Njohësit e rrethanave politike në vend nuk e kanë përjashtuar mundësinë e arritjes se një koalicioni qeverisës ndërmjet PDK-AAK-Nisma dhe LDK-AKR-Alternativa.

Ndonëse të dyja palët tani për tani e kundërshtojnë një gjë të tillë, analistët politikë, Behxhet Shala dhe Imer Mushkolaj, kanë thënë për gazetën “Epoka e re” se nuk duhet zënë besë qëndrimeve kundërshtuese të palëve pasi, sipas tyre, këto subjekte politike edhe më herët kanë vendosur vija të kuqe për t’i ngritur pazaret, pastaj i kanë shlyer vijat e kuqe.

“Asnjë koalicion nuk është i pamundur në të ardhmen, sepse Isa Mustafa, Lutfi Haziri dhe këta të tjerët që po kundërshtojnë çdo bashkëpunim me koalicionin PAN, e dinë se në fund të fundit, po të duan ndërkombëtarët, brenda natës e bëjnë”, është shprehur Behxhet Shala, duke shtuar se kundërshtimet tani po bëhen për ta ngritur pazarin.

“Tani për tani po bëhet një përpjekje për ta ngritur pazarin sesa që është një synim i vendosur për të mos hyrë në qeveri”, ka thënë Shala.

Edhe analisti tjetër politik Imer Mushkolaj ka thënë se nuk duhet zënë besë shumë subjekteve politike që betohen se nuk do të bëjnë koalicion.

“Ramush Haradinaj edhe mund ta sigurojë ndonjë votë më shumë. Në Kosovë njihet fenomeni i kontrabandimit, ‘peshkimit’ të deputetëve për përfitime materiale. Pra, deklaratave të subjekteve politike, se nuk do t’ia bëjnë assesi votat Haradinajt, nuk është për t’u besuar, ngaqë ka nga to që në të kaluarën kanë dëshmuar se nuk e mbajnë fjalën”, ka thënë Mushkolaj./Epoka e re/

Gjykata Speciale prej sot është edhe ligjërisht funksionale dhe e gatshme për t’i pranuar aktakuzat e Prokurorisë Speciale ndaj ish-eprorëve të lartë të UÇK-së, të cilët dyshohen për “krime lufte”

Zyra e Prokurorit të Specializuar, David Schwendiman, që nga dita e sotme mund të fillojë me ngritjen e aktakuzave ndaj ish-pjesëtarëve të UÇK-së. Kjo meqë para 7 ditësh (28 qershor) Dhoma e Specializuar e Gjykatës Kushtetuese shpalli aktvendimin pozitiv për rregullat e rishkruara të Rregullores së Procedurës dhe të Provave të Gjykatës Speciale. Me këtë rast u bë e ditur se këto rregulla janë në përputhshmëri të plotë me Kushtetutën e Kosovës, shkruan “Zeri”.

Kryetarja e Dhomave të Specializuara të Kosovës, Ekaterina Trendafilova, pati bërë të ditur se me hyrjen në fuqi të rregullores në fjalë, pas një jave (që nga sot) nuk do të ketë kurrfarë pengese ligjore për ngritjen e çfarëdo aktakuze.

Megjithatë, ekspertët e çështjeve juridike dhe kushtetuese në Kosovë konsiderojnë se puna e Speciales mund të zvarritet, siç është zvarritur deri më tash. E ndonëse konsiderojnë se Gjykata Speciale do t’i prekë edhe zyrtarët më të lartë shtetërorë, ata thonë se nuk do të ketë diçka spektakolare nga i tërë ky proces. /Zeri/

Sonte rreth orës 18:00, është paraqitur në Stacionin Policor në Suharekë i dyshuari A. B. i cili ishte në arrati prej datës 30 qershor.

I dyshuari më pas i ka treguar policisë për armën ilegale të cilën e kishte në posedim e që është pushkë automatike e llojit kallashnikov me numër serik 3105734 e prodhimit kinez pa municion.

Pas sekuestrimit të armës, hetuesit policorë e kanë njoftuar prokurorin e shtetit për rrethanat e rastit i cili ka urdhëruar që i dyshuari të ndalët nën masën e arrestit policor.

Vlen të theksohet se i dyshuari ishte i përfshirë në një rast të kanosjes me ç’rast ishte sekuestruar edhe një pistoletë e llojit TT M57.

Deputeti nga Nisma për Kosovën, Zafir Berisha në emisionin “Rrokum Roll”, ka konfirmuar edhe njëherë kandidaturën e tij për kryetar të Komunës së Prizrenit, duke u shprehur i bindur se do të dalë fitues nga kjo garë.

E këtë bindje, Berisha thotë se e ka shkaku i asaj që mungojnë kundër kandidat serioz, raporton Gazeta Blic.

“Disponimi është për një ndryshim thelbësorë për në Prizren”, ka thënë ai.Sipas Berishës Nisma për Kosovën do të sjellë ndryshim në komunën e Prizrenit si beson që ai tashmë është fitues në këtë Komunë.

“Besoj që do të arrijë të fitojë në Prizren për shkak se nuk ka ndonjë rival seriozë që ta marrë komunën e Prizrenit”, ka përfunduar Berisha, përcjell GazetaBlic.com

Seanca e gjykimit të Eshref dhe Ejup Shemallarit nuk u zhvillua ngase munguan dy avokatë.

Në gjykimin ku po akuzohen babë e bir, Eshref dhe Ejup Shemallari, të cilët për shkak të një mosmarrëveshje të mëhershme, privuan nga jeta Ferdi Shishkon, Haki Thaçin dhe Bergin Ersoyn, që të tre nga Prizreni, të martën seanca gjyqësore nuk u mbajt.

I akuzuari Ejup Shemallari, e njoftoi trupin gjykues se mbrojtësi i tij- avokati Mahmut Halimi, për shkaqe shëndetësore nuk ka mundur të jetë i pranishëm në seancën gjyqësore.

Gjykata përmes telefonit komunikoi me avokatin Mahmut Halimi dhe konfirmoi se i njëjti gjendet në Republikën e Shqipërisë, ku i ishte nënshtruar një operacioni.

Ndërsa avokati Betim Shala, përmes telefonit e njoftoi gjykatën se kishte dorëzuar një parashtresë në gjykatë, mirëpo trupi gjykues atë parashtresë ende nuk e kishte pranuar dhe kjo u konstatua në procesverbal bashkë me shënimin se nuk dihet për çfarë parashtrese është fjala.

Pas marrjes së mendimit të palëve të pranishme, trupi gjykues vlerësoi se nuk ka kushte për mbajtjen e shqyrtimit gjyqësor.

Seancat e radhës u caktuan që të mbahen me 15 dhe 29 shtator 2017.

Eshref Shemallari dhe Ejup Shemallari akuzohen për shkelje të Kodit Penal të Kosovës, pasi që më 8 mars 2015 rreth orës 14:10 minuta në Prizren në Rrugën “Ismet Jashari- Kumanova”, pas një mosmarrëveshjeje paraprake të mëhershme, me dashje privuan nga jeta tani të ndjerët Ferdi Shishko, Haki Thaçi dhe Belgin Ersoj, të gjithë nga Prizreni.

Incidenti kriminal, i cili ishte temë e diskutimeve të shumta për shkak të së kaluarës recidiviste të të vrarëve, tashmë është drejt fundit të gjykimit në Gjykatën e Prizrenit.

KALLXO.com në vazhdimësi ka raportuar për këtë rast.