Kandidatja presidenciale ruse Ksenia Sobchak, personalitet në televizionin rus, thotë për Zërin e Amerikës se thashethemet janë të vërteta: Presidenti Vladimir Putin, dikur një favorit i babait të saj, do të largohej nga karriera politike po të kishte garanci se nuk do të cënohej.
“Po, mendoj se do të dilte në pension. Por është e vështirë ta bindësh se vërtetë ka një rrugëdalje dhe se mund t’u zërë besë atyre që i japin garanci se nuk do ta presë i njëjti fat si ish-diktatorin kilian Augusto Pinoshet, apo ish-diktatorin libian, Moamar Gadafi. Ai i trembet shumë kësaj mundësie”.
Kandidatura e 36-vjeçares Sobchak është vënë në pikëpyetje nga aktivistë të opozitës, të cilët dyshojnë se fushata e saj është thjesht inskenim i Kremlinit për të ndihmuar një fitore tjetër të Vladimir Putinit. Por pretendimet që ajo ngre janë dëgjuar edhe nga të tjerë.
Alexei Navalni, aktivisti shumë popullor anti-korrupsion, ka bërë pretendime të ngjashme disa muaj më parë.
Pasi iu hoq e drejta për të konkurruar për post publik nga akuza që përkrahësit e tij i shohin si të motivuara politikisht, Navalni e ngriti idenë e dëshirës së Putinit për të lënë politikën. Por ai është jashtë rrethit të presidentit rus. Ndërsa Sobchak është e para që e bën këtë koment nga njerëzit që e njohin personalisht Putinin.
E pyetur nëse tranzicioni në duart e një udhëheqësi tjetër që nuk i përket rrethit të aleatëve të fuqishëm të Putinit mund të realizohet pa dhunë, ajo thotë se procesi do të kërkonte një strategji politike:
“Po flasim për një strategji afat-gjatë politike. Pas gjashtë vjetësh Putini nuk do të kërkojë ndryshime të reja kushtetuese që të marrë përsëri pjesë në zgjedhje”.
Një ndryshim i ngadaltë kërkon që të minimizohet “agresioni” duke lejuar “njerëz të rinj, të talentuar, si dhe një figurë politike të zgjedhur me kompromis që përmbush kërkesat e opozitës, por që pranohet edhe nga Putini,” thotë ajo.