Prej ditës së shtunë drejt së dielës me zhvendosje të akrepave të orës për një orë përpara, respektivisht prej orës 2 në orën 3 pas mesnate, fillon llogaritja verore e kohës.

Kalimi i llogaritjes prej dimërore në verore të kohës është vendosur me arsye se “vazhdohet” dita, mundësohet kursim i energjisë elektrike, rritet produktiviteti i fuqisë punëtore, përmirësohet adaptimi i njerëzve dhe dita punuese bëhet më efikase.

Që prej vitit 1981 u vendos ligji që përfshin tërë Evropën në të gjitha shtetet e saj. Norma evropiane përcakton në mënyre të qëndrueshme datat e fillimit të periudhës së orës verore, ku akrepat lëvizin 60 minuta para dhe orës dimërore kur ajo shkon 1 orë pas. Ndryshimet bëhen të dielën e fundit të muajit marsit dhe të dielën e fundit të tetorit.

Kryetari i Partisë Demokratike të Kosovës, Kadri Veseli, ka deklaruar në Konventën e VIII të Partisë Demokratike të Kosovë se ai beson në shtetin e Kosovës dhe të ardhmen euro-atlantike të shtetit, ndërsa ka premtuar edhe se Kosova do ta formojë ushtrinë, pa i prishur raportet me Shtetet e Bashkuara të Amerikës, njofton Klan Kosova.

“Kosova është dhe do të mbetet, një vend i shpresës për të gjithë. Shtet dhe shoqëri e mundësive të barabarta për qytetarët e saj. Para nesh ndodhen shumë sfida, të politikës së jashtme e të brendshme, por unë kam besim të plotë tek njerëzit e Kosovës. Kam besim të plotë në shtetin e Kosovës, në të ardhmen e tij të sigurt euro-atlantike”, tha Veseli.

“Të tjerët le të merren me dilema, por ne do ta bëjmë ushtrinë e Kosovës. Do ta bëjmë një ushtri moderne e profesionale, rojtare e sigurisë së atdheut tonë, kontribuese e paqes dhe stabilitetit në rajon, anëtare dinjitoze e NATO-s, krenari e brezave që ëndërruan gjatë lirinë e Kosovës, krenari e brezave që do ta trashëgojnë shtetin e pavarur dhe sovran, Republikën e Kosovës”.

Ai u shpreh optimist se me besimin e palëkundur në forcën e popullit Kosova do t’ia del edhe sfidës së zhvillimit dhe fuqizimit të shtetit.

“Ne e çliruam Kosovën, sepse e donim lirinë më shumë se jetën tonë. Mijëra dëshmorë të Ushtrisë Çlirimtare të Kosovës janë dëshmia e përjetshme e kësaj atdhedashurie të pashembullt. Ne do ta bëjmë Kosovën shtet të zhvilluar e të begatshëm, sepse ky është obligimi ynë ndaj qytetarëve të mrekullueshëm të kësaj toke të bekuar”, tha kryetari Veseli.

Ministri i Punëve të Jashtme të Kosovës, Enver Hoxhaj ka konfirmuar njohjen e Pavarësisë së vendit tonë nga ana e Bangladeshit më 27 shkurt 2017, ndërsa sot ka marrë notën origjinale të njohjes nga Bangladeshi.

“Kjo është nota origjinale e njohjes nga Bangladeshi e cila i është dorëzuar misionit tonë diplomatik në Washington. Nga dje është vendosur në arkivin e Ministrisë së Jashtme me 113 letrat tjera të njohjeve”, ka shkruar kryediplomati kosovar në profilin e tij zyrtar në rrjetin social Facebook.

Notën origjinale e ka pranuar edhe kryeministri Isa Mustafa në formë elektronike.

Ish-eprorët e lartë të UÇK-së kujtojnë 24 marsin e vitit 1999, kur aeroplanët e NATO-s filluan sulmet ajrore ndaj caqeve të ish-ushtrisë jugosllave. Sipas tyre, Aleanca NATO-UÇK ishte fatale për Serbinë, shkruan sot Gazeta “Zëri”

Tetëmbëdhjetë vjet më parë NATO-ja filloi fushatën e bombardimeve kundër caqeve të ushtrisë ish-jugosllave, duke e shënuar kështu fillimin e fundit të regjimit serb mbi Kosovën.

Fushata ajrore pasoi refuzimin e Beogradit për ta nënshkruar marrëveshjen e negociuar në Rambuje të Francës, për t’i dhënë fund luftës në Kosovë.

E lajmin e shpresës për Kosovën 18 vjet më parë e kishte dhënë ish-presidenti i SHBA-së, Bill Clinton, shkruan “Zëri”.

Ai ndër të tjera në një konferencë të jashtëzakonshme për medie kishte thënë se kriza në Kosovë ka arritur kulminacionin, “nëse nuk veprojmë do të përkeqësohet”. Menjëherë pas asaj deklarate, NATO-ja dhe aleatët filluan bombardimin mbi caqet serbe.

Fushata e bombardimeve të NATO-s zgjati 78 ditë, kur edhe forcat serbe ngritën “flamurin e bardhë”.

Gjatë luftës së fundit në Kosovë mbi 10 mijë qytetarë janë vrarë nga forcat serbe, rreth 1 milion veta u depërtuan nga vendi, ndërsa 5000 shqiptarë llogariteshin si të zhdukur.

Krahas sulmeve të NATO-s nga ajri, Ushtria Çlirimtare e Kosovës (UÇK) fitonte terren në tokë.

Ish-eprorët e UÇK-së kujtojnë momentin kur nisën sulmet e NATO-s, të cilat vinin pas një lufte njëvjeçare të tyre me forcat serbe. /Zëri/