Për herë të fundit si komisionar për zgjerim, Stephan Fule, sot do ta prezantojë Raportin e Progresit për Kosovën dhe për vendet e tjera që kanë synim anëtarësimin në Bashkimin Evropian.

Për pesë vjetët e ardhshëm, punën e deritashme të Fules do ta ushtrojë Johanes Hahn, i cili nga 1 nëntori do të nisë punën e re.

Edhe ky i fundit, sipas zyrtarëve të lartë në Bruksel, do t’ua kujtojë vendeve të Ballkanit Perëndimor punët që duhet t’i kryejnë para se të anëtarësohen në BE. Megjithatë gjatë mandatit pesëvjeçar, komisionari i ardhshëm nuk pritet që t’ua kumtojë lajmin se ndonjë shtet i Ballkanit, përfshirë edhe Kosovën do të anëtarësohet në BE./Zëri/

Mosfunksionimi i rreth tridhjetë agjencive, ndërmarrjeve dhe institucioneve tjera publike e shtetërore për shkak të moskonstituimit të Kuvendit të Kosovës, mund ta çojë vendin në zgjedhje të shpejta. Ky, në fakt është arsyetimi ligjor që presidentja e vendit Atifete Jahjaga do ta përdorë në rast të një veprimi të tillë, e që nuk pritet të jetë i largët.

Sipas burimeve të gazetës Tribuna, pengesa e vetme drejt zgjedhjeve të reja është vullneti i qytetarëve serb në veri të Kosovës. Atje po bëhen hulumtime nëse do të mund të mbaheshin sërish zgjedhje të suksesshme dhe nëse rezultati del të jetë pozitiv atëherë zgjedhjet e shpejta bëhen të pashmangshme.

Jahjaga ka nisur një seri konsultimesh me liderët e partive politike për tejkalimin e ngërçit politik, por koalicioni paszgjedhor LDK-VV-AAK dhe Nisma në njërën anë dhe PDK në anën tjetër nuk po arrijnë që t`i krijojnë institucionet. Blloku paszgjedhor nuk po e voton kandidatin e PDK-së për kryeparlamentar që i takon sipas kushtetutës së vendit, derisa PDK nuk po heq dorë nga kjo e drejtë. Pa zgjedhjen e kryetarit, Kuvendi mbetet i pakonstituuar dhe kësisoj nuk mund të procedohet në zgjedhjen e qeverisë së re ..

Isa Mustafa, Ramush Haradinaj, Fatmir Limaj dhe Albin Kurti do të takohen sot, në orën 13:00, për ta bërë planin e veprimit për seancën e Kuvendit, të cilën ata e kanë thirrur për të enjten, me nënshkrimet e deputetëve të tyre.

Burime të Politiko.net kanë pohuar se në këtë takim do të vendoset nëse në seancë do të ketë vetëm debat të deputetëve, apo do të ketë edhe votim për Kryeparlamentarin.
Lideri i LDK’së, Isa Mustafa, të cilit i është rezervuar posti i Kryeparlamentarit me Marrëveshjen e Koalicionit, ka deklaruar ditë më parë se më nuk do të kandidojë në rrethana të pasqaruara kushtetuese.

Ndërkohë, nga Blloku përjashtohet ndonjë kandidat tjetër.
Lideri i AAK’së, Ramush Haradinaj ka deklaruar të martën se seanca e ka një rend të ditës – zgjedhjen e Kryetarit dhe Nënkryetarëve të Kuvendit, ndërsa ka pohuar se asaj do t’i paraprijë një debat i deputetëve.

Kështu, Blloku synon ta përmbushë Pikën 127 të Aktgjykimit të Gjykatës Kushtetuese, sipas interpretimit të tyre. Ky është edhe qëllimi i Bllokut, e që për rrjedhojë do të mund të çonte në Gjykatën Kushtetuese.

PDK ka bërë të ditur se nuk do të marrë pjesë në këtë seancë, të cilën e ka quajtur të jashtëligjshme dhe jovalide, ndërkohë që Lista Serbe dhe Grupi 6+ nuk janë prononcuar ende nëse do të shkojnë apo jo.

Kryesuesja e Kuvendit, Flora Brovina, po ashtu ka ftuar për sot në takim partitë parlamentare, për të vendosur se kur duhet të thirret vazhdimi i seancës konstituive. Blloku ka përjashtuar mundësinë që të shkojë në këtë takim. / Politiko.net

Kosova është kthyer mbrapa në procesin e integrimit në Bashkimin Evropian dhe këtë më së miri e dëshmojnë gjetjet e Raportit të Progresit për Kosovën, kanë thënë analistët, shkruan sot Koha Ditore.

Përveç përmbylljes së negociatave për Marrëveshjen e Stabilizim-Asocimit dhe dialogut me Serbinë, ka pak gjëra të tjera në këtë raport për të cilat do të mund të mburrej Kosova.

Njohësi i integrimeve evropiane, Shenoll Muharremi, i ka thënë gazetës se nuk është pritur që Raporti të jetë pozitiv për shkak se çdo ditë jemi dëshmitarë të indikatorëve ekonomikë dhe demokratikë, të cilët tregojnë se Kosova ka humbur hapin me vendet e tjera të rajonit, në rrugën e integrimit drejt BE-së. Ndër ngecjet më të mëdha ai ka përmendur reformën në administratën publike.

Marrëveshjet e arritura ndërmjet Kosovës dhe Serbisë do t’i adresohen për trajtim Komisionit të Venecias, në rast se do të arrijë ta bëjë Qeverinë shumica aktuale parlamentare LDK-LVV-AAK-Nisma, shkruan sot Koha Ditore. Por ka dilema nëse kushtetutshmëria e marrëveshjes do të trajtohet nga ky komision.

Jep këshilla kushtetuese ky institucion që njihet me emrin zyrtar Komisioni Evropian për Demokraci Nëpërmjet Ligjit. Asistenca kushtetuese është midis katër fushave kryesore që trajton.

Përkitazi me këtë pikë, Komisioni ofron opinione ligjore për vendet anëtare.

Ka qenë LVV-ja subjekti politik që ka këmbëngulur ta përfshijë në marrëveshje me bllokun LDK-AAK-Nisma edhe çështjen e marrëveshjeve që Qeveria në detyrë i ka mbërritur me Serbinë

Kryetari i Këshillit Kombëtar të Nismës Për Kosovën, Jakup Krasniqi, vazhdon të shpërndajë për miqtë e tij në Facebook, thënie filozofike.

Kësaj here Krasniqi, u ka dhënë edhe shpjegim këtyre thënieve duke iu referuar gjendjes aktuale.

Ai ndër tjerash ka thënë se ndoshta Misioni i Ri, i Hashim Thaçit, është mision për t’a bërë “Rrush e Kumbulla” Kosovën.

Ja edhe shkrimi i plotë i Krasniqit:

“Ndaje si ta ndash, livadhin lema mua”!

Populli ynë përmes fjalëve të urta ka shpalosur filozofinë e tij të urtë. Në të shumtën e rasteve, kjo filozofi jep shembuj drejtësie, guximi e vendosmërie për ti tejkaluar situatat e vështira në raport me sundimtarët kapadai e të fuqishëm. Në ndonjë rast i janë përvjedhur edhe fjalë të urta skllavërie, nënshtrimi e pa drejtësie, siç janë:

1. “Një dorë që nuk mund ta thyesh, ktheu dhe puthe” dhe

2. “Ndaje si ta ndash, livadhin lema mua”.

E para, sikur është thirrje për nënshtrim. Nënshtrimi është pasoj e qyqarllakut dhe e frikës. Kjo e fundit thuhet se është pa “para”, merr sa të duash dhe zakonisht njerëzit marrin shumë. Ndoshta kjo fjalë ka dalë nga një shpirt skllavi, e cila më vonë i është veshur popullit. Ndërsa e dyta, personifikon sundimtarin kapadai që nuk e pranon drejtësinë kur ajo nuk ndahet sipas vullnetit te të fortit. Është interesant, sot i hasim, te dy llojet e përshkruara: shpirtin e robit që përjarget duke e lavdëruar sundimtarin dhe kapadaiun që nuk e njehë as drejtësinë e as sundimin e ligjit. Përjargëqa ka gjithandej nder ne.

Sundimtari thotë: “ligji duhet ti nënshtrohet interesit tim” apo “ndaje si ta ndash “babo”, e drejta për të qeverisur, është vetëm e imja”. “Këtu, unë vrajë dhe kthjelli” , pasi unë dhe vetëm unë ju kam çliruar, ju bëra Republikën e pavarur dhe tani kam një mision të ri!? Ndoshta “misioni i ri” është me e bë rrush e kumbulla gjithë pasurinë e Kosovës. Pas këtyre kërkesave fillon thirrja në kushtetutshmëri!? (sic!)

Kushtetutë tarake është kjo e jona, sipas interpretimit të “babës”!?
Historia politike makiaveliste ka treguar se sundimtarët tiranë pushtetin politik e mbajnë goxha gjatë dhe kundërshtarët e tyre në të shumtën shfaqen pas përfundimit të jetës (pas vdekjes) ose pasi bien nga froni sundimtaret. Jakov Xoxa thoshte: “Kur rrezohet kau, shtohen thikat, kur rrezohet njeriu, shtohen kritikat”. Ndërsa, kritikat e pas kohe, janë si “kofini pas të vjelave”.

Deputeti i LDK-së, Arben Gashi, thotë se po zbulohet koncepti për dalje nga kriza, mirëpo shtoi se nuk është momenti që ai ta zbulojë.

Sipas tij, opsion është edhe zgjedhja e kryetarit të Kuvendit me konsensus, një kandidat që teknikisht propozohet nga PDK.

“Gjykata Kushtetuese ka kërkuar që deputetët të jenë kreativë. Kreativitetin e tyre ata mund ta japin me plot elemente që mund të merren dhe të pranohen”.

“Koncepti po studiohet dhe nuk është momenti që unë ta zbuloj. Opsioni i dytë që është diskutuar është më i lehtë në dukje, në fazën e parë, por më i vështirë në zbatim. Që do të thotë, zgjedhja e kryetarit të Kuvendit me konsensus nga të gjithë anëtarët, një kandidat, i cili teknikisht propozohet nga PDK dhe pastaj të pozicionohemi për qeverinë”, tha ai në emisionin “Zona B” të Klan Kosovës.

Në pyetjen se çka bëhet nëse herën e parë Presidentja ia jep zotit Thaçi dhe herën e dytë ia jep dikujt tjetër ose e propozon ajo vet dhe ju nuk e votoni.

“Mendoj se do të ishte sjellje e papërgjegjshme, sepse ajo e ka detyrë të konsultohet dhe të konstatojë nga konsultimet që i bën”.

Por sjellja e papërgjegjshme, sipas Gashit, do t’i detyronte ata ta çonin vendin në zgjedhje dhe zgjedhjet do ta rrezikonin stabilitetin e vendit.

“Dhe, ndër veprimet e para që do të duhej t’i merrte Kuvendi i ardhshëm është shkarkimi i Presidentes”

Vendim i guximshëm konsiderohet vazhdimi i qëndrimeve të tashme, vlerësoi ai.

“Veprim i guximshëm do të jetë ky veprim i cili do të zgjedhë një kryetar të konsensusit dhe të guxosh t’ia japësh mundësinë Presidentes që ajo ta nominojë kandidatin në bazë të konsultimeve dhe parashikimeve kushtetuese”.

Nesër, saktësisht bëhen katër muaj që kur Hashim Thaçi dhe Partia Demokratike e Kosovës, i fituan zgjedhjet e përgjithshme për të tretën herë me radhë.

Mirëpo, kjo fitore e Thaçit duket se mbeti në gjysmë. Madje, PDK-së e Thaçit festimi i fitores nuk u zgjati me shumë se 24 orë. Për këtë u përkujdesën partitë që deri atë kohë ishin opozitë, Lidhja Demokratike e Kosovës dhe Aleanca për Ardhmërinë e Kosovës së bashku me Nismën, e cila doli nga PDK, që të arrijnë një marrëveshje, e që deri më tani doli të jetë edhe bllokuese që Thaçi të mos mund ta formoj qeverinë.

Pa kaluar as 48 orë nga mbyllja e kutive të votimit, liderët e këtyre tre partive, Isa Mustafa, Ramush Haradinaj e Fatmir Limaj arrijnë të nënshkruajnë një marrëveshje për të bashkëqeverisur në katër vitet e ardhshme, e cila duket se e zuri në befasi PDK-në dhe Hashim Thaçin.

Si u zunë në befasi Thaçi e PDK?

Madje, siç merr vesh Gazeta Blic, Kryetari i PDK-së, Hashim Thaçi ishte i relaksuar pas fitores, dhe po i diskutonte me njerëzit e tij më të afërt se kujt prej partive politike t’i bëjë ofertë dhe çka t’u u ofroj për bashkëqeverisje.

“Marrëveshja LDK- AAK- Nisma na ka zënë të gjithëve në PDK në befasi”, i ka thënë Gazetës Blic një zyrtar i lartë në kushte anonimiteti.

Tashmë nuk është sekret që vetëm disa çaste para nënshkrimit të marrëveshjes së treshes, ishte Thaçi ai që secilin prej tyre, Mustafën, Haradinajn dhe Limajn i kishte telefonuar dhe lutur që të mos e nënshkruanin marrëveshjen dhe se ai do të ishte i hapur për çdo “opcion”.

Sidoqoftë, tash e katër muaj, që prej se kanë përfunduar zgjedhjet dhe që është nënshkruar marrëveshja LDK- AAK- Nisma, drejtuesit e PDK-së, insistojnë që atyre u takon pushteti, si partia më e madhe e dalë nga zgjedhjet me mbi 30 për qind.

I dyti i PDK-së, Hajredin Kuçi vetëm një ditë pas nënshkrimit të marrëveshjes LDK- AAK- Nisma, në një intervistë i kishte thënë Gazetës Blic se kjo marrëveshje është një eufori pas zgjedhore. Ai ishte shprehur i bindur se Blloku do të thyhet me kalimin e kohës. Mirëpo, as pas katër muajsh një gjë e tillë nuk ndodhi.

Edhe Adem Grabovci e ka pranuar se PDK nuk e kishte pritur, madje as nuk e kishte menduar që pas përfundimit të zgjedhjeve edhe pse do të dalë partia e parë të mos ketë asnjë partner për bashkëqeverisje. “Askush nuk e ka pritur sjelljen e tillë të atyre partive politike, të cilët jo vetëm që e kanë bllokuar veten, por e kanë bllokuar edhe vendin”, ka thënë Grabovci për Gazetën Blic.
Në anën tjetër, koalicionit LDK- AAK- Nisma, pas vendimit të Gjykatës Kushtetuese ku vetëm PDK-së i njihet e drejta për kryetar të Kuvendit, i bashkohet edhe Lëvizja Vetëvendosje e Albin Kurtit, duke e përforcuar edhe më shumë Bllokun.

Analistët politik, vlerësuan se sado që PDK po mundohet që të përçajë Bllokun, ata edhe më shumë po forcohen.

Vendimi i Gjykatës Kushtetuese, i cili u vlerësua nga shumë njohës të së drejtës Kushtetuese si kontravers, duket se e ka thelluar edhe më shumë krizën politike.

Kur as Jahjaga nuk bën punë

As ndërhyrja e presidentes Atifete Jahjaga nuk po mund që të tejkaloj ngërçin politik. Madje, as takimet që ajo sot i ka zhvilluar me liderët e partive politike nuk ka dhënë shpresa se mund të dilet nga kjo situatë. Krejt çka ka bërë ajo pas këtij takimi, është alarmimi i saj për këtë gjendje në të cilën ndodhet vendi.

Derisa çdo ditë e më shumë po zvarritet krijimi i institucioneve dhe thellimi i krizës politike, ka filluar të humb edhe durimi i liderëve. Sot, edhe kryetari i PDK-së, Hashim Thaçi edhe ai i AAK-së, Ramush Haradinaj, të dy këta të nominuar nga dy blloqet politike për kryeministër, kanë folur me një gjuhë shumë të ashpër dhe kanë shprehur shenja nervozizmi.

Dhe tani katër muaj pas zgjedhjeve, shtrohet pyetja e famshme, që Hashim Thaçi e përdorte në zgjedhjet lokale, edhe…?

Adem Grabovci ka thënë se e vetmja mundësi që vendi të dalë nga kriza politike është respektimi i Kushtetutës, i ligjeve dhe i aktgjykimit të Gjykatës Kushtetuese.

Që duket se jo vetëm analistët politik, por as partitë politike deri më tani nuk kanë përgjigje për t’i dhënë. Ndoshta, ndërhyrja ndërkombëtare mund të kryente punë për tejkalimin e kësaj situate. Ose, do të vinte në shprehje edhe opsioni i fundit, që mund të ishin zgjedhjet e jashtëzakonshme…/Gazeta Blic/