Karl-Heinz Rummenigge tashmë e ka një sy dhe një vesh nga çerekfinalet e Ligës së Kampionëve, ku Bayern Munich do të përballet me Real Madridin.

Bosi i klubit gjerman foli për një duel gjigantësh, në kolonën e tij për revistën zyrtare të Bayernit, por u dorëzua në objektivin e caktuar: “Nëse ju më pyesni mua për rangun aktual të futbollit europian, menjëherë mund të them se Real Madridi është numri një. Reali është një mit, të gjithë e dinë dhe e pranojnë këtë gjë. Trofetë e shumtë kombëtarë dhe ndërkombëtarë, të fituar nga ky klub, përbëjnë rekord më vete, ndërsa galeria e yjeve që kanë veshur fanellën e bardhë nis nga Di Stefano e vazhdon deri te Cristiano Ronaldon. Sa për dy ndeshjet e Champions-it të Bayern Munich kundër “Los Blancos”, mendoj se faktori-trajner është në favorin tonë. Me Carlo-n në drejtim, ne mund të përballemi më mirë në këtë sfidë, që është më e vështira, deri më tani, këtë sezon. Ne jemi shumë të ngazëllyer që do të përballemi dy herë me këtë klub legjendë. Me tre artistë në sulm, Ronaldo, Benzema dhe Bale, me një qendër të fushës të pabesueshme, Modric-Kroos, si dhe një mbrojtje, që gjithashtu, di të luftojë ashpër, Real Madridi vazhdon të mbetet i njëjtë me atë që Carlo Ancelotti fitoi finalen e vitit 2014 të Champions-it, kundër Atletico Madrid.”

Claudio Marchisio ka shpallur Andres Iniestën, si futbollistin e Barcelonës, që ai respekton më shumë. Mesfushori katalanas ka pasur një karrierë të shndritshme, duke fituar katër tituj të Ligës së Kampionëve dhe tre Botërorë për Klubet me Barcelonën, si dhe Kupën e Botës e dy Kampionate Europiane me kombëtaren iberike.

Megjithatë, 32-vjeçari ka qenë disi në hijen e yjeve të tjerë në ekip, me Lionel Messin, që vazhdon të tërheqë më shumë vëmendje. Por Marchisio ka folur me admirim për yllin e Spanjës, duke këmbëngulur se ai është një lojtar me të vërtetë i veçantë, një plus i madh për Barcelonën.

“Lojtari i Barcelonës, që e admiroj më shumë, është Iniesta, pasi ai ka talent të pafund,” – ka thënë mesfushori italian për “JTV”.

Italiani do të ketë mundësinë për t’u përballur me Iniestën përsëri, kur të takohen në çerekfinalen e Champions-it, pasi e bënë këtë gjë edhe në finalen e këtij kompeticioni në vitin 2015, e cili e pa skuadrën nga “Camp Nou” të ngrinte një tjetër titull europian. Marchisio, megjithatë, thotë se skuadra e tij nuk është në kërkim të ndonjë hakmarrjeje:

“Edhe pse Liga e Kampionëve ka ardhur gjatë një kohe delikate në kalendarin e Seria A, adrenalina na jep energji të pabesueshme fizike dhe mendore. Ju nuk keni nevojë shumë për t’u përgatitur për një ndeshje kundër Barcelonës. Ky nuk do të jetë një shans për hakmarrje, pas finales së vitit 2015. Qëllimi ynë është për të arritur në finale e Cardiff-it dhe të fitojmë trofeun.”

Bastian Schweinsteiger nuk ka pasur mundësi t’iu thotë lamtumirë bashkë-lojtarëve të Manchester Unitedit para se të udhëton për në Amerikë

Ish anëtari i Bayern Munichut, i cili nuk u pëlqye aspak nga Jose Mourinho, është transferuar te skuadra amerikane, Chicago Fire pa u përshëndetur me bashkë-lojtarë.

“Vendimi nuk ishte i lehtë, pasi ka qenë pakë vonë, por asnjëherë nuk e kam pas mundësin mu përshëndet si duhet me ekipin”, ka deklaruar Schweinsteiger.

“Ata kishin një ndeshje jashtë të dielën kështu që unë nuk munda t’i përshëndes, sepse unë nuk kam dashur që lojtarët ta ketë fokusin tek unë, por te ekipi dhe ndeshja”, ka theksuar ai.