Mediat italiane janë të bindura që Diego Godin do të lërë Milanon në përfundim të këtij sezoni, duke qenë se nuk është përshtatur si duhet me skemat e trajnerit Antonio Conte, ndërsa Marotta e Ausilio vijojnë punën për të gjetur pasuesin e tij.
Prej kohësh negociojnë për blerjen e mbrojtësit të Kombëtares shqiptare, Marash Kumbulla, por së fundi në skenë ka dalë edhe emri i 21-vjeçarit të Nices, Malang Sarr, i cili gjithashtu ndiqet nga disa klube të Premier League.
Sarr ka shkëlqyer me fanellën e kuqezinjve, ndërsa Interi dëshiron të shfrytëzojë faktin që mbrojtësi është futur në vitin e fundit të kontratës dhe mund ta rrëmbejë në Milano për një shifër prej 10-15 milionë eurosh.
Një tjetër faktor pozitiv për zikaltrit është edhe menaxheri i mbrojtësit, Federico Pastorello, i cili ka marrëdhënie mjaft të mira me drejtuesit e Interit, pasi është njëkohësisht menaxher i futbollistëve si Lukaku, Candreva e Asamoah.