Instituti Hidrometeorologjik bën të ditur se sot do të mbajë mot i vranët dhe me mjegull.
IHK njofton se temperaturat minimale do të lëvizin ndërmjet -5°C dhe -2°C, ndërsa ato maksimale do të variojnë nga 2°C deri në 6°C.
Era do të jetë e lehtë nga drejtimi i verilindjes.
Marketing
Sot mbushen 19 vjet nga vdekja e ish-presidentit të Kosovës, Ibrahim Rugova. Ai ndërroi jetë më 21 janar të vitit 2006, ku u varros me nderime të larta shtetërore dhe ushtarake.
Ibrahim Rugova u lind më 2 dhjetor 1944 në Cercë të Istogut. Më 10 janar 1945 komunistët jugosllavë ia pushkatuan të atin, Ukën dhe gjyshin Rrustë Rugova, që kishte qenë luftëtar i njohur kundër çetave çetnike që po depërtonin në Kosovë gjatë Luftës së Dytë Botërore.
Ibrahim Rugova shkollën fillore e kreu në Istog, të mesmen në Pejë, më 1967. Fakultetin Filozofik – Dega Gjuhë e Letërsi Shqipe e kreu në Prishtinë.
Gjatë vitit akademik 1976-77 qëndroi në Paris, në Ecole Pratique des Hautes Etudes, nën mbikëqyrjen e profesor Roland Barthes-it, ku ndoqi interesimet e veta shkencore në studimin e letërsisë, me përqendrim në teorinë letrare. Doktoroi në fushën e letërsisë në Universitetin e Prishtinës, më 1984.
Në vitin 1996 doktor Ibrahim Rugova u zgjodh anëtar korrespondent i Akademisë së Arteve dhe Shkencave të Kosovës. Në fillim ishte redaktor në gazetën e studentëve “Bota e re” dhe revistën shkencore “Dituria” (1971-72), që botoheshin në Prishtinë. Një kohë punoi edhe në revistën “Fjala”.
Mandej, për afro dy dekada, Rugova veprimtarinë shkencore e zhvilloi në Institutin Albanologjik si hulumtues i letërsisë. Një kohë ka qenë kryeredaktor i revistës “Gjurmime albanologjike” të këtij Instituti. Me krijimtari letrare u mor që nga fillimi i viteve gjashtëdhjetë.
Rugova më 1988 u zgjodh kryetar i Shoqatës së Shkrimtarëve të Kosovës, që u bë bërthamë e fuqishme e lëvizjes shqiptare kundër sundimit komunist serb dhe jugosllav në Kosovë, shkruan KP.
Si intelektual me nam që i jepte zë kësaj lëvizjeje intelektuale e politike, Rugova u zgjodh, më 23 dhjetor 1989, nga themelimi kryetar i Lidhjes Demokratike të Kosovës, partisë së parë politike në Kosovë që sfidoi drejtpërdrejt regjimin komunist në fuqi. LDK, nën udhëheqjen e tij, u bë shpejt forca politike prijëse në Kosovë, duke mbledhur shumicën e popullit rreth vetes.
Në bashkëpunim me forcat e tjera politike shqiptare në Kosovë si dhe me Kuvendin e atëhershëm të Kosovës, Rugova dhe LDK-ja përmbyllën kornizën ligjore për institucionalizimin e pavarësisë së Kosovës. Deklarata e Pavarësisë (2 korrik 1990), shpallja e Kosovës Republikë dhe miratimi i Kushtetutës së saj (7 shtator 1990), referendumi popullor për pavarësinë dhe sovranitetin e Kosovës, mbajtur në fund të shtatorit 1991, qenë prelud për zgjedhjet e para shumë-partiake për Kuvendin e Kosovës, më 24 maj 1992.
Doktor Ibrahim Rugova u zgjodh president i Republikës së Kosovës. Ai u rizgjodh në këtë post në zgjedhjet e mbajtura në mars 1998.
Nën udhëheqjen e tij, LDK-ja fitoi shumicën e votave në zgjedhjet e para lokale të sponsorizuara ndërkombëtarisht në Kosovën e pasluftës në tetor 2000, si dhe në zgjedhjet e para nacionale në vitin 2001 dhe në zgjedhjet e dyta lokale të vitit 2002. LDK fitoi edhe zgjedhjet nacionale më 2004.
Doktor Ibrahim Rugova u zgjodh president i Kosovës në mars 2002 dhe u rizgjodh më 2004.
Ai ndërroi jetë më 21 janar 2006 në Prishtinë dhe u varros në “Bregun e Diellit”, me nderimet më të mëdha të popullit të Kosovës.
Në përvjetorin e vdekjes më 21 janar 2007, presidenti Fatmir Sejdiu, dekoroi presidentin historik të Kosovës me Urdhrin “Hero i Kosovës”, titulli më i lartë në vend që u jepet figurave historike shqiptare dhe të Kosovës që kanë bërë “vepra trimërie për lirinë dhe pavarësinë e Kosovës”.
Ibrahim Rugova ka botuar këto vepra:
Prekje lirike, Rilindja, Prishtinë, 1971
Kah teoria, Rilindja, Prishtinë, 1978
Bibliografia e kritikës letrare shqiptare 1944-1974, Instituti Albanologjik, Prishtinë, 1976 (së bashku me Isak Shemën)
Kritika letrare (nga De Rada te Migjeni), Rilindja, Prishtinë, 1979 (së bashku me Sabri Hamitin)
Strategjia e kuptimit, Rilindja, Prishtinë, 1980
Vepra e Bogdanit 1675-1685, Rilindja, Prishtinë, 1982
Kahe dhe premisa të kritikës letrare shqiptare 1504-1983, Instituti Albanologjik, Prishtinë, 1986
Refuzimi estetik, Rilindja, Prishtinë, 1987
Pavarësia dhe demokracia, Fjala, Prishtinë, 1991
Çështja e Kosovës, Dukagjini, Pejë, 1994
– Kompleti i veprave të Ibrahim Rugovës në tetë vëllime, Faik Konica, Prishtinë, 2005
Çmimet dhe titujt ndërkombëtarë të Ibrahim Rugovës:
Më 1995, Dr. Ibrahim Rugovës iu dha Çmimi për paqe i Fondacionit Paul Litzer në Danimarkë
Më 1996, Dr. Ibrahim Rugova u shpall Doktor Nderi (Honoris Causa) i Universitetit të Parisit VIII, Sorbonë, Francë
Më 1998, Dr. Ibrahim Rugovës iu nda Çmimi Saharov i Parlamentit Evropian
Në vitin 1999, Dr. Rugova mori Çmimin për paqe të qytetit Mynster, Gjermani, ndërsa u shpall qytetar nderi i qyteteve italiane: Venedik, Milano dhe Breshia
Në vitin 2000, Dr. Ibrahim Rugova mori çmimin për paqe të Unionit Demokratik të Katalonisë “Manuel Carrasco i Formiguerra” në Barcelonë, Spanjë
Në vitin 2004, Dr. Ibrahim Rugova u nderua me Çmimin e Evropës, Senator Nderi nga Fondacioni panevropian Coudenhove-Kalergi
U nderua gjithashtu nga Komonuelthi i Pensilvanisë (SHBA), “Mik i Shteteve të Bashkuara të Amerikës”
Më 2004, Dr. Ibrahim Rugova u shpall Doktor Nderi (Honoris Causa) i Universitetit të Tiranës.
Kandidat për kryeministër nga radhët e PDK-së, Bedri Hamza përmes një postimi në Facebook ka thënë se gjithçka bëhet e mundshme kur bashkohemi.
Ai tha se vendosmëria e Zhurit, Hasit, Piranës dhe Hoçës së Prizrenit për “Ma Mirë” sipas tij, është e madhe.
“Gjithçka bëhet e mundshme kur bashkohemi. Edhe Kosova mundet ma mirë. Edhe fitorja jonë po vjen, sepse jemi të bashkuar”.
“Vendosmëria e Zhurit, Hasit, Piranës dhe Hoçës së Prizrenit për #MaMirë është e madhe”, ka shkruar Hamza.
Gjatë ditës së sotme një 71-vjeçar është gjetur pa shenja jetë në fshatin Greikoc të Suharekës.
Rastin për Indeksonline e ka konfirmuar zëdhëndës polici për rajonin e Prizrenit, Shaqir Bytyqi, ku bëri të ditur i moshuari është gjetur pa shenja jete në rrugë.
“Aty mjekët e kanë konstatuar vdekjen. Me vendim të prokurorit, trupi i pajetë i viktimës është dërguar në IML për obduksion. Rasti është iniciuar si hetim i vdekjes dhe se Policia ka marr të gjitha veprimet e nevojshme për rastin”, tha Bytyqi.
Marketing
Për herë të parë është themeluar Shoqata e Basketbollistëve dhe Basketbollisteve të Kosovës.
Në mbledhjen e mbajtur në zyrat e Federatës së Basketbollit të Kosovës kanë marrë pjesë 35 delegatë, apo lojtarë dhe lojtare, të cilët janë pjesë e rëndësishme e basketbollit të Kosovës.
Kapiteni i Kosovës, Dardan Berisha ka qenë i vetmi kandidat dhe me 35 vota pro është zgjidhur Kryetar i Shoqatës së Basketbollistëve dhe Basketbollisteve të Kosovës.
Kjo Shoqatë do të ketë përfaqësuesit e saj në Bordin e FBK-së.
Shoqata është themeluar konform Ligjit të ri të Sportit.
Po ashtu sot janë zgjidhur edhe Anëtarët e Bordit të Shoqatës, të cilët janë: Gëzim Morina, Arbnore Përquku, Aulona Muhadri, Erjon Kastrati dhe Drilon Hajrizi.
Shoqata synon të mbrojë të drejtat e basketbollistëve/eve në Kosovë dhe të jetë zëri i tyre./PrizrenPress.com/
Marketing
Në derbin e xhiros së 11-të të Superligës së Femrave, Bashkimi mposhti Prishtinën 79:72 në Prizren. Aulona Muhadri shkëlqeu me 18 pikë, 15 kërcime dhe 4 asistime, duke siguruar titullin MVP të xhiros.
Bashkimi mban pozitën e parë në tabelë me 10 fitore dhe vetëm 1 humbje, transmeton PrizrenPress.
Marketing
Kryetari i Lidhjes Demokratike të Kosovës, Lumir Abdixhiku, ka thënë se uragani i fitorës së madhe po vjen, andaj LDK-në e cilësoi si partinë fituese të zgjedhjeve të 9 shkurtit, raporton Ekonomia Online.
Në tubimin elektoral në Dragash, kandidati për kryeministër nga LDK-ja ka premtuar investime në turizëm.
“Kur gjërat shkojnë mbrapshtë, kur eksperimentet përfundojnë, e kur qytetarët kosovarë kërkojnë seriozitet, punë e shtet, ata kanë një adresë dhe një adresë të vetme, kanë një drejtim dhe një drejtim të vetëm, kanë një shtëpi dhe një shtëpi të vetme, kanë Lidhjen Demokratike të Kosovës, shpresën e parë dhe të fundit të Republikës së Kosovës. Si lëvizja më e madhe historike shqiptare, e kemi për detyrë, e kemi për obligim, e kemi për mision indentitar, të shtrojmë jo vetëm dorën e përbashkimit me njerëzit e Kosovës, me ata të harruarit e të lënë në mëshirën e fateve ditore, por të shtrojmë Rrugën e Re përpara, për vet Republikën e Kosovës, shtetin që e bëmë ne. Sepse, kjo rrugë s’bëhet pa ne, këtë rrugë na takon ta bëjmë ne. Si bartës të së djathtës, si bartës politik të lëvizjes për liri, për demokraci e për pavarësi, neve, Lidhjes Demokratike të Kosovës, na takon ta bëjmë rrugën e zhvillimit, rrugën e konsolidimit shtetar e rrugën e integrimit euroatlantik”, tha Abdixhiku.
Kreu i LDK-së pati premtime edhe për bujqit e Dragashit, ndërsa nuk i harroi as qeverinë Kurti.
“Është koha të zgjedhni për ata bujq, që nuk kanë motra e vëllezër në Ministri për t’i marrë grantet nga 100 mijë. Për keqpërdoruesit e pushtetit kam vetëm një mesazh! Ndryshimi po vjen! Do t’i ktheni paratë cent më cent! Do të ndiqeni penalisht për secilin veprim korruptiv; nga buka e bujqve tek mafia energjetike, nga rezervat shtetërore tek kontratat njëburimore! Ndryshimi po vjen! Për ata që mashtrojnë e keqpërdorojnë nuk ka shpëtim. Është koha të zgjidhni për të gjithë punëtorët e Kosovës, që në kushtet më të rënda të punës, në pagat më të ulëta të mundshme, rrezikojnë jetë. Dhe prapë janë në punë, më punëtorë, më të zellshëm, më këmbëngulës, se secili punëtor në Evropë. Është koha të zgjedhni për mësuesit, mjekët, punëtorët e shërbyesin që marrin lëmoshë dhe s’ka kush t’i dëgjojë. Është koha të zgjedhni për veten”.
“Po do t’i mbulojmë shpenzimet e kontratës kolektive dhe do t’i mbulojmë shpenzimet nga fatkeqësitë natyrore. Këto pasuri përrallore që i keni do të bëhen atraksione turistike. Qeveria e ardhshme do të imvestojë në rrugë që ta shoh e gjithë bota se sa e bukur është Kosova”, tha Abdixhiku, teksa pati premtime edhe në nivel nacional.
“Koeficienti 150, që në javën e parë të qeverisë së re, për shërbyesit civil, është zotimi ynë i parë – është vendimi ynë i parë. Një javë, 150. Aty ku s’kanë bërë punë në rrugë për katër vjet, ne kemi projekt infrastrukturore që transformojnë këtë shtet. Aty ku shtrenjtimi i energjisë elektrike s’ka fund, ne kemi plan për Central me Gaz, për stabilitet furnizimi, për një ekonomi të sigurt me partnerë. Rruga e Re, ka 120 projekte, ka 5 miliardë euro investime, ka 5 miliardë euro buxhet, ka 5% rritje ekonomike”, u shpreh Abdixhiku.
Marketing
Kandidati i Partisë Demokratike të Kosovës për Kryeministër, Bedri Hamza, ka vizituar sot Dragashin, ku ka shpalosur planet për mbështetje të prodhuesve vendorë dhe zhvillimin e bujqësisë dhe blegtorisë. Gjatë fjalës së tij, Hamza ka theksuar angazhimin për rritjen e mbështetjes për sektorët e rëndësishëm të ekonomisë lokale, duke ofruar grante investive deri në 30% për prodhuesit vendorë.
“Për qumështoren ‘Sharri’ dhe të gjithë prodhuesit, do të ketë vetëm mbështetje, zhvillim dhe përmirësim të teknologjisë së punës. Për punëtorët, përmirësim të kushteve dhe paga më të dinjitetshme. Për bujqit dhe blegtorët që i mbushin tryezat tona me produkte vendore, do të ketë vetëm zgjerim të mbështetjes përmes subvencioneve dhe granteve investive”, ka thënë Hamza.
Ai ka shtuar se deri në 30% të investimeve të prodhuesve vendorë do të mbulohen me grante investive, duke u përpjekur për të rritur prodhimin vendor, zëvendësuar produktet e importuara dhe rritur mundësitë e eksportit.
“Duke i përkrahur prodhuesit vendorë, ne e furnizojmë tregun me produkte më të shëndetshme dhe krijojmë mundësi për rritje të eksportit”, ka përfunduar Hamza./PrizrenPress.com/
Marketing
Kandidati i LDK-së për deputet, Xhavit Ukaj, thotë se qytetarët e Prizrenit, po i thonë ‘po’ Lidhjes Demokratike të Kosovës.
“Më afër qytetarëve, për ndryshimin e madh në Prizren dhe Kosovë.Ndryshimi po ndodhë edhe në Prizren.Qytetarët e Prizrenit po i thonë PO ndryshimit me Lidhjen Demokratike të Kosovës”, shkruan Ukaj.
Marketing
Abdurrahman Memaj, 25 vjeç, ka ndërruar jetë pas plagëve të marra nga shpërthimi i fishekzjarrëve në qytetin e Prizrenit, në prag të Vitit të Ri. Memaj ishte dërguar menjëherë në spital, por pas përpjekjeve të mjekëve, nuk ka mundur të mbijetojë.
Kryetari i Prizrenit, Shaqir Totaj, ka shprehur ngushëllimet e tij për familjen dhe të afërmit e të ndjerit.
“Me dhembje të thellë mora lajmin për ndarjen nga jeta të të riut Abdurrahman Memaj, i cili humbi betejën për jetën pas plagëve të marra nga shpërthimi tragjik në qytetin tonë”, u shpreh ai.
“Ngushëllimet e mia më të sinqerta për familjen Memaj dhe të gjithë të afërmit e tij. Në këto momente të vështira, jemi me zemër pranë tyre dhe lutemi që ata të gjejnë forcën për ta përballuar këtë humbje të madhe”.
“Ky është një moment i rëndë për gjithë komunitetin tonë dhe një kujtesë për rëndësinë e rritjes së sigurisë. Lutemi që diçka e tillë të mos përsëritet më. U prehtë në paqe!”/PrizrenPress.com/
Marketing