Një tufë delesh ‘respektojnë’ shenjat e komunikacionit.
Ato të shoqëruar nga një bari shihen duke ecur në vendin e këmbësorëve në hyrje të qytetit të Prizrenit./TVPZ/
Pengim të policëve në detyrë në Suharekë
Në Suharekë mbrëmjen e djeshme, disa persona kanë tentuar të sulmojnë dhe të pengojnë policët në detyrë, kur ata dolën në vendin ku një shofer që voziste në gjendje të dehur goditi me makinë një shenjë trafiku.
Sipas raportit policor shoferi i dehur dhe dy pasagjerë që udhëtonin me makinën që goditi shenjën e komunikacionit, deshën të sulmojnë policinë.
Të dyshuarit për tentim-sulm dhe tentim-pengim të policëve në Suharekë u dërguan në stacionin policor deri në këndellje.
Kujtimi për Njeriun Unik
Muzikantë dhe politikanë kanë shprehur ngushëllime për vdekjen e këngëtarit legjendar kanadez, Leonard Cohen.
Cohen ka vdekur në moshën 82-vjeçare.
Elton John tha se ai ka qenë “një njeri gjigant dhe një kompozitor i shkëlqyer”.
Peter Gabriel tha se “zëri unik i Cohenit” ka krijuar “imazhe të paharrueshme”.
Për Justin Timberlake, Cohen ka pasur “një shpirt të pakrahasueshëm”.
Cohen ka qenë krejtësisht unik dhe e pamundur pa ta imituar, tha Nick Cave.
Yusuf, artisti i njohur më herët si Cat Stevens, tha se vdekja e Cohenit “edhe njëherë tregon se sa e brishtë është jeta”.
Kryeministri i Kanadasë, Justin Trudeau, tha se Cohen do të mbahet në mend për vokalin, humorin dhe vargjet e tij.
Trudeau tha se këngët e tij do të mbeten favorite për shumë breza njerëzish.
Kryeministri i Izraelit, Benjamin Netanyahu, e përshkroi atë si “krijues të madh” dhe “artist të talentuar”.
Lajmi për vdekjen e Cohenit është publikuar në faqen e tij zyrtare në Facebook, por aty nuk janë dhënë detaje për shkakun e vdekjes.
Cohen ka folur muajin e kaluar për mundësinë e vdekjes.
“Jam gati të vdes”, ka thënë ai për gazetën The New Yorker.
Promovohet libri me 101 dokumente sekrete për Kadarenë
Pas “Kadare i denoncuar”, gazetari dhe studiuesi Dashnor Kaloçi vjen me librin e dytë me dokumente sekrete mbi shkrimtarin e njohur, “Kadare në dokumentet e Pallatit të Ëndrrave” -101 dokumente arkivore “Tepër sekret” të papublikuara, botim i UET-Press.
Libri, i cili ka hapur polemika në shtyp, u promovua sot në ambientet e Universitetit Europian të Tiranës, ku morën pjesë studiues, gazetarë e figura të jetës publike në vend.
Autori Kaloçi gjatë fjalës së tij tha shkrimtari Kadare vazhdon të krijojë edhe sot debat pro dhe kundër tij.
“Do t’i përgjigjem vetëm një pyetjeje, e cila bëhet prej 25 vitesh. Kur na kanë pyetur se çfarë po bëni për Ismail Kadarenë, pyetja që shtronin ishte: “Po e mbroni apo po e sulmoni? As njëra dhe as tjetra. Dokumenti nuk merr përsipër as të mbrojë njeri dhe as të sulmojë njeri, dokumentet janë botuar të gjitha të plota dhe secili e nxjerr vetë konkluzionin. Në libër ka dokumente, ku Enver Hoxha e ngre në qiell Ismail Kadarenë dhe urdhëron botimin e tij në 5, 6 gjuhë të botës, ka mbledhje të byrosë politike që i kushtohen vetëm vetëm Kadaresë, janë mbledhjet pas vdekjes së Enver Hoxhës dhe Ramiz Alisë. Ka një numër të madh dokumentesh kryesisht të viteve ‘73 që e quajnë armik reaksionar, bashkëpunëtor i Fadil Paçramit dhe nga më të ndryshmet. Pra nuk ka seleksionim dokumentash dhe çdokush do t’i shikojë vetë”, tha Kaloçi.
Botuesi Henri Çili, i cili ka bërë dhe parathënien e këtij libri, tha se me këtë botim u ezurua një moment shumë i rëndësishëm i nxjerrjes në dritë të arikivave që kishin lidhje me një nga emrat më të njohur të letërsisë shqiptare.
“Duket sikur po bëjmë një përsëritje të një eventi që bëmë vitin e kaluar, rreth një vit më parë ne panairin e kaluar, por në fakt është diçka krejt e re dhe është për përmbylljen e një projekti mendoj me një rëndësi shumë të madhe për Universitetin Europian të Tiranës si dhe për për jetën publike aktuale si dhe mendoj për të shkuarën dhe për të ardhmen e të vërtetave ose të historisë së këtij vendi. Në shkencë gjetjet janë shumë të rralla ose me thënë të drejtën të rejat janë shumë të rralla. Prandaj kush mbledh, dokumenton dhe sistematizon dokumente me një koherencë dhe me një vijë logjike ndoshta është duke kryer një kontribut të posaçëm shkencor”.
Çili vlerësoi punën e bërë nga autori duke e quajtur punë mirëfilli shkencore.
Ky libër sjell çdo dokument arkivor të regjimit komunist që flet për Kadarenë, ku sulmohej, kritikohej apo cilësohej reaksionar.
Ai nis që nga dokumenti i parë ku sekretarja e komumitetit qëndror Liri Belishova autorizon vajtjen e djaloshit Kadare me studime në institutin Gorki deri në mbledhjet e fundit të politikës ku flitet për arratisjen e tij. / MAPO / KultPlus.com
PDK akuzon qeverisjen në Malishevë: Qytetarët janë të rrezikuar nga përmbytjet
Dega e PDK’së në Malishevë, përmes një komunikate për media ka bërë të ditur se qytetarët e kësaj komune janë të rrezikuar nga përmbytjet pasi qeverisja lokale nuk e hap digën e Liqenit të Mirushës
Qytetarët e komunës së Malishevës këto ditë u përballen me mot të vështirë. Zyrtarët komunalë ishin vetëm vëzhgues të situatës dhe asgjë më tepër. Për më keq ata edhe i kontribuuan grumbullimit të ujit te liqeni në Mirushë. Kështu thotë PDK’ja në Malishevë.
Sipas komunikatës, kjo ka ndodhë për faktin se Komuna e Malishevës është dashur ta hapin digë, lirimin e ujit, paraprakisht dhe të mbajnë në kuota të ulëta nivelin e ujit në liqen, por sipas PDK’së, Komuna as edhe gjatë vërshimeve nuk e kanë hapur gypin e shkarkimit të ujërave.
“Kjo ka bërë që të rrezikohen fshatrat nga shpërthimi i digës, kur dihet se digën e patën dëmtuar vet zyrtarët e komunës pranverën e kaluar, duke e hapur me forcë”, shkruan në komunikatë, transmeton Gazeta Express.
PDK akuzon komunën për shumën që Qeveria i kishte dhënë për këtë çështje, shumë prej 50 mijë euro, por që qeverisja komunale nuk i shpenzoi ato për riparimin e digës, por për qëllime të tjera.
“Po ashtu grumbullimi i ujit në hyrje të Malishevës nga Banja është krijuar artificialisht nga ndërtuesit pa leje ndërtimi dhe mbulimi i gypave të kullimit që janë vendosur aty vite më parë. Kjo e ka rënduar situatën pas shirave të shumta në Malishevë. Komuna ka kontribuar që të kemi një situatë emergjente në Malishevë”, thotë komunikata./GazetaExpress/
Berisha: Me pallavrat e Thaçit e Hazirit nuk bëhet reformë
Iniciativwn e presidentit Hashim Thaçi për ta vazhduar reformën zgjedhore, të dështuar në mandatin e kaluar qeverisës nga PDK-ja, deputeti i Nismws Zafir Berisha e quan joserioz.
“Faktikisht, me këtë veprim Hashimi po provon me qenë në qendër të vëmendjes se gjoja është një lloj faktori, përndryshe sa i takon reformës zgjedhore, në të cilën ai po thirret, kjo nuk është çështja serioze që i intereson atij, sepse pikërisht kjo reformë, në të cilën ai po thirret, është një tallje e madhe me opinionin”, theksoi deputeti i Nismës Zafir Berisha, shkruan gazeta Kosova Sot.
Sipas Berishës, qytetarët e Kosovës kanë shumë halle më të mëdha, ngase Kosova është më e paqëndrueshme se kurrë, edhe politikisht edhe ekonomikisht, që nga paslufta. Ai potencoi se edhe aktualizimi i dekriminalizimit të listave zgjedhore, është tallje e madhe e presidentit, ngase pikërisht vetë presidenti Thaçi, sa ka qenë kryetar i PDK-së, e ka propozuar dhe zgjedhur për kryetar komune njeriun e dënuar nga Gjykata, e ai është akoma kryetar komune në Prizren Ramadan Muja.
“Një njeri, i cili e ka deformuar, tash po thirret se është i interesuar për të bërë reformë, reforma në fund të fundit nuk bëhet me pallavrat e Hashim Thaçit e të Lutfi Hazirit, sepse pak rëndësi ka pragu zgjedhor a është -5-7 apo 10 për qind, por reformë zgjedhore do të thotë që sistemi zgjedhor të ofrohet te qytetari, që i zgjedhuri të jetë zë i vërtetë i qytetarit, që deputeti të jetë përfaqësues i vërtetë i qytetarit dhe jo si deri tash, kur vetëm në zgjedhje dalin e i marrin votat, kurse 90 për qind jetojnë në Prishtinë.
“Faza e parë e reformimit për mendimin tim është që Kosova duhet t’i ketë 7 zona zgjedhore dhe përfaqësuesit në Kuvend të zgjidhen sipas përkatësisë zonale, me sistem gjysmëproporcional, përndryshe të gjitha këto që Hashim Thaçi me njerëzit që po i mbledh rreth vetes vetëm po tallet me opinionin”, tha Berisha për “Kosova Sot”. Ai ka pohuar se edhe kalkulimet e Thaçit për mënyrën e zgjedhjes së presidentit janë kalkulime personale, sado që do të ishte në interes të demokracisë, që zgjedhja vërtet të bëhet nga populli.
Gurët e mullirit në Kushnin të Hasit, vazhdojnë të sillen edhe në shekullin XXI
Mulliri vazhdon t’i qëndrojë kohës në fshatin Kushnin të Hasit.
Adem Morina ky mulli edhe tani vazhdon të jetë funksional dhe është në shërbim jo vetëm për nevojat e familjeve të fshatit Kushnin, por edhe të fshatrave përreth.
“Mbi dhjetë fshatra të Hasit e shfrytëzojnë për bluarjen e misrit mullirin në fshatin Kushnin të Hasit”, pohon Morina për “Kosova Sot”.
Morina shprehet se fshati ka një traditë të gjatë të shkollimit.
Ai përmend familjen e Ramë Fetahut, në shtëpinë e të cilit edhe kishte filluar punën shkolla e parë shqipe në këtë fshat, 60 vjet më parë. Sipas tij, Kushnini është fshati që ndan dy pjesët shqiptare, atë të Kosovës dhe të Shqipërisë me Pashtrikun që i rri mbi kokë.
Kryeprokurori Sylë Hoxha flet për xhirimet e dala nga burgu i Prizrenit
Kryeprokurori i Prokurorisë Themelore të Prizrenit, Sylë Hoxha ka thënë se nuk është në dijeni se nga kush kanë dalë pamjet e burgut të Prizrenit, provë e cila është duke u hetuar për vdekjen e aktivistit të Lëvizjes Vetëvendosje, Astrit Dehari.
Kryeprokurori i Prokurorisë Themelore të Prizrenit, Sylë Hoxha ka thënë se nuk është në dijeni se nga kush kanë dalë pamjet e burgut të Prizrenit, provë e cila është duke u hetuar për vdekjen e aktivistit të Lëvizjes Vetëvendosje, Astrit Dehari.
“Unë ndihem i shqetësuar nuk e di se si kanë dalë ato publikime. Sigurisht që këto ne ende nuk i kemi në dorë, prokurorët e prokurorisë janë në kontakt me policinë me hetuesit, si do që të jetë sigurisht që do të merremi edhe me çështjen se si u publikuan këto pamje. Nuk e dimë se kush i ka dhënë këto publikime”, tha Hoxha për KALLXO.com.
Ai theksoi se pamjet nga burgu i Prizrenit nuk janë ende në prokurori dhe se është i sigurt që nga ata nuk kanë dalë këto pamje.
“Ne jo. Ato s’kanë qenë ende pronë e prokurorisë”, tha në fund Hoxha.
Mbrëmë në televizionin Klan Kosova u shfaqën xhirimet nga kamerat e sigurisë të ditës kritike të 5 nëntorit, ditën e vdekjes së aktivistit të Vetëvendosjes, Astrit Dehari.
Gjatë ditët së sotme Lëvizja Vetëvendosje në një konferencë ka thënë se hetimet janë duke u kryer në mënyrë jo profesionale.
Ndërsa, përfaqësuesi juridik familjes së Astrit Deharit, avokati Tomë Gashi, ka paraqitur kallëzim penal kundër personave përgjegjës të cilët mundësuan publikimin e videove nga burgu i Prizrenit, vendin ku i ndjeri Dehari vdiq më 5 nëntor.
Vetëvendosje nesër kërkon drejtësi për Astritin, para burgut të Prizrenit
Lëvizja Vetëvendosje të shtunën do të kërkojë drejtësi për vdekjen e aktivistit të tyre, Astrit Dehari, i cili një javë më parë u gjet i vdekur në burgun e Prizrenit.
“Nesër bëhen një javë nga vdekja e aktivistit Astrit Dehari. Ende askush nuk ka dhënë përgjegjësi!”, thuhet në komunikatën e Vetëvendosjes.
“Nesër, e shtunë, ora 15:00, para ndërtesës së Burgut të Prizrenit, kërkojmë drejtësi për Astrit Deharin”./PrizrenPress.com/
Burgu i Prizrenit, Zogaj emëroi zyrtarin e papërvojë në pozitën e drejtuesit
Qendra e Paraburgimit në Prizren, e shumëpërfolur gjatë kësaj jave për shkak të vdekjes tragjike të aktivitit të VV-së, Astrit Deharit, ka probleme me nivelin e lartë drejtues. Janë bërë rreth një vjet që kjo qendër udhëhiqet nga një zyrtar që nuk i plotëson kriteret për të qenë drejtues i këtij institucioni. Destan Zogaj ka zëvendësuar Ilir Gutajn, që u largua pas publikimit të skandaleve në media.
Sokol Zogaj, drejtori i Burgjeve të Kosovës, për rreth një vjet ia ka besuar udhëheqjen e Qendrës së Paraburgimit në Prizren një zyrtari që nuk i ka plotësuar kriteret për të qenë drejtues.
Ai e pati emëruar Destan Zogajn në postin e ushtruesit të detyrës së drejtorit të Qendrës së Paraburgimit në Prizren.
Është i vetëdijshëm se njeriu të cilin e lartësoi në këtë pozitë nuk ka qenë i duhuri.
“Emërimi i tij [Destan Zogaj ] ka ndodhur vitin e kaluar. Sot morëm vendim që të shpallet konkursi për drejtor edhe u kry muhabeti”.
“Po Destan Zogaj ka qenë ushtrues detyre. Me siguri ai nuk mundet me qenë ushtrues i detyrës së drejtorit për shkak të atyre kritereve që janë. Po kryesorja është se sa të kryhen procedurat ai nuk do të jetë më”, ka thënë për Insajderin Sokol Zogaj, drejtori i Shërbimit Korrektues të Kosovës.
Në njoftimin e Ministrisë së Drejtësisë për konkursin për Drejtor në Qendrën e Paraburgimit në Prizren, ndër të tjera është kërkuar që kandidati të ketë gjashtë vite përvojë pune profesionale dhe së paku tri vite në menaxhim.
Ndërkohë që Destan Zogaj sipas Sokol Zogajt ka qenë Instruktor (mbikqyrës) në këtë qendër, e cila është pozitë jo menaxheriale.
Para gjashtë ditësh, më 5 shtator, është vendosur që të shpallet konkursi për drejtor të Qendrës së Paraburgimit në Prizren.
Kjo qendër pati mbetur pa drejtor pas largimit nga detyra të ish-drejtorit Ilir Gutaj, në fund të vitit të kaluar. Ai ishte larguar pas publikimit në media të skandaleve që ndodhën gjatë mandatit të tij.
“Koha Ditore”, kishte raportuar se një prej të burgosurve kishte ndërtuar një “shtëpi” private brenda Qendrës së Paraburgimit në Prizren, ngjashëm siç kishte bërë Eskobar, kur kishte ndërtuar një burg special për t’i kaluar pesë vjet dënim.
Naser Kryeziu, i dënuar për vrasje, e kishte bërë këtë në bashkëpunim me zyrtarët e Shërbimit Korrektues të Kosovës.
Adaptimin e një depoje në dhomë banimi dhe zyrë pune për Naser Kryeziun e kishte bërë një firmë private e një gardiani të Burgut të Prizrenit.
Për këto veprime ishte në dijeni ish-drejtori Ilir Gutaj, bashkëshort i deputetes së PDK-së, Luljeta Veselaj-Gutaj, pati raportuar “Koha Ditore”.
Kjo histori dhe më pas largimi i Gutajt, sipas Sokol Zogajt ishin shkaktare që të merrej vendim në shpejtësi për ta emëruar një ushtrues detyre, i cili nuk i plotësonte kriteret.
“Jo për ushtrues detyre nuk i ka plotësuar kriteret [Destan Zogaj], por u vendos me një vendim të përkohshëm. Është dashtë me ba u.d për shkak të disa problemeve që janë bërë atëherë, s`kemi pas kënd edhe është zgjedh ushtrues detyre. Punën e ka kry mirë edhe tash vendosëm me ja shpallë konkursin”, ka thënë Zogaj për Insajderin.
Ai ka pohuar se brenda tri javëve do të përfundojnë procedurat e rekrutimit dhe do të zgjidhet drejtori i ri i Qendrës së Paraburgimit në Prizrenit.
I kontaktuar nga Insajderi, ushtruesi i detyrës së drejtorit Destan Zogaj, tha se nuk e din se cilat kritere nuk i plotësoi.
“Unë për herë të parë po dëgjoj, se ka pasur ndonjë kriter të pa plotësuar”.
“T`ju njoftoj më gjerësisht unë punoj këtu prej vitit 2000, kam kalu nëpër struktura të ndryshme prej oficerit deri në nivelin më të lart. Me nivel arsimor jam master i shkencave ekonomike prej 2007”, tha Zogaj për gazetën. /Insajderi.com