Fillimi edhe zyrtar i një faze të re të dialogut me Serbinë, që po bëhet tani nga dyshja e presidentëve të të dyja vendeve, Thaçi e Vuçiq, pa e pritur konstituimin e Kuvendit të ri të Kosovës, pasi në pranverë të këtij viti ky dialog është ndërprerë me një rezolutë të Kuvendit me konsensus të të gjitha subjekteve politike të shumicës shqiptare, sipas përfaqësuesve të partive politike dhe analistëve, është një veprim i papërgjegjshëm i presidentit të Kosovës.

Deputeti Zafir Berisha, nga Nisma për Kosovën -koalicioni PAN, i tha gazetës se kjo është një shkelje e rëndë e presidentit të vendit, i cili sidomos tani që Kosova është pa institucione të reja paszgjedhore, nuk ka asnjë legjitimitet të negocimit në emër të Kosovës për çështje që lidhen me sovranitetin dhe integritetin e shtetit.

“Faza e re, për të cilën po thirret Hashimi është një vazhdimësi e papërgjegjshmërisë së një personi në institucionet e shtetit, sepse fazat e reja apo ato të vjetrat i rregullon ekzekutivi i vendit, sepse Kosova është një shtet me rregullim parlamentar dhe jo sistem presidencial”, u shpreh Berisha për “Kosova Sot”.

Sipas tij, duhet të reagojë edhe Kuvendi, por edhe qytetarët.

“Tani po shihet ashiqare që roli të cilin po e luan Hashim Thaçi, sikur të jetë babai i Kosovës, e ka sjellë Kosovën buzë greminës, prandaj unë mendoj që të gjitha subjektet politike dhe qytetarët duhet të bëhen bashkë kundër këtij njeriu të papërgjegjshëm, për të mos lejuar që të vazhdojë për ta dëmtuar Kosovën, duke e bërë shtet jofunksional, duke e kthyer Serbinë përmes formave të ndryshme brenda shtetit të Kosovës”, tha Zafir Berisha për “Kosova Sot”.

Në Kosovë është ulur numri i lindjeve. Prej 31 mijë  e 433 lindjeve se ishin regjistruar në vitin 2015, ky numër është ulur për 1 mijë e 23 lindje.

Në vitin 2016 janë regjistruar 30 mijë e 410 lindje, ku prej tyre 23 mijë e 494 lindje kanë ndodhur në Kosovë, ndërsa 6 mijë e 916 kanë ndodhur jashtë vendit.

Kjo është bërë e ditur në raportin që ka publikuar Agjencia e Statistikave të Kosovës (ASK), për statistikat  e lindjeve në Kosovë për vitin 2016, ku të dhënat janë paraqitur sipas  bazës së grumbullimit të të dhënave Administrative për vitin 2016, nga zyrat e gjendjeve civile.

Në bazë të këtij raporti prej 23 mijë e 494 lindjeve në Kosovë, 23 mijë e 416 janë lindje të gjalla dhe 78 janë lindje të vdekura, ndërsa nga 6 mijë e 916 lindje që kanë ndodhur jashtë vendit, 6 mijë  e 915 janë lindje të gjalla dhe 1 lindje e vdekur.

Prej këtij numri, 99.7 për qind e lindjeve kanë ndodhur në institucione mjekësore, ndërsa pjesa tjetër në vende të tjera.

Raporti ndërmjet lindjeve të gjalla dhe vdekjeve apo siç quhet ndryshe koeficienti i vitalitetit është 2.8.

“ Koeficienti i maskulinitetit është 110.3. Koeficienti i lindjeve të vdekura – vdekjeve fatale në 1000 lindje ishte 3.3 promil”, thuhet në raportin e ASK-së.

Prishtina, vendi me më së shumti lindje

Kryeqyteti prin me numrin më të madh të lindjeve. Sipas raportit të Agjencisë së Statistikave të Kosovës, në Prishtinë kanë ndodhur 9 mijë e 937 lindje, që pasohet nga Prizreni me 3 mijë e 420 lindje dhe Peja me 2 mijë e 27 lindje.

Vetëm në Prishtinë, nëna për herë të parë janë bërë 1 mijë e 475 femra, në Prizren 836 femra dhe Ferizaj 558 femra.

Në Gjakovë janë 4 nëna që kanë fëmijën e nëntë.

Nënat që kanë lindur më së shumti fëmijë i takojnë nacionalitetit shqiptar me 94.9 për qind, pastaj renditen nënat e komunitetit Romë-Ashkalinjë-Egjiptian (RAE) me 1.7 për qind, dhe boshnjaket ,me 1.3

Grup moshat e nënave që kanë lindur

Nënat që kanë lindur u përkasin moshave të ndryshme, mirëpo numri më i madh i nënave që kanë lindur fëmijë, është i grup-moshave 25-29 vjeç me 35.6 për qind, pastaj grup-moshat 30-34 vjeç me 25.0 për qind, grup-moshat 20-24 vjeç me 23.4 për qind dhe grup-moshat tjera përbëjnë 17.0 për qind të numrit të përgjithshëm të lindjeve.

Nga kjo del se mosha mesatare e femrave që kanë lindur fëmijë për vitin 2016, është 28 vjeç.

38.6 për qind e femrave janë bërë nëna për herë të parë, 32 për qind janë nëna që kanë fëmijën e dytë dhe 19.4 për qind e nënave kanë fëmijën e tretë e kështu me radhë.

Sipas përgatitjes shkollore, dominojnë nënat me shkollë të mesme me 39.4 për qind, shkolla fillore e kryer me 29.3 për qind, ndërsa nëna që kanë përfunduar shkollën  e lartë dhe fakultetin janë  23.3 për qind e tyre.

Emrat më të përdorur: Alea dhe Ajan

Emrat që më së shpeshti i pagëzuan prindërit, fëmijët e tyre në vitin 2016 janë Alea, ku me këtë emër u pagëzuan 169 vajza, pastaj Sara ku u pagëzuan 134 vajza. Ndërsa emrat më të shpeshtë për djem ishin Ajan dhe Noar.

Me emrin Ajan u pagëzuan 218 foshnje dhe me Noar 195 foshnje.

Sipas raportit të ASK-së, bineq u lindën 722 foshnje, ndërsa treneq e më shumë u lindën 30 foshnje.

Sa i përket peshës së fëmijëve të lindur, në institucione shëndetësore,  numri më i madh i foshnjave është me peshë 3000-3499gram apo 37.4 për qind, 3500-3999 gram 31.3 për qind, 2500-2999 gram apo 12.8 për qind. Foshnjat e lindura gjallë me peshë më të vogël se 1000 gram përbëjnë vetëm 0.2 për qind.

Këto të dhëna ishin vetëm për fëmijët që janë të lindur në institucionet shëndetësore, pasi që për ata fëmijë që lindin jashtë institucionit mjekësor, sipas metodologjisë së hulumtimit kjo agjenci nuk kërkon të dhëna për peshën e tyre. /Gazeta Fjala/

Grupi joformal i grave dhe vajzave të Komunës së Prizrenit e quajtur FEMaktiv, do të organizoj performancën publike të rradhës “Burrat hekurosin”, ku nëpërmjet kësaj performance publike synon t’i sfidon rolet tradicionale gjinore.

“Ndarja e punëve të shtëpisë në Kosovë nuk bëhet në mënyrë të barabartë në mes të grave dhe burrave. Përveç kësaj punët e shtëpisë ende vazhdojnë të përceptohen si obligime që i takojnë vetëm grave. Andaj nëpërmjet kësaj performance publike FEMaktiv synon ti sfidon rolet gjinore duke e dhënë mesazhin që punët e shtëpisë nuk janë obligime që i takojnë vetëm grave. Punët e shtëpisë janë obligime që duhen të ndahen në mënyrë të barabartë në mes të grave dhe burrave – pa dallim gjinie. Arritja e barazisë gjinore në jetën private është e domosdoshme për arritjen e barazisë gjinore në jetën politike dhe publike duke i dhënë fund stereotipeve gjinore”, thuhet në njoftim, përcjellë PrizrenPress.

Iniciativa FEMaktiv i fton të gjithë qytetarët/et që të bashkangjiten në këtë performancë pubike, e cila ka për qëllim sfidimin e roleve tradicionale gjinore.

Perfomanca mbahet të shtunën (8 korrik 2017) në ora 13:00, përpara Lidhjes së Prizrenit.

FEMaktiv është iniciativë e grave dhe vajzave të Prizrenit që synojnë ta sfidojnë mendësinë patriarkale në diskursin publik të qytetit. /PrizrenPress.com/