Rreth nëntë muaj nga vdekja e aktivistit të Lëvizjes Vetëvendosje, Astrit Dehari në Qendrën e Paraburgimit në Prizren, organet e ndjekjes bëjnë të ditur se nuk ka asnjë fakt, i cili përfshinë vizitorët e Deharit në vdekjen e tij.

Edhe pse të gjithë ata që vizituan Deharin gjatë qëndrimit të tij në paraburgim, ishin cilësuar nga prokuroria si të dyshuar të mundshëm për përfshirje në vdekjen e Deharit, prokurori i rastit, Metush Biraj, thotë edhe pse janë kryer 99 për qind e hetimeve nuk ekziston fakti më i vogël se të njëjtit janë përfshirë në këtë rast.

“Ende nuk i kemi intervistuar, por s’ka kurrfarë indikacioni që mund të rezultojë me ndonjë dyshim që vizitorët e Deharit mund të jenë të implikuar në këtë rast”, është shprehur prokurori Biraj.

Prokurori i Prokurorisë Themelore në Prizren, Metush Biraj i ka thënë “arbresh.info” se ende janë në pritje të ekspertizës dhe se nuk e di se kur do të vijë kjo ekspertizë.

“Nuk ka diçka të re rreth asaj çështjeje, rreth 99 për qind të veprimeve i kemi rrumbullakosura, na ka mbetur me ardh edhe përgjigja definitive prej ekspertizës së Austrisë”, është shprehur prokurori”, tha ai.

Sipas tij, nuk ka asnjë të dyshuar konkret ndaj të cilit do të mund të nisnin hetimet.

“Nuk kemi të dhëna se ai është ndikuar apo jo, ose ka mundësi ndoshta të ketë qenë ndikuar nga dikush indirekt, mirëpo problem është mi faktu zhvillimet në kuadër të botës së tij të brendshme shpirtërore. Deri tash nuk kemi dyshime të nivelit të tillë që ne me iniciua procedurë ndaj dikujt, por jemi në veprime akoma”, është shprehur prokurori Biraj.

Ai tha se nuk ka hequr dorë nga intervistimi i vizitorëve të Deharit, ku përfshihen pjesëtarët e Lëvizjes Vetëvendosje. Sipas tij, prokuroria po shqyrton një mundësi të re që në të ardhmen edhe vizitorët e Deharit të intervistohen, e kjo sipas tij do të bëhet në mënyrën më adekuate të mundshme.

Aktivisti i Vetëvendosjes, Astrit Dehari ka ndërruar jetë më 5 nëntor të vitit të kaluar në Qendrën e Paraburgimit në Prizren, deri sa po qëndronte në paraburgim për hetimet që po zhvilloheshin ndaj tij dhe 5 aktivistëve të tjerë nënë dyshimin për sulm në Kuvendin e Kosovës./ Arbresh.info/

Një person nga fshati Mushtisht i Suharekës ka raportuar në Polici se derisa ishte duke punuar në lokalin e tij, ka pranuar dy kartëmonedha prej 50 euro që dyshohet të jenë të falsifikuara.

Monedhat e dyshuara janë konfiskuar.

Dje Bundeswehr-i i dorëzoi pas 18 vitesh shfrytëzim bazën mbi kodrën e Cviljen-it Misionit të Kombëve të Bashkuara në Kosovë (UNMIK).

Bundeswehr-i, si pjesëmarrës i misionit të KFOR-it, ngriti që në vitin 1999 një bazë ushtarake mbi këtë kodër dhe e shfrytëzoi atë. Ajo bazë shërbeu për arsye të pozitës së saj gjeografike para se gjithash si një pikë vëzhguese për KFOR-in. Shpërbërja e kësaj baze është kryer në muajt e kaluar. Në këtë hapësirë mbeten depo dhe ndërtesa administrative, të cilat do t´i dorëzohen shfrytëzuesit pasues. Fillimisht kjo hapësirë ju dorëzua UNMIK-ut dhe kjo e fundit ia dorëzoi në vijim KK të Prizrenit.

Komandanti i Kontingjentit Gjerman të KFOR-it, koloneli Jochen Gumprich, u shpreh shumë i kënaqur me përmbylljen me sukses të këtij kapitulli të Bundeswehr-it.

“Për Kosovën dhe Bundeswehr-in dorëzimi i kësaj baze pas 18 vitesh shfrytëzimi tek Misioni i Kombëve të Bashkuara në Kosovë është një moment ushtarako-historik”, theksoi koloneli Gumprich.

Besnik Velija, i akuzuar për grabitje, të mërkurën, ka thënë se aktakuza e ngritur ndaj tij, është e bazuar në një rast tjetër penal dhe se në bazë të kësaj aktakuze, sipas tij, janë marrë disa aktgjykime të padrejta.

Velija, së bashku me Remzi Kuqin, i cili është në arrati, ngarkohen me veprën penale të grabitjes në bashkëkryerje, pasi sipas aktakuzës së Prokurorisë Themelore në Prizren, të njëjtit kanë hyrë me dhunë në firmën “Nisa”, e cila kryente shërbime të transferit të parave për “Western Union” dhe duke e kërcënuar me armë zjarri kanë marrë nga kasaforta rreth 2.500 euro.

Velija, në mbrojtjen e tij, ka thënë se provat në një rast të grabitjes së kazinosë “Las Vegas”, për të cilin nuk ka aktgjykim të plotfuqishëm, prokuroria i ka marrë për bazë për të konkluduar se të njëjtit persona e kanë kryer edhe grabitjen në këtë rast. Sipas tij, bazuar në provat e atij rasti janë marrë tre aktgjykime, siç i ka cilësuar ai, të paligjshme në këtë rast penal.

Në seancën e së mërkurës, ka dëshmuar Flurim Shehu, i cili ka thënë se gjatë vitit 2010, duke punuar në shtëpinë e Remzi Kuqit, e ka njoftuar të akuzuarin Besnik Velija, i cili po ashtu ka punuar në rregullimin e mureve të jashtme të asaj shtëpie. Ai ka thënë se gjatë 10 ditëve sa ka punuar në atë shtëpi i ka parë të rrinë bashkë Remzi Kuqin dhe Besnik Velinë, e po ashtu me një rast kishte pirë kafe së bashku me ata, pas pune.

Mbrojtësi i të akuzuarit, avokati Blerim Mazreku, ka kërkuar që në këtë rast të dëshmojë sërish e dëmtuara Diellza Pervanqe, por një propozim të tillë e ka kundërshtuar prokurori Mehdi Sefa, me arsye se njëherë janë pajtuar që deklarata e saj e mëparshme të lexohet.

Trupi gjykues, i kryesuar nga gjyqtari Artan Sejrani, ka refuzuar kërkesën e mbrojtjes për dëgjimin e dëshmitares Diellza Pervanqe, ndërsa me kërkesë të mbrojtjes, e ka shtyrë shqyrtimin për 28 korrik 2017, në ora 13:30, ku do të jepen fjalët përfundimtare.

Ndryshe, ky rast zhvillohet në bazë të aktakuzës së Prokurorisë Themelore në Prizren, sipas së cilës i akuzuari Besnik Velija ngarkohet me veprën penale të grabitjes në bashkëkryerje.

Sipas aktakuzës i akuzuari Velija së bashku me të akuzuarin tjetër, i cili është në arrati,  Remzi Kuqi, kanë hyrë me dhunë në firmën “Nisa”, e cila kryente shërbime të transferit të parave për “Western Union” dhe duke e kërcënuar me armë zjarri kanë marrë nga kasaforta rreth 2.500 euro.

I akuzuari Velija, më 4 maj 2016, është gjetur fajtor nga Gjykata Themelore në Prizren, me ç’rast është dënuar me 3 vite burgim efektiv.

Po ashtu edhe Gjykata e Apelit më 16 shtator 2016, ka vërtetuar aktgjykimin e shkallës së parë dhe ka refuzuar ankesat e mbrojtjes si të pabazuara.

Por, mbrojtja e të akuzuarit, ka atakuar vendimin e Apelit në Gjykatën Supreme, për shkelje të procedurës penale dhe ligjit penal, me ç’rast Supremja ka vendosur që rasti të kthehet në rigjykim në shkallë të parë.

Sipas Gjykatës Supreme në këtë rast nuk janë vërtetuar saktë provat nga vendi i ngjarjes, pasi që ekzekutorët kanë mbajtur maska dhe nuk mund të vërehen nga kamerat se kush janë. Tutje, në aktgjykimin e Supremes, thuhet se as punëtorja e lokalit të sulmuar nuk ka mundur të bëjë identifikimin e personave që e kanë sulmuar e po ashtu i akuzuari tjetër është arratisur dhe nuk e ka inkriminuar të akuzuarin si bashkëkryerës.

Ndërsa, sipas Supremes, nuk është e mjaftueshme arsyetimi i gjykatës se i akuzuari ka pasur veshë një trenerkë me vija, e cila po ashtu është përdorur në një rast tjetër të grabitjes (Las Vegas) dhe se është vërtetuar se është e të akuzuarit në fjalë, për të cilin rast gjithashtu nuk ka vendim përfundimtar të çështjes./betimiperdrejtesi/