Analistë dhe njohës të rrethanave politike kanë thënë për Telegrafin se dorëheqja është përgjegjësi morale e kryetarit të Prizrenit, Ramadan Muja. Por, ata kanë vlerësime të ndryshme ndaj protestave që po zhvillohen para “Shtëpisë së Bardhë” – ku po kërkohet dorëheqja e të parit të Prizrenit.

Analisti Shpend Kursani mendon se presioni i shoqërisë civile dhe protestuesve do ta detyrojë Mujën që të jep dorëheqje.

Ndërsa, Bexhet Shala ka theksuar se nuk i pëlqen krijimi i task – forcave (grupe protestuesish që protestojnë nga njëri vend në tjetrin) përmes të cilave kërkohen “kokat” e krerëve të institucioneve.

Sipas tij, nëse kryetari i Prizrenit do ta pyeste ndërgjegjen, ai deri më tani nuk do të duhej të ushtronte pozitën e tij, “mirëpo në vendin tonë vlerat morale moti e kanë humbur kuptimin”.

“Konsideroj se nuk është në rregull që protestat të shfrytëzohen nga subjektet për poena politik, dhe të përdoret një gjuhë e cila nxit urrejtje dhe denigron tej mase ushtruesit e posteve publike”, ka thënë ai për Telegrafin.

Shala mendon se shoqëria kosovare nuk duhet të vendos standarde të dyfishta përballë keqpërdoruesve të pushtetit, por për të gjithë të gjykohen në raport me atë që e kanë bërë, sepse sipas tij, ka individë të cilët kanë abuzuar me pushtetin dhe askush deri më tani nuk e ka kërkuar “kokën” e tyre.

“Ramadan Muja duhet të dorëhiqet në mënyrë që të përfundojë përplasja në mes policisë dhe protestuesve, dhe të mos shkaktohen lëndime eventuale në mesin e këtyre palëve”, ka vlerësuar Kursani, i cili mendon se i pari i Prizrenit duhet që ta respektojë kodin moral, sikurse çdo politikan tjetër, duke u larguar menjëherë nga pozita e tij.

“Konsistenca e protestuesve do ta detyrojë Mujën që të jap dorëheqje, dhe ta arrijnë qëllimin e tyre final, por e keqja e kësaj është se duhet të presin se cilat institucione do t’i bëjë ‘kurban’ kryetari i Prizrenit”, ka thënë Kursani.

Ndryshe, kryetari i Komunës së Prizrenit, Ramadan Muja, nuk ka dhënë dorëheqje ka pezulluar postin e kryetarit.

Ramadan Muja nuk e ka informuar Ministrinë e Administrimit të Pushtetit Lokal për vendimin e tij për pezullim të postit.

MAPL-ja ka thënë se nuk është informuar zyrtarisht për vendimin e Kryetarit të Komunës së Prizrenit, Ramadan Muja, për pezullim të vetvetes nga posti i Kryetarit. Zëdhënësja e MAPL-së, Lumnije Demi, ka thënë për lajmi.net se kjo ministri do ta bëjë vlerësimin e kësaj situate pasi ta marrë njoftimin zyrtar.

“Ministria e Administrimit të Pushtetit Lokal ende nuk e pranuar në mënyrë zyrtare njoftimin për pezullimin e detyrës së Kryetarit të komunës së Prizrenit”.

“Pas pranimit të njoftimit në mënyrë zyrtare, Ministria e Administrimit të Pushtetit Lokal bazuar në mandatin ligjor do të bëjë vlerësimin e këtij rasti dhe opinioni publik do të njoftohet me kohë”, ka thënë Demi.

Pas vendimit të Ramadan Mujës për pezullim të pozitës së kryetarit të Prizrenit, nuk janë pezulluar edhe pakënaqësitë e të tjerëve që dëshirojnë dorëheqjen e tij.

Kryetari i “Ec ma ndryshe”, Hajrullah Çeku, thotë se nuk do ta pranojë një vendim të tillë, por do të vazhdojnë të kërkojnë dorëheqjen e Mujës edhe të nesërmen me anë të protestës, që, thotë se do të jetë paqësore.

“Nuk do ta pranojmë këtë farë lloj vendimi i cili nuk ka kurrfarë bazë ligjore”, tha Çeku për emisionin InfoMagazinë në Klan Kosova, citon lajmi.net.

“Ju e shihni edhe në tekstin e vendimit askund nuk thirret vendimi në ndonjë bazë ligjore. Sepse, nuk ka bazë ligjore”.

“Pezullimi për ne nuk do të thotë kurrgjë. Të njëjtën kohë për neve është një përpjekje e kryetarit Muja për ta evituar aktin e dorëheqjes”.

“Dorëheqja si akt moral ishte dashur të vije në fillim por nuk ka ardhur, megjithatë, ne ende presim”.

Në anën tjetër, eksperti i pushtetit lokal, Besnik Tahiri, cilëson veprimin e kryetarit të Prizrenit, si një veprim nga i cili ligji për qeverisje lokale nuk njeh një nen të tillë.

“Kjo është një problematikë shumë e rrallë. Këtu duhet të reagojë Ministria e Pushtetit Lokal. Ajo që dihet saktësisht është që një kryetar i cili nuk ushtron detyrën e tij pa arsye Komuna duhet të shkojë në zgjedhje”.

“Në këtë rast kryetari është në mes të dy pozicioneve, të dorëhiqet, ose ta shfrytëzojë zbrazëtinë ligjore, nenin 56 piken e, do të thotë, kryetari duhet të lirojë detyrën e vet deri sa ka një vendim të ligjit e cila është 30 ditë”.

Tahiri ka thënë se pezullimi i detyrës së tij, nënkupton mosshkuarja në punë, e cila bie ndesh me interesat e qytetarëve, të cilët dhanë votën për një kryetar aktiv.

“Ajo që duhet të ruhemi dhe të kemi kujdes është në çështjet që rregullohen me ligj si kjo të mos lënë hapësirë për interpretimin më ndryshe”.

“Muja është ngutë, është veprim i ngutshëm”, tha Besnik Tahiri për emisionin InfoMagazinë në Klan Kosova.

Me veprimin e tij për pezullim të postit të Kryetarit të Prizrenit, Ramadan Muja e ka zënë pa përgatitur edhe partinë e tij.

Sekretari i Partisë Demokratike të Kosovës (PDK), Basri Musmurati, i kontaktuar nga Express, ka thënë se nuk mund të komentojë konkretisht për këtë çështje.

“Dëgjova që Ramadan Muja e ka pezulluar pozitën e tij, por zyrtarisht nuk kemi marrë ende diçka. Pa marrë një njoftim zyrtar për këtë veprim të tij, ne nuk mund të komentojmë as si parti e as si Ministri e Administratës së Pushtetit Lokal kurrgjë.”, ka thënë Musëmurati, i cili njëherësh është edhe Zëvendësministër i Pushtetit Lokal, shkruan Express.

Ramadan Muja sot ka marr vendim që të pezullojë pozitën e tij prej Kryetari të Prizrenit, pas protestave të shoqërisë civile që nisën kur ai u shpall fajtor nga gjykata për korrupsion. Shoqëria civile dhe partitë që e përkrahin këtë protestë në Prizren thonë që pezullimi i pozitës është veprim që nuk e njeh ligji, dhe për më shumë, thonë që është veprim i pamjaftueshëm- ata kërkojnë dorëheqjen e Mujës.

Lëvizja Vetëvendosje! Në Prizren, vlerëson se pezullimi i postit është vetëm një mashtrim i radhës i Ramadan Mujës. Sipas kësaj lëvizje pezullimi nuk është dorëheqje.

“Të nderuar qytetarë të Prizrenit,sot mbas vetëm 2 dite protestash të përmasave të vogla qytetarët e Prizrenit me guximin e tyre arritën që kryetarin e inkriminuar me gjyq ta detyrojnë të kërkoj rrugëdalje prej situatës ku është gjet me papërgjegjësinë e tij”.

“Ai sot ka nënshkruar një shkresë me të cilën deklaron se pezullon ushtrimin e detyrës së tij deri në përfundimin e procesit personal të ankesave për vendimin gjyqësor ndaj tij”.

“ LVV në Prizren dëshiron të njoftojmë opinionin se ky vendim i tij është një mashtrim i radhës, me anë të së cilës dëshiron të përfitoj në kohë, posaçërisht kur dihet se ai nesër do të ballafaqohet me protesta qytetare për të cilën e kan përkrahjen tonë të plotë”.

“Vlerësimin tonë e bazojmë në faktin se Pezullimi nuk është njëejtë si dorëheqja – kur thotë se e pezullon (teknikisht ngrirje) të pozitës derisa procesi gjyqësor vazhdon. Kjo nuk është mjaft, sepse ai në çdo moment mundet të pezulloj vendimin për pezullimin e pozitës. Teknikisht ai qysh mbasnesër mund të kthehet në pozitën e të parit të qytetit.

Që mos të krijohet huti në opinion, dëshirojmë të konfirmojmë se nesër në ora 12 do të jemi së bashku me Ju në Shadërvan, në përkrahje të protestave të qytetarëve të Prizrenit. Nesër së bashku do ta përcjellim mesazhin tonë qytetarë shkelësve të ligjit,thuhet në komunikatën e Qendrës së VV-së në Prizren”. /PrizrenPress.com/