Lidhja e Shkollës së Kompetencës në Prizren në rrjetin energjetik ka rezultuar të jetë një sfidë e ndërlikuar për zyrtarët e Komunës së Prizrenit.

Me gjithë ujdinë që Drejtoria e Arsimit kishte arritur me KEDS-in për zgjidhjen e kësaj çështjeje, problemi ende nuk është tejkaluar ani pse tashmë afër dy muaj ka nisur procesi mësimor në këtë qendër arsimore, shkruan KD.

Drejtori i DKA-së, Nexhat Çoçaj, ka bërë të ditur se Qendra e Kompetencës aktualisht ka një lidhje në rrjetin energjetik, që nuk është e mjaftueshme për t’i vënë në funksion të gjitha pajisjet kur qendra operon me kapacitet të plotë, prandaj dhe ishte arritur ujdia me KEDS-in që të sigurohet një lidhje me kapacitet më të lartë për furnizim me energji elektrike.

“Problemi është se një marrëveshje që e kemi arritur në komunë dhe donatori me KEDS-in para katër muajsh nuk është jetësuar. Ata kanë premtuar se do të sigurojnë kabllot në gjatësi afër dy mijë metra për ta lidhur Qendrën në rrjetin energjetik. Por premtimi i dhënë nuk është mbajtur dhe jemi të detyruar që ta përsërisim kërkesën e njëjtë te KEDS-i, pasi ata janë arsyetuar se është ndërruar menaxhmenti”, ka thënë Çoçaj.

Zyrtarët e KEDS-it në Prizren në disa raste kanë pohuar se nuk prononcohen për mediet.

Qendra e Kompetencës në Prizren ka nisur punën në mes të shtatorit të këtij viti. Kjo Qendër u themelua në saje të përpjekjeve të përbashkëta të Qeverisë së Kosovës dhe të Luksemburgut. Afër 3 milionë është shuma e investimeve për ndërtimin dhe pajisjen e kësaj shkolle, krijimin e plan-programeve dhe ofrimin e trajnimeve.

“Të gjitha kurset të cilat shkolla i ofron, i plotësojnë kërkesat e Kornizës Kombëtare të Kualifikimeve dhe Kornizës Evropiane të Kualifikimeve. Kjo nënkupton që certifikatat përfundimtare të nxënësve mund të krahasohen me ato të vendeve anëtare të Bashkimit Evropian”, shpjegohet në uebfaqen e këtij institucioni.

Katër persona janë lënduar në tri aksidente të trafiku që kanë ndodhur në rajonin e Prizrenit.

Në qytetin e Prizrenit kanë ndodhur dy raste të aksidenteve, njëri në rrugën “Rifat Ukimeri” dhe tjetri në rrugën “Ismet Jashari”, kurse rasti i tretë në fshatin Sopi të Suharekës.

“Në rrugën ‘Rifat Ukimeri’ në Prizren, raportohet se një person shtetas i Shqipërisë duke lëvizur me veturën e tij nga pakujdesia ka godit një çiklist dhe ka ikur nga vendi i ngjarjes”, njofton Policia e Kosovës.

“Viktima është dërguar ne Spitalin e Prizrenit dhe pas tretmanit mjekësorë është liruar ne shtëpi”.

I dyshuari është ndaluar në pikë kalimin kufitar në Vermicë dhe i njëjti është shoqëruar në stacion policorë ku pas intervistës me vendim të prokurorit është liruar në procedurë të rregullt.

Ndërkaq, aksidenti i dytë ka ndodhur në rrugën “Ismet Jashari”.

“Një veturë e pa identifikuar ka goditur biciklistin, duke i shkaktuar lëndime të rënda trupore dhe i njëjti ka ikur nga vendi i ngjarjes”.

“Viktima është dërguar në spitalin e Prizrenit ndërsa rasti është nën hetime”.

Në fshatin Spoi të Suharekës ka ndodhur një aksident trafiku mes dy veturave civile ku përpos dëmeve materiale lëndime trupore kanë pësuar dy persona.

Viktimat kanë pranuar tretman mjekësorë në QKMF në Suharekë dhe më pas janë liruar në shtëpi. /PrizrenPress.com/

Gjykata Kushtetuese ka refuzuar kërkesën e Avokatit të Popullit lidhur Dekretin e presidentes për vazhdimin e mandatit të gjyqtarëve ndërkombëtarë të Gjykatës Kushtetuese.

Në kërkesën e Avokatit të Popullit drejtuar Kushtetueses, pretendohet se Dekreti i presidentes është jokushtuetues. Por Gjykata në vendimin e saj ka nxjerrë të kundërtën. Kushtetuesja ka konkluduar se procedura e ndjekur nga presidentja është në pajtueshmëri me Kushtetutën, transmeton RTK.

Procedura e ndjekur nga presidentja Atifete Jahjaga për vazhdimin e mandatit të tre gjyqtarëve ndërkombëtarë, është në pajtueshmëri me Kushtetutën e Kosovës. Këtë konkludim ka nxjerrë Gjykata Kushtetuese, duke hedhur poshtë pretendimet e Avokatit të Popullit, i cili Dekretin e presidentes të datës 31 gusht, e konsideron jokushtetues. Kërkesën e Avokatit të Popullit, Gjykata Kushtetuese e ka refuzuar si kërkesë qartazi të pabazuar.

Paneli i Gjykatës Kushtetuese i përbërë nga 7 anëtarë, përfshirë edhe dy gjyqtarët ndërkombëtarë ka konstatuar se Dekreti i nxjerrë nga Presidentja, është në linje me obligimet ndërkombëtare të Republikës së Kosovës, të inkorporuara në Marrëveshjen Ndërkombëtare, të lidhur ndërmjet Republikës së Kosovës dhe Bashkimit Evropian dhe të ratifikuar nga Kuvendi.

Gjykata Kushtetuese thekson se neni 84.19, i Kushtetutës, i cili thotë se “Presidenti i Republikës së Kosovës emëron gjyqtarët për Gjykatën Kushtetuese, me propozimin e Kuvendit, ka të bëjë me emërimin e gjyqtarëve të rinj kosovarë në Gjykatë, ndërsa Dekreti ka të bëjë me vazhdimin e mandatit të gjyqtarëve të tanishëm ndërkombëtarë dhe kësisoj, ky nen i Kushtetutës nuk është i aplikueshëm në rastin e tanishëm.

Gjykata thekson se edhe mandati i gjyqtarëve ndërkombëtarë dallon dhe është i përcaktuar me kontratë të ofruar nga aktorë ndërkombëtarë. Gjykata vëren se argumentet e parashtruesit të kërkesës kryesisht ndërlidhen me përmbajtjen e Marrëveshjes Ndërkombëtare të lidhur ndërmjet Republikës së Kosovës dhe Bashkimit Evropian nëpërmjet këmbimit të letrave, e ratifikuar nga Kuvendi me 23 prill 2014, edhe pse parashtruesi pohon se ai sfidon vetëm kushtetutshmërinë e Dekretit. Prandaj, parashtruesi nuk e ka mbështetur pretendimin e tij dhe nuk ka provuar se Dekreti është jokushtetues.

Duke pasur parasysh këto argumente, Gjykata ka vendosur të deklarojë kërkesën të papranueshme dhe të refuzojë kërkesën për masë të përkohshme.

Ambasadori i Mbretërisë së Bashkuar në Kosovë, Ian Cliff, tha sot se nuk e ka të qartë pse deputetët e Kuvendit të Kosovës nuk janë sot në seancë për ta zgjedhur kryetarin dhe nënkryetarët e këtij institucioni.

Duke folur në tryezën e organizuar nga BIRN, CRTA dhe Internews Kosova për prezantimin e raportit mbi implementimin e marrëveshjes Kosovë- Serbi, diplomati britanik tha se tashmë që blloku paszgjedhor LDK-VV-AAK-NISMA ka hequr dorë nga posti i kryeparlamentarit, nuk ka më arsye që të shtyhet zgjedhja e organeve drejtuese të Kuvendit.

“Nuk e di pse parlamenti nuk është takuar sot. E di që e kanë propozimin për kryeparlamentar”, tha Cliff.

Qëndrimi i ambasadorit Cliff është mbështetur edhe nga ambasadori i Holandës në Kosovë, Robert Bosch.

Grupi joformal i Grave të Asamblesë Komunale të Prizrenit ka reaguar ndaj fyerjeve që i janë bërë koleges së tyre, Drita Millaku, nga drejtori i Drejtorisë Komunale të Shërbimeve Publike në Prizren, Hasan Hasani.

Në reagimin e tyre thuhet se pas takimit të mbajtur më datën 11 nëntor 2014, Grupi joformal i Grave të Asamblesë Komunale të Prizrenit reagon ashpër në lidhje me fyerjet dhe ofendimet e ulëta, të drejtorit te Drejtorisë Komunale të Shërbimeve Publike në Prizren Hasan Hasani, ndaj kolegës tonë asambleiste Drita Millaku.

Sipas deklaratës se znj. Millaku, ajo pasi ka shkuar në drejtorinë përkatëse për të kërkuar dokumente zyrtare, duke ndjekur dhe respektuar të gjitha rrugët e parapara me Ligjin për Qasje në Dokumentet Zyrtare, është ndeshur me fyerje dhe ofendime të rënda nga drejtori Hasani.

“Ne grupi joformal i grave te Asamblesë Komunale te Prizrenit, ndjehemi thellësisht të prekura nga deklarata e koleges tonë Millaku, në lidhje me ngjarjen e ndodhur në drejtorinë në fjalë”, thuhet në reagimin e tyre.

“Ne kërkojmë që drejtori Hasani të kërkoj falje publike për tonet fyese e ofenduese që njollosin jo vetëm kolegen Millaku, por edhe gjithë qytetarët që ajo i përfaqëson. Femra në çdo shoqëri duhet të gëzoj respekt dhe trajtim dinjitoz nga meshkujt-kolegë, në të gjitha sferat pavarësisht se ku është angazhuar. Andaj, duke kërkuar që kjo traditë të kultivohet edhe me tej, sidomos në nivele të përfaqësimit politik, ne reagojmë fuqishëm në lidhje me nëpërkëmbjen e personalitetit të koleges sonë”.

“Secili zyrtar komunal, i cilit do nivel qoftë, duhet ta dijë se fyerjet apo ofendimet në adresë të asamblisteve janë të papranueshme dhe do të jenë fyerje ndaj një përfaqësuesi të popullit, ndaj votuesve të saj, të cilët me besimin e dhënë presin dhe na obligojnë që t’i përfaqësojmë me përgjegjësi të lartë në legjislativin komunal”.

“Çdo tentim për të na penguar apo vështirësuar punën tonë zyrtare, ne si gra përfaqësuese do ta dënojmë të gjitha njëzëri duke kërkuar përgjegjësi dhe llogari nga të gjithë zyrtarët komunal. Rrjedhimisht, kërkojmë që raste të tilla skandaloze të mos përsëriten më, përfundon reagimi i nënshkruar nga tetë gra të Grupit joformal të Grave të Asamblesë Komunale të Prizrenit”, thonë ato. /PrizrenPress.com/

Një burr ka sulmuar me armë zjarri ish bashkëshorten në Suharekë. I dyshuari po mbahet nën masën e arrestit policor për 48 orë.

“Mbrëmë, rreth mesnate, policia në Suharekë është informuar për një kanosje me armë zjarri që kishte ndodhur në rrugën e Reshtanit. Pas hetimit fillestar dhe arrestimit të kërcënuesit është kuptuar se bëhet fjalë për një kanosje që një burrë ka kryer ndaj ish bashkëshortes së tij”, njofton zëdhënësi i policisë në Prizren, Hazir Berisha

“Policia ka kryer procedurat hetimore dhe e ka sekuestruar një pistoletë të llojit M 57 e prodhimit jugosllav pa fishekë”.

“I dyshuari po mbahet nën masën e arrestit policor për 48 orë ndërsa shkresat e lëndës dhe provat materiale do t’i kalojnë prokurorisë për procedurë të më tejme”, thotë Berisha. /PrizrenPress.com/