Kryetari i Lidhjes Demokratike të Kosovës (LDK), Isa Mustafa, ka thënë se partitë e koalicionit LDK-AAK-Nisma dhe VV duhet të bëjnë një marrëveshje të re.

Në intervistën për “Epokën e re”, ai ka thënë se partitë e bllokut mbi marrëveshjen e deritanishme duhet të bëjnë një marrëveshje të re, me të cilën do t’i përcaktonin përgjegjësit e reja qeverisëse dhe objektivat qeverisëse. “Vendimi i Gjykatës Kushtetuese e ka zhvlerësuar edhe marrëveshjen tonë, sa i përket përgjegjësive. Praktikisht ne duhet, mbi marrëveshjen e deritanishme, të bëjmë një marrëveshje të re, me të cilën do të përcaktonim përgjegjësitë e reja qeverisëse dhe objektivat qeverisëse. Në këtë marrëveshje do të përcaktojmë se cili, në rrethana krejtësisht të reja, do të jetë kandidat për kryeministër nga ky koalicion. Neve nuk jemi të lumtur që duhet të bëjmë një marrëveshje të re, sepse ky nuk ka qenë vullnet i yni, por kjo është pasojë e vendimit të Gjykatës Kushtetuese”, ka thënë Mustafa.

I pyetur nëse do të jetë kandidat për kryeministër, Mustafa ka lënë të kuptohet se ai do të jetë kandidati i bllokut për kryeministër. “Natyrisht se çdo marrëveshje ka për bazë themelore fuqinë e subjekteve politike, përkatësisht numrin e deputetëve, ky është edhe qëndrimi i LDK-së për marrëveshjen e re dhe pozitën e kryeministrit”, është shprehur Mustafa.

Se çfarë pozite do të ketë Ramush Haradinaj me marrëveshjen e re, lideri i LDK-së, ka thënë se gjithçka do të arrihet me një mirëkuptim të plotë. “Kjo do të jetë çështje e marrëveshjes sonë dhe e vullnetit të zotit Haradinaj dhe AAK-së. Besojmë se çdo gjë do ta arrimë me një mirëkuptim të plotë dhe në interes të qeverisjes së mirë të vendit. Gjatë këtyre muajve të bashkëpunimi tonë, ndaj përshtypje të forta për korrektësinë dhe përkushtimin e z. Haradinaj por edhe të z. Limaj dhe Kurti”, është shprehur Mustafa.

Mustafa ka thënë se nuk ka ndikuar deklarata e ambasadores Jacobson për të hequr dorë blloku nga posti i kryetarit të Kuvendit.

Sipas tij, ky vendim i bllokut ka qenë duke u diskutuar shumë më herët. “Praktikisht ne kemi përfunduar me vendimin tonë të mërkurën, në një takim të gjatë të pasdites, pra një ditë para se ambasadorja të jap deklaratën e saj”, ka treguar Mustafa.
Lideri i LDK-së ka përjashtuar mundësinë e një koalicioni me PDK-në.
Mustafa ka thënë se blloku është unik, pasi sipas tij, i bashkon vullneti, dëshira dhe përcaktimi për t’ia sjellë vendit një qeverisje të mirë.

Ai ka përjashtuar mbajtjen e zgjedhjeve të reja. “Zgjedhjet nuk janë opsion, kjo është bërë e qartë për të gjithë”, është shprehur Mustafa.

Mustafa ka shprehur gatishmërinë që të takohet me liderin e PDK-së. “Ne mund të flasim ndërmjet veti se si do të respektojmë rregullat pozitë-opozitë në Kuvend dhe sesi do të bashkëpunojmë në të mirë të vendit tonë”, ka thënë Mustafa.

Ai ka konfirmuar se këtë jave do të udhëtoj për në Gjermani, ku do të ketë takime me zyrtarë të kabinetit të kancelares Merkel dhe deputetë të CDU-së. Në këtë intervistë, Mustafa iu është kundërpërgjigjur edhe deklaratës së Eqrem Kryeziut, i cili iu drejtua me fjalën serbisht: ‘Neka drug Isa bude predsednik Skupštine!’ (Shoku Isa u bëftë kryetar i Kuvendit!). “Zoti Kryeziu ka dhënë një kontribut të rëndësishëm për LDK-në për një periudhë të gjatë kohore. Kjo është me rëndësi për mua, dhe kjo është vlerë që dëshiroj ta kultivojë në marrëdhënie me njerëzit e LDK-së. Unë me ta flas dhe mendoj shqip”, ka thënë Mustafa.

Ambasadori britanik në Kosovë, Ian Cliff tha se nuk i takon komunitetit ndërkombëtar të thotë se kush duhet të jetë kryeministër e kush ministër në Qeverinë e Kosovës.

Ai tha për RTK 2 se vendimi i Bllokut të votojë kandidatin e PDK-së për kryeparlamentar, është shenjë e mirë për Kosovën.

I pyetur nëse PDK do ta bllokojë procesin pasi insiston në të drejtën e saj që si parti e parët ë jetë pjesë e institucioneve, Cliff tha se duhet shkuar hap pas hapi.

Isa Mustafa dhe Ramush Haradinaj me shumë gjasë do t’i marrin instruksionet nga shteti më i fuqishëm në Evropë, Gjermania, se cili do ta ketë përkrahjen për ta drejtuar Qeverinë e re të Kosovës.

I pari që ka udhëtuar drejt Berlinit zhvillojë takime me sekretarin e partisë së kancelares Angela Merkel (CDU), me udhëheqësin e grupit parlamentar të CDU-së, deputetë të tjerë të Bundestagut, zyrtarë të lartë të kancelares Merkel, si dhe me përgjegjësitë e fondacionit “Conrad Adenauer”.Sipas burimeve të gazetës “Zëri”,pjesë e delegacionit të LDK-së në Berlin janë: Isa Mustafa, Teuta Sahatqija, Lutfi Haziri, Agim Veliu dhe Valon Halimi.

Zyrtarët më të lartë të EULEX-it dhe të Bashkimit Evropian kanë ditur se në EULEX ka dyshime të forta për korrupsion dhe nepotizëm. Në vend që të ndërhynin, ata kanë heshtur.

Madje e kanë këshilluar që një gjë të tillë ta bëjë edhe prokurorja angleze Maria Bamieh.

Në serinë e dytë të hulumtimit për korrupsionin në EULEX, “Koha Ditore” sjell dëshmi për komunikime të zyrtarëve të BE-së lidhur me zhvillimet brenda EULEX-it. Dëshmitë flasin për një mision të përqendruar në pak njerëz, siç është Jonathan Ratel. Ai e kishte bërë prokuror një shok të tij të banesës pa pasur asnjë ditë përvojë pune si prokuror..

Nëse Partia Demokratike e Kosovës nuk do të thërras seancën konstituive të Kuvendit të Kosovës, Blloku LVAN nuk do të qëndrojë duarkryq. Brenda Bllokut janë duke u diskutuar disa ide se si të veprohet nëse PDK do të vazhdojë me këtë bllokadë.

“Nëse PDK nuk do ta thërras seancën deri ne fund të javës së ardhshme, atëherë do të veprojmë ne”, i ka thënë një zyrtar i lartë i Bllokut i ka thënë Gazetës Blic.

Sipas këtij burimi, deputetja më e re e Kuvendit, Teuta Rugova, do t’i bëjë ftesat për deputetët dhe do të thirret seanca konstituive. Edhe njohësi i fushës së drejtësisë, Dastid Pallaska, ka thënë për media se seancën konstituive mund ta thërras deputetja më e re e Kuvendit të Kosovës, Teuta Rugova.

“Opsioni më i mundshëm është votimi i kandidati i PDK-së, Arsim Bajrami. Dhe, kësisoj të vazhdohet me formimin e qeverisë”, ka thënë ky burim, i cili nuk ka përjashtuar edhe opsione të tjera në rast se PDK do të vazhdoj me bojkot.

Ndërkohë, një zyrtar i lartë i PDK-së i ka thënë Gazetës Blic se ata nuk do të marrin pjesë në Kuvend pa pasur marrëveshje edhe për qeverinë.

“PDK nuk do të thërras seancën konstituive. Nëse e bën Blloku këtë gjë, pra e thërret seancën, realisht bëjnë shkelje të Kushtetutës”, ka thënë ky zyrtar i lartë u PDK-së në kushte anonimiteti. “Neve na takon edhe Qeveria. Pa marrëveshje nuk shkojmë në Kuvend. Ne jemi duke u përgatitur për zgjedhje të reja”, ka thënë ky zyrtar. /Gazeta Blic/

Krijimi i rrethanave për konstituimin e kryetarit dhe organeve të Kuvendit nuk ka ndikuar në tejkalimin e ngërçit politik. PDK-ja përmes kryesueses Flora Brovina po refuzon të thërrasë vazhdimin e seancës, pa një marrëveshje tek presidentja edhe për Qeverinë.

Ndërkaq partitë e bashkuara rreth koalicionit VLAN nuk kanë ndonjë qëndrim se si të veprojnë, nëse Brovina nuk e thërret seancën. Opozita sytë i ka drejtuar nga presidentja Jahjaga, prej së cilës kërkojnë që t’i bëjë presion kryesueses. Por ajo nuk është deklaruar me gjithë lëvizjen nga ana e bllokut.

Nënkryetari i LDK-së, Haki Rugova, ka thënë për “Kohën Ditore” se vonesat për thirrje të seancës janë të paarsyeshme dhe zvarritje e qëllimshme prej PDK-së. Por ai ka mohuar të kenë diskutuar për veprimet që mund t’i ndërmarrin nëse Brovina nuk e thërret seancën këtë javë. Ky koalicion më herët pati thënë se i ka nënshkrimet e nevojshme për ta ftuar vetë seancën, por nuk i ka vënë në zbatim.

“Ne po presim dhe ajo (kryesuesja) duhet t’i ftojë deputetët ta vazhdojnë seancën aty ku ka mbetur. Tashmë janë eliminuar arsyet, pse të mos thirret seanca. Ne nuk kemi ndonjë qëndrim nëse ka refuzim, por presim që presidentja e vendit ta luajë rolin e saj për garantimin e funksionimit të institucioneve. Pra, ajo duhet të marrë një vendim që të mos ketë më tutje vonesa”, ka thënë Rugova. “Pas konstituimit të Kuvendit krijimi i Qeverisë do të jetë më i shpejtë. Në atë periudhë ecën sahati, për shkak se ekzistojnë afatet kohore”./koha ditore/

Gazeta prestigjioze angleze The Guardian e ka pranuar gabimin e rëndë që ka bërë në një shkrim për hetimet e EULEX-it rreth rastit Bllaca 4, ku e akuzon kryeministrin e Kosovës për “lidhje familjare me porositës të vrasësve me pagesë”.

Në artikullin e botuar më 7 nëntor The Guardian në titull shkruante: “Dyshime për lidhje të familjarëve të kryeministrit të Kosovës me vrarës me pagesë”. Në këtë artikull gazeta e quante Azem Sylën si daja i Hashim Thaçit.

Atë ditë stafi i kryeministrit dhe një komunikatë e Zyrës së Kryeministrit sqaruan se ky ishte një artikull tendencioz, me qëllim njollosjen e personalitetit të kryeministrit Thaçi dhe shtetit të Kosovës.

E si duket se këtë e ka kuptuar edhe The Guardian dhe e ka ndryshuar artikullin, duke hequr pjesën për familjarë të kryeministrit dhe duke ndryshuar titullin në “Dyshime për lidhje mes politikanëve të lartë dhe vrasëseve”.

Ndërsa, në fund The Guardian shkruan se “ky artikull është ndryshuar pasi një element i tij po hetohet për verifikim”.

Pas heqjes dorë nga pretendimet për kreun e Kuvendit, blloku paszgjedhor e ka zgjidhur një fije të nyjës politike, ka thënë analisti Artan Muhaxhiri.

Ai vlerëson se pretendimet e bllokut për këtë pozitë ishin joligjore. Sipas tij, tashti është radha e PDK-së të reflektojë në realitetin e ri politik të krijuar, raporton KTV.

Edhe Dren Doli, nga Grupi për Studime Politiko-Juridike, pohon se tashmë nuk ekziston asnjë mundësi që pengon konstituimin e Kuvendit. Doli thotë se pas zgjedhjes së kryetarit të Kuvendit, është legjitime që Partia Demokratike e Kosovës, si parti me më së shumti vota të fituara në zgjedhje, t’u bëjë ftesë partnerëve të tjerë në Kuvendin e Kosovës dhe të kërkojë që të bëjnë koalicionin qeverisës me të.

Partitë e bllokut po e akuzojnë edhe presidenten e vendit, e cila nuk ka ftuar asnjëherë kryesuesen e seancës konstituive, Flora Brovina, që ta thërriste vazhdimin e seancës.

Deputetja e Vetëvendosjes, Albulena Haxhiu, thotë se deri tashti nuk e kanë parë presidenten që të ketë bërë diçka për ta zgjidhur ngërçin, por vetëm ka ftuar liderët në takime, por pa dhënë asnjë alternativë, transmeton Koha.net.

Njohësit e çështjeve politike kanë theksuar se nuk ekzistojnë mundësi ligjore për të shkuar në zgjedhje të jashtëzakonshme për aq kohë sa Kuvendi i Kosovës nuk vendos me votë që të organizojë vendi në zgjedhje apo të shpërndajë vetveten. /KTV/