Nënkryetari i Kuvendit të Kosovës, Xhavit Haliti, thotë se detyrimisht institucionet e Kosovës duhet t’i përkushtohen qytetarit dhe rinisë. Kërkon mbështetje për sektorin e bujqësinë për ta nxjerrë nga kriza prodhuesin bujqësor.

Zyrtari i lartë i Partisë Demokratike të Kosovës, Xhavit Haliti, thotë se viti që sapo lamë pas i ka sjell të mira Kosovës.

Nënkryetari i Kuvendit të Kosovës nga kjo parti, thotë për lajmi.net se gjatë vitit 2013 është punuar shumë dhe janë realizuar shumë premtime.

Si pozitive i sheh edhe zgjedhjet lokale të nëntorit, të cilat u vlerësuan nga të gjithë si zgjedhjet më të mira të organizuar nga vetë kosovarët deri më sot.

“Viti i kaluar ka sjellë të mira”.

“Është punuar. Për aq sa janë premtuar, një pjesë janë realizuar, mirëpo ka pasur edhe premtime të parealizuara”.

“Zgjedhjet, për dallim nga zgjedhjet e kaluara kanë qenë më të mira, më të pranueshme dhe, realisht janë pranuar ashtu siç janë mbajtur. Janë vlerësuar pozitivisht edhe nga vëzhguesit ndërkombëtar dhe nga vëzhguesit vendorë”.

“Vërejtje ka pasur por me rëndësi është që është ndryshim i madh pozitiv lidhur me zgjedhur”.

Por, si e vlerëson Halitin rezultatin që prodhuan këto zgjedhje për partinë e tij, PDK?

“PDK’ja, në qoftë se e masim suksesin në humbjen e disa komunave, atëherë duhet të kemi parasysh që kemi humbur disa nga komunat e rëndësishme që i kemi pasur në qeverisje”.

“Por, në anën tjetër numrin e votave e kemi ruajtur, dhe primatin politik në Kosovë, sipas numrit të elektoratit që e ka votuar PDK’në, e kemi ruajtur”.

Xhaviti Haliti sugjeron të gjithë që në vitin 2014 të flasim më pak e të punojnë më shumë.

“Detyrimisht ne duhet t’i përkushtohemi qytetarit dhe rinisë me qëllim që të hapim vende të reja pune, përndryshe të tjerat nuk kanë ndonjë vlerë të madhe”.

“Përkushtimi i dytë duhet të jetë përmbushja që duhet të kemi në drejtim të liberalizimit të vizave”.

“Këto janë dy detyrime të cilat duhet t’i përmbushim si politikë, ndërsa në anën tjetër, do të thosha që do të duhej t’i përkushtohemi shumë përpjekjeve për t’i mbështetur bujqësinë e cila po shpresoj që do të jetë një hap shumë i rëndësishëm për ta nxjerrë nga kriza që ka hy edhe konsumatori i produkteve bujqësore por edhe prodhuesi bujqësor”.

Haliti pret që viti 2014 t’i sjell sërish fitore PDK’së në zgjedhjet nacionale.

E për koalicione të mundshme, thotë se është herët të flitet.

“Është herët të ju them kush me kë do të jetë në koalicion në zgjedhjet e viti 2014, sepse unë nuk mund të flas si i pavarur”.

“Por, unë besoj që Partia Demokratike e Kosovës do të fitoj”.

Zgjedhjet lokale të 3 nëntorit krijuan një hartë të re politike në Kosovë. Disa nga komunat që për parti të caktuara njiheshin si bastione, me zgjedhjet e fundit nuk do të quhen më të tilla.

Kështu, Prishtina nuk udhëhiqet më nga një kryetar i LDK-së, as Mitrovica e Jugut, Malisheva e Ferizaj, nuk do të udhëhiqen nga PDK-ja, kurse AAK-ja humbi bastionin më të madh Pejën, si edhe Gjakovën.

Në këtë hartë, vendin e vet tash do ta kenë edhe Vetëvendosje me Prishtinën dhe AKR me Gjakovën e Mitrovicën e Jugut. Një fituese e madhe e zgjedhjeve ishte edhe “Lista serbe” me marrjen e pushtetit në nëntë komuna.

Me zgjedhjet lokale të 3 nëntorit, në Kosovë u ndëshkuan të gjitha keqqeverisjet me anë të votave të qytetarëve, thonë për Radio Evropën e Lirë analistët politikë në Prishtinë.

Sipas tyre, qytetarët me rezultatet përmbysëse në 20 komuna, dëshmuan se kërkojnë ndryshime dhe qeverisje e menaxhim më të mirë të komunave dhe nuk duan të vazhdojë trendi i deritashëm.

Analisti Ilir Deda thotë se ndryshimet e 1 dhjetorit janë fitore e madhe e qytetarëve dhe demokracisë në Kosovë.

“Është një humbje e madhe e Partisë Demokratike të Kosovës dhe Aleancës për Ardhmërinë e Kosovës dhe është një fitore e Lidhjes Demokratike të Kosovës. Fitues të vërtetë janë Vetëvendosja, e cila ka fituar kryeqytetin, Shpend Ahmeti, Mimoza Kusari -Lila në Gjakovë dhe Aleanca Kosova e Re në Mitrovicë”, thotë Deda.

Ndërkohë, edhe analisti tjetër, Ardian Arifaj, thotë se me këto zgjedhje u tregua qartë se votat e qytetarëve ishin kundër qeverisjes së keqe në të gjitha komunat.

“Vota në pothuajse çdo komunë ka qenë votë negative. Ka qenë votë kundër qeverisjes së deritashme. Kjo e tregon një vërejtje shumë të madhe për gjithë klasën politike. Kjo tregon se qytetari i Kosovës nuk është i kënaqur fare me mënyrën se si po qeveriset Kosova dhe kërkon një ndryshim rrënjësor të qasjes që ka klasa politike, kërkon një kompetencë më të madhe, një përgjegjësi më të madhe dhe një llogaridhënie më të madhe”, thekson Arifaj.

Krahas PDK-së që ka nën udhëheqje 10 komuna dhe LDK-së me 9, edhe “Lista serbe” do të ketë po ashtu nën udhëheqje 9 komuna të Kosovës dhe pritet të drejtojë Asociacionin Serb të Komunave.

Publicisti Belul Beqaj thotë se ky subjekt politik i formuar nga Beogradi, është fituesi i vërtetë i këtyre zgjedhjeve.

Misioni i serbëve të Thaçit përfundoi. Filloi misioni i serbëve të Daçiqit.

“Misioni i serbëve të Thaçit përfundoi. Filloi misioni i serbëve të Daçiqit. Kujtoj se është çështje e rrethanave kur edhe ministri kosovar i Pushtetit Lokal, Slobodan Petroviq, do të shpallet tepricë teknologjike në Qeverinë e Kosovës, ngase të gjitha veprimet kryesore në komunat serbe, po i kryen ministri i Serbisë i ngarkuar për Kosovë. Ky është ai ndryshimi që duhet ta analizojmë seriozisht dhe çfarë efektesh do të na sjellë”, vlerëson Beqaj.

Qëndrimet e partive më të mëdha politike

Se në Kosovë po krijohet një hartë e re politike, për këtë flasin edhe vetë partitë më të mëdha.

Kryetari i Partisë Demokratike të Kosovës, Hashim Thaçi, beson se votuesit nuk e zhgënjyen PDK-në, por se tani, edhe PDK-ja duhet t’i bëjë disa ndryshime të brendshme që të ruajë primatin në skenën politike.

“Votuesit na kanë dhënë mbështetje për të udhëhequr vendin, por të njëjtën kohë na e kanë dhënë edhe mesazhin për ndryshimet e nevojshme e të domosdoshme në PDK, si parakusht i domosdoshëm për të vazhduar udhëheqjen në nivel të Republikës së Kosovës dhe në shumicën e komunave”, thotë Thaçi.

Në anën tjetër, kryetari i Lidhjes Demokratike të Kosovës, Isa Mustafa, i cili në garën e tij për kryetar të Prishtinës humbi nga Shpend Ahmeti i Vetëvendosjes, thotë se LDK-ja po kthehet në subjektin numër një në Kosovë.

Ai pret që në zgjedhjet e ardhshme parlamentare, LDK-ja të marrë nën drejtim Qeverinë e Kosovës.

“Nuk do të jetë ditë e largët që ne do të shënojnë fitore në zgjedhjet nacionale dhe LDK-ja do ta themelojë Qeverinë e Kosovës dhe në mënyrë të përgjegjshme e të ndërgjegjshme, ne do të qeverisim me vendin”, shprehet Mustafa.

Pas zgjedhjeve lokale, ambiciet janë drejtuar kah ato parlamentare.

Njëri nga liderët kosovar që në vazhdimësi ka thënë se do të luftojë që të bëhet kryeministër, është Ramush Haradinaj, kryetar i Aleancës për Ardhmërinë e Kosovës. Pavarësisht humbjeve në Pejë e Gjakovë, Haradinaj ende shpreson se e ka të hapur mundësinë për t’u bërë kryeministër.

“Unë u ofroj qytetarëve një kualitet qeverisës të një qeverisjeje 100-ditëshe që kam qenë dhe do të ofertoj me të në garë me secilin që hyn në këtë garë dhe kuptohet qytetarët më pas do të vlerësojnë. Ne i kemi 15 për qind të votave të qytetarëve të Kosovës”, thekson Haradinaj.

Aktualisht, subjektet politike po synojnë të përmbyllin një reformë zgjedhore, e cila do t’i paraprinte shpalljes së zgjedhjeve parlamentare.

Megjithatë, zgjedhjet edhe mund të përshpejtohen, marrë parasysh faktin se në Kuvendin e Kosovës koalicioni aktual konsiderohet se e ka humbur qysh moti shumicën.

Qendra Klinike Universitare e Kosovës, përballet me mungesë të kuadrit në disa fusha mjekësore. Ekspertë të shëndetësisë thonë se Ministria e Shëndetësisë ka ndarë specializime pa ndonjë planifikim. Kurse, zyrtarë të kësaj të fundit thonë se nuk pati interesim të mjekëve të rinj për disa lëmi, derisa po punohet në këtë drejtim, transmeton RTK.

Zyrtarë të Qendrës Klinike Universitare ankohen për mungesë të stafit në disa lëmi. Drejtori mjekësor Nexhmedin Shala thotë, se qendra terciare ka nevojë për anesteziologë, infektolog, kardiokirurgë por edhe staf të mesëm.

“Në radhë të parë kemi mungesë të theksuar të specialistëve anesteziolog. Kemi staf të pamjaftueshëm infektologësh dhe kemi numër të pamjaftueshëm të kardiokirurgëve prandaj Klinika e Kardiokirurgjisë nuk po punon me kapacitetet e plota. Kemi numër të vogël fizikanësh të cilët janë pjesë e rëndësishme e planifikimit për radioterapi në Institutin e Onkologjisë”.

Talat Gjinolli ekspert shëndetësor thotë se kjo situatë është rezultat i mos planifikimit të kuadrove nga Ministria e Shëndetësisë dhe dhënies së specializimeve pa kritere të mirëfillta.

“Po pikërisht këtu është ai problemi i huqjes së detyrave dhe përgjegjësive që i ka Ministria e Shëndetësisë, d.m.th këtu nuk ka planifikim të kuadrove. Planifikimi mund të bëhet kur merren shumë të dhëna nga terreni nga Instituti Kombëtar i Shëndetit Publik i cili bënë monitorimin dhe i jep impute Ministrisë së Shëndetësisë dhe në bashkëpunim me të bëhet planifikimi, do të thotë ka dështuar në planifikim prandaj është edhe ky kaos”.

Por, Ministri Ferid Agani thotë se Ministria e Shëndetësisë është duke punuar në zhvillimin e resurseve njerëzore, ndonëse në konkurset e hapura për disa profile nuk pati mjaft të interesuar.

“Ne jemi munduar të stimulojmë disa lëmi deficitare siç është p.sh anesteziologjia, neonatologjia pra me konkurs të hapur permanent për punësim, por fatkeqësisht nuk ka pasur interesim të duhur nga kolegët. Por megjithatë kemi një numër të kënaqshëm të specializantëve në këtë drejtim”.

Ministri Agani po ashtu thotë se me statutin e ri, QKUK ka të drejtë të gjeneroj të hyra vetanake prandaj menaxherët e klinikave do të mund të investojnë në mjekët e ri apo në kuadrin të cilin e kanë mungesë në mënyrën e duhur. Sipas tij, pagesa është stimuluesi kryesor, por kjo deri më tani nuk ka qenë e mundur në mungesë të infrastrukturës ligjore.

Ish ambsadori britanik në Serbi, Ivor Roberts në një intervistë për B92 ka deklaruar se angazhohet për një politikë më realiste dhe një realitet të ri politik në Ballkan, përkatësisht në raportet diplomatike.

Në këtë kuadër, ai prezanton një mendim ndryshe për kufijtë, duke deklaruar se ata janë të ndryshueshëm, përkatësisht, se korrigjimi i kufijve në Ballkan, mund ti kontirbuojnë paqes së përhershme.

“Aty ku kufijtë krijojnë ndjenjën e pasigurisë, jostabilitetit dhe dhunës, aty kufijtë nuk kanë ndonjë funksion të dobishëm”. Ivor thotë se është për ndryshim kufijsh edhe mes Kosovës dhe Serbisë.

“Konsideroj se rajoni në veri të lumit Ibër, duhet ti kthehet Serbisë, e disa pjesë të territorit të Luginës së Preshevës ti kthehen Kosovës,” ndërsa shton se “është edhe për bashkim kombëtar dhe shtetëror të shqiptarëve”.

Ambasadori i Britanisë së Madhe në Kosovë, Ian Cliff në një intervistë për gazetën ‘Kosova Sot’, të numrit festiv ka thënë se kryetarët e zgjedhur të 9 komunave serb do t’i zbatojnë marrëveshjet për gjykatat.

“Mendoj se pika që ka nxjerrë barnoresha Ashton para ministrave në Bruksel ka qenë se Serbia e ka pranuar konceptin e një gjykate bazike në Mitrovicën e veriut” duke mbuluar 7 bashki, 4 prej tyre në veri të Mitrovicës. Por. Kur të shkohet përtej kësaj, ka një marrëveshje se si degët duhet të funksionojnë dhe këtu ka shumë punë që të bëhen në këtë drejtim”, ka thënë ambasadori britanik duke folur për gjykatat e Kosovës.

Ai ka shtuar se “ne shpresojmë shumë se do të ketë një marrëveshje për Gjyqësorin para fillimit të negociatave me Serbinë më 21 janar”.

Cliff po ashtu ka thënë se Serbia gjatë këtyre negociatave nuk është kushtëzuar me njohjen e Kosovës, kur është pyetur nga gazetari për këtë gjë.

“Mund të them se jo, pra përgjigja e saktë është jo. Përfundimet e KE-së janë, para se gjithash, se Serbia angazhohet në normalizimin e marrëdhënieve me Kosovën gjatë periudhave të negociatave dhe në fund ky normalizim duhet të jetë i vendosur edhe më një marrëveshje të saktësuar ligjore”.

Për kryetarët e sapozgjedhur të komunave serbe, Cliff ka thënë se ata nuk mund ta bllokojnë strukturën kushtetuese të Kosovës. “Është e rëndësishme që asnjëri të mos mendojë që këto shoqata mund të bëhen një lloj shtetit brenda shtetit. Pra nuk është kjo dhe të gjitha krahasimet për të cilat kam thënë më përpara me Republikën Srpska janë ato që nuk janë të vërteta, sepse ato derivojnë nga pushteti i etniteteve në Bosnje dhe Hercegovinë, dhe ato nuk kanë kapacitet që ta bllokojnë strukturat kushtetuese të Kosovës”, ka thënë Cliff.