“Parashkrime të rasteve të korrupsionit ku janë të përfshirë zyrtarë të lartë nuk do duhej të mbylleshin pa dhënë përgjegjësi askush”, thotë Petrit Kryeziu, shef i Zyrës Ligjore të BIRN dhe Internews Kosova.

Petrit Kryeziu, shef i Zyrës Ligjore të BIRN dhe INTERNEWS KOSOVA, siç transmetoi emisioni “Drejtësia në Kosovë”, ka thënë se lëndët e natyrës së korrupsionit, sidomos ato ku janë të përfshirë zyrtarë të nivelit të lartë, nuk do duhej të parashkruheshin.

Ai ka deklaruar se Zyra e Prokurorit Disiplinor e ka për obligim që të hetojë rastet kur parashkruhen lëndët e korrupsionit. Sipas tij parashkrime të tilla nuk do duhej të mbylleshin pa dhënë përgjegjësi askush.

Siç transmetoi “Drejtësia në Kosovë”, ndjekja penale ndaj ish-ministrit të Kulturës, Astrit Haraqisë, i cili akuzohej për keqpërdorim të detyrës dhe autoritetit zyrtar për shkak të parashkrimit të veprave penale është e pamundshme.

Zvarritja e lëndës për më shumë se pesë vjet ka bërë që vepra penale ndaj Haraqisë ta humbë vlerën, pasi që është parashkruar gjatë rrugëtimit 57 ditësh nga Gjykata Themelore e Prishtinës për në Gjykatën e Apelit, të cilat i ndan vetëm një mur në mes.

Ndjekja penale për Haraqinë i cili në cilësinë e ministrit të Kulturës akuzohej për shpërdorim detyre pushoi në janar të këtij viti, pasi lënda e tij u vjetërsua.

Siç dihet bashkë me Haraqinë të gjykuar në këtë çështje janë edhe ish-ministri i Kulturës, Valton Beqiri, Nehat Fejza pronar i kompanisë “Concordia Pictures” dhe Armond Morina, pronar i kompanisë “Morina Films”.

Sipas aktakuzës Astrit Haraqija, në kohën kur ishte ministër i Kulturës, në vitet 2006-2007, kishte lidhur kontrata të kundërligjshme për financimin e dy projekteve filmike. Po sipas aktakuzës, dëmi që i ishte shkaktuar buxhetit me kontratat në fjalë ishte rreth 300 mijë euro.

Gjykata Themelore e Prishtinës i kishte shpallur fajtorë dhe lënda ishte kthyer në rivendosje nga Apeli. Por sërish gjykata i shpalli fajtorë në dhjetor të vitit 2016 dhe i kishte dënuar me nga një vit me burgim katër të akuzuarit.

Hulumtimi i “Drejtësia në Kosovë” tregoi se Gjykata Themelore e Prishtinës dhe ajo e Apelit për 5 vjet nuk arritën të nxirrnin një vendim për këtë çështje, duke lejuar kështu që lënda ndaj Haraqisë të endej herë në njërën e herë në tjetrën ndërtesë, pa një vendim përfundimtar.

Emisionin për vjetërsimin e lëndës së Astrit Haraqisë mund ta ndiqni në këtë link.

“Të pandehurit për kanosje i është caktuar masa e arrestit shtëpiak”, tha prokurori i rastit, Zejnulla Gashi.

Gjykata Themelore e Prizrenit ka caktuar masën e arrestit shtëpiak prej një muaji ndaj të dyshuarit H.P. për shkak të veprës penale të kanosjes ndaj prokurorit të krimeve të rënda në Prizren, Mehdi Sefa.

Lajmin për KALLXO.com e bëri të ditur prokurori i rastit Zejnulla Gashi.

“Të pandehurit për kanosje i është caktuar masa e arrestit shtëpiak”, tha Gashi.

Prokurori Gashi bëri të ditur arsyen e moskërkesës për caktim të masës së paraburgimit.

“Jam tërhjekur nga kërkesa për caktimin e masës së paraburgimit, pasiqë i pandehuri në seancë për caktimin e masës ka pranuar veprën penale dhe është penduar thellë për veprimet e tij”, tha Gashi.

KALLXO.com të enjten raportoi për rastin e kanosjes ndaj prokurorit të krimeve të rënda në Prizren.

Prokurori Mehdi Sefa tha se personi i dyshuar kishte kërkuar prokurorin në recepcion dhe me të hyrë në zyrë kishte filluar ta ofendonte dhe kërcënonte.

“Ai më fajësonte për dënimin që kishte marrë djali i tij, lëndën e të cilit e kam pasë unë. Më quajti me fjalë fyese “gomar prokuror” dhe vazhdoi të më kërcënonte duke mos u larguar nga zyra ime”, tha prokurori Sefa.

Më tutje, prokurori Sefa tregoi se fjalët kërcënuese kishin vazhduar nga i dyshuari në zyrën e tij derisa ai ishte detyruar ta lëshonte zyrën dhe të intervenonte Policia në arrestimin e të dyshuarit.

Motivi i kanosjes ndaj prokurorit nga i dyshuari H.P. duket të jetë lënda e djalit të tij, të cilin prokurori e kishte akuzuar për dy vepra penale: atë të vrasjes në tentativë dhe të armëmbajtjes pa leje.

Prokurori njoftoi se djali i të dyshuarit për këto dy vepra penale është dënuar nga Gjykata Themelore e Prizrenit me 22 muaj burg. I pakënaqur me këtë vendim, prokurori Sefa kishte bërë ankesë në Gjykatën e Apelit dhe dënimi ishte rritur në 3 vjet burg.

Si rezultat i kësaj, prindi i të dënuarit e kishte kërcënuar prokurorin se për fajin e tij djali i ishte dënuar me një dënim kaq të lartë.

Deputeti i PDK’së, Shukri Buja, ka thënë se do ta përkrahë rrëzimin e Qeverisë të iniciuar nga NISMA për Kosovën. Pro rrëzimit të Qeverisë është deklaruar edhe Nait Hasani. Mocionin për rrëzimin e Qeverisë e kanë përkrahur edhe AAK e Vetëvendosje. Në këtë situatë, Isa Mustafa ka deklaruar se mandati i Qeverisë do të shkojë deri në fund.
Të paktën tre deputetë të PDK’së e përkrahin idenë e NISMA’s për Kosovën për rrëzimin e Qeverisë së udhëhequr nga Isa MUstafa.

Shukri Buja e Nait Hasani, deputetë të PDK’së, kanë konfirmuar për Gazetën Express, se do të përkrahin çfarëdo nisme që e çon në pension Isa Mustafën dhe e largojnë këtë Qeveri nga udhëheqja e Kosovës.

“E përkrahi çdo nismë për rrëzimin e kësaj Qeverie”, ka thënë Hasani, për Express, të dielën.

“Kjo Qeveri ka dështuar”, ka shtuar ai.

Mendim të njëjtë e ka edhe Shukri Buja, i cili thotë se edhe Konventa e fundit e PDK’së e ka lënë të hapur mundësinë e rrëzimit të Qeverisë.

“Jam pro largimit të kësaj Qeveria dhe do të mbështesë nismën për rrëzimin e saj. Edhe deputetë të tjerë të PDK’së e përkrahin rrëzimin e kësaj Qeverie përfshirë Nait Hasanin e Shaip Muja”, ka thënë Buja, të dielën.

Express ka provuar të kontaktojë me deputetin Muja por ai s’është përgjigjur thirrjeve në telefon.

Megjithëkëtë, Shukri Buja ka thënë se duhet kujdes që nisma për rrëzimin e Qeverisë të realizohet se nëse dështon s’mund të ketë nisma të tilla për 90 ditë të tjera.

Rrëzimin e Qeverisë përmes një mocioni të mosbesimit e ka nisur NISMA për Kosovën, parti kjo e udhëhequr prej Fatmir Limajt.

Edhe Vetëvendosje dhe AAK e kanë përkrahur NISMA’n për Kosovën që të rrëzojnë Qeverinë e udhëhequr prej Kryerarit të LDK’së, Isa Mustafa.

Koalicioni PDK-LDK i lidhur para dy viteve ka dështuar të marrë ndonjë vendim lidhur me demarkacionin me Malin e Zi, kusht ky për liberalizimin e vizave. Veç kësaj, pozita ka dështuar të themelojë asociacionin e komunave me shumicë serbe. Ka dështuar edhe të themelojë ushtrinë.

Sidoqoftë, Isa Mustafa ka thënë dje në Shtime se mandati i Qeverisë do të shkojë deri në fund. Ka thënë se s’bën të dorëzohet në gjysmë të rrugës pavarësisht nismave për të shkuar në zgjedhje të jashtëzakonshme.

Idenë për zgjedhje të reja, PDK e kishte nisur në tetor të vitit të kaluar. Atëkohë, Kadri Veseli kishte thënë se me një marrëveshje mes partive politike edhe mund të shkohet në zgjedhje të jashtëzakonshme.

“Nuk është fundi i botës nëse nesër del një opsion me marrëveshje politike në mes të kampit të pozitës dhe opozitës që të shkohet në zgjedhje dhe të kemi normalitet”, kishte deklaruar ai.

Kryetari i PDK’së, Kadri Veseli kishte numëruar dështimet e Qeverisë dhe të Isa Mustafës.

Dështimi i parë i Qeverisë, sipas Veselit, ishte gabimi që Qeveria bëri me Asociacionin e Komunave me shumicë serbe. Dështimi i dytë, sipas tij, është pamundësia e koalicionit për të ratifikuar në Parlament, marrëveshjen e demarkacionit me Malin e Zi.

Në këtë situatë, Veseli ka përmendur zgjedhjet si mundësi për kthim në normalitet

Është raportuar për një monedhë të falsikuar në sheshin “Shatërvan” në Prizren.

Ankuesi punëtorë në një lokal, raporton se i dyshuari ka paguar me një kartëmonedhë prej 100 euro e cila dyshohet se është false, transmeton Indeksonline.

Monedha e falsifikuar është konfiskuar nga forenzika.

Me urdhër të prokurorit rasti shkon në procedurë të rregullt.