Që nga dita e djeshme, Greqia ka marrë kryesimin gjashtëmujor të Këshillit të Bashkimit Europian. Kryesimin e BE’së, Greqia e mori nga Lituania.

Ministri i Punëve të Jashtme i Kosovës, Enver Hoxhaj, ka uruar Greqinë për marrjen e kryesimit të BE’së ndërsa ka thënë se Kosova ka pritje të mëdha gjatë kësaj periudhe.

“Po e filloj vitin 2014 me urime. E uroj Presidencën Greke të Këshillit të Bashkimit Europian. Pritje ambicioze përpara nga Kosova. E falënderoj Presidencën e Lituanisë dhe Ministrin Linas Linkevicius për arritjet e mëdha dhe kryesimin e shkëlqyeshëm të BE’së. Kosova mirëpret mbështetjen tuaj”, ka shkruar Ministri Hoxhaj në Twitter.

Bashkë me Sllovakinë, Spanjën, Qipron dhe Rumaninë, Greqia është ndër pesë vendet anëtare të BE’së që nuk e ka njohur ende Kosovën.

Kryetari i Prizrenit, Ramadan Muja vitin 2013-të e vlerëson si të sukseshëm për këtë qytet. Ai thotë se gjatë këtij viti në Prizren janë realizuar projekte të shumta.

“Kemi realizuar shumë projekte në infrastrukturë,arsim, shëndetësi, turizëm…”.

Muja premton se edhe gjatë vitit 2014-të, qeveria komunale do të punojë dhe investojë edhe më shumë për të përmisuar jetën e qytetarëve.

“Qeveria komunale në mandatin e ardhshëm do të jetë e përkushtuar, që në bashkëpunim të ngushtë me qytetarin të vazhdojë rrugën e realizimit të projekteve të nisura për Prizrenin edhe më të zhvilluar”.

Sipas tij, objektivat kryesore të “Qeverisë Muja III”, do të jenë realizimi i synimeve për një zhvillim të hovshëm social dhe ekonomik.

“Do t’i fuqizojmë politikat e biznesit privat me synim hapjen e vendeve të reja të punës. Ky zhvillim do të jetë në përputhje me planet rregullative urbane, për ndërtimin modern të qytetit tonë”.

“Do ta bëjmë reformimin e administratës publike komunale duke e përmbyllur në plotni procesin e digjitalizimit të shërbimeve komunale”.

Muja premton se gjatë katër viteve të ardhshme, përveç infrastrukturës rrugore dhe nëntokësore, prioritet do të jetë edhe shtimi i kapacitetit të ujit të pijes,ndërtimi i impiantit për pastrimin e ujërave të zeza, ndërtimi i tregjeve dhe parkingjeve me PPP,trafiku urban me PP, dhe ndërtimi i sheshit të Lidhjes së Prizrenit.

“Po ashtu do të rregullojmë edhe rrugën transiti i vjetër, rrugën unazore deri në kala,ndërtimin e objektit të bibliotekës…”. /PrizrenPress.com/

Partitë opozitare në Kuvend vlerësojnë se bisedimet me Beogradin nuk i sollën ndonjë përfitim Kosovës. Sipas tyre, shumë çështje nuk janë zgjidhur, procesi po shkon në drejtim të fuqizimit të serbeve në Kosovë dhe po shihet qartë se nuk ka gatishmëri për zbatim të marrëveshjes në praktikë. Në këtë rast, humbës është Kosova.

Edhe pse dialogu i Kosovës me Serbinë nuk ka filluar të shënojë humbës apo fitues për normalizim të marrëdhënieve mes dy vendeve, në bazë të rezultateve të deritanishme Serbia ka më shumë favore, vlerësojnë partitë opozitare, transmeton RTK.

Vjosa Osmani, nga LDK konsideron se pala kosovare nuk ka qenë e përgatitur për bisedime, prandaj një gjë e tillë po ndikon në rezultatin final.

”Shumë çështje që janë përfshirë në marrëveshje konkrete mes Kosovës dhe Serbisë do të mund të dilnin më të favorshme për Kosovën sikur pala kosovare do të ishte më e përgatitur për të negociuar në të mirë të vet. Kështu që ky ka qenë problem kryesor, ndërsa problem i dytë është implementimi në praktik i marrëveshjes. Derisa Kosova ka treguar gatishmëri të madhe që të implementojë të gjitha pikat e marrëveshjes, herë herë edhe duke e tejkaluar atë që ka premtuar, në anën e Serbisë nuk kemi parë një gatishmëri të tillë, që tregon se Kosova duhet të jetë shumë më vigjilente që të mos ndërmarr hapa të njëanshëm në implementimin e marrëveshjeve”.

Ndërsa Ahmest Isufi nga AAK, thotë se nuk ka kuptim vazhdimi i dialogut me Serbinë nëse nuk zbatohen marrëveshjet nga ana e Serbisë, pasi gjithçka po shkon në dëm të interesit të Kosovës.

”Në këtë proces më shumë ka humbur Kosova, sepse të gjitha cështjet e brendshme të Kosovës janë bisdeuar dhe nuk janë diskutuar ato çështje që janë të ndërlidhura me dëmet që Serbia i ka shkaktuar Kosovës, siç janë të pagjeturit, dokumentet kadastrale të cilat ende mbahen në Serbi, artefaktet, shumë cka nga ato elemnte që është dashur ti përmbush Serbia e deri te njohja e pavarësisë së Kosovës. Sjellja në këtë mënyrë e qeverisë së Serbisë e ka dobësuar pozicionin e Kosovës sepse ka lënë edhe më tej iluzione te serbet që të mendojë se Kosova nuk është e pavaruar. Po ashtu edhe te miqtë tanë, kanë lënë që të pritet që përmes dialogut të ndryshohet diçka dhe e kanë lënë Kosovën në një status quo”.

Sipas Glauk Konjufcës, deputet i Vetëvendosjes në dialogun me Serbinë, edhe Kosova edhe Bashkësia ndërkombëtare kanë dështuar plotësisht pasi duke bërë përpjekje për integrim të serbëve të veriut në Institucionet e Kosovës, ata po fuqizohen duke mos njohur Kosovën.

”Kjo do të thotë se një organizim institucional që është krijuar brenda Kosovës siç është bashkësia e Komunave serbe do të mbushet me përmbajtje e cila na vjen prej Serbisë edhe do të punojnë me programe që do të jenë kundër pavarësisë, kjo është shumë e qartë. Unë mendoj se kjo është njëra prej dështimeve më të mëdha të qeverisë dhe një dështim edhe i strategjisë ndërkombëtare të Kosovës se si e kanë parë ata integrimin e popullatës serbe këtu. Kështu prej atyre 11 apo 12 komunave sa do të jenë në asociacionin e komunave serbe, 9 prej tyre do të jenë të listës së Daçiqit që nuk e pranojnë Kosovën, dhe unë mendoj se krejt asociacionin do ta vendosin në këtë funksion”.

Sipas Konjufcës, i vetmi përfitim i Kosovës në këtë dialog ka qenë pjesëmarrja e serbëve në zgjedhje, edhe pse fitorja e tyre është kundër Kosovës. Ndryshe dialogu Kosovë Serbi, pritet të vazhdojë në janar, për të gjetur zgjidhje për gjykatën në veri.

Zëvendëskryeministres së Kosovës, Edita Tahirit, nuk i kanë shkuar punët mirë me vota në zgjedhjet e 3 nëntorit të vitit 2013-të në Prizren.

Partia e saj, ADK, në këto zgjedhje nuk ka marrë as më shumë e as më pak se 228 vota. Votuesit jo vetëm që nuk i siguruan ulëse në organet më të larta lokale ADK-së, por ato ishin tepër të ulta për një parti që udhëhiqet nga një Zëvedëskryeministre e Kosovës.

Edita Tahiri është kryetare e ADK-së.Nga zgjedhjet nacionale të vitit 2007, është në koalicion me Partinë Demokratike të Kosovës.

Tahiri ka një karrierë të shquar politike si lidere, politikane, diplomate dhe negociatore me reputacion ndërkombëtar prej çerek shekulli, të nisur në kohërat më të vështira të Kosovës, në vitet 1989, kur regjimi i Milosheviçit po instalonte masat e dhunshme, atëbotë si zyrtare e LDK-së, e tash si kryetare e ADK-së.

Tahiri është Zëvendëskryeministre e Qeverisë së Republikës së Kosovës. Ajo ka qenë e ngakruar në bisedimet e zhvvilluar me Serbinë në Bruksel.
Ajo ishte edhe Ministre e Administratës Publike. Por këto pak i kanë bërë punë në zgjedhjet e fundit lokale në Prizren.

Mbështetur në rezultatet e publikuara nga KQZ, për Asamblenë Komunale, partia që udhëheq Tahiri, ADK, në Prizren ka marrë vetëm 228 vota, ndërsa ato janë adresuar tek bartësi i listës Nizam Mullafazliu.

Ndërkaq, menjëherë pas Mullafazliut, kandidati i dytë për Kuvend të Prizrenit nga ADK, doktoresha e mirënjohur, gjinekologia Dr. Jalldëze Gorani ka marrë vetëm 37 vota. Më së paku vota në listën e këtij subjekti apo vetëm tri sosh i mori Myrvete Perdibuka.

Por, ndonëse Tahiri vepron në majat e Qeverisë së Kosovës, partia e saj mori pak vota edhe në kryeqendër, bile për më keq ADK më e votuar doli në Viti, një komunë kjo shumë më e vogël se sa Prishtina.

Në kryeqendër bartësi i listës së ADK-së, Faruk Salihu, siguroi vetëm 134 vota, përderisa Teuta Rexhepi në Viti mori 172 vota, pra 38 më shumë. ADK më së miri në zgjedhjet komunale kaloi në Gjilan. Bartësi i listës Neshat Rexhepi këtu siguroi 373 vota, përderisa në Pejë, Gazmir Raci, si bartës i listës për Kuvend Komunal është votuar nga 263 qytetarë./PrizrenPress.com/

Lideri i Lëvizjes Vetëvendosje, ka thënë se edhe përkundër rezultatit jo të mirë që ka shënuar kjo parti në disa komuna, megjithatë ata e fituan Prishtinën, qytetin më të madh.

“Kemi fituar, sepse kemi fituar në Prishtinë, në komunën më të madhe dhe më të rëndësishme në Kosovë, në Kryeqytetin e Republikës. Nuk jemi të kënaqur me rezultatin në përgjithësi dhe nuk do të jemi të kënaqur deri atëherë kur do të ndryshojmë qeverisjen në gjithë Kosovën dhe në secilën komunë ashtu siç bëmë në Prishtinë”, ka thënë Kurti në një intervistë për gazetën “Bota Sot”, të numrit festiv.

Kurti i ka bërë bisht pak pyetjes së gazetarit kur është pyetur se a ka qenë Shpend Ahmeti ai që e ka fituar Prishtinën apo Vetëvendosje.

“Nuk e fituam ne Prishtinën, por Prishtina na fitoi ne. Prishtina e fitoi një kryetar të ri e të mirë, Shpend Ahmetin dhe qeverisjen e Vetëvendosjes me alternativë përkatëse lokale për Prishtinën. As Shpend Ahmeti dhe as Isa Mustafa nuk ishin kandidat të pavarur. Nënkryetari i Lëvizjes Vetëvendosje e mundi kryetarin e LDK-së”, ka thënë Kurti.

Në këtë intervistë Kurti është pyetur edhe për një formatizim dhe ndryshime në Vetëvendosje duke sjell një “frymë të re” në këtë Lëvizje. Po në vend të kësaj ai e ka quajtur zgjerim të VV-së dhe jo “formatizim”.

“Është e vërtetë që Lëvizja Vetëvendosje por zgjerohet e po forcohet, po i shton e po i shtrëngon radhët e saj në përgatitije për sfidat e vitit 2014. Do të fitojmë në zgjedhjet parlamentare që me gjasë do të mbahen në vjeshtën e vitit 2014. për të gjitha këto beteja që nuk janë vetëm qeverisëse dhe elektorale lëvizja Vetëvendosje ka nisur ristrukturimin e qendrave të saj dhe organizatës në përgjithësi. Këtë ne e quaj ristrukturim dhe jo “reformatizim”, ka thënë Kurti.