Kryetari i Prizrenit, Ramadan Muja ka punësuar djalin e vëllait, Hektor Bislim Muja.
Hektori është punësuar në Bibliotekën Ndërkomunale të Prizrenit.
Lidhja Demokratike e Kosovës(LDK) në Prizren, ka reaguar për këtë punësim, duke vlerësuar familjarë.

“Punësimet familjare, pa kriter dhe ofendimi i qytetarëve prizrenas me konkurse sa për sy e faqe nuk kanë të ndalur nga kjo qeverisje lokale, tashmë e kapitulluar”, thuhet në reagimin e LDK-së në Prizren.
Nga reagimi jonë i fundit lidhur me Elhame Berishën, që duke qenë drejtoreshë e Mirëqenies Sociale, pranohet edhe në konkursin e hapur për Zyrtar për Biblioteka, tashmë sheshazi ka dal në pah se kjo pozitë është mbajtur peng ngase paska qenë e rezervuar për nipin (djalin e vëllait) të Ramadan Mujës, Hektor Bislim Muja”.
“Lidhur me këtë rast Dega e LDK-së në Prizren ndjenë keqardhje për fatin e qytetit dhe qytetarëve prizrenas që pandershmërisht tash e 8 vite udhëhiqen nga një grup njerëzish që para së gjithash kanë vetëm interesin personal e familjarë, njëherit u bëjmë thirrje edhe organeve të hetuesisë që të merren më seriozisht me këtë rast dhe shumë raste tjera si kjo, në të kundërtën ato do të mbesin si të mirëqena”./PrizrenPress.com/

Zyrtari i lartë i Lidhjes Demokratike të Kosovës (LDK), Sali Asllanaj, ka shprehur bindje se mocioni i opozitës nuk do të mund ta rrëzojë Qeverinë e drejtuar nga Isa Mustafa.

Ai ka thënë se koalicioni qeverisës mund të rrëzohet vetëm kur të duan PDK-ja dhe LDK-ja.

Në këtë intervistë dhënë për gazetën “Epoka e re”, Asllanaj ka hedhur poshtë mundësinë e mbajtjes së zgjedhjeve të parakohshme parlamentare.

Sipas tij, koalicioni qeverisës (PDK-LDK) e ka për obligim dhe duhet t’i përfundojë çështjet madhore që janë në interes të shtetit: ushtria, demarkacioni me Malin e Zi dhe asociacioni i komunave serbe.

Asllanaj ka thënë se këtyre çështjeve madhore nuk do të mund t’u bënin ballë koalicionet e tjera.

Ai ua ka bërë me dije pozitës dhe opozitës t’i marrin seriozisht mesazhet e senatorit amerikan John McCain dhe të ministrit të Jashtëm gjerman Sigmar Gabriel.

Ministria e Punëve të Jashtme, në bashkëpunim me Asociacionin e Komunave të Kosovës, ka organizuar konferencën një-ditore me temën: “Diplomacia e qyteteve: Qeverisja, zhvillimi lokal dhe marrëdhëniet me jashtë”, në Prizren.

Në këtë konferencë ku prezentë ishin kryetarë komunash, ambasadorë të akredituar në Kosovë, ambasadorët e Kosovës jashtë vendit u diskutua për mënyrat e bashkëpunimit ndërmjet qyteteve të Kosovës dhe qyteteve të ndryshme në Evropë dhe më gjerë.

Ministri i Punëve të Jashtme, Enver Hoxhaj në fjalën e tij drejtuar të pranishmëve tha se bashkëpunimi ndërkombëtar i komunave është pjesë e rëndësishme e politikës së jashtme të Kosovës. Ai shtoi se MPJ është në dispozicion të Komunave për t’i ndihmuar në procesin e lidhjes së bashkëpunimeve, marrëveshjeve apo binjakëzimeve, në funksion të rritjes së mundësive për qytetarët e Kosovës.

“Qëllimi i kësaj konference është që ne ta kemi një shkëmbim më të thellë të ideve, të reflektojmë se si të kemi një koordinim më të mirë në politikën e jashtme dhe me gjetjet nga kjo konferencë ta bëjmë një plan të veprimit me qëllime të matshme e konkrete për ta pasur më të lehtë edhe zhvillimin e bashkëpunimit ndërkombëtar të komunave”, ka thënë ministri Hoxhaj.

Nga ana tjetër, kryetari i Asociacionit të Komunave të Kosovës, Naim Ismajli ka vlerësuar se komunat mund të kenë ndikim pozitiv në diplomaci.

“Bashkëpunimi ndërmjet qyteteve të ndryshme, binjakëzimet, anëtarësimet në organizata të ndryshme ndërkombëtare, e kanë shtuar kontributin e komunave në politikën e jashtme”, ka vlerësuar Ismajli.

Përveç pjesëmarrësve nga Kosova, përvojat në qeverisjen komunale i ka ndarë edhe Arbjan Mazniku, nënkryetari i Bashkisë së Tiranës.

Në panelet tjera u diskutua për promovimin e turizmit lokal dhe angazhimin e qyteteve në iniciativa dhe asociacione rajonale dhe ndërkombëtare. Konferenca e sotme është organizuar si vazhdimësi e aktiviteteve të dala nga konferenca e ambasadorëve e organizuar në dhjetorin e vitit të kaluar.