Zyrtarë të lartë të LDK-së i thonë jo ofertës së Kadri Veselit për koalicion me PDK-në. Ndërsa, në AAK për ish-shefin e SHIK-ut thonë se është “axhami” në politikë.

Partia e Isa Mustafës i ka thënë “Jo” koalicionit eventual me partinë e kryeministrit Thaçi. ”Vardisja” e zëvendëskryetarit të parë të PDK-së, Kadri Veselit, se është në favor të një partneriteti me LDK-në, por jo edhe me partinë e Ramush Haradinajt, ka marrë përgjigje negative nga LDK-ja. Nënkryetari i LDK-së, Haki Rugova, është kundër një partneriteti në të ardhmen me partinë e Hashim Thaçit, “Kryesia s’ka qëndrim të tillë dhe asnjëherë nuk është diskutuar rreth mundësisë për një koalicion eventual me PDK-në. Pra, është herët të flitet për koalicione, kur dihet se zgjedhjet nacionale do të mbahen diku në shtatorin e vitit që vjen”, ka pohuar Rugova.

Sipas tij, LDK nuk bënë koalicion me PDK,pasi që aktualisht janë parti të barabarta për nga numri i votave. “Thjeshtë koalicionet në mes dy partive më të madha politike nuk kanë sjellë rezultatet të mira asnjëherë. Prandaj, edhe i them “Jo” një koalicioni të tillë eventual”, ka thënë Rugova për gazetën “Zëri”.

Kryetari i Bashkimit Demokratik në Prizren Zafir Berisha, ka përmbyllur aktivitetin politik për vitin 2013-të.

Ai edhe në takimin e fundit që ka organizuar të premten me strukturat e partisë , sërish ka akuzuar kryeministrin e Kosovës, Hashim Thaçin, për krimin e organizuar dhe për bisedimit që ka zhvilluar me Serbinë në Bruksel.

“Në janar të vitit 2014-të Serbia fillon bisedimet për integrim në BE. Ky integrim i Serbisë vjen si rezultat i negociatave të arritura me Hashim Thaçin”

“Rezultati i bisedimeve në Bruksel, është edhe legalizim i strukturave paramilitare serbe në 9 komuna të Kosovës dhe dhe mbi 300 pjesëtarë të MUP-it, të cilët do të jenë në Policinë e Kosovës”.

“Politikanët e shantazhuar të sojit të Hashim Thaçit, tash kërkojnë që edhe me ndryshim të Kushtetutës së Kosovës t’i bëhet vend këtyre grupeve paramilitare serbe në Kuvendin e Kosovës me qëllimin që të mos jemi shtet funksional dhe të varur nga Serbia”. /PrizrenPress.com/

Drejtori i Policisë së Kosovës në Prizren, Nexhmi Krasniqi, e ka vlerësuar si të suksesshëm vitin 2013. Sipas tij, gjatë këtij viti, ka pasur rënie të krimit dhe vjedhjeve.”Këtë vit kemi pasur rënie të rasteve të krimit dhe vjedhjeve”.

Sipas tij, të gjitha veprat që përbëjnë vepër penale kanë shënuar rënia në rajonin e Prizrenit. “Ky vit mund të them se ka qenë i suksesshëm për policinë e Prizrenit”.

Krasniqi tha se gjatë këtij viti në rajonin e Prizrenit ka pasur rënia edhe të aksidenteve me fatalitet. “Fatmirësisht po ashtu kemi pasur rënia edhe të aksidenteve me fatalitet”.

Ai premtoi se policia edhe gjatë vitit të ardhshëm do të punojë për të siguruar një jetë normale për qytetarët./PrizrenPress.com/

Fondi për të Drejtën Humanitare (FDH) ka ngritur kallëzim penal më 26 dhjetor kundër Bozidar Deliqct, ish-komandant i Brigadës së Motorizuar 549 të Ushtrisë Jugosllave (BRMO 549 UJ), Radivoj Paravinja, komandant i Grupit luftarak 3 dhe disa pjesëtareve të paidentifikuar e BRMO 549 UJ-së me dyshimin se kanë kryer krime të luftës kundër popullatës civile në fshatin Landovicë (komuna e Prizrenit) më 26 mars të vitit 1999.

Më 26 mars të vitit 1999, rreth orës 10:00, në qendër të Landovicës, gjatë konfrontimit mes UÇK-së dhe katër ushtarëve të BRMO 549 UJ-së ishin vrarë dy pjesëtarë të UJ-së dhe një pjesëtar i UÇK-së.

Pas këtij incidenti, rreth orës 11:00, me urdhrin e komandantit Bozidar Delic pjesëtarët e UJ-së kishin hapur zjarr artilerie tokësore dhe nga tanket nga disa pozicione pranë rrugës Prizren-Gjakovë, në Landovicë.

Predhat e para e kishin goditur shtëpinë e Ismet Gashit, ku kishte rreth 45 civilë, kryesisht gra, fëmijë dhe të moshuar. Një predhë kishte depërtuar në brendësi të shtëpisë, ku kishte shpërthyer duke e vrarë 16-vjeçaren Njomëza Morina.

Civilët e tjerë nga paniku kishin filluar të iknin nga shtëpia përmes një livadhi në drejtim të pyllit aty pranë. Pjesëtarët e UJ-së kishin hapur zjarr nga tanket dhe armët e këmbësorisë, me ç’rast kishin vrarë 12 civilë, përfshirë gjashtë fëmijë dhe një grua shtatzënë. Janë plagosur edhe disa civilë të tjerë.

Fshati ishte granatuar deri në orën 15:00. Pas kësaj BRMO 549 e UJ-së hyri në qendër të fshatit. Në pesë shtëpi të ndryshme, ata gjetën pesë civilë, kryesisht të moshuar, dhe i likuiduan.

Të nesërmen, më 27 mars 1999, pjesëtarët e UJ-së i ngarkuan trupat e civilëve që ishin në afërsi të shtëpisë së familjes Gashi në automjetin “Zastava” dhe i larguan në drejtim të panjohur. Po të njëjtën ditë, tre pjesëtarë të paidentifikuar të Brigadës së motorizuar 549 të UJ-së me eksploziv e rrëzuan minaren e xhamisë së fshatit.

Trupat e gjashtë civilëve janë gjetur në një varr masiv në Batajnicë, dy trupa në një varr masiv në vendin Shirokë pranë Suharekës, një trup në fshatin Lubizhdë, ndërsa mbetjet mortore të pesë civilëve janë gjetur në vende të ndryshme në Landovicë. Edhe katër trupa nuk janë gjetur ende.

Kallëzimi penal kundër gjeneralit Delic është ngritur për shkak të urdhrit për sulm joselektiv ndaj popullatës civile, i cili rezultoi me vdekjen e civilëve, lëndime të rënda dhe dëmtime serioze të shëndetit të njeriut apo sulmit pa përzgjedhjen e cakut i cili godet popullatën civile, vrasjen e civilëve dhe shkatërrim arbitrar të pronave të civilëve nga neni 142 Kodi Penal i RFJ-së .

Viktimat e krimit në Landovicë janë: Njomëza (Ibish) Morina (1983), Dalife (Hazer) Gashi (1923), Ismet (Selman) Gashi (1952), Afrim (Eqrem) Gashi (1981), Fatime (Selman) Morina (1955), Festina (Islam) Morina (1997), Luljeta (Haxhi) Qarreti (1965), Bukurije (Xhemajl) Qarreti (1971), Diellza (Selajdin) Qarreti (1998), Nazmie (Haxhi) Qarreti (1984), Gëzim (Haxhi) Qarreti (1990), Kosovare (Nazim) Selimaj (1988), Kushtrim (Nazim) Selimaj (1991, Avdi (Ragip) Gashi (1939), Avdi (Haxhi) Morina (1935), Hadije (Mustafë) Gashi (1924), Shefki (Ali) Jahaj (1948) dhe Abaz (Sejdi) Krasniqi (1977).

Në mars të vitit 2013, FDH ka publikuar dosjen mbi aktivitetet e BRMO 549 të UJ-së dhe krimet e kryera në zonën e përgjegjësisë të këtij njësiti gjatë vitit 1999 në Kosovë.

Policia e Kosovës, ka arrestuar të premten dy persona dhe ka konfiskuar mbi 30 kilogramë marihuanë.

Sipas një njoftimi të dërguar nga forcat e rendit, bëhet e ditur se kjo sasi e drogës është konfiskuar në Mitrovicë dhe Rahovec.

I pari aksion policor thuhet se është kryer të mërkurën, ku “është bërë kontrollimi i një veture dhe në një bunker special (të improvizuar) kanë gjetur substancën narkotike, e dyshuar të jetë e llojit marihuanë me peshë 5.2 kilograme”, transmeton Indeksonline.

Dy të dyshuar janë arrestuar, kurse në vazhdimësi të hetimeve rreth këtij rasti, policia ka kryer një operacion të dytë bastisjeje në Xërzë të Rahovecit, ku ka konfiskuar edhe 25.6 kilogramë marihuanë.Operacioni policor është kryer nga njësia anti-drogë Mitrovicë-Veri

PDK ka mbajtur takimin e fundvitit me anëtarët e Këshillit Drejtues të PDK’së. Aty kanë munguar përsëri Fatmir Limaj e Jakup Krasniqi. Sidoqoftë, Kryetari i PDK’së, Hashim Thaçi ka folur për rezultatin e zgjedhjeve, duke thënë se do ta lexojnë drejt atë. Ka paralajmëruar ndryshime dhe reforma në PDK.Fatmir Limaj e Jakup Krasniqi përsëri kanë munguar në koktejin e PDK’së, e cila është mbajtur, të premten pasdite, në hotelin Emerald, në periferi të Kryeqytetit.

Aty, Lideri i PDK’së, Hashim Thaçi ka shkuar bashkë me Hajredin Kuçin, ndërsa pas tyre ka shkuar vazhdimisht, Basri Musmurati, aktualisht Sekretar i Përgjithshëm i PDK’së.

I fundit që ka ardhur në mbledhjen e PDK’së ka qenë Zëvendëskryetari i Parë i PDK’së, Kadri Veseli.

Shumica e deputetëve, anëtarëve të Kryesisë dhe të Këshillit të Përgjithshëm janë përshëndetur me ish-Shefin e SHIK’ut.

Por, shtrëngimi i duarve mes Thaçi e Veselit ka ndodhur krejt në fund të takimit.

Sidoqoftë, Thaçi ka mbajtur një fjalim, duke folur për humbjet dhe fitoret e PDK’së.

I ka përshëndetur, ish-Kryetarët e komunave, kryetarët e rinj dhe zyrtarët e tjerë të Partisë.

Për dallim prej herëve të tjera, Thaçi ka paralajmëruar ndryshime dhe reforma në PDK.”Votuesit na kanë dhënë mbështetje dhe na kanë dhënë mandat për ndryshim por edhe për reformë”, ka thënë Thaçi para anëtarëve të Këshillit Drejtues.

“Votuesit na kanë dhënë mbështetje për të udhëhequr vendin, por në të njëjtën kohë na kanë dhënë mesazhin për ndryshime të domosdoshme në PDK si parakusht i domosdoshëm për të vazhduar udhëheqjen në nivel të Republikës së Kosovës dhe në shumicën e komunave”, ka shtuar ai.

“Ne duhet t’i sjellim ndryshimet që ka kërkuar sovrani. Më shumë reforma, më shumë energji të reja, më shumë plane për të ardhmen”, ka shtuar ai.