Gjykata e Apelit e Kosovës e ka aprovuar si të bazuar ankesën e avokatit mbrojtës, kundër një aktgjykimi të Gjykatës Themelore në Prishtinë, të datës 23.12.2016, njoftoi ajo përmes një komunikate për medie.

I akuzuari Hysni Hoxha konform nenit 364 paragrafi 1, të Kodit të Procedurës Penale të Kosovës, është liruar nga akuza se në cilësi të personit zyrtar – kryetarit të Organit Shqyrtues të Prokurimit, ka kryer veprën penale: “Keqpërdorimi i pozitës apo autoritetit zyrtar” nga neni 422 par. 1 i Kodit Penal të Kosovës.

Kolegji profesional prej tre gjyqtarësh i kësaj gjykate, nder të tjera ka gjetur se në rastin konkret nuk është vërtetuar dashja direkte e të akuzuarit Hysni Hoxha, për të kryer veprën penale si element konstituiv i veprës, si dhe nuk është vërtetuar se me veprimin e tij ka përfituar për vete apo tjetrin dobi pasurore, prandaj vendosi ta lirojë atë nga përgjegjësia penale me bindje të thellë se veprimet e tij nuk hyjnë në sferën penale.

Driton Selmanaj doli i treti më i votuari në koalicionin LDK-AKR-Alternativa, duke siguruar përkrahje të madhe, të cilën ai tregon se s’i planifikon të kapitalizojë politikisht.

Selmanaj tregon se cilën do të zgjedhtë mes qëndrimit në Kuvend si deputet dhe pjesëmarrjes në zgjedhjet lokale të cilat mbahen më 22 tetor.

Deputeti i LDK’së është përmendur si kandidat i mundshëm i kësaj partie në komunën e Prizrenit, e ai vet thotë se do të pranonte të garonte, nëse këtë ia kërkon partia.

Deputeti i Lëvizjes Vetëvendosje nga Prizreni, Arbër Rexhaj thotë se kanë mbetur vetëm dy rrugë për të dal nga kriza institucionale.
“Dy rrugë ka ose Vetëvendosje! në qeveri ose sërish në zgjedhje”, shkruan Rexhaj në Facebook.

“Jo pse këtë e duam ne por PAN-i i cili po këmbëngul pa pasur deputetët e nevojshëm të krijoj një qeveri ” të lodhtë” nuk do të krijoj stabilitet afatgjatë në vend”.

“Në zgjedhjet e reja Vetëvendosje! pa asnjë problem në koalicion me qytetarët, do të fitonte mjaftueshëm për ta krijuar qeverinë”.

“Prandaj i mbetet PAN-it të zgjedhë mes tkurrjes së vazhdueshme apo presidenti i gazit t’ia kaloj mandatin Vetëvendosje! pasi të dështoj kjo e para”./PrizrenPress.com/

I dëmtuari Hill Kaqinari nga Prizreni, ka mohuar se Patër Berisha, i akuzuar për tentim vrasje ndaj tij, ka dashur ta privojë atë nga jeta.

Të enjten, gjatë rigjykimit në këtë rast, i dëmtuari Kaqinari ka deklaruar se i akuzuari Berisha nuk ka pasur mundësi ta dëshirojë vdekjen e tij, pasi tha se me të kanë qenë dhe vazhdojnë të jenë shokë shumë të ngushtë.

Plagosjen nga gjuajtja me armë zjarri nga i akuzuari Berisha, ai e ka quajtur si aksident sepse sipas tij, i pandehuri vetëm ka dashur ta frikësojë, e jo edhe ta qëllojë. Tutje, ai ka thënë se në mes vete nuk kanë asnjë problem dhe se familjet e tyre janë mbledhur nën udhëheqjen e klerit fetar të tyre dhe kanë nënshkruar një akt-pajtimi, e cila po ashtu është administruar si provë.

Në këtë seancë ka dëshmuar edhe eksperti i psikiatrisë forenzike, mjeku Shpend Haxhibeqiri, i cili ka elaboruar ekspertizën të bërë për këtë rast penal. Eksperti ka thënë se pas tri seancave direkte me të akuzuarin, analizimit të shkresave të lëndës dhe raporteve në mes tij dhe të dëmtuarit, kanë ardhur në përfundim se i akuzuari ka pasur zvogëlim të konsiderueshëm të aftësisë për të gjykuar në momentin kur ka kryer veprën penale.

Sipas ekspertit, reagimi i të akuzuarit ka ardhur si pasojë e lodhjes psiko-fizike, qëndrimit në ambient me presion psikik duke u marrë me çështjet e biznesit, orët e vona të natës dhe si reagim ndaj fyerjes nga i dëmtuari. Këto rrethana, sipas psikiatrit Haxhibeqiri, të akuzuarin e kanë shtyrë të bëjë veprime emocionale të ngutshme, pa mundësi për të analizuar pasojat e mundshme.

I akuzuari Berisha, në mbrojtjen e tij, ka deklaruar se nuk ka pasur për qëllim që ta vrasë të dëmtuarin Kaqinari, por se ka reaguar në mënyrë të vrullshme pa menduar për pasojat. Ka kërkuar falje që ka ndodhur një rast i tillë dhe po ashtu, ka thënë se familjet e janë pajtuar dhe se ai me të dëmtuarin janë edhe më shumë të lidhur se para rastit.

Prokurori i rastit, Mehdi Sefa, në fjalën përfundimtare, ka thënë se nga provat e administruara dhe dëshmitarët e dëgjuar është dëshmuar se i akuzuari ka gjuajtur me armë zjarri në drejtim të të dëmtuarit, andaj ka kërkuar që Berisha të shpallet fajtor dhe të dënohet sipas ligjit.

Mbrojtësi i të akuzuarit, avokati Avni Berisha, ka deklaruar se nga provat e administruara dhe dëshmitarët e dëgjuar, e posaçërisht nga dëshmia e të dëmtuarit, nuk është arritur të provohet se klienti i tij ka kryer veprën penale të tentim vrasjes. Ai ka thënë se raportet familjare në mes tyre janë rregulluar dhe se ekspertiza psikiatrike ka treguar që i akuzuari ka pasur zvogëlim të konsiderueshëm të gjykimit. Andaj ka kërkuar që ndaj klienti të tij, duke u bazuar në këto rrethana lehtësuese, të shqiptohet një dënim sa më i butë.

Kryetari i trupit gjykues, Xheladin Osmani, e ka shpallur të përfunduar këtë rigjykim, ndërsa shpalljen e aktgjykimit e ka caktuar për 28 korrik 2017, në ora 09:00.

Patër Berisha akuzohet se më 29 prill 2014, pas mesnate, duke luajtur bixhoz në kazino me të dëmtuarin Hill Kaqinari, fillojnë të fjalosen rreth mosmarrëveshjeve për rregullat e lojës së pokerit, me ç’rast i akuzuari merr pistoletën dhe gjuan në drejtim të të dëmtuarit. Sipas aktakuzës i dëmtuari është goditur me armë zjarri në pjesën e abdomenit, duke i shkaktuar lëndime të rënda trupore, me rrezik për jetën.

I akuzuari Berisha, në janar të këtij viti, është shpallur fajtor nga Gjykata Themelore në Prizren dhe është dënuar me dënim unik prej 12 muajve burgim efektiv, 10 muaj për lëndim të rëndë trupor dhe 3 muaj për armëmbajtje pa leje.

Mirëpo, Gjykata e Apelit, sipas ankesës së prokurorit të çështjes, e ka prishur aktgjykimin e shkallës së parë, me arsye se dispozitivi i aktgjykimit me arsyetimin e të njëjtit, janë në kundërthënie. Sipas aktvendimit të Apelit, gjykata e shkallës së parë e ka dënuar të akuzuarin për lëndim të rëndë trupor, ndërsa në dispozitiv të aktgjykimit qëndron konstatimi se i akuzuari ka pasur qëllim ta vrasë të dëmtuarin./betimiperdrejtesi/

Një problem mjaft i madh për gratë e Komunës së Prizrenit është se po anashkalohen nga politika. Afërdita Berisha, tani me shkallën master të kryer dhe e papunë, është shprehur për “Kosova Sot” se edhe pse Prizreni është me traditë, anashkalon mjaft shumë avancimin e gruas.

“Merreni me mend, ende s’kam dëgjuar që të ketë pasur një rast të vetëm që një grua të kandidojë për kryetare, edhe pse e di se ka plot gra të zonja që mund ta kryejnë me përgjegjësi këtë detyrë. Kur vjen puna te kandidimi ai dështon, dhe kjo është pozita e gruas në postet vendimmarrëse”, është shprehur ajo. Kurse Mybera Mustafa, nga LDK-ja, shprehet për gazetën se bazuar mbi ligjshmërinë sidomos karshi gjinisë femërore, thotë se ligji nuk zbatohet.

“Gratë janë të privuara nga mundësia e të qenit në krye të këtyre organizimeve, dhe se te gratë ndikon edhe gjendja e rëndë ekonomike”, është shprehur ajo, duke shtuar se të gjitha rastet vendosin burrat.

Në vend të përkrahjes, përbuzje

Mustafa thotë se është krijuar një përshtypje se gratë duhet të jenë të përfaqësuara me 30 për qind si kuotë, e në fakt dihet se proporcioni mashkull e femër është 50 me 50 për qind. “Unë mendoj se gratë duhet të jenë këmbëngulëse në shumë drejtime, sepse deri më tani është parë se ka një varg indikatorësh, që gratë të mos jenë në ndonjë post vendimmarrës”, është shprehur ajo. Afërdita Morina-Bifar për “Kosova Sot” tregon se ajo këtë fat arriti ta provonte në lëkurën e saj, duke mos u përkrahur as edhe me një cent në fushatën zgjedhore të 11 qershorit, nga dega e LDK-së në Prizren. Ajo nuk e fajëson partinë, por pohon se këtu partia ta jep rastin e dega të anashkalon.

Gratë më të përgjegjshme

Ndërsa studentja Antigona Krasniqi mendon se edhe brenda vetë strukturës studentore, gjinia femërore pra studentet nuk arrin të përkrahet sa e si duhet. “Kjo për faktin se ato në vend të përkrahjes shpesh marrin përbuzje”, tregon ajo për “Kosova Sot”.

Violeta Thaçi, kryetare e gruas nga AKR, tregon se janë vetë gratë që njëra- tjetrën e pengojnë deri në masën e fundit, që gratë të mos jenë asnjëherë në ndonjë detyrë për vendimmarrje.

“Unë nuk do të thosha se burrat i lejojnë këto hapësira e mundësi dhe pengesa më e madhe mendoj se është mes gjinisë sonë. Kur e them këtë, e kam parasysh se jemi ne vetë gratë që nuk kemi arritur t’i japim përkrahjen e duhur. Artnesa Gashi shprehet se është një fatkeqësi që shpesh askush nuk e ka analizuar se po të ishte një grua në ndonjë post menaxhues do të ishte me mirë.

“Them kështu, sepse shumica e femrave janë nëna dhe ato domosdo se e ndiejnë veten më të përgjegjshme. Pastaj është e konstatuar që nga paslufta se gratë nuk janë korruptuar, hiç ndonjë rast që është shumë i rrallë. Kjo u pa edhe në bazë të aktakuzave të ngritura”, është shprehur ajo. Ka shtuar se gratë pak avancohen. Ajo tregon se gratë e Prizrenit dhashtë Zoti të zgjohen nga kjo letargji.

(Kosova Sot)