Në portën e manastirit të Zoçishtes në Rahovec, persona të panjohur kanë shkruar mbishkrime “UÇK” dhe “Kosova”, veprime të cilat dioqeza Rashkë-Prizren i ka cilësuar si provokime të reja.
Dioqeza Rashkë-Prizren ka njoftuar në faqen e saj të internetit se rasti është raportuar në Policinë e Kosovës, ndërsa ka shtuar se kryesi i veprës ka hyrë përmes një hapësire në mur afër portës, raporton Koha.net.
Në Dioqezë vlerësojnë se shkrimi i këtyre mbishkrimeve është edhe një provokim i radhës, me siguri me qëllimin që të sjellin shqetësim në mes të murgjve dhe punëtorëve në manastir.
Dioqeza kujton se ky nuk është rasti i parë që shkruhen mbishkrime në muret e manastireve, porse “secilën herë ky është një paralajmërim i ri për murgjit që të jenë më të kujdesshëm”.