Studentët e Fakultetit Media dhe Komunikim në UBT, po marrin pjesë në festivalin ndërkombëtar të dokumentarëve dhe filmave të shkurtër “DokuFest”, i cili organizohet tash e gjashtëmbëdhjetë vjet në Prizren.

UBT ka marrëveshje bashkëpunimi me drejtuesit e festivalit, sipas së cilës është hartuar një projekt i përbashkët, në kuadër të të cilit studentët e Fakultetit për Media dhe Komunikim janë angazhuar në përcjelljen e ngjarjeve me shkrime dhe video-materiale.

Qëllimi i bashkëpunimit mes UBT-së dhe “DokuFest”-it është që studentët të përfitojnë përvoja profesionale si dhe të aftësohen për profesionin e tyre.

Përmes këtij projekti synohet që në kuadër të bashkëpunimit, studentët të kenë mundësi të ushtrojnë profesionin në aspektin praktik, të punojnë dhe njëkohësisht të fitojnë disiplinë në punë si dhe atyre u krijohet mundësia që të punojnë me staf profesional të mediave.

Projekti ka filluar në maj të këtij viti dhe pritet të përfundojë më 14 gusht, me ç’rast për studentët pjesëmarrës do të ndahen certifikata nga UBT dhe “DokuFest”. /kp/

Përgjatë nëntë ditëve sa zgjatë Festivali Ndërkombëtar i Filmit Dokumentar dhe atij të Shkurtër-DokuFest, në shtatë nga këto ditë, pjesë e këtij festivali është edhe Muzeu Kombëtar i Fotografisë ‘Marubi’, shkruan KultPlus.

‘Marubi’, erdhi në Prizren më datë 5 gusht, ku gjithçka nisi me street art, projekt ky i nisur në Shkodër, atje edhe ku është ky muze. Në Prizren erdhi në kuadër të programit të fotografisë DokuPhoto, duke prezantuar tre breza fotografësh përmes koleksionit të tij të gjerë prej 500.000 negativëve, që dokumentojnë ngjarjet nga historia e trazuar e Shqipërisë.

‘Marubi i Shkodrës’, jo rastësisht njihet kështu në publik, pasi që edhe sot në ligjëratën e mbajtur nga drejtori i këtij muzeu Lucjan Bedeni, krejt ajo që ai e tha mbajti titullin ‘A Museum Can Change a City’. Kështu ‘Marubi’ në njëfarë forme e ‘ka ndryshuar qytetin e bukur të Shkodrës’, e krejt kjo duke i dhënë edhe më shumë madhështi qytetit që bartë mbi supe një histori të madhe siç është ajo e Kalasë së Rozafës e jo vetëm.

Lucjan Bedeni, solli një dialog mes trashëgimisë kulturore të së shkuarës dhe Muzeut të ri të Fotografisë ‘Marubi’, duke prezantuar edhe projektet më të reja të këtij muzeu përmes programeve të ndryshme të cilat nga njëra anë sjellin më afër historinë e të parës studio fotografie shqiptare, e nga ana tjetër kërkojnë të sensibilizojnë më të rinjtë ndaj rëndësisë të ruajtjes së vlerave të kësaj trashëgimie.

“‘A Museum can change the city’, vjen si një premtim i Muzeut Marubi, duke sjellë pjesë të rëndësishme të trashëgimisë që nga fillimi e deri më tani. Fotografia që unë zgjodha që ta fillojë këtë prezantim të shkurtër është momenti i inaugurimit të muzeut më datën 9 maj të viti 2016, por ajo çka do të shohim është një strategji me të cilën zhvillohen programet dhe idetë inovative. Të gjithë e dimë se uji është jeta dhe nga ajo pikë e ujit nis ky moment strategjie. Kështu që rreth programit Marubi, do të zhvillohen disa programe të ndryshme siç është programi i ekspozitave, çmimi Marubi, që tash muzeu ynë ka rënë dakord me Galerinë e Arteve që ta zbatoj vitin e ardhshëm i cili do të jetë një kompeticion për artistët bashkëkohor, e shumëçka tjetër”, nisi kështu drejtori i Marubit Bedeni, duke vazhduar ligjëratën e tij me fotografi nga ekspozitat e ndryshme që ka pas ky muze që nga hapja e duke dalë atje se çfarë do të bëjnë në një të ardhme shumë të afërt.

“Kalendari vjetorë i ekspozitave prezanton katër ekspozita të përkohshme, dy ekspozita të përmasave të mëdha dhe dy ekspozita të tjera që muzeu ynë i bënë në bashkëpunim me muzetë e tjerë”, pohoi Bedeni, duke vazhduar të flasë për arkivin e Marubit, i cili është një pasuri e virgjër me vetëm 9% të digjitalizuar, dhe kësisoj kërkon ruajtje të madhe të këtyre artefakteve.

Ai teksa foli për procesin e digjitalizimit, poashtu tregoi edhe për website-in, që ‘Marubi’, posedon dhe është i hapur online për publikun. Pas kësaj Lucjan Bedeni, u rikthye te ekspozitat e këtij muzeu, duke bërë një panoramë të shkurtër të atyre që janë hapur në ‘Marubi’.

“Po nisim me ‘Dy rrugët e Idromenos’ që i përkasin Kolë Idromeno e që është kuruar nga Adrian Paci. Për secilën ekspozitë ne realizojmë punëtori të ndryshme me grupmosha të fëmijëve dhe për të gjitha këto, muzeu ka nënshkruar kontratë me drejtorinë arsimore të Shkodrës, dhe disa institucione tjera. Muzeu krahas ekspozitave apo programit edukativ mbanë edhe një program tjetër siç është programi i bisedave, pra për secilën ekspozitë është kuratori ai që një ditë pas hapjes së saj mbanë një diskutim me audiencën”, theksoi Bedeni.

Muzeu Kombëtar i Fotografisë ‘Marubi’, ka qenë i selektuar për çmimin evropian “European Museum of the Year Award” ku Marubi është përzgjedhur një ndër 46 muzetë më të mirë të Evropës. Prezantimi është mbajtur në Zagreb më 6 maj.

Lucjan Bedeni, pas shumë e shumë prezantimeve që bëri për ‘Marubin’, pak u kthye edhe tek programi i DokuFest-it, duke e vlerësuar lartë, e më pastaj, foli edhe për ekspozitën e fundit ‘Manipulim’ që është hapur më 3 maj.

“Folëm për këto fotografi, por janë edhe disa fotografi tjera që inspirimin kryesorë e kanë marrë nga disa imazhe të tjera të panjohura. Ato janë manipulimet më të vjetra të historisë botërore të fotografisë. Manipulimi nuk është vetëm propaganda politike por edhe manipulim si lloj satire, humori dhe deri këto manipulimet që shohim tani me fantazmat”, tregoi ai.

Ndërkohë krejt si përfundim, ai para audiencës së DokuFest, dha disa lajme shumë interesante për këtë muze, duke paralajmëruar edhe ekspozitën e artistes Lala Meredith Vula që do të hapet më 12 tetor.

“Do të doja të ju informoja që vitin që vjen ne do shpallim thirrjet për ‘Çmimin Marubi’, dedikuar artistëve të rinj kryesisht artistëve nga Evropa Juglindore. Gjithashtu për herën e parë në Shqipëri dhe ndoshta në rajon, në muzeun tonë në vitin që vjen pritet të fillojë edhe ndërtimi konkret i laboratorit të restaurimit të xhamave , dhe kjo në bashkëpunim me Institutin e Trashëgimisë në Francë. Pas pak ditësh po ashtu ne do të lansojmë edhe një tjetër program me shumë rëndësi në muzeun tonë. Është rrjeti kulturor i muzeut Marubi, që konsistojnë në rrjetëzimin e studios së vjetër të Marubëve, një hapësirë ku deri tani është dhënë me qera një dyqani që shiste çanta kineze”, tha Lucjan Bedeni, duke vazhduar ta jap lajmin e fundit për këtë muze, i cili do të nis projektin për ta përfshirë ‘Marubin’ në UNESCO.

“Një tjetër informatë e rëndësishme për muzeun tonë që do të fillojë në fund të këtij viti dhe në fillim të vitit të ardhshëm, do të jetë fillimi i projektit dhe punës për ta përfshirë Marubin në UNESCO dhe duke ju referuar kritereve besoj se do të jetë e kalueshme”, përfundoi Lucjan Bedeni. / KultPlus.com

Dy vjet më parë regjisorit të famshëm britanik Daniel Mulloy, derisa po përgatiste videon për edicionin e 14-të të “DokuFestit”, do t’i lindte ideja për një film të shkurtër. Atë vit, Festivali ndërkombëtar i filmit dokumentar dhe të shkurtër temë kishte migrimin.

Duke marrë për bazë historinë e Kosovës dhe përjetimet e popullit të këtij vendi me luftën e fundit, po ashtu edhe me valën e refugjatëve në botë, realizoi një film të shkurtër që prek pikërisht këtë çështje. Ky film u shfaq nëpër festivale të ndryshme dhe Kosovës ia solli çmimin e parë prestigjioz “BAFTA”, shkruan sot “Koha Ditore”.

“Home” është realizim mes Kosovës dhe Britanisë së Madhe. E “DokuFest” është një prej mbështetësve të këtij projekti filmik, në të cilin u përfshi në realizim një ekip i madh vendor. Me këtë u dëshmuan kapaciteti dhe talenti i të rinjve kosovarë në realizimin e projekteve të tilla madhore. Po ashtu, edhe një herë u dëshmuan fuqia dhe rëndësia e një festivali siç është “DokuFesti”, që tashmë është shndërruar në shkollë për kineastë vendorë e ata të rinj që ia mësynë të merren me artin e shtatë.

Megjithatë “Home” është vetëm një prej filmave që ky festival ka mbështetur deri më tani. Kontributi i “DokuFestit” në kinematografinë kosovare kap edhe një dimension tjetër. Përveçqë sjell filma nga e gjithë bota, e kineastë me nam, prodhon filma përmes projekteve që ka dhe i mëson të rinjtë se si të kenë qasje më bashkëkohore në këtë fushë.

Mulloy në një ligjëratë që e mbajti të dielën në “KinoKlub”, në kuadër të programit të masterklasave të “DokuFestit” tregoi se si ky festival dhe tema që kishte trajtuar e kishin inspiruar për të realizuar “Home”.

Ekranet e kinemave të mbyllura u ndezën gjatë ditës së diel për të shfaqur filmat në programet speciale të këtij edicioni të “DokuFestit”. Ligjërata, punëtori e masterklase përcollën pjesën tjetër të ditës së tretë të festivalit ndërkombëtar të filmit dokumentar dhe të shkurtër.

Kinematë e hapura, si zakonisht, u rindezën gjatë mbrëmjes. E diela u përmbyll me koncertin e “Andrras” në parkun e Marashit, ku edhe zë vend “DokuNights”, shkruan sot “Koha Ditore”.

Por një ditë më parë, në Kalanë e Prizrenit u mbajt koncerti i cili erdhi në bashkëpunim mes kompozitorit e jazz-muzikantit të njohur shqiptar Robert Bisha, i cili jeton në Itali dhe Korit iso-polifonik. Koncerti, i organizuar bashkë me organizatën “Trashëgimia Kulturore pa Kufij”, qe inaugurim i Kalasë së rinovuar.

Kori solli këngë të vjetra shqipe, ndërsa Bisha i përcolli ato në piano e kitarë. Hapësira në mes të Kalasë, aty ku zë vend edhe ekrani i madh për shfaqjen e filmave, të shtunën mblodhi rreth 400 veta në këtë koncert. Gërshetimi i tradicionales me bashkëkohoren erdhi si asnjëherë më parë në programin e “DokuFestit”. Ndonëse pikat e para të koncertit i shoqëroi perëndimi i diellit, ky bashkëpunim ishte si një dëshmi për rilindjen e muzikës ndërshekullore që shpërfaq fuqinë emocionale të zërit njerëzor.

Bisha si një jazz pianist i talentuar, me improvizimet e veta arriti që të përcjellë korin për mrekulli. Këngët si “Janinës ç’i panë sytë”, “Delja rude”, ishin vetëm dy prej këngëve të njohura për publikun kosovar. Bisha me piano interpretoi një pjesë të “Bareshës” së Rexho Mulliqit, ndërsa kori këndoi edhe në italisht. Ndërsa krejt në fund publiku iu bashkuan në një improvizim të rastit.

“Sonte po dëgjoni muzikë tradicionale e bashkëkohore të gërshetuar me erën”, ka thënë Bisha gjatë performancës. Edhe pse era që frynte krijonte pak telashe në zërim, kjo aspak nuk ia prishi hijeshinë koncertit. E Bisha u nda shumë i kënaqur.

“U ndjeva shumë mirë, publiku kishte një muzikalitet interesant, sepse të gjitha frazave të mia iu përgjigjën. Kisha ndjesi të shumta dhe flladi i verës u bë pjesë e koncertit dhe e përdorëm, ose më mirë të them e ftuam, e mirëpritëm. Është një emocion i fortë dhe për mua është nder të jem pjesë e këtij festivali. Të vij në Kosovë për mua është diçka e veçantë, sepse më duket se edhe origjina ime është e kësaj ane, nuk e kam vërtetuar, por kështu thoshin nga dajët”, ka thënë Bisha, i cili luajti edhe një melodi të kompozuar nga ai, derisa kori këndoi disa prej vargjeve që ai i pëlqen më së shumti. Bëhet fjalë për disa vargje të Gjergj Fishtës.

“Fjalët e Gjergj Fishtës i kam zgjedhur, sepse janë një deklaratë e dashurisë në përgjithësi, e cila nuk ka një drejtim për një person: ‘Në ty mendoj’, pra ky dimensioni i tekstit është një dimension që e kam kompozuar për kor”, ka thënë Bisha, i cili ka 17 vjet që jeton në Itali.