Ministri në detyrë i Punëve të Jashtme, Enver Hoxhaj, para pak minutash ka bërë publik një lajm të mirë për Kosovën.

Hoxhaj, në një postim në Facebook, ka bërë me dije se Ishujt Solomon sapo kanë marrë vendimin për njohjen e Kosovës shtet të pavarur.

“Një tjetër lajm i mirë për Kosovën. Ishujt Solomon sapo e kanë njohur pavarësinë e Kosovës duke u bërë vendi i 108 që e marrin këtë vendim. Urime qytetarëve të Kosovës”, ka shkruar Hoxhaj. /Telegrafi/

Pamjet e vuajtjeve të komunitetit Jezidi nga pjesëtarët e ISIS-it në Irak, po e kthejnë 15 vite mbrapa Gramoz Berishën nga Suhareka. Ai i kishte mbijetuar masakrës se forcave serbe në vitin 1999, kur u vranë mbi 50 anëtarë të kësaj familjeje.

“Më 29 mars 1999 ka ndodh masakra ma e madhe në Suharekë. Këtu janë vra 50 anëtar të familjes. Kemi shpëtuar vetëm unë, nëna dhe gruaja e axhës”, thotë Berisha për Klan Kosova.

Atij i kujtohen edhe kolonat e gjata të shqiptarëve që dëboheshin nga shtëpitë e tyre. Ndërsa, kujtimet e tmerrit që përjetoi në lokalin fatal të Suharekës, ai ende i ka të freskëta. Madje, Gramozi nuk dëshiron as ta shoh këtë vend në qytetin e tij. Prandaj, dëshiron të shpërngulet për të jetuar në Prishtinë.

Për të mos përjetuar të tjerët vuajtjet e kosovarëve në luftë, ai u lutet bashkëkombësve të tij të mos shkojnë për të luftuar në Irak e Siri.

“Ju kisha lutur, mos të ndodh diçka si familjes sonë, si kemi vuajtur; mos të ndodh kjo në asnjë vend të botës, e aq më pak që ato vrasje të bëhen prej shqiptarëve”, thotë Berisha.

Dhjetëra kosovarë i janë bashkuar grupit terrorist të ISIS-it për të luftuar në vendet e Lindjes së Mesme. Më i njohuri prej tyre është Lavdrim Muhaxheri, i cili ka postuar foto në rrjete sociale duke i prerë kokën një të mituri.

16 vjeqarja Rebeka Rexhepi, vajza e cila vuante nga sëmundja e kacerit, sot është shëruar plotësisht.

Këtë e ka bërë të ditur nëna e saj Xheraldina, e cila përmes një shkrimi në rrjetin social Facebook, ka falënderuar të gjithë ata që ndihmuan për shërimin e saj.

“My baby is kancer free!!!!!!! Miq, Re Beka sot zyrtarisht është e shëruar”, ka shkruar në Facebook.

Ajo ka thënë se kanceri nuk është lojë dhe që nuk duhet mashtruar, përderisa ka treguar se si familja e saj së bashku me të tjerët ka fituar betejën e madhe, por që lufta vazhdon.

Xheraldina ka treguar se ajo dhe vajza e saj Rebeka do të kthehen shumë shpejt në shtëpi dhe se të gjithë se bashku do të festojnë për shërimin e vajzës së saj.

Sipas një njoftimi të misionit evropian për sundim të ligjit, EULEX, Prokuroria Speciale e Kosovës ka ngritur aktakuzë ndaj pesë personave me dyshimin se kanë kryer krime lufte dhe vrasje të rëndë.

Njoftimi i EULEX-it thotë se aktakuza është bërë në Gjykatën Themelore të Mitrovicës, ndërsa njëri nga të pandehurit akuzohet për nxitje për të kryer krime të luftës “në prill të vitit 1999”.

“Po ashtu, ai dhe një i pandehur tjetër akuzohen për nxitje në bashkëkryerje për të kryer veprat e vrasjes së rëndë dhe tentim vrasjes së rëndë në shkurt të vitit 2000. Tre të pandehurit e tjerë akuzohen për veprat e vrasjes së rëndë dhe tentim vrasjes së rëndë në shkurt të vitit 2000”, thuhet në fund të njoftimit të EULEX-it.

40 personat e arrestuar një ditë më parë nga Policia e Kosovës me akuzën e terrorizmit dhe pjesëmarrjes në luftërat jashtë vendit në radhët e organizatave të shpallura terroriste si ISIS dhe al-Nusra, u shoqëruan mesditën e së martës përpara gjykatës.

Për shkak të numrit të madh të personave të ndaluar, është dashur zhvendosja e gjykatës në një nga kinematë e Prishtinës.

Të arrestuarit u shoqëruan nën masa të forta sigurie nga ana e Policisë së Kosovës, ku ishin angazhuar edhe forcat speciale.

Njëri prej të arrestuarve dyshohet se kishte në plan të kryente një sulm në Doku Fest, ngjarja më e madhe kulturore në Kosovë, tha për Top Channel një burim zyrtar në kushte anonimati.

I njëjti person, thotë burimi, ka pasur për qëllim të dërgojë mesazh se Prizreni është qytet mysliman si kundërpërgjigje e donacioneve amerikane për festivalin.

Prokurori i çështjes, Blerim Isufaj, në një konferencë për shtyp tha se hetimet e luftës kundër terrorizmit vazhdojnë dhe në mesin e të dyshuarve ka edhe imamë xhamish, ndonëse ata nuk janë arrestuar.

Pyetjes së gazetarëve nëse grupi kishte në plan të kryente sulme terroriste, prokurori i rastit dha këtë përgjigje: “Aktualisht jemi në fazën e parë të veprimit. Nuk mund të konfirmojmë gjë tjetër, por të jeni të sigurt se do analizojmë çdo provë që kemi siguruar”.

Në kuadër të operacionit policor është mbyllur edhe xhamia që ka funksionuar në mënyrë ilegale dhe ku dyshohet se në kuadër të mësimeve fetare është bërë edhe rekrutimi i njerëzve për luftën e Sirisë.

Burime zyrtare bëjnë të ditur se numri i të kërkuarve kalon 200-n, ndërsa në mesin e tyre është edhe një femër 23-vjeçare nga Komuna e Prishtinës, e cila dyshohet se ka shkuar në Siri.

Në listën e policisë, të cilën e ka parë Top Channel, është edhe serbi me inicialet D.J. nga komuna e Parteshit, i cili së fundmi është konvertuar në mysliman dhe ndodhet në Siri. Autoritetet dyshojnë se D.J. është i infiltruar nga shërbimi sekret serb.

Numri më i madh i të arrestuarve është nga qyteti i Ferizajt, gjithsej 11 të arrestuar, i pasuar nga Prishtina me tetë të arrestuar, Gjilani me shtatë, Prizreni dhe Mitrovica me nga pesë dhe katër në Pejë. /TCH/