Ministria e Punëve të Jashtme ende s’ka hartuar një listë me numrin e saktë të shteteve që e kanë njohur Republikën e Kosovës. Sipas faqes zyrtare të MPJ-së, 96 është numri i shteteve që deri më tani ia kanë njohur subjektivitetin Kosovës.

Aty figurojnë shtete për të cilat nuk ka nota verbale, derisa janë injoruar vendet që kanë konfirmuar njohjet, shkruan Koha Ditore.

Zyrtarë të Ministrisë së Jashtme kanë thënë se me njohjen e fundit nga Ishujt Solomon- ishull në Oqeani, numri i shteteve që e kanë njohur Kosovën ka shkuar në 108. Paqartësitë rreth njohjeve ata i kanë arsyetuar me ridizajnimin e faqes, për të cilën ishte thënë se do të përditësohet qysh në shkurt të këtij viti.

“Kur të bëhet dizajni dhe plani i faqes së re do të vendosen edhe njohjet e sakta. Aktualisht faqja është në mirëmbajtje minimale. Por janë 108 njohje dhe lista e njohjeve është në Ministrinë e Jashtme”, ka thënë zëvendësministri i Punëve të Jashtme, Petrit Selimi.

Lideri i AAK’së Ramush Haradinaj, është shprehur i bindur se në pjesën e dytë të shtatorit do ta drejtojë Kosovën si kryeministër për katër vitet e ardhshme.

Ai, në një intervistë për Epokën e re,  ka bërë të qartë se koalicioni LDK-AAK-Nisma i ka numrat për ta formuar Qeverinë dhe ka përjashtuar çfarëdo bashkëqeverisje me PDK’në.

Haradinaj ka thënë se do të ishte mirë për PDK’në dhe Thacin që këtë herë ta japin kontribtin duke qenë pjesë e opozitës.

Haradinaj ka deklaruar se do ta udhëheqë dialogun me Serbinë, por është shprehur i gatshëm t’i japë përgjegjësi në këtë proces edhe Lëvizjes Vetëvendosje.

Ai ka thënë se koalicioni ende nuk i ka ndarë postet ministrore por sipas tij, hisen e qeverisjes e kanë ndarë në bazë të kuotës.

E indinjuar me mungesën e përparimit në zbardhjen e vrasjes së Elvis Pistës, familja e tij i ka shkruar një letër kryeministrit të Kosovës, Hashim Thaçi, nga i cili kërkon të ushtrojë ndikimin e tij “politik dhe institucional” ndaj organeve të hetuesisë dhe të drejtësisë, që hetimet rreth vrasjes së Pistës të përmbyllen dhe përgjegjësit për këtë krim të dalin para drejtësisë.

Në letër – një kopje të së cilës “Koha Ditore” e ka siguruar nga familjarët e Pistës, dhe e cila u është drejtuar përfaqësuesve të institucioneve të Kosovës, prej të cilëve në mënyrë eksplicite përmendet vetëm kryeministri Thaçi – shprehet besim tek institucionet e Kosovës dhe kryeministri Thaçi, por paralajmërohet se “ky besim mund të zbehet në rast se vazhdon të mos ketë rezultate konkrete nga hetimet. Ky besim mund të shndërrohet në zhgënjim, e zhgënjimi është i madh edhe në mesin e qytetarëve të Kosovës, e qytetarëve të Rahovecit”.

Asnjëri prej të arrestuarve për terrorizëm nuk dyshohet për planifikim sulmesh në Kosovë, por vetëm për pjesëmarrje në grup terrorist në Siri e Irak, mëson Koha Ditore.

Lajmi se të dyshuarit planifikonin sulm në njërën prej ngjarjeve më të mëdha kulturore në vend “DokuFest” është i pavërtetë, kanë thënë për gazetën zyrtarët policorë.

Madje as në kërkesën e prokurorit për paraburgim dhe në urdhërarrestet që ka siguruar Koha Ditore nuk ka dyshim për planifikim sulmesh në Kosovë.

Mediat kanë raportuar se njëri prej të arrestuarve dyshohet se kishte në plan të kryente një sulm në “DokuFest”, teksa thirreshin në burime anonime. I njëjti person, thoshte ky burim, ka pasur për qëllim të dërgojë mesazh se Prizreni është qytet mysliman si kundërpërgjigje e donacioneve amerikane për festivalin.

40 të dyshuarve për terrorizëm u është vazhduar masa e ndalimit edhe për 48 orë të tjera, raporton RTK.

Në seancën e parë dëgjimore, 5 nga të arrestuarit kanë pranuar se kanë qenë për vizitë në Siri, por kanë mohuar pjesëmarrjen në luftime apo në organizime terroriste.

Të gjithë të arrestuarit e tjerë e kanë mohuar së kanë qenë pjesë e grupeve terroriste ISIS dhe Al-Nusra. Ndërsa pala mbrojtëse është shprehur e bindur në pafajësinë e klientëve të tyre, duke e cilësuar arrestimin spektakël dhe në dëm të vendit.

Vendimi për masa të tjera ndaj të arrestuarve pritet të merret të enjten. 40 të arrestuarit, përveç pjesëmarrjes në luftën e Sirisë dhe Irakut, dyshohen edhe për rekrutimin e të rinjve kosovarë për pjesëmarrje në luftërat në Lindjen e Mesme.

Edhe një person tjetër nën dyshimin për terrorizëm është arrestuar sot në qytetin e Prizrenit.

I arrestuari është N. Abdyli, i cili dyshohet se ka qenë pjesë e rrjetit të grupit të të arrestuarve që dyshohen për pjesëmarrje dhe bashkëpunim me organizatat terroriste ISIS dhe Al-Nusra, raporton rtk.

Personi në fjalë ka pasur fletëarrest nga Prokuroria Speciale në Prishtinë. Mësohet se policia do të vazhdojë edhe më tej me operacionin për arrestimet e të kërkuarve të tjerë të dyshuar për pjesëmarrje në luftërat në Lindje të Mesme.