Policia Rajonale e Prizreniit ka njoftuar se pas një pune hetimore lidhur me vjedhjen e rëndë e cila pati ndodhur me datën 19 shtator, rreth orës 17:00 në një shtëpi në rrugën “Enver Hadri” në Arbanë, hetuesit e Stacionit Policor “Veriu” e kanë identifikuar dhe arrestuar një të dyshuar me mbiemër Gashi, për të cilin dyshohet se me datën dhe kohën kritike i njëjti kishte hyrë me forcë në shtëpinë e të dëmtuarit dhe nga aty kishte vjedhur dy fustane për nuse në vlerë prej 300 eurove.

“Intervista me të dyshuarin është kryer në prani të avokatit mbrojtës me ç’ rast janë bërë të njohura detajet dhe mënyra e kryerjes së vjedhjes. I dyshuari është recidivist i veprave penale të vjedhjeve”, thuhet në njoftimin e Policisë, përcjell PrizrenPress.

Pas intervistës është informuar prokurori i shtetit i cili ka urdhëruar që i dyshuari të ndalet në mbajtje.

Tre persona janë arrestuar nga policia e rajonit të Prizrenit pasi që e kishin torturuar fizikisht një person tjetër për të cilin dyshonin se kishte bërë magji të zezë.

Policia e Rajonit të Prizrenit ka njoftuar se të martën rreth orës 19:00 një person ka kërkuar ndihmën e policisë pasi që ishte ndaluar nga tre persona të një familjeje në Shirokë të Suharekës. Sipas njoftimit, të dyshuarit e kishin futur viktimën në bodrum të shtëpisë së tyre dhe e kishin lidhur me një rrip e më pas e kanë torturuar fizikisht me ç’rast i kanë shkaktuar edhe lëndime trupore.

“Pas rreth katër orëve, dy fqinj të të dyshuarve e kishin liruar viktimën. Ekipe policore kanë dalë në vendin e ngjarjes dhe kanë kryer procedura hetimore. Në cilësi të provës materiale është gjetur dhe sekuestruar një rrip për të cilin dyshohet se është përdorur në rast”, thuhet në njoftimin e Policisë, përcjell PrizrenPress.

Nga hetimet fillestare Policia ka thënë se dyshohet që motivi i rastit është pretendimi i të dyshuarve se viktima i ka bërë magji të zezë njërit prej tyre.

Lidhur me rastin është informuar prokurori i shtetit i cili ka urdhëruar që të dyshuarit të ndalen nën masën e arrestit policor. /PrizrenPress.com/

Policia e Kosovës ka njoftuar se në Prizren, raportohet se i dyshuari mashkull k/shqiptar, nën ndikim të alkoolit, pas një mosmarrëveshje me bashkëshorten dhe djalin e tij ka shtënë me armë zjarri brenda shtëpisë.

Në njoftim të Policisë thuhet se në vendngjarje është gjetur një gëzhojë, ndërsa nga i dyshuari është konfiskuar një pistoletë me 12 copë fishkë, shkruan PrizrenPress.

Nuk raportohet për të lënduar. Me vendim të prokurorit i dyshuari është mbajtur në stacionin policor për 6 orë dhe pas intervistimit i njëjti është liruar në procedurë të rregullt. /PrizrenPress.com/

Prizreni vuan shumë për shtigje të veçanta ku ecin çiklistët

Organizata Joqeveritare “EC Ma Ndryshe”, në bashkëpunim me komunitetin e çiklistëve, kanë realizuar performancën “Kërkojmë shtigje për çiklistët”, përmes të cilit aktivitet reaguan ndaj pasivitetit të deritanishëm të autoriteteve komunale në ndërmarrjen e masave adekuate për sigurimin e pjesëmarrësve të barabartë të çiklistëve në trafikun që zhvillohet në rrugët kryesore të qytetit të Prizrenit. Përmes këtij aktiviteti, në mënyrë simbolike, përkatësisht duke vendosur shtigje të improvizuara, në rrugën “Remzi Ademaj” afër Urës së Gurit dhe Urës së Arastës, është theksuar e drejta e çiklistëve për qarkullim më të sigurt brenda zonës urbane. “EC Ma Ndryshe” edhe më parë ka ndërmarrë aktivitete në këtë drejtim, ngase hulumtimet e viteve të kaluara, në kuadër të projektit “Qyteti gjithëpërfshirës…”, rregullisht e patën nxjerrë si shqetësim të qytetarëve mungesën e shtigjeve (korsive) për biçikleta në pjesën urbane, shkruan gazeta Kosova Sot.

Trotuaret e zëna

Butrint Xhemajli, nga “EC Ma Ndryshe”, është shprehur për “Kosova Sot” se në bashkëpunim me disa organizata dhe komunitetin e çiklistëve po realizojmë projektin për shtigjet korsitë për biçikleta në rrugët e Prizrenit. Kurse për këto iniciativa, Mirlinda Shigjeqi tregon se aktivizimi i deritanishëm në këtë drejtim vazhdimisht ka kërkuar më shumë vëmendje dhe kujdes të autoriteteve për krijimin e shtigjeve për biçikleta, pasi edhe ky komunitet duhet ta gëzojë të drejtën që të lëvizë lirshëm dhe në mënyrë të sigurt në trafik.

Biçiklistët prizrenas përmes kësaj forme edhe njëherë kërkuan korsi të reja në Prizren sepse, siç shprehet Astrit Gashi, qytetar, vërtet qytetarët janë në hall me trotuaret e zëna.

“E di se më së keqi e kanë pikërisht biçiklistët të cilëve u duhen korsi të veçanta, por ata detyrohen të ecin andej nga munden. Ata nuk kanë as korsi edhe kur kanë nevojë, e të mos flasim për relaksim”, është shprehur ai.

Berisha: Moti e kemi hartuar projektin për korsi

Me organizmin e shoqërisë civile për korsitë e biçiklistëve, zëdhënësi i Komunës së Prizrenit, Ymer Berisha shprehet se kjo Komunë që moti ka pasur projektin sa i përket hapjes së një korsie të veçantë për biçiklistë.

“Tanimë lidhur me këtë kemi edhe një konkluzion të kryetarit Muja dhe të drejtorëve të ekzekutivit që kjo korsi biçikletash është nga lagjja “Bajram Curri” deri në fshatin Vlashnje, kurse këtë projekt që moti e kemi në realizim dhe tani janë krijuar kushtet që ky shteg të jetë funksional për ata që duan çiklizmin”, u shpreh për “Kosova Sot” zëdhënësi Berisha.

Ai shton se edhe brenda qytetit është duke u punuar që të ketë korsi, porse pengesë janë bërë rrugët e ngushta të Prizrenit.

“Duhet të mendohet mirë se si mund të realizohen ato shtigje”, thotë zëdhënësi Berisha.

Afrim Morina, qytetar nga Prizreni, shprehet se në qendrën e parë mbrojtëse të Prizrenit duhet të mendohet që njerëzit e turistët të shëtisin këmbë e jo të bëhen korsi për biçikleta.

“Kam dëgjuar për një ide të mirë që të shkohet me teleferik ose shkallë lëvizëse në kala, sepse është mëkat që të shëtitësh në Prizren e të mos shkosh në kala”, është shprehur ai. Shton se kërkesa e shoqërisë civile për korsi është e drejtë, por jashtë kësaj qendre mbrojtëse, meqë biçikletat përdoren për ta ruajtur ambientin. /Kosova Sot/