Kandidati i LDK-së për kryeministër, Lumir Abdixhiku, ka mbajtur një tubim në Malishevë, ku tha se pjesëmarrja ishte masive.

Abdixhiku tha se në Malishevë gjeti entuziazëm e besim të madh qytetar, teksa shtoi se festa u bë edhe më e veçantë falë manifestimit të 35-vjetorit të themelimit të degës së LDK-së atje.

“Lidhja Demokratike e Kosovës është ngritur në këmbë, dhe me ne është ngritur e tërë Kosova. Në çdo anë të vendit po jehon fort thirrja e madhe popullore për ndryshim! Siç bëjmë në çdo tubim, edhe në Malishevë folëm për projekte madhore e për zgjidhje konkrete. Folëm për të ardhmen, dhe për ‘Rrugën e Re’”.

“Do t’i investojmë 5 miliardë euro në katër vite për ta transformuar infrastrukturën, arsimin, shëndetësinë dhe energjinë e Kosovës, dhe për ta ringjallur ekonominë tonë! Do të krijojmë programe specifike për mbështetjen e bujqësisë dhe blegtorisë me qasje më të lehtë në financim dhe teknologji moderne”, tha Abdixhiku.

Më tej, kandidati i LDK-së për të parin e qeverisë premtoi se do t’i realizojnë të gjitha projektet zhvillimore dhe do ta bëjnë vendin krenar, pasi tha se kjo tashmë s’është veç fushatë, por është ëndrra më e madhe për Kosovën që do ta ndërtojnë bashkë.

“Fatmir, përgëzime për këtë organizim madhështor! Suksese edhe kandidatëve tanë nga Malisheva Fatmir Ademaj, Fetah Rudi, dhe Fatmir Kastrati. Ndryshimin do ta bëjmë bashkë – me 9 shkurt”, tha ai.

Pjesëtarët e Policisë së Kosovës në bashkëpunim me zyrtarët e Drejtorisë së Arsimit të Komunës së Suharekës kanë realizuar një aktivitet motivues për nxënësit e shkollës “17 shkurti” në Shirokë, pas ngjarjes traumatike ku disa fëmijë ishin lënduar si pasojë e sulmit të qenit.

Qëllimi i këtij aktiviteti sipas zëdhënësit të Policisë rajonale të Prizrenit, Vesel Gashi ka qenë krijimi i afërsisë me nxënësit, për të përçuar ndjenjën e sigurisë, por edhe për t’i mbështetur për ta kapërcyer përvojën traumatike, raporton Telegrafi.

“Stacioni Policor në Suharekë së bashku me Drejtorinë e Arsimit të Komunës së Suharekës, ka zhvilluar një aktivitet motivues për nxënësit, pas ngjarjes së ndodhur në SHFMU “17 Shkurti” me qëllim që Policia të jetë sa më afër komunitetit, të përçoj ndenjën e sigurisë dhe afërsisë. Me këtë rast janë shpërndarë ushqime dhe pije për nxënësit e kësaj shkolle”, ka bërë të ditur Gashi.

Sipas tij në kuadër të këtyre angazhimeve është vizituar edhe nxënësja e lënduar.

“Një grup i zyrtarëve nga Stacioni Policor në Suharekë së bashku me drejtorin e Arsimit në Komunën e Suharekës kanë vizituar në Spitalin rajonal në Prizren edhe nxënësen e lënduar nga sulmi i qenit”, ka thënë Gashi për Telegrafin.

Në shkollën e sipërpërmendur të mërkurën në mëngjes disa nxënës kanë pësuar lëndime nga sulmi i qenit, ku njëra prej tyre është ndalur për trajtim në Repartin e Infektives. Lidhur me këtë rast, Policia pat intervenuar dhe pati neutralizuar qenin.

Marketing

Komiteti për Komunitete (KK) në Suharekë ka mbajtur sot takimin e parë për vitin 2025, duke shqyrtuar një rend dite me disa pika kyçe.

Sipas njoftimit të komunës, në këtë mbledhje u diskutuan: Miratimi i procesverbalit nga mbledhja e kaluar; Shqyrtimi i projekt-vendimit për ndryshim-plotësimin e vendimit 01-Nr-016-6358, të datës 28.01.2022; Shqyrtimi i projekt-vendimit për dhënien e pëlqimit për të zhvilluar procedurat përmes konkurrimit të hapur për dhënien në shfrytëzim afatgjatë të pronës së paluajtshme të Komunës; Shqyrtimi i projekt-vendimit për dhënien e pëlqimit për të zhvilluar procedurat përmes ankandit publik për dhënien në shfrytëzim afatshkurtër të pronës së paluajtshme të Komunës; dhe Të ndryshme.

“Pas diskutimeve të zhvilluara, të gjitha pikat e rendit të ditës u miratuan dhe do të paraqiten për shqyrtim dhe miratim në takimin e ardhshëm të Kuvendit Komunal, që pritet të mbahet më 30 janar 2025”, thuhet në njoftim./PrizrenPress.com/