Një këmbësore është shkelur me veturë në Prizren. Viktima ka pësuar lëndime të rënda trupore dhe është dërguar në spitalin e Prizrenit për tretman mjekësor.
Ngjarja ka ndodhur dje rreth orës 19 e 10 minuta, në rrugën “Tirana”, shkruan PrizrenPress.
Sipas Policisë, aksidenti ka ardhur nga pakujdesia e të dyshuarit i cili në kalimin për këmbësor, duke mos i dhënë përparësi viktimës, e godet me veturë. /PrizrenPress.com/
Të paktën 50 persona kanë vdekur dhe dhjetëra të tjerë janë lënduar në aksidente trafiku në gjysmën e parë të vitit, flasin shifrat zyrtare të Policisë së Kosovës, ndërkohë që një numër aksidentesh kanë shënuar posaçërisht periudhën e verës.
Autoritetet e rendit thonë se kanë shqiptuar mijëra dënime me gjobë, por shkeljet e rregullave në trafik dhe tejkalimi i shpejtësisë janë shëndërruar në ‘tragjedi për shumë familje’.
Por, kaosit në trafik që ka mbretëruar viteve të fundit në të gjitha rrugët e Kosovës, autoritetet e vendit kësaj jave i janë përgjigjur me një plotësim-ndryshim të një Ligji, që sipas njohësve të rrethanave, nuk ka sjellë rezultate.
Me Ligjin e ri, që parasheh dënime shumë të rënda për shkelësit e rregullave, autoritetet e rendit në Kosovë thonë se aksidentet, sidomos ato me fatalitet, pritet të zvogëlohen.
Megjithëkëtë, pikërisht në ditën e futjes në fuqi të ligjit, bazuar në shënimet zyrtare të Policisë së Kosovës, mbi 50 aksidente, një pjesë e të cilave me të lënduar janë shënuar në gjithë Kosovën, policia thotë se ka shqiptuar sërish qindra dënime.
Sipas autoriteteve të rendit, qëllimi i ligjit të ri, shumë më të rreptë, është të rris sigurinë në trafikun rrugor dhe të mundësojë zhvillimin i rrjedhës normale të tij.
Jeton Rexhepi, drejtor i Departamenti Rrugor në Policinë e Kosovës tha për Radion Evropa e lire se me ligjin e ri janë përcaktuar rregullat e reja që, sipas tij, do të sjellin ‘etikë në trafik’.
“Synohet që të disiplinohen kundërvajtësit në trafik, në të njëjtën kohë të krijohet një sjellje dhe etikë më e madhe në trafikun rrugor dhe në fund edhe pjesa e trajtimit të ambientit”, tha Rexhepi.
Janë mbi 300 mijë makina të regjistruara në Kosovë, nga të cilat vetëm në Prishtinë afro 100 mijë, në një infrastrukturë rrugore që, siç thonë ekspertë të fushës, nuk mund ta mbajë këtë kapacitet.
Por, mekanizmat e sigurisë thonë se me ligjin e ri, përveç shqiptimit të pikëve negative, dënimet për shkelësit e rregullave të trafikut do të sillen nga 300 deri në 900 euro, dhe në raste të caktuara edhe me marrjen e patentshoferit.
Dënimet e parapara me Ligjin për trafikun, sado që thuhet se do të mund të rregullojnë “kaosin në trafik” dhe do t’i bëjnë ngasësit e makinave “më të disiplinuar”, megjithatë nga një pjesë e qytetarëve janë parë si “në shpërputhje me standardin jetësor në Kosovë”.
Për organizatat për të drejtat e njeriut, megjtihatë ligji i ri me dënime të larta, nuk përbën shkelje të të drejtave të njeriut. Këshilli për Mbrojtjen e Lirive dhe të Drejtave të Njeriut në Kosovë thotë se nuk cenohet e drejta e qytetarëve me këtë ligj.
Dënimet prej 900 eurosh, thonë disa shoferë, janë të papërballueshme për qytetarët.
Kaltrina është një qytetare e cila është shofere dhe konsideron se në komunikacion shoferët duhet të jenë të kujdesshme, por dënimet janë të larta.
“Varet nga gabimi që bënë. Por nëse një dënim sillet deri në 900 euro… është shumë i madh. Është i madh për shkak të standardit tonë jetësor”, tha ajo.
Të shumtë janë ata që e kanë parë ligjin në shpërputhje me mundësitë e qytetarëve, sado që thonë se ndryshimet ligjore janë të domosdoshme për të rregulluar “kaosin që po mbretëron”.
Kryetari i Federatës së Auto shkollave të Kosovës, Xhemshit Cakolli, thotë se duhet të shihet në praktikë nëse ligji do të zbatohet …
“Sa do të zbatohet dhe sa do të jenë kompetenten gjykatat,me i përfunduar këto lëndë mbetet për diskutim…Nga ana tjetër dënimet për xhepin e qytetareve është i madh. Por ngasësit e vetuarave duhet te kenë kujdes sepse 900 euro një nga dënimet për dike janë 3 paga mujore”, tha Cakolli.
Nga ana tjetër, Muhamet Krasniqi, ekspert për çështje të komunikacionit, nga Kolegji i shkencave të aplikuara teknike ‘Tempulli’, tha për Radion Evropa e Lirë se Ligji i ri për rregullat e trafikut rrugor sikurse edhe ligjet tjera të kësaj fushe, janë duke u ballafaquar me mungesë të punës të përbashkët paraprake dhe të koordinimit të mirëfilltë institucional sidomos në fazën e përgatitjes dhe hartimit të tyre.
Megjithatë, Krasniqi mendon se ligji do të ndikojë pozitivisht për sigurinë e qytetareve në rruge. Ai tha po ashtu se në raport me standardin e jetës në Kosovë kundërvajtjet mund të jenë të larta, por aspak në raport me jetën e njeriut.
“Unë mendoj se bashkërisht duhet të zhvendosim fokusin te një tjetër dukuri, asaj të vështirësisë së respektimit të ligjit, sidomos për kategoritë e caktuara të ngasësve. Këto vështirësi mund të varirojne prej mosbindjes se qytetarëve ndaj autoritetit policor, deri te shkelja e mundshme e ligjit nga ana e vet zyrtareve policorë, nëse ta zëme kuptohet se kundërvajtësi (i dënuari) ka lidhje të ndryshme me zyrtarin policor dhe jo vetëm”, tha Krasniqi.
Në krahasim me vendet në rajon Kosova thuhet se po shndërrohet aktualisht në vendin me dënimet më të larta në trafik. Sa për ilustrim, në Maqedoni dënimi më i lartë është deri në 400 euro, me mundësinë e marrjes së patentshoferit, varësisht nga shkelja në trafik.
Që nga e marta [20 shtator],ka hyrë në fuqi ligji i ri për Rregullat e Trafikut Rrugor, përmes të cilit ligj Ministria e Infrastrukturës (MI), ka përcaktuar rregullat e reja për shoferë, këmbësorë dhe për pjesëmarrësit tjerë në trafik. (REL)
Universiteti i Prishtinës “Hasan Prishtina” ka hapur sot konkursin për studime postdiplomike master.
Në vitin akademik 2016/17, ky universitet do t’i pranojë 2 mijë e 886 studentë. Si shtesë e numrit të përcaktuar UP-ja do t’i regjistrojë deri në 12 për qind përkatësisht 346 studentë të rregullt nga komuniteti joshumicë, raporton “Epoka e re”.
Konkursi do të jetë i hapur prej datës 21 deri më 30 shtator. Shpallja e rezultateve preliminare të provimit pranues do të mbahet më 5 tetor. Kandidatët, të cilët nuk janë pranuar mund të ankohen më 6, 7 dhe 8 tetor. Rezultatet përfundimtare në bazë të vendimit të komisionit të ankesave shpallen më së largu deri më 10 tetor.
Nga Jakup Krasniqi
Gjenerali Mike Xhekson, Komandanti i parë i KFOR-it, pas sa viteve erdhi në Kosovë dhe mirë bëri. U deshtë ardhja e tij që qeveritarët tanë, mos të thonë më se “Marrëveshja e Kumanovës e 10 qershorit 1999 ka përcaktuar kufijtë e Kosovës. Gjenerali Xhekson tha se çështja e kufijve nuk është trajtuar në Marrëveshjen e Kumanovës. Pra, Gjenerali i parë i KFOR-it, qeveritarëve ua hoqi nga dora një fakt, faktin se kufiri i Kosovës qenka caktuar në Kumanovë. Ai tha: “nuk ka qenë problem çështja e kufirit në Kumanovë”. Edhe për ketë Gjenerali e meriton një falënderim të sinqertë.
Qeveritarët si “fakt” të rëndësishëm veç Kumanovës e përmendin edhe Dokumentin Gjithëpërfshirës për zgjedhjen e Statusit Përfundimtar të Kosovës ose siç njihet ndryshe, Dokumenti i Presidentit Ahtisari. As kjo nuk është e vërtetë! Po a do të thotë se për t’u bindur qeveritarët tanë, se kjo është e pa qëndrueshme, duhet ta thërrasim Presidentit Ahtisari që të na tregojë se bisedimet e Vjenës nuk janë marrë me çështjen e kufijve të Kosovës. Kur flas për ketë, flas me kompetencë se kam qenë pjesë e Grupit Politik Strategjik dhe kam qenë prej më aktivëve dhe e them me përgjegjësi se në asnjë rast të vetëm nuk është folur për kufijtë e Kosovës. Pasi kufijtë e Kosovës janë vendosur shumë kohë më herët.
Përmendja edhe e disa datave të tjera, pas asaj të vitit 1974, nuk janë ndonjë “ARGUMENT”. Nisur nga këto që u thanë, ka hapësirë të bollshme për të mos e ratifikuar demarkacionit në ketë variant që e kemi. Pra demarkacioni duhet rishikuar në marrëveshje me Malin e Zi ose duhet me ia lënë ARBITRAZHIT. Por, për të ndodhë njëra nga këto që u thanë, Kuvendi duhet t’i thotë Jo, Ratifikimit të Marrëveshjes për Demarkacionin.
Kështu diçka të ngjashëm me “argumentin” e Kumanovës janë të gjitha “argumentet” e Komisionit të Thaçit e të Mustafës?!
Adnan Januzaj është “zhdukur” në muajt e fundit. Drejtuesit e FFK-së, por edhe Bunjaki janë munduar ta kontaktojnë, mbi të gjitha pas pranimit të Kosovës në UEFA e FIFA, por një gjë e tillë ka qenë e pamundur.
Përzgjedhësi thotë se nuk ka ende asnjë informatë në këtë drejtim, derisa është në pritje që Adnani të bëhet “i gjallë”.
Pasi Belgjika nuk po llogarit më në të, është e pashpjegueshme se cila ka mundur të jetë arsyeja që futbollisti i Manchester Unitedit, i huazuar në Sunderland, nuk iu bashkua Kosovës.
Sidoqoftë, pasi nuk ka luajtur në Evropianin e Francës, ai ka ende kohë ta bëjë një gjë të tillë, përcjellë Zëri.
Pas pranimit në UEFA e FIFA, Kosovës iu bashkua një numër i konsiderueshëm lojtarësh, përpos atyre që luajtën në Evropian.
Dhe, forca e ekipit verdhekaltër u demonstrua në debutimin e tij në eliminatoret e Botërorit 2018, ku shfaqi lojë të shkëlqyer, duke barazuar me Finlandën 1:1. Dyert e Kosovës janë të hapura, për të gjithë.
Një tjetër futbollist të cilin është duke e pritur Kosova tash e sa kohë është edhe Përparim Hetemaj. Futbollisti drenicas nuk pranoi të luante për Finlandën ndaj Kosovës në ndeshjen e parë kualifikuese për Botërorin e Rusisë. Tash, futbollisti e ka marrë vendimin dhe do ta publikojë shumë shpejt. Kosova ende shpreson.
“Kam biseduar edhe me Përparimin. Ai do ta lëshojë një komunikatë shumë shpejt, përmes së cilës do ta tregojë vendimin e tij përfundimtar. Nuk mund të them nëse do të luajë apo jo për Kosovën”, ka vazhduar Bunjaki për Zërin.
Përfaqësuesja e Kosovës po vazhdon të pasurohet dita-ditës. Pas Sinan Bytyqit e Atdhe Nuhiut, skuadra më e re evropiane, shumë shpejt do të mundë të llogarisë edhe në dy yje të së ardhmes.
Bëhet fjalë për Florent Hadërgjonajn dhe Ylli Sallahin. Mbrojtësi i djathtë, me vlerë 3 milionë euro, i cili aktualisht luan në skuadrën gjermane, Ingolstadt, e pati një karrierë të suksesshme në futbollin zviceran, ndërsa deri tash ishte pjesë e ekipit U-21 të Zvicrës.
Megjithatë, përzgjedhësi Albert Bunjaki thotë se ka kontaktuar së fundmi me lojtarin, i cili është i gatshëm të luajë për Kosovën.
“Kemi biseduar me Florentin dhe ai e ka shprehur gatishmërinë për të luajtur për Kosovën. Gjasat janë të vijë të luajë kundër Turqisë, por ndoshta edhe ndaj Islandës. Është një lojtar që na nevojitet, është e ardhmja e futbollit, një lojtar shumë interesant”, ka thënë Bunjaki të martën për “Zërin”.
Gjithashtu, ai ka konfirmuar se edhe ish-futbollisti i Bayern Munichut, tash pjesë e Karlsruher, do të jetë pjesë e Kosovës.
“Edhe me Yllin kemi biseduar dhe edhe ai do të na bashkohet”, ka shtuar Bunjaki. Sallahi ishte pjesë e Përfaqësueseve të reja të Austrisë, por ka vendosur t’i bashkohet vendit të prindërve të tij.
Gjithashtu, Bunjaki ndihet i lumtur që tash e tutje do të mund të llogarisë në sulmuesin Atdhe Nuhiu, me të cilin thotë se ka pasur kontakt tash e disa vite. Ai e konsideron lojtarin mjaft të rëndësishëm për skuadrën e tij, pasi synon të ketë konkurrencë të fortë në çdo pozitë.
Në qendër të sallës ishte vendosur një rrjetë e cila mbante shumë pendla e që në shikim të parë dukeshin si re. Të gjitha këndet e Sallës së Kuqe të Pallatit të Rinisë në kryeqytet, ishin zënë me mbajtëset e partiturave klasike, gjë që nuk është e zakonshme të ndodhë në koncertet klasike.
Por si çdoherë tjetër edhe kësaj radhe Festivali DAM sjellë risi që janë shumë atraktive për audiencën. Kësisoj udhëtimi i njëmbëdhjetë i këtij festivali nisi me performancën “Stitching Needs” apo “Domosdoshmëritë e harrnuara”, që e sollën artistët Lola Sylaj e Dardan Zhegrova.
Lola e Dardani, harrnuan kukulla në formë njeriu.
“Performanca “Stitching needs” është ideuar për hapjen e festivalit DAM në bashkëpunim me Dardan Zhegrovën. Pjesa e parë e performancës ishte krijimi i kukullës e cila vazhdon me një video ku ne jemi kukulla. Njerëzit krijojnë kukulla për ti afruar të tjerët por përfundojnë duke i larguar ata, si shpikjet e rrjeteve sociale të cilat krijojnë idenë se krijon shoqëri por në fakt largon socializimin me njerëz”, tha fillimisht për KultPlus artistja Sylaj e cila vazhdoi tutje të tregonte edhe për pjesën e dytë të performancës. Videoja e cila paraqitet para audiencës tregon një poezi që flet për ndjenjën e vetmisë dhe nevojën që ta kesh afër dikë.
“E kur je fëmijë vetminë nganjëherë e largon me kukulla ku biseda e zhvilluar mësohet të jetë si ajo që e bënë me rrethin. Jemi inspiruar prej besëtytnive që i kanë njerëzit për kukulla, për shembull në Shqipëri mbajnë kukulla në shtëpitë e tyre njerëzit që të mbrohen nga syri i keq”, tha ajo.
Menjëherë pas përfundimit të performancës së artistëve, njëzetë flautistë të Korit të Flautëve të Kosovës u shpërndanë nëpër sallë pa u vërejtur nga publiku gjersa filluan të ekzekutojnë në flaut një e nga një. Ky kor u udhëhoq nga dirigjenti Ljubisa Jovanovic.
Çka pasoi, ishte një program i ngjeshur që kishte përgatitur ky festival për këtë hapje, me pikën e dytë të koncertit që solli trion Robert Kowalski në violinë, Olga Zado në piano dhe Boris Nedialkov në violonçel.
Kjo pjesë nisi me Beethoven, sonatën për piano dhe celo në D-dur, vazhdoi me Felix Mandelssohn me sonatën për violinë e piano e u përmbyll me një pikë interesante e mjaft të fuqishme krijuar nga kompozitori Dimitri Shostakovich, që ishte piano trio “Poeme” në c-mol dhe piano trio në e-mol.
Olga Zado ishte ajo që gjatë tërë kohës shoqëroi me piano dy muzikantët tjerë. Ajo për KultPlus tha se ishte kënaqësi të performonte në hapjen e DAM-it.
“Jam pak e lodhur, po ishte një kënaqësi të performoja, nuk ishte e lehtë të dije se çfarë zëri po prodhohej pas muzikës, akustika nuk ishte e lehtë. Në pjesën e dytë të koncertit kishte shumë emocion tek të tretë ne, kolegët e mi ishin fantastik dhe ma bënë punën shumë të lehtë”, tha për KultPlus Zado, e vazhdoi duke treguar se në Kosovë po ndihet shumë mirë dhe ka respekt për një festival si DAM, i cili me pak burime po bën një punë të madhe.
Nga ana tjetër violinisti Robert Kowalski, tha për DAM Fest-in se është një ide fantastike.
“Jemi mbledhur në këtë shtet të mrekullueshëm që ka kaluar peripeci e kohë të vështira. Prandaj jemi të lumtur të gjithë që po ju njohim juve, popullin e Kosovës. Ndërkaq të flas për koncerte, për mua dje ka nisë maratona ku luajta me Filharmoninë e Kosovës, ndërsa sonte kishim një program të veçantë”, tha ndër të tjera për KultPlus, Kowalski.
Në këtë mënyrë u bë hapja e edicionit të njëmbëdhjetë të Festivalit DAM, i cili edhe përgjatë pesë ditëve në vazhdim do të na sjellë koncerte të ndryshme e padyshim të veçanta, ashtu siç vetëm organizatorët e tij dinë ti bëjnë.
Sonte, me fillim prej orës 19:30, në kuadër të DAM Festivalit vjen sopranoja Zana Abazi Ramadani dhe Elena Atanasovska në piano, në Sallën e Kuqe të Pallatit të Rinisë. / KultPlus.com
Lëvizja Vetëvendosje njofton se është arrestuar aktivistij i saj, Egzon Azemi.
Sipas VV-së ai është arrestuar sot nga policë civilë afër shtëpisë së tij, pa asnjë arsyetim.
“Aktivisti Egzon Azemi është arrestuar sot me forcë nga policë civilë afër shtëpisë së tij. Atij nuk i është dhënë asnjë arsyetim se pse është marrë nga policia e cila po vazhdon t’i ndjekë aktivistët në çdo hap. Kjo po i shpenzon forcat e saj në ndjekjen e aktivistëve të pashembullt për aktivitetet e tyre politike, përderisa kriminelet e qeverisë po i vazhdojnë shëtitjet e tyre të papenguar. Kur fokusi dhe prioriteti i policisë është luftimi i opozitës, ky është tregues i qartë i autoritarizmit. Por, qytetarët e Kosovës nuk mund t’i binden urdhrave të padrejta policore të shtetit autoritar dhe kjo situatë nuk mund të vazhdojë gjatë. Dikasteri i Qeverisë “Pronto”, policia, tashmë është demaskuar dhe fytyra e saj kundër qytetarëve të Republikës është vënë më pah. Qytetarët do të triumfojnë përballë kësaj shtypjeje.”, njofton Vetëvendosje me anë të një komunikate për media. /PrizrenPress.com/
Motrat Mustafa të cilat janë të njohura mirë për muzikën e tyre popullore, kishin të njëjtin fat sikurse shumë njerëz të tjerë gjatë kohës së luftës në Kosovë, transmeton Klan Kosova.
Gjatë luftës së vitit 1999 edhe ato u detyruan të largoheshin nga shtëpia e tyre e të marrin një rrugë pa adresë.
Dy nga motrat Mustafa përjetuan fatin e refugjatëve.
Për këtë agjencia e lajmeve Reuters iu ka kushtuar një reportazh.
Kukës, Shqipëri (27 Prill 1999)
Disa javë më parë motrat Mustafa zor se mund të ecnin nëpër një rrugë në Kosovë pa u rrethuar nga fansat e muzikës së tyre. Tani ato janë në një apartament të ngushtë në qytetin kufitar të Kukësit duke kënduar këngë të dhimbshme për shtëpinë nga e cila ato u detyruan të largohen bashkë me qindra mijëra refugjatë të tjerë nga krahina jugore e Serbisë.
Sahide Mustafe dhe motra e saj Elhame janë ndër muzikantët më të njohura të Kosovës, të njohura kudo nga fansat edhe kur ato shkojnë në dyqane.
Talenti i tyre ka fituar çmime muzikore, kontrata dhe një mënyrë jetese të rehatshme për familjen e tyre, por gjithçka duket se u rrënua kur ato u përballen me jetën si refugjate.
Motrat Mustafa vijnë nga një fshat afër Prizrenit, rreth 30 km (20 milje) në veri të kufirit me Shqipërinë në një zonë që për shekuj me radhë ka qenë një zemër për nacionalistët e Kosovës që luftuan për një atdhe të pavarur.
Ato ishin lindur në një familje muzikantësh, nëna e tyre ishte një këngëtare popullore në rininë e saj, dhe ato shumë shpejt mësuan edhe se si të luhet me instrumente . Ato u rriten me çifteli dhe të tjera instrumente tradicionale.
Por për autoritetet serbe që sunduan Kosovën, muzika e tyre është parë si një himn për nacionalizmin duke u përpjekur për ta shtypur atë brutalisht.
“Gjërat filluan të bëhen më keq për ne. Disa javë më parë, motra ime është ndaluar nga një polic në makinën e saj dhe më pas u dërgua në stacionin e policisë deri herët në mëngjes”, tha Sahidja.
“Ata më donin mua për t’ju shpjeguar se çfarë isha duke kënduar”, tha Elhamja. “Ata donin të dinin se pse unë kam qenë duke kënduar në lidhje me Kosovën”.
Më 11 mars 1999 ato u urdhëruan të dilnin nga shtëpia e tyre nga policia serbe dhe iu është kërkuar të shkonin në Shqipëri.
Prindërit e tyre u zhvendosën tek të afërmit në fshat, duke mos dëgjuar më për ta, por motrat iu bashkuan një kolone me mijëra shqiptarë të tjerë të cilët u dëbuan nga shtëpitë e tyre dhe kaluan kufirin në këmbë, me asnjë ide të vetme se çfarë do të mund të ndodhte.
Fama e tyre ishte fati i tyre.
Derisa ato po ecnin drejt Kukësit, një grua shqiptare i njohu dhe e prezantoi veten si një fanse e madhe e tyre.
Ajo i ftoi në shtëpinë e saj, dhe ato kanë qëndruar me të qëkur.
Sahidja tha: “Ne kemi qenë shumë të mirëpritura nga njerëzit këtu, por një ditë shpresojmë që të kthehemi në shtëpitë tona edhe nëse ato janë djegur”.
Elhamja tregoi se ajo po punonte si infermiere në kampin e refugjatëve për të ndihmuar njerëzit për të jetuar një jetë normale.
Të martën më 27 prill të vitit 1999 ato u ulën në dhomën e pritjes në banesën modeste, morën çiftelinë në dorë, një instrument me dy tela, dhe bënin prova për shfaqjet për të cilat kishin frikë se nuk do t’i bënin më kurrë.
“Toka e Kosovës, atdheut tonë, ne jemi bijtë e tu dhe ti je nëna jonë”, kështu ishin fjalët e tyre të hitit më të madh “Toka e Kosovës që ka vuajtur shumë”.