6.8 C
Prizren
E diel, 21 Prill, 2024

“Do you read me” bën bashkë artistët shqiptarë e serbë

Festivali-DoYouReadMeEdhe pse jashtë është një urë që i ndan shqiptarët dhe serbët, është një qendër kulturore dhe një festival i letërsisë që ka arritur t’i bëjë bashkë artistë e të rinj nga të dyja komunitetet

Një numër i madh shkrimtarësh nga Kosova, Shqipëria, Bosnja e Serbia të shtunën mbrëma kanë prezantuar poezitë e prozat e tyre në festivalin e letërsisë “Do you read me”, i cili u mbajt për herë të parë në qendrën e kulturës “Rexhep Mitrovica” në Mitrovicë. Brenda sallës së kësaj qendre në njërën anë ishin ulur publiku shqiptar në tjetrën ai serb, të cilët duartrokisnin çdo artist që dilte në skenë.

Festivali i cili u moderua nga regjisori, Bekim Lumi, së bashku me kroaten, Mima Simiq, ka si qëllim të bashkojë shqiptarë e serbë në një vend për të ngjallur jetën kulturore në këtë qytet.

I pari i cili u ngjit në skenën e festivalit ishte publicisti Halil Matoshi. I pyetur se përse komuniteti i artit dhe letërsisë shpeshherë arrijnë të gjejnë gjuhë të përbashkët sesa ata të politikës, ai ka thënë se një teori e tillë vështirë se mund të konsiderohet si e saktë.

“Se di sa artistët dinë të gjejnë gjuhë të përbashkët ose jo, por e di që sidomos letrarët janë iluzionistë dhe idealistë, ne mendojmë që atë që e ka prishur politika mund ta ndreqim ne, por unë definitivisht dyshoj”, përfundoi fjalën e tij Matoshi, duke u ulur në kolltukun që ishte vendosur në skenë, filloi të lexonte poezi, ndër to ishin “Mërzi Dhembje”, “Neveria”, “U çart moti” e “Paqe e pabesueshme”, shkruan Zëri.

Pas tij në skenë për një bashkëbisedim u ftuan dy shkrimtarët, Xhevdet Bjari, poet dhe shkrimtar nga Rahoveci dhe Vlladimir Arsejenovic nga Beogradi, të cilët folën për takimin e tyre të rastësishëm, i cili kishte ndodhur në vitin 1999 në Meksikë në kuadër të një festivali, dhe prej atëherë ata kishin vazhduar kontaktet me njëri-tjetrin.

Vlladimir Arsejenovic, i cili është edhe organizator i këtij festivali nga shoqata “Krokodill”, kohën kur janë takuar e ka vlerësuar si një periudhë e zymtë, duke thënë se gjatë asaj kohe me ftesë nga organizata ndërkombëtare e shkrimtarëve, ata kanë pasur rastin të njihen me njëri-tjetrin. “Nuk ka qenë lehtë. Ishte qershori i vitit 1999 kur ka ndodhur ky takim, është interesant se kemi qenë me familjet tona, dhe i vazhdojmë kontaktet edhe sot”, ka thënë Arsejenovic.

Ndërkaq Xhevdet Bajri e vlerësoi këtë si një festival i cili bashkon të gjithë pa dallim, ka thënë se ndjehet i lumtur që është në mesin e artistëve.

“Jam i lumtur që jam këtu në mesin e këtyre njerëzve që janë këtu, në kushtet kur kemi shkuar në Meksikë, nga popujt tanë ne jemi cilësuar si tradhtarë, mua më kanë akuzuar se po bashkëpunoj me serbët, por tani ne jemi këtu së bashku, kjo është me rëndësi”, deklaroi Bajri.

Gjithashtu në një bashkëbisedim janë ftuar edhe ajo që u quajt befasia e këtij festivali, aktori kosovar Enver Petrovci dhe aktori serb Miki Manoljeviç, të cilët kanë folur për përvojat e tyre si aktorë në ish-Jugosllavi.

Petrovci me këtë rast duke kujtuar fillimet e tij si aktor, ka treguar kohën kur ka luajtur në një serial serb në të cilin kanë qenë të dy, por jo bashkë me njëri-tjetrin, duke mos pasur rast kështu të takohen.

“Miki ka qenë një prej emrave më të nderuar, pse duhet ta nderoj Mikin, sepse para se gjithash ai është njeri, gjatë tërë kësaj kohe që kemi kaluar ai ka mbetur njeri nuk është përlyer aspak”, ka thënë Petrovci. Kurse Miki Manoljeviç e ka vlerësuar Petrovcin si një aktor të madh, përkundër faktit që nuk kanë luajtur asnjëherë bashkë, ai duke shpresuar se një gjë e tillë të ndodhë së shpejti.

Gjatë këtij festivali të rinjtë që kishin ardhur herë pas here i ka argëtuar grupi multietnik i rokut “Gilespie”. Ndërkaq në kuadër të këtij festivali me poezitë e tyre janë shfaqur para publikut boshnjaku Bekim Sejranoviq, duke lexuar pjesë nga romani i tij “Sandalet”, i cili përbëhet prej disa tregimesh të shkurta, për t’u përmbyllur kështu me shkrimtaren nga Tirana, Luljeta Leshanaku e cila ka recituar pesë poezi të saj.

Festivali “Do You Read Me”, është organizuar nga Qendra “Multimedia” në Prishtinë dhe Shoqata “Krokodil” nga Beogradi, ndërkaq është financuar nga Ambasada Zvicerane në Kosovë, që për partner ka organizatën Community Building Mitrovica.

Më Shumë

Sot votimi historik për anëtarësim të Kosovës në Këshill të Evropës

Asambleja Parlamentare e Këshillit të Evropës sot me 2/3 e votave të të gjithë deputetëve të pranishëm nga të gjitha shtetet anëtare, do të...

Kosova merr Mirënjohje të Veçantë për Përfaqësim Shtetëror në Bienale të Venecias

Doruntina Kastrati dhe instalacioni skulpturor “Heshtjet Kumbuese të Metalit dhe Lëkurës” u nderua me “Mirënjohje të Veçantë për Përfaqësim Shtetëror” në ceremoninë e edicionin...

Lajmet e Fundit