Rrëmbimi i tre policëve brenda territorit të Kosovës ka ngjallur reagimin e ashpër të zyrtarëve vendorë, gjersa të martën kryeministri Albin Kurti dhe ministrja e Jashtme, Donika Gërvalla kanë shpalosur detaje të rastit pasi ambasadori i Kosovës në Beograd, Jetish Jashari, ka takuar tre policët e rrëmbyer nga forcat serbe.

Kryeministri ka bërë të ditur se policët në momentin e rrëmbimit kanë qenë duke ngrënë drekë, kur 15 persona i kanë rrethuar, sulmuar dhe i kanë rrëmbyer.

“Që të tre e thonë rrëfimin e njëjtë kur pyeten ndaras nga ambasadori ynë”, ka deklaruar Kurti, duke shtuar se vendi ku ndodhet tryeza e ngrënies është 7 metra prej veturës së policisë.

Kurti: Jam i gatshëm për takim në Bruksel, të paraqes të dhënat për rrëmbimin e policëve

Kryeministri Albin Kurti ka deklaruar të martën se është i gatshëm që të shkojë në takimin e radhës në Bruksel, në kuadër të dialogut Kosovë-Serbi.

Sipas tij, de-eskalimi i situatës së krijuar në veri të vendit nënkupton lirimin e menjëhershëm dhe të pakusht të policëve të Kosovës dhe dënimin e agresionit të Serbisë në Kosovë.

“Do të komunikoj edhe me Brukselin dhe jam i gatshëm dhe i interesuar të shkoj në takimin e radhës në Bruksel në mënyrë që të paraqes hollësisht këto të dhëna që i morëm dhe ta kuptojnë që de-eskalimi i situatës të cilin po kërkojnë të gjithë, nënkupton lirimin e menjëhershëm dhe të pakusht të policëve të Kosovës dhe dënimin e agresionit të Serbisë në Kosovë”, ka thënë Kurti.

Ndërkaq, ka shtuar se normalizimi mes dy vendeve nënkupton zbatimin e menjëhershëm, pa kushte dhe të plotë të Marrëveshjes bazike

U rrethuan nga 15 persona, i dërguan në Rashkë e pastaj në Beograd – Gërvalla shpalos detaje nga biseda e tre policëve me ambasadorin Jashari

Ministrja e Punëve të Jashtme dhe Diasporës, Donika Gërvalla në konferencën e përbashkët për media me kryeministrin e vendit ka shpalosur detajet nga takimi i ambasadorit Jetish Jashari me tre zyrtarët policorë që po mbahen në qendrën e paraburgimit në Kralevë.

Gërvalla ka treguar se takimi i ambasadorit Jashari me tre oficierët, Beqir Sefa, Rifat Zeka dhe Shemë Mustafa ka zgjatur 15 minuta me secilin prej tyre.

“Takimet janë mbajtur të ndara nga 15 minuta secili, dhe ata kanë treguar ngjarjen e rrëmbimit të tyre”, ka thënë Gërvalla.

“Ata kanë theksuar si në vijim: Më 14 qershor rreth orës 12:30 minuta duke ngrënë drekën papritmas janë rrethuar nga rreth 15 persona të uniformuar të cilët më vonë kanë rezultuar të jenë pjesëtarë të forcave të sigurisë së Serbisë, të cilët i kanë sulmuar dhe çarmatosur dhe pastaj me thes në kokë i kanë dërguar tek makinat e tyre”, ka thënë Gërvalla.

Ministrja ka shtuar se zyrtari policor Beqir Sefa ka theksuar se disa nga pjesëtarët e forcave të sigurisë së Serbisë kanë shkrepur armët në ajër.

“Në momentin e kidnapimit ata kanë qenë duke ngrënë drekë në tavolinën e improvizuar e cila menjëherë është afër gropës së parë dhe 15 metra larg gropës së dytë. Gropat hapen për të bllokuar kalimin përmes rrugëve ilegale. Të dyja gropat janë brenda territorit të Kosovës, sepse ne nuk hapim gropa në territorin e Serbisë”, ka treguar tutje Gërvalla.

“Kanë treguar se nuk janë maltretuar fizikisht, mirëpo nuk iu është dhënë ushqim i mjaftueshëm vetëm nga një copë bukë. Ndërkaq Shem Mustafa i cili ka probleme kronike shëndetësore i është dhënë vetëm një injeksion dhe një pompë me frymëmarrje. Nga momenti i shqiptimit të paraburgimit ata janë vendosur në Kralevë, janë në dhoma të veçanta. Sipas tyre trajtimi është korrekt, u jepet ushqim në baza të rregullta ditore edhe pse cilësia është jo e mirë”, tha Gërvalla.

Gërvalla shtoi se Shem Mustafa ka treguar se ende i mungojnë medikamentet bazike dhe se kjo po ja vështirëson qëndrimin në burg.

“Ata janë takuar edhe me avokatët mbrojtës. Ju është thënë se mund të vizitohen nga familjarët e tyre ditën e premte”, tha Gërvalla. /Telegrafi/

Sot në vendin tonë parashihet të mbajë mot kryesisht me diell në pjesën e parë të ditës.

Sipas Meteo Kosova, pasdite priten vranësira të pjesshme, të cilat në zona të caktuara mund të gjenerojnë ndonjë reshje të izoluar si dhe ndonjë shkarkesë elektrike.

Era do të fryjë nga drejtimi i veriut me shpejtësi prej 5-30 km/h.

Temperaturat minimale do të luhaten prej 14 deri në 17°C, ndërsa ato maksimale prej 29 deri në 32°C.

Maturantët e Kosovës do t’i nënshtrohen Provimit të Maturës Shtetërore këtë të shtunë, më 24 qershor, me fillim nga ora 10.

Sipas Ministrisë së Arsimit, Shkencës, Teknologjisë dhe Inovacionit, janë realizuar të gjitha përgatitjet e duhura, në koordinim me Drejtoritë Komunale të Arsimit dhe shkollat, për organizimin e këtij provimi.

Në çdo bankë do të sistemohet nga një nxënës, ndërkaq në çdo klasë do të lejohen më së shumti 15 maturantë.

“Çfarëdo parregullsie eventuale në qendrën e testimit, të raportohet me shkrim në DKA dhe në MAShTI. Ndërsa, ndaj të gjithë personave të angazhuar në proces, të cilët nuk i realizojnë detyrat e caktuara me kompetencë dhe profesionalizëm të lartë, do të kërkohet përgjegjësi”, thuhet në njoftimin e MAShTI-t.

Në këtë provim ndalohet rreptësisht mbajtja e telefonit brenda qendrave të testimit dhe kujtdo që i zihet telefoni do të përjashtohet nga mbajtja e provimit.

“Testi do të organizohet në 178 qendra të testimit. Këtë vit, në sallën e testimit (klasat) përveç administruesve do të jetë edhe një mbikëqyrës (student absolvent ose i nivelit master). Për të mos ndikuar në proces dhe sipas rregullave të administrimit të testit, pas orës 10:00 (koha kur fillon testi) nuk lejohet asnjë person tjetër brenda qendrave të testimit përveç personave përgjegjës për mbarëvajtje të testit”, thuhet tutje në këtë njoftim.

Rezultatet e Provimit të Maturës Shtetërore pritet të shpallen më 3 korrik.