Situata e krijuar pas mbledhjes së Kryesisë në dorëheqje të Kuvendit të Kosovës ka aktivizuar sërish Partinë Demokratike të Kosovës, e cila vazhdon të insistojë se posti i kryetarit të Kuvendit i takon kësaj partie, e cila ka dalë fituese në zgjedhjet e 8 qershorit.

Një prej nënkryetarëve të PDK-së në kushte anonimiteti i ka thënë “Epokës së re” se sot (e hënë) do të mblidhet Kryesia e PDK-së, e cila do të diskutojë për hapat që do të ndërmerren nga kjo parti në seancën e 17 korrikut, ku do të bëhet konstituimi i Kuvendit të ri të Kosovës.

“Kryesia e PDK-së do të mblidhet sot (e hënë) për të diskutuar rreth çështjes së kryeparlamentarit. Në këtë takim do të ndërmerren të gjitha hapat që do të ndërmarrë PDK-ja gjatë seancës konstituive. Nuk ka asnjë dyshim se kyeparlamentari i takon PDK-së dhe partnerëve të saj”, ka thënë një nga nënkryetarët e PDK-së.

Në këtë kontekst, ai ka thënë se PDK-ja nuk e ka ndërmend të heqë dorë nga pozita e kryeparlamentarit të Kosovës.

“PDK-ja si parti fituese nuk e ka ndërmend të lëshojë pe karshi pozitës së kryeparlamentarit dhe formimit të qeverisë. Në këtë drejtim askush nuk mund të shkelë mbi vullnetin e qytetarëve të Kosovës, të cilët me votën e tyre ia kanë treguar secilës parti dhe individi veç e veç”, ka thënë ky nënkryetar i PDK-së, duke bërë me dije se do t’i drejtohen edhe Gjykatës Kushtetuese për kryeparlamentarin, nëse blloku opozitar vazhdon të barrikadohet karshi kësaj çështje.

“Nëse blloku opozitar vazhdon të insistojë në këtë çështje, atëherë opsioni ynë i fundit mbetet Gjykata Kushtetuese”, ka thënë ai.

(E plotësuar) Ka filluar takimi në selinë e AAK-së ndërmjet liderëve të LDK-së, AAK-së, NISMA-së dhe të Vetëvendosje!-s, ku pritet të vendoset për arritjen e marrëveshjes ose jo me Vetëvendosje!-n.

Blloku dhe VV takohen për Marrëveshjen

Blloku Opozitar, i krijuar nga LDK, AAK dhe Nisma, bashkë me Vetëvendosjen, do të ulen sot në orën 10, për t’i dhënë përgjigje njëri-tjetrit nëse pajtohen ose jo për parimet e marrëveshjes së tyre politike lidhur me qeverisjen e vendit.

Takimi i paralajmëruar për të dielën është shtyrë për sot, siç ka shpjeguar VV, me kërkesën e Bllokut Opozitar, “për arsye private, familjare”.

Afati kohor për të dielën fillimisht kishte tingëlluar si “ultimatum” i Albin Kurtit, por ndryshimi i planit për takimin, gjatë ditës së djeshme, nuk solli asnjë reagim të ashpër nga Vetëvendosje.
Isa Mustafa, Ramush Haradinaj, Fatmir Limaj dhe Albin Kurti pritet të vendosin si do të ecin më tutje.

Kurti ka kërkuar që marrëveshja eventuale mes tyre të kryhet para seancës konstituive të Kuvendit, e caktuar të mbahet më 17 korrik, në mënyrë që të ketë kohë të mjaftueshme për ta mbajtur referendumin me anëtarësinë e Vetëvendosjes – prej të cilit do të dalë fjala përfundimtare.

Pika më e ndjeshme është Dialogu i Brukselit.

Ndihmës-Sekretarja Amerikane të Shtetit, Victoria Nuland, pas vizitës së djeshme në Prishtinë, ka pohuar të ketë marrë garanci nga liderët politikë kosovarë se Dialogu me Serbinë do të vazhdojë.

Nuland ka kërkuar që Dialogu të fillojë menjëherë pas formimit të Qeverisë së Kosovës.
Blloku Opozitar, siç pohohet, është optimist që marrëveshja me VV mund të arrihet.
Nëse është kështu dhe nëse Vetëvendosje pranon të nënshkruajë marrëveshjen, atëherë duket se Albin Kurtit i duhet të heqë dorë nga disa “kushte të forta” që fillimisht i kishte parashtruar./Politiko.net/

Ambasadori i Jashtëzakonshëm dhe Fuqiplotë i Republikës së Shqipërisë në Republikën e Kosovës, Qemal Minxhozi, e ka vlerësuar si “delikat” krijimin e një koalicioni të ri, të përbërë nga LDK, AAK dhe Nisma, shkruan sot Koha Ditore. Ndërkohë që situatën paszgjedhore e ka konsideruar si të vështirë, duke shprehur njëherësh drojën për një përkeqësim të situatës.

Sipas ambasadorit shqiptar në Kosovë, Qemal Minxhozi, lëvizja “Vetëvendosje” ka një pozicion tepër kyç dhe interesant për zgjidhjen e krizës, ndërsa Kushtetuta e Kosovës është e re dhe ka disa vakuume që nuk janë të parashikuara

Këto komente kryediplomati shqiptar në Prishtinë i ka bërë në Komisionin për Politikë të Jashtme të Parlamentit të Shqipërisë, në fundjavë, ku ishte thirrur në një seancë informuese rreth zhvillimeve të fundit në Kosovë.

Fillimisht ambasadori Minxhozi bëri një pasqyrim të situatës së zgjedhjeve të zhvilluara më 8 qershor dhe, sipas tij, ato ishin një hap pozitiv për konsolidimin e demokracisë në Kosovë, ishin zgjedhje të lira, të ndershme, të qeta dhe që plotësuan të gjithë parametrat që kërkon komuniteti ndërkombëtar, por dhe vetë populli i Kosovës.

Derisa konfirmojnë se Brukseli pret qeverinë e re, burimet demantojnë ministrin e Jashtëm të Kosovës, Enver Hoxhaj, shkruan sot Koha Ditore.

Burimet e BE-së kanë demantuar paralajmërimet e Hoxhajt, se “së shpejti mund të nënshkruhet MSA-ja”. Këto burime pohojnë se kjo Marrëveshje do të mund të “inicializohej” (parafohej) e jo të nënshkruhej së shpejti.

Inicializimi është vetëm teknik dhe do të thotë se palët pajtohen me tekstin e marrëveshjes. Edhe pse është fjala vetëm për vënien e inicialeve në tekstin e MSA-së edhe për këtë disa qarqe në BE mendojnë se duhet pritur formimin e qeverisë së re, ndërsa disa shtete duan që inicializimi të bëhet tash, sepse kjo është vetëm çështje teknike

“MSA-ja me Kosovën është bërë duke respektuar neutralitetin e BE-së ndaj statusit dhe ajo nuk e trajton Kosovën si shtet të pavarur, por më shumë bazohet në kontratat të cilat BE-ja i ka me entitetet të cilat nuk janë shtete sovrane. Kjo ka qenë e vetmja mënyrë për të pasur mbështetjen e Këshillit (vendoset me konsensusin e 28 shteteve anëtare) ku ende janë 5 vende të cilat nuk e njohin Kosovën si shtet”, ka thënë një diplomat i BE-së i përfshirë në procesin e Stabilizim Asociimit.

Kosova gjendet në një moment tepër të rëndësishëm demokratik, spektakolar, por edhe sfidues, kur pas zgjedhjeve të lira e të drejta i duhet ta krijojë Qeverinë e re në mënyrë kushtetuese. Kështu e cilësoi momentin e tanishëm politik në vend Victoria Nuland, ndihmëssekretare e Shtetit e SHBA-së për Evropë dhe Azi, e cila qëndroi të dielën në Kosovë.

Në një intervistë ekskluzive për “Kohën Ditore”, Nuland foli për situatën aktuale politike në Kosovë, duke u shprehu e bindur se liderët kosovarë, një pjesë e të cilëve edhe i ka takuar, do ta përdorin këtë moment me mençuri për t’i dhënë vendit një Qeveri të re, në mënyrë transparente dhe në përputhje me ligjet e vendit.
SHBA-ja, tha ajo, pret të shohë një rezultat ku dialogu do të vazhdojë.

Derisa insistoi se nuk i takon SHBA-së të përcaktojë mënyrën se si të arrihet përmbyllja e procesit zgjedhor, ndihmëssekretarja Nuland tregoi qartë se çka pret nga procesi politik në vend.

Lexojeni të plotë intervistën e Nuland në numrin e sotëm të Kohës Ditore, ku ajo ka folur edhe për perspektivën ekonomike dhe atë të energjisë në Kosovë dhe rajon, për nevojën e luftimit të korrupsionit, si dhe përballjen me sfidën e ekstremizmit fetar.

Në qendër të qytetit të Prizrenit, në bodrumin e njërës nga ndërtesat që gjendet në Sheshin e Lidhjes, ka 20 ditë që kanë depërtuar ujërat e zeza, sipas banorëve të lagjes, krejt kjo ka ndodhur për shkak të ndërtimit të sheshit nga Komuna e Prizrenit.

Banorët e ndërtesës pranë sheshit ku po kryhen punimet përveçse nuk po munden t’i shfrytëzojnë hapësirat e bodrumit ankohen se po kanë vështirësi të qëndrojnë në këtë objekt nga kundërmimi i rëndë i kanalizimit.

‘’Kur kanë filluar me ndërtu rrugën, e kanë çelë kanalizimin, era po vjen, kur kemi dalë e kemi pa se bodrumi jonë është mbushë”, thotë Suzi Celina, banor i kësaj ndërtese.

Bodrumi i këtij objekti të banimit kolektiv ku jetojnë 20 familje është mbushur nga ujërat e zeza. I moshuari Shaban Krusha që gjithashtu jeton në ndërtesë thotë se uji është mbledhur në bodrum, ngase gjatë punimeve në Sheshin e Lidhjes gypat e ndërtesës janë dëmtuar dhe mbyllur.

Ai tregon se gypat e rinj të kanalizimit në shesh janë vendosur mbi ata që e lidhnin ndërtesën me rrjetin e kanalizimit.

“Krejt kanalet, krejt gypat i kanë mshelë, ata kanë pas vytë që kur i kanë qitë gypat është dashtë me hy nën këta gypa, jo mbi ta”, thotë Krusha.

Suzi Celina tregon thellësinë e ujërave të zeza në bodrumin e ndërtesës.

“Thellë është gjysmë metre, bodrumet janë të banorëve’’, thotë Celina.

Zëdhënësi i Komunës së Prizrenit Ymer Berisha problemet me kanalizim të kësaj ndërtese i lidh me vjetërsinë e rrjetit të gypave të saj.

“ Gjuha e ekspertëve dhe teknikëve na jep raport tjetër, jo që tani është blloku, se nuk është blloku. Çdo projekt që niset, që e realizon komuna ka kujdesin e ruajtjes së interesit të publikut, të qytetarit, por kapaciteti i kanalizimit i ndërtuar para 40- 50 vjetëve, edhe rritja e banorëve për shfrytëzim të atyre ndërtesave është në shpërputhje’’, arsyetohet Berisha.

Por banorët shpjegojnë se para fillimit të punimeve nuk kanë pasur probleme me kanalizim.

‘’Këto sende na nuk i kemi pasë. Kjo gjendje është kriju qitash kur kanë fillu kta me punu”, thotë Krusha

Zëdhënësi i komunës dhe këshilltari i Ramadan Mujës porosit banorët se problemi i kanalizimit do të zgjidhet në vjeshtë, atëherë kur do të fillojë faza e punimit nëntokësor të projektit.

‘’Jemi shumë të interesuar që dikund nga vjeshta do të futemi edhe në infrastrukturën nëntokësore, ku do të inkorporohen edhe i gjithë rrjeti i këtyre kanalizimeve në kanalizimin modern të ri dhe besojmë se në vjeshtë do të zgjidhet njëherë e mirë problemi i ujërave që janë tani në këto bodrume” thotë Berisha.

Ndërtesa, bodrumi i së cilës është mbuluar nga ujërat e zeza ndodhet në qendër të Prizrenit në “Shatërvan”./Kallxo.com/