Lideri i Lidhjes Demokratike të Kosovës, Isa Mustafa, ka vendosur një standard të ri në partinë e tij, për të pasur kontroll më të lehtë mbi disa degë të partisë ku strukturat janë të përçara dhe po kërkojnë zgjedhje të jashtëzakonshme. Ai ka vendosur që disa vartës të tij nga Kryesia qendrore e LDK-së t’i dërgojë si udhëheqës të përkohshëm të degëve problematike, duke i emëruar si anëtarë të shtabeve zgjedhore për zgjedhjet parlamentare.

Burime të Tribunës brenda Lidhjes Demokratike, kanë treguar me kusht anonimiteti se nëpër disa degë ku LDK ka pësuar humbje në zgjedhjet lokale, duke përfshirë edhe kryeqytetin, ka shumë probleme dhe pakënaqësi me strukturat aktuale udhëheqëse, andaj kanë kërkuar zgjedhje.

“Por mbajtja e këtyre zgjedhjeve të parakohshme në degët si ajo e Prizrenit dhe dega e tretë e LDK-së në Prishtinë, por edhe disa degë tjera, në këtë kohë, po shihet si rrezik për ndarje eventuale të partisë.

Andaj kemi vendosur që në këto degë të dërgohen zyrtarë të lartë të partisë nga qendra për të udhëhequr bashkë me strukturat aktuale partinë deri pas zgjedhjeve parlamentare, kur pritet të mbahen zgjedhjet e brendshme partiake”, ka thënë një zyrtar i lartë i LDK-së

Komandanti i policisë për regjionin e Prizrenit, Nexhmi Krasniqi në një prononcim për Klan Kosovën u ka bërë thirrje partie politike, që të mos t’i politizojnë protestat dhe të kursejnë uniformën kaltër.

“Unë ju bëj thirrje partive politike që të mos t’i politizojnë protestat, me qëllim që të përfitojnë pikë politike. Mos e qitni policinë e Kosovës në një pozitë të vështirë”, ka thënë Krasnqi.

Kujtojmë se sot grupi ‘qytetarët aktiv për Prizrenin” ka protestuar para ‘Shtëpisë së Bardhë’ duke kërkuar dorëheqjen e të parit të qytetit të Prizrenit, Ramadan Mujës pasi ky i fundit u shpall fajtor dhe u dënua me dy vjet burgim me kusht nga një trup gjyqësor i EULEX-it në Gjykatën Themelore të Prizrenit.

Sekretari i Degës së PDK-së në Prizren, Njazi Kryeziu në emisionin “Interaktiv” të KTV-së ka thënë se vendimi i kryetarit të Prizrenit Ramadan Muja për pezullim të detyrës është një veprim i ligjshëm.

Sipas tij, ky vendim i Mujës është një vendim i tij personal dhe dinjitoz. Megjithatë, sipas tij, Ministria e Administrimit të Pushtetit Lokal është ajo e cila vlerëson nëse veprimi ka qenë i ligjshëm apo jo.

Fati i zhvillimit të Prizrenit sipas tij, është i lidhur me fatin e Ramdan Mujës. Sipas tij, qytetarët e Prizrenit i besojnë Mujës për kryetar. Ai ka thënë se i besojnë misionit të EULEX-it, por nuk i besojnë prokurorisë themelore në Prizren.

Kryeziu ka thënë se sido që të jetë, PDK-ja është një parti e fortë në Prizren dhe nuk është e lidhur me emra. Gazeta Blic

Zëvendëskryeministrja e Kosovës, Edita Tahiri, ka folur për “Epokën e re” në lidhje me kërcënimin që ka marrë nga një qytetar i Dragashit nëpërmjet mesazheve që janë dërguar në celularin e saj.

Ajo ka treguar se ky nuk është kërcënimi i vetëm.
Zëvendëskryeministrja Tahiri ka thënë se asnjëherë nuk ka pasur dëshirë dhe as tash që këto çështje të trajtohen nëpërmjet medieve.

“Shumë vite vazhdon ky kërcënim, gati që nga koha kur jam larguar nga LDK-ja”, është shprehur Tahiri, duke treguar se për këtë kërcënim kabineti i saj i ka njoftuar organet e rendit. “Asnjëherë nuk kam pasur dëshirë dhe as tani që këto çështje të trajtohen në medie”, ka thënë Tahiri.

Edita Tahiri, e cila ka kontribuar për shtetndërtimin e Kosovës në shumë pozita udhëheqëse në institucionet e Kosovës, njëherë në postin e ministres, në mandatin e parë të qeverisë Thaçi, tash zëvendëskryeministre, njëherësh kryenegociatore e dialogut teknik në Bruksel, ka treguar se kur ka qenë pjesë e LDK-së ka pasur tri tentim-atentate.

“Kur kam qenë në LDK kam pasur tri tentim-atentate në vitin 2000. Kjo ka qenë arsyeja e largimit për studime në Harvard. E mos të flasim se gjatë okupimit kërcënimi ka qenë i vazhdueshëm”, ka treguar Tahiri.

Zëvendëskryeministrja e Kosovës, Edita Tahiri, ka thënë se, pavarësisht kërcënimeve që ka pasur, ajo nuk do të ndalet për të shërbyer për shtetin e Kosovës. “Këto gjëra nuk më kanë ndalur asnjëherë, sepse Atdheu është para meje”, ka thënë Tahiri.

Edita Tahiri është kërcënuar nga një person nga komuna e Dragashit, për shkak të bisedimeve me Serbinë.

Kërcënimi ndaj Tahirit është bërë përmes mesazheve që janë dërguar në celularin e saj.

Zëvendëskryeministrja Edita Tahiri aktualisht ndodhet në Bruksel, megjithatë, lajmin për kërëcnimin e Tahirit e ka konfirmuar këshilltari i saj politik, Gazmir Raci.

“Po është e vërtetë që në javën e kaluar kemi pranuar disa sms kërcënues ndaj zëvendëskryeministres, zonjës Tahiri, si dhe në ndaj meje si këshilltar politik i saj”, ka thënë ai për Indeksonline.

Mësohet se I njëjti është dërguar në qendrën e ndalimit në Prishtinë, pas vetëdorzimit të tij në në stacionin policor në Dragash