuna.
Ndërkaq ata që thirrën demonstratë ditën e enjte janë shprehur se rektori i UP-së ka një javë kohë për të vërtetuar listat e shoqatave të dala nga lufta. Xhavit Jashari, përfaqësues i këtyre organizatave ka thënë se veprimet e ditës së enjte të këtyre organizatave kanë qenë të arsyeshme dhe legjitime.