Me rastin e 70 vjetorit të lindjes së ish-presidentit të ndjerë, Dr. Ibrahim Rugova, strukturat e Lidhjes Demokratike të Kosovës i bënë homazhe te varri i tij.

Isa Mustafa, kryetar i LDK-së, tha se Rugova mbetet një ndër personalitetet më të shquara të kësaj epoke dhe ishte themeluesi i shtetit të Kosovës.

“Sot po ia bëjmë nderimet kryetarit të Lidhjes Demokratike të Kosovës, themeluesit të LDK-së dhe presidentit historik Dr. Ibrahim Rugova me rastin e 70 vjetorit të lindjes së tij. Rugova mbetet një ndër personalitet më të shquara të kësaj epoke, themelues i shtetit të Kosovës, kreator i lirisë dhe pavarësisë, njeri i cili e frymëzoi me demokraci dhe me marrëdhënie të mira. Ai që hapi portat kyçe të vendeve të rëndësishme botërore në mënyrë që çështja e Kosovës të bëhet jo vetëm çështje e Evropës por çështje e botës, dhe ne natyrisht se do t’i kemi të gjitha këto parasysh në mënyrë që të ndërtojmë raport të mirë ndaj figurës së tij. Respekt për figurën e tij dhe këtë respekt ta kultivojmë të gjithë gjeneratat” , tha ai, transmeton kp.

Ai shtoi se Rugova ishte ai që hapi të gjitha portet e Kosovës drejt Evropës.

Nënkryetari i Komunës së Prizrenit, Lulëzim Kabashi, ka shkëmbyer një pronë të tij private, me një pronë të paluajtshme të Komunës. Shkëmbimi i pronës së tij, është miratuar edhe nga Asambleja Komunale.

Drejtori i Urbanizmit dhe Planifikimit Hapësinor Nijazi Kryeziu është arsyetuar se shkëmbimi i pronës së paluajtshme e Komunës, me atë të nënkryetarit të Prizrenit, Lulëzim Kabashit është bërë për shkak nevojës për zgjerimin e rrugës “Kuvendi i Arbërit” dhe realizimin e Planit Rregullues Urban për lagjen “Lakuriqi”..

Çështja e shkëmbimit të pronës së nënkryetarit të parë të Ramadan Mujës, Lulëzim Kabashit, në mbledhjen e 18 shtatorit të këtij viti, fillimisht, kishte hyrë në rend të ditës në Asamblenë Komunale të Prizrenit.

Edhe pse u votua me shumicë votash nga pozita, vendimi nuk është proceduar, për shkak të frikës nga ndjekja e mundshme penale për shkeljen e procedurave që i përcaktojnë ligjet në fuqi.

Kërkesa për shkëmbimin e pronës është kthyer përsëri në Asamblen Komunale me datën 27 nëntor 2014, por kësaj here, si propozim kryetarit të Komunës Ramadan Muja për realizimin e “interesit publik” për këmbim të pronave ndërmjet Komunës së Prizrenit me firmën “K Group”.

Asamblisti i Lëvizjes Vetëvendosje! në Prizren, Artan Abrashi thotë se shkëmbi i pronës nuk është bërë për interes publik, por për motive biznesore të nënkryetarit të Komunës, Lulëzim Kabashit, dhe realizimin e pazareve politike ndërmjet PDK-së dhe AAK-së.

“K Group” është kompani private e lidhur ngushtë me nënkryetarin Lulëzim Kabashi. Para ardhjes së kërkesës në Asamble, kjo firmë ka bërë ndryshime në përbërjen e saj të brendshme për t’i fshehur gjurmët e konfliktit të interesit”, thotë Abrashi.

“Neni 11, pika 2.1 e Ligjit Nr. 04/L-144 për Dhënie në Shfrytëzim dhe Këmbimin e Pronës së Paluajtshme të Komunës thotë “këmbimi iniciohet vetëm nga Komuna, jo nga pronari privat, kurse në këtë rast, Komuna këmben pronë me personin privat që ka lidhje të drejtpërdrejta me një zyrtar publik të Komunës”.

“Rrjedhimisht, kemi të bëjmë me konflikt interesi, që sipas ligjit Nr. 04/L-051 për Parandalimin e Konfliktit të Interesit në Ushtrimin e Funksionit Publik përkufizohet si “gjendje e mospajtimit ndërmjet detyrës publike dhe interesave private të zyrtarit të lartë, kur ai ka interesa private të drejtpërdrejta ose të tërthorta, personale ose pasurore, të cilat ndikojnë, mund të ndikojnë ose duket sikur ndikojnë në ligjshmërinë, transparencën, objektivitetin dhe paanësinë e tij gjatë ushtrimit të funksionit publik”, thotë Abrashi./PrizrenPress.com/

Këshilli për Mbrojtjen e të Drejtave dhe Lirive të Njeriut (KMDLNj) ka reaguar në lidhje me rastin e Shyhrete Berishës, e mbijetuara e masakrës më të madhe të Suharekës, për pretendimin e saj se i takon hise në pasurinë e bashkëshortit të saj të ndjerë.

KMDLNj për këtë rast e bënë përgjegjëse edhe gjykatën kompetente që nuk ka vepruar shpejtë dhe duke e trajtuar rastin me prioritet për shkak të ndjeshmërisë.

“E mbijetuara e masakrës ndaj familjes Berisha që e kryen forcat paramilitare, policore dhe ushtarake serbe në Therandë, znj. Berisha përkundër faktit se në masakrën ndaj familjes Berisha humbi burrin dhe 4 fëmijët, edhe 15 pas përfundimit të luftës në Kosovë nuk po mund të realizojë njërën ndër të drejtat themelore të njeriut, të drejtën e trashëgimisë. Në një kontest të stërzgjatur gjyqësor që ka filluar para 12 vjetësh ajo po përballet me mohimin e të drejtës që të trashëgojë shtëpinë ku ka jetuar me burrin dhe 4 fëmijët e ekzekutuar nga forcat serbe”, thuhet në reagimin e KMDLNj-së.

KMDLNj thotë se sot në Kosovë e drejta e trashëgimisë është e rregulluar me Ligjin për Trashëgiminë i cili përcakton qartë këtë të drejtë andaj thirrje eventuale në të drejtën zakonore apo Kanunin e Lekë Dukagjinit përveç se është anakronizëm është edhe një veprim i pamoralshëm dhe demonstrim i hapur i diskriminimit që i bëhet femrës në Kosovë në përgjithësi ndërsa Shyhrete Berisha në veçanti.

Në rastin konkret, KMDLNj e bënë përgjegjëse edhe gjykatën kompetente që nuk ka vepruar shpejtë dhe duke e trajtuar rastin me prioritet për shkak të ndjeshmërisë së rastit në mënyrë që të eliminohet diskriminimi në baza gjinore ndaj Berishës.

Për KMDLNj –në është i parëndësishëm fakti ku jeton Shyhrete Berisha (Gjermani) e që përdoret si argument në kontestimin e së drejtës së pakontestueshme, të drejtës për trashëgimi. Gjithashtu, manipulimi me faktin kinse babai i Xhelal Berishës, si trashëgimtar i vetëm i kësaj prone e njeh për trashëgimtar të ligjshëm dhe të vetëm Xhelal Berisha nuk paraqet fuqi juridike që e përjashton Shyhrete Berisha nga trashëgimia.

“KMDLNj përkrah të drejtën e pamohueshme të znj. Shyhrete Berisha për trashëgimi të pronës familjare dhe kërkon të ndërpriten diskriminimet që u bëhen femrave në realizimin e kësaj të drejte duke kërkuar gjithashtu që Ligji për Trashëgiminë të respektohet në përpikëri pa bërë dallime etnike, fetare e në rastin konkret gjinore”, thuhet në fund të këtij reagimi të KMDLNj-së.

Kryesitë e shoqatave të dala nga lufta e UÇK-së në Prizren, janë takuar me shefat e tyre, Fadil Shurdhajn, Xhavit Jasharin dhe Smajl Elezaj.
Kryetar i SHIL të UÇK-së, Dega Prizren, Burim Shala tha se në këtë takim është diskutuar për demonstrata që do të mbahen të enjtën në ora 12:00 para Rektoratit të UP-së.

“Shoqatat janë këmbëngulëse,që të zbatohet menjëherë memorandumi që është në fuqi”, ka thënë Shala për “PrizrenPress”.

“Shoqatat nuk do të marrim përgjegjësi nëse demonstratat mund të shndërrohen në dhunë, sepse janë fyer vlerat e UÇK-së”.“Fëmijët tanë janë quajtur fëmijë të paditur nga vet Rektori, prandaj iu bëjmë thirrje të gjithë familjeve të kategorive të luftës, që të marrin pjesë në këtë demonstratë për t’i mbrojtur vlerat tona”./PrizrenPress.com/

Llogaritë e bëra për përfshirjen e postit të presidentit në ndarjen e pushtetit ndërmjet PDK-së dhe LDK-së, nga ana ligjore e kushtetuese duken vështirë të realizueshme. PDK dhe lideri i saj Hashim Thaçi, po tregojnë shenja mospajtimi me faktin që posti i presidentit të mbetet jashtë pazarit politik në kohën kur LDK e ka bërë të qartë se pa postin e kryeministrit, do ta prishte edhe marrëveshjen me PDK-në. Si parti fituese e zgjedhjeve, PDK-së po i mbetet posti i kryetarit të Kuvendit.

Në këtë mes, llogaritë politike që ende mbeten në fuqi, janë që aty në pazarin e ndarjes së pushtetit të përfshihet edhe posti i presidentit të vendit, duke aluduar në një marrëveshje me presidenten Atifete Jahjaga, e cila sipas këtij skenari, brenda 6-7 muajve do ta lëshonte këtë post për liderin e PDK-së Hashim Thaçi. Por, dorëheqja e presidentes, për kah ana ligjore-kushtetuese vlerësohet se është e pamundshme të realizohet në këso rrethana.

Në bazë të skenarëve të PDK-së, por të cilat në heshtje nuk i kishte kundërshtuar as LDK-ja, ishte llogaritur që nën emrin e formimit dhe funksionimit të institucioneve të Kosovës, me anë të marrëveshjes t’ia shkurtojnë mandatin kushtetues pesë vjeçar presidentes Atifete Jahjaga, duke besuar se një marrëveshje të tillë do ta pranonte edhe presidentja shkruan Tribuna e sotme.

Hashim Thaçi, pas shtatë vjetësh në krye të Qeverisë mund të mbetet përkohësisht pa pozitë të lartë udhëheqëse. Të garantuar e ka vetëm mandatin e deputetit. Mirëpo, synimet e tij janë që të vije në krye të shtetit brenda pak muajsh, pavarësisht se me Kushtetutë, posti i presidentit është i zënë deri në pranverën e vitit 2016. Atëherë i skadon mandati presidentes, Atifete Jahjaga.

Por, pavarësisht pozitës që ai do ta ushtrojë, analistët politikë vlerësojnë, se kryeministri aktual do të ketë ndikim të madh në qeverisjen e ardhshme. Për Driton Selmanaj nga KDI, kjo është çështje e kalkulimeve politike që mund t’i bëjnë lidershipi i subjekteve politike, por vendi ka Kushtetutën e dhe ligjet e Kosovës dhe mandati i presidentes, sipas tij është i qartë.

“Mandati i presidentes është shumë i qartë, sepse Kushtetuta e Kosovës i ka paraparë afatet, mënyrat dhe kompetencat se kur përfundon mandati i saj. Është çështje tjetër, nëse presidentja heq dorë nga pozita e saj, por në rrethanat tjera duket se është e pamundur që ajo të largohet. Presidentja ka mandat deri në pranverën e vitit 2016. Nëse vepron ndryshe, kjo atëherë është çështje e saj”, ka thënë Selmanaj…/tribuna/

Kryeministri në largim, Hashim Thaçi, do të takohet me kryeministrin e Serbisë Aleksandër Vuçiq në New York, më 4 dhjetor.

Ata do të kenë një takim gjatë kohës kur do të mbahet Këshilli i Sigurimit të Kombeve të Bashkuara. Kështu ka bërë të ditur burimi ndërkombëtar i gazetës ”Zëri”..

PDK-ja dhe LDK-ja akoma nuk janë përcaktuar sa ministri do t’i ketë Qeveria që do ta formojnë. Në këto subjekte kanë thënë se janë duke e diskutuar një çështje të tillë dhe se pritet që të vendoset bashkërisht.

Ndërkohë anëtarë të subjekteve opozitare si dhe analistë politikë kanë vlerësuar se numri aktual i ministrive përbën një shifër të madhe dhe se ajo duhet të zvogëlohet.

Nënkryetari i PDK-së, Hajredin Kuçi, ka thënë të hënën se çështjen e ministrive e kanë temë trajtimi me partnerin qeverisës. “Ende jemi në konsulta me LDK-në dhe vendosim bashkërisht si të veprohet”, ka thënë ai…/koha ditore/

Lideri i LDK-së, Isa Mustafa, ka “kërcënuar” partnerin e koalicionit, PDK-në e Thaçit, se në rast se nuk merr postin e kryeministrit, do të tërhiqet nga marrëveshja për bashkëqeverisje.

Mustafa, pas kësaj deklarate në mesditën e djeshme rreth orës 13.00 është takuar edhe me Presidenten e Kosovës, Atifete Jahjaga.

Nga burimet e LDK-së mësohet se Mustafa është duke kërkuar garanci për postin e kryeministrit edhe nga ndërkombëtarët, duke mos i zënë besë kreut të PDK-së, Hashim Thaçi.

Mësohet se me presidenten kanë biseduar rreth procedurave të ardhshme të themelimit të institucioneve.

Ndërkohë që Mustafa ka bërë me dije se marrëveshja për ndarjen e ministrive do të finalizohet brenda dy ditësh.

Por, derisa kreu i LDK-së zyrtarisht këmbëngul se posti i kryeministrit të ardhshëm do t’i takojë atij, na anën tjetër PDK-ja e Thaçit vazhdon të mos komentojë rreth kësaj çështjeje.

Kreu i LDK-së, Isa Mustafa, tha të hënën pas takimit që kanë zhvilluar liderët politikë dhe anëtarët e grupeve punuese për ndarjen e përgjegjësive se partia e tij nuk do të hynte në koalicion me PDK-në sikur të mos i jepej posti i kryeministrit. /Zëri/