Reduktimi i përshkallëzuar i kompetencave të EULEX-it në fushën e sundimit të ligjit, dhe kalimi i shumë rasteve serioze për trajtim te institucionet e drejtësisë kosovare, po shihet me shumë mosbesim për trajtim efikas dhe ndëshkim eventual meritor. Raste të njohura si ai i APEC-ut, për pronat, e raste të ngjashme serioze, janë transferuar në organet e drejtësisë kosovare, edhe pse gjykatat edhe prokuroria vendore janë të kapura dhe ndikuara nga politika e parapolitika.
Profesori universitar, Nexhmedin Spahiu, e konsideron si veprim të nxituar të EULEX-it, kalimin me aq lehtësi të rasteve me dyshime serioze për krim dhe korrupsion në institucionet vendore të sundimit të ligjit, ngase, sipas Spahiut, drejtësia kosovare nuk po arrin t’i gjykojë në mënyrë profesionale dhe krejtësisht të pavarur edhe disa raste nga më të lehtat të dyshimeve për vepra penale, e lëre më të ketë guximin dhe kurajën që të ballafaqohet edhe me “elefantët” e krimit dhe korrupsionit ordiner të lidhur me politikën.
“Gjyqësia e Kosovës, fatkeqësisht, nuk është e gatshme me u marrë as me çështje të lehta e lëre më me ato të rënda. Nga të gjitha fushat e jetës publike në Kosovë, gjyqësia është në pozicionin më të mjerë. Çdo fushë ka heronjtë e vet, por vetëm në gjyqësi nuk kemi heronj”, theksoi Spahiu.
Rrjetet kriminale ndikojnë në drejtësi
Edhe profesori i së drejtës, Muhamet Kelmendi, thotë se çështja e ndarjes së drejtësisë në Kosovë është një ndër problemet më akute dhe nuk ka funksionuar si duhet që nga fillimi, e nuk po funksionon as tani 8 vjet pas pavarësimit të shtetit të Kosovës. Kelmendi thotë se e mbrapshta në sistemin e drejtësisë është instaluar që nga ditët e para të pasluftës dhe nuk është vendosur asnjëherë në binarët profesionalë dhe të shkëputur nga ndikimet e rrjeteve kriminale të nëntokës dhe oligarkisë kriminale.
“Kjo për faktin se si gjykatat, ashtu edhe prokuroria, dhe vetë policia, rrjedhimisht nga viti 1999, kanë qenë në duar të grupeve mafioze dhe kriminale politiko-ekonomike. Duket sheshit se kompetentët që e kanë vendosur kuadrin në këto tri struktura të luftimit të krimit kanë qenë të interesuara që të vazhdohet në pafundësi çështja e krimit për t’ua shtuar dhe zgjatur jetën mekanizmave ndërkombëtarë në Kosovë, mekanizma të cilët kanë pasur dhe klane për përfitime të mëdha ekonomike”, ka thënë ai për “Kosova Sot”.
“Kjo skemë del nga UNMIK-u dhe tash vazhdon edhe nga EULEX-i. Të dy këto subjekte i kanë vendosur njerëzit e korruptuar dhe të kontrolluar nga ata dhe nga politika kosovare nëpër gjyqësor, prokurori dhe në polici. Dhe, si të tillë kanë zgjatur rastet nëpër gjykatat me vite të tëra. Ka raste sikundër dihet që në polici janë vjedhur provat dhe materialet e tjera të tubuara në luftë kundër kriminalitetit. Kemi gjithashtu raste kur në prokurori është ndërprerë e tërë hetuesia, sepse njerëzit (prokurorët) kanë qenë të politikës”, vijoi më tej ai.
“Edhe tani kalimi aktual i rasteve, sikundër është APEC-u, apo rasti me prona, sikundër rastet e tjera më herët, tregojnë se EULEX-i vetëm ka për qëllim ta zhveshë tërësisht Gjyqësorin dhe Prokurorinë e Kosovës. Ata e dinë se nuk kanë mundësi dhe dëshirë që mekanizmat e brendshëm të ndarjes së drejtësisë të merren me rastet e tilla të rënda, apo edhe në të ardhmen të kapin këtë çështje”, tha Muhamet Kelmendi. /Kosova Sot
Ramë Buja kishte arritur që njerëz të lidhur me interesa të PDK-së, t’i caktonte në Bordin e Universitetit, “Haxhi Zeka”. Por, njëri prej anëtarëve që kishte caktuar, Ilhami Gashi, nuk e kishte falënderuar. Për këtë arsye, Buja e quante “qen” e “faqezi”. Ndërkohë, Bordi i KEK-ut, ishte rezervuar për “dostat e Grabovcit dhe Bujës”. Insajderi sjell tri përgjime që dëshmojnë për pazaret e anëtarëve të lartë të PDK-së me institucionet publike.
Ramë Bujës i kishte mbetur hatri se pse Ilhami Gashi, nuk e kishte falënderuar për një favor që i kishte bërë.
Ish-ministri i Arsimit e kishte caktuar, kolegun e tij partiak, Ilhami Gashin, anëtar të Bordit të Universitetit “Haxhi Zeka” në Pejë. Mirëpo, Gashi as që e kishte falënderuar.
Për këtë arsye, Buja e quante “qen” Gashin.
Ndryshe prej Gashit, Haxhi Kastrati, një i emëruar tjetër nga Buja në këtë Bord, në shenjë falënderimi i kishte dhënë një pikturë.
Detajet e caktimit të anëtarëve të Bordit të këtij Universiteti zbulohen nga përgjimet e kryera në nëntor të vitit 2011, të cilat Insajderi i sjell të plota.
“O zoti Grabocka…, Ky Ilhami Gashi…, faqeziu…, qysh more burrë unë e çova në Bord të Universitetit të Pejës… edhe as ni faleminderës nuk ma tha bile, as mem marr në telefon”, ankohet Buja.
“Seriozisht për dallim nga Haxhi Kastrati”, vazhdon ai.
“Qysh hiq s’t’ka ka thirr a”, e pyet me habi Grabovci.
“Absolutisht hiç. Edhe…. le tum thirr katërqind herë ai ma, po shiko qisi faqeziu unë rrallë kom pa”, vazhdon të ankohet ish-ministri i Arsimit.
“A, Haxhiu bile ma kish çu ni pikturë, ni punim të vetin, ni pikturë, ja di për faleminderit”, tregon Buja.
Një përgjim tjetër zbulon se si Adem Grabovci ia kishte bërë të qartë Ramë Bujës se bordi i Bordi i KEK-ut ishte i rezervuar për “dostat e tyre”.
Buja, ish-ministër i Arsimit, Shkencës dhe Teknologjisë e kishte thirrur shefin e Grupit Parlamentar të PDK-së, Adem Grabovcin nëse ka vend në këtë bord për një kushëri të tij.
Mirëpo, Grabovci kishte thënë se Bordi është thuajse i pandryshueshëm me përbërje të “dostave të tyre”.
Edhe kjo bisedë për këtë bord zbulohet nga një përgjim i kryer në nëntor të vitit 2011 gjatë kohës sa Grabovci po hetohej për krim të organizuar.
“Hej shoqi, kjo puna, se m’tranun me këto Borde, ç’borde. Kët’ Bordin e KEK-ut, Kuvendi e zgjedh a po”, e pyet Buja Grabovcin.
“Ëhë…, zgjedhin, zgjedhin qashtu qysh t’mujn o’bo, shkojnë ma të mirtë”, thotë Grabovci duke duke qeshur.
“Po de, ma të mirtë, normalisht ajo punë, po, po thom Kuvendi e zgjedh a po”, vazhdon Buja.
“Hëhëhë, Po, po, po, po”, ironizon shefi i Grupit Parlamentar të PDK-së, teksa Buja e quan idiot.
Ish-ministri i Arsimit i tregon Grabovcit se një kushëri i tij po kërkon që të emërohet anëtar i këtij Bordi.
“Ni kushërinit p’i kallxoj që Kuvendi i zgjedh këto, a po merr vesh”, shkon Buja.
“O hiqu thuj kushërinit, thuj, s’vjen në shprehje hiç kurrkush, se janë këta dostat, pe din”, sqaron Grabovci.
“Po de e kom parasysh po, po thash ta hjeki qafe. e thirra me pi çaj se m’qiti menç, thash t’i kallxoj, që o ti djalë Kuvendi, s’mirrna unë mo me tulifar pun’sh”, tregon Buja.
Grabovci ia sqaron sërisht se ky bord është i rezervuar dhe nuk do të ketë thuajse fare ndryshime.
“Jonë k’ta kryesortë, dostat tonë e kanë… I pa ndryshushum osht po thuj…”, vazhdon Grabovci.
Ndërkohë, në një bisedë tjetër Adem Grabovci kishte pohuar se kishte zbuluar se sekretari i Ministrisë së Arsimit, Xhavit Dakaj, po punonte për interesa të Ilir Tolajt, ish-sekretar i Ministrisë së Arsimit.
Buja, kishte mbetur i habitur nga ky fakt, dhe ishte lutur që mos të ishte e vërtetë.
“Do njerëz, do njerëz që iu boj shërbim po pendohna, bash sa jam i madh”, kishte thënë Grabovci në një përgjim tjetër.
“Po pasha, pasha besën”, vazhdon ai për t’u ankuar në veprimet e sekretarit të MSH-së.
“Hej, hej dëgjo, për qatë sekretarin ton qatë laper…, Ta shoh, ta shoh qa ka bo, se ja kom dhon dje ni porosi diçka”, shton Grabovci.
“Ia ke dhanë porosinë edhe se ka kry a”, pyet Buja.
“Po tybe, edhe, edhe i shërben Ilir Tolës”, shton Grabovci.
“Jo more, mos bo hajgare”, ndërhyn Buja.
Biseda e parë për bordin e KEK-ut
Grabovci: Përshëndetje, zoti Buja!
Buja: Heheheh e merr vesh ti kit’ far; kollen time, jom ftofë pak a po merr vesh a jo?
Grabovci: Ec more, ec more shko në përvjetor të partisë aty.
Grabovci: Vallain, erdha në shpi u bllokova në rrugë e pash që s’muj me mrri, ika në shpi krejt, se kesh lodh, kesh tesh.
Buja: Edhe unë kesh tesh qashtu, e erdha në shpi, s’um paska ra në men hiq, me të kallxu drejt veç sa hangra bukë qitash.
Grabovci: Hahaha, t’pas bo mirë.
Buja: Hohoho.
Grabovci: Qysh je?
Buja: O lum partia që ju ka po thotë kjo nusja jeme.
Grabovci: Aiii, thuj nuses tane thuj, lum e lum vallain edhe na për partin.
Buja: Aiii lum na, lum ata.
Grabovci: Po vallain.
Buja: Po, po, ei shoqi.
Grabovci: Ha?
Buja: Kjo puna, se m’tranun me k’to borde, ç’borde, ket’ bordin e KEK-ut, Kuvendi e zgjedh a po?
Grabovci: Ee… ëëë… Zgjedhin, zgjedhin qashtu qysh t’mujn o’bo, shkojnë ma të mirtë.
Buja: Po de, ma të mirtë, normalisht ajo punë, po po thom Kuvendi e zgjedh a po, a?
Grabovci: Hëhëhë, Po, po. Po. Po.
Buja: Ooo (nuk kuptohet) idiot o idiot…heheheh.
Grabovci: Hehehehe.
Buja: Ni kushërinit p’i kallxoj që Kuvendi i zgjedhe këto, a po merr vesh.
Grabovci: Ooo hiqu thuj kushërinit, thuj, s’vjen në shprehje hiç kërrkush, se janë këta dostat, pe din.
Buja: Po de e kom parasysh po, po thash ta hjeki qafe, e thirra me pi çaj se m’qiti meç, thash t’i kallxoj, që o ti djalë Kuvendi, s’mirrna unë mo me tulifar punshë.
Grabovci: Jonë kta kryesortë, dostat tonë e kanë.
Buja: Po de po.
Grabovci: I pa ndryshushum osht po thuj…
Buja: Hahahah, po a.
Grabovci: Po, vallahi.
Buja: U kry.
Grabovci: Qysh je ti, a je mirë ?
Buja: Vallain, me shnet mirë.
Grabovci: Lodh, a hek keq a?
Buja: Po shokët s’i kom kurqysh.
Grabovci: Hajde more pimë kafe.
Buja: Jo, jo… (nuk kuptohet)
Grabovci: As nuk po thirr n’kafe, as nuk po vjen n’kafe.
Biseda, vazhdon për çështje private dhe familjare.
Biseda e dytë mes Grabovcit dhe Bujës për Bordin e Universitetit “Haxhi Zeka”
Buja: O zoti Grabocka.
Grabovci: Po.
Buja: Ky Ilhami Gashi.
Grabovci: Po.
Buja: Faqeziu.
Grabovci: Po.
Buja: Qysh more burrë unë e çova në bord të Univesiteit t’Pejës… edhe as ni faleminderës nuk ma tha bile, as mem marr në telefon?
Grabovci: Hëë.
Buja: Seriozisht për dallim nga Haxhi Kastrati.
Grabovci: Qysh hiq s’tka ka thirr a?
Buja: Absolutisht hiq, edhe shkon le tum thirr katërqind herë ai ma, po shiko qisi faqeziu unë rrallë kom pa.
Grabovci: Hahahaha.
Buja: Ani ani…
Grabovci: … Normal
Buja: A, Haxhiu bile ma kish çu ni pikturë ni punim të vetin,ni pikturë, ja di për faleminderit.
Grabovci: Haxhiu?
Buja: Po, po Haxhiu.
Grabovci: Ani, hajt hajt.
Buja: (Nuk kuptohet).
Grabovci: Hajt hiqu tyne.
Biseda e tretë për Ilir Tolajn mes Grabovcit dhe Bujës
Grabovci: Alo.
Buja: Zotëri, shoku Grabocka si jeni?
Grabovci: Mirë.
Buja: Çka po flet si përgjumshëm?
Grabovci: A?
Buja: Çka je t’u fol si përgjumshëm?
Grabovci: Ja vallain n’zyrë jom qitu.
Buja: A n’zyrë?
Grabovci: Do njerëz, do njerëz që po ju boj shërbim po pendohna, bash sa jam i madh.
Buja: Hahaha, hehehe.
Grabovci: Po pasha, pasha besën.
Buja: (Nuk kuptohet)
Grabovci: Hej, hej dëgjo, për qatë sekretarin ton qatë laper.
Buja: Po.
Grabovci: Ta shoh, ta shoh qa ka bo, se ja kom dhon dje ni porosi diçka.
Buja: Ja ke dhanë porosinë edhe se ka kry a?
Grabovci: Po tybe, edhe, edhe i shërben Ilir Tolës.
Buja: Jo more, mos bo hajgare.
Grabovci: Qysh je ti a je mirë?
Buja: Mirë, me shnetë.
Grabovci: Ça i ki punët?
Buja: Na dy pe marrum vesh ma me vonesë këto far’ pune.
Grabovci: Po de, po de.
Buja: Hehehehe nanen, jo more ishalla s’është qashtu.
Grabovci: Kah je ti?
Buja: Unë qitash jom në banesë, edhe unë dola e hongra pak bukë.
Grabovci: Po a.
Buja: Po ni kafe sun e pimë na që thamë pe pijmë, ni kafe bashkë edhe (nuk kuptohet)…
Grabovci: Unë në zyrë jom, n’paç kohë a t’pres në zyre?
Buja: Jo, jo jo n’zyrë, se… hajde po dalum dikun ta marr edhe unë Fatimen e dalum pimë kafe dikun jashtë.
Grabovci: Ma vonë, se i kom do miq të Italisë.
Buja: Ani u bo hajde, e lajm ma vonë, u bo.
Grabovci: U bo, ma vonë, ma vonë ndash shkojmë kah Lipjani atje i marrum gratë, hajt.
Buja: U bo hajt. / Insajderi.com
(Në transkriptim të bisedave mund të ketë lëshime të vogla teknike)
Në çdo shtet të botës demokratike aty ku sundon shteti i së drejtës, ka arsye ngritje procedure edhe për pak incizime. Çfarë elemementi më i qartë mund të ekzistojë, në këtë kontekst dhe në këto rrethana specifike, se korrupsioni dhe veprimet e kundërligjshme të dokumentuara përmes telefonit dhe zërit të të dyshuarve. Por, për regjime të tilla siç është ky regjimi yni nuk vlen as Kushtetuta, as ligji, as rendi, as drejtësia, as parimet, as principet, as etika. Nuk e kuptojë se çfarë prova të tjera dëshiron të ketë z. Aleksandër Lumezi, që t’i ndjek penalisht të gjithë të involvuarit në këtë aferë, që zanafillën e ka prej aferës ”Pronto 1” të para ca viteve. Prandaj, një Kryeprokuror si z. Lumezi që ka ardhur në krye të Prokurorisë së shtetit nga klani ”Pronto”, thotë se nuk ka prova të mjaftueshme për ndjekjen e Grabovcit dhe Grabovcve të tjerë…. Sepse është vegël e këtij klani dhe kuptohet që nuk e ka guximin që të nisë hetimet kundër shefave të tij! Për qytetarët e thjeshtë një email mund të shërbej për Prokurorinë ta futur në burg, e lëre më të ketë ndonjë bisedë telefonike. Kurse për të ”fortit” e politikës dhe parapolitikës, nuk vlejnë as incizimet. Që do të thotë se drejtësia tek ne është selektive. Për të ”fortit” është nënë, kurse për të ”dobëtit” njerkë.
Imagjinoni se çfarë kanë bërë ky klan mafioz për 17 vite. Ky është tmerri dhe fundi i Kosovës. Dyshoj që ky klan mafioz do lagen ndonjëherë, pavarësisht se çfarë kanë bërë dhe çfarë janë duke bërë, sepse kanë në dorë të gjithat, duke filluar nga Gjykatat, Prokuroritë, Policinë, shtetin e pushtetin! Deri sa populli nuk ua prenë rrobat, këtyre kungulli do u ec tërë jetën mbi ujë! Por me cilin popull se!Paramendojeni po të kishte ndodhur ky skandal i përgjimeve në një shtet normal, ku zbulohen pisllëqet e pushtetarëve se çfarë tërmeti kishte me ndodh, sa arrestimet e sa shkarkimet. Por tek ne kjo gjë nuk ndodh, sepse ne s’kemi as shtet normal e as nuk jemi shoqëri normale!
Gjyqtarja e Procedurës Paraprake – Departamenti i Krimeve të Rënda i Gjykatës Themelore të Prizrenit vendosi që ndaj të pandehurit me iniciale D.F. nga Prizreni i caktohet masa e paraburgimit për shkak të dyshimit të bazuar se ka kryer veprat penale lëndim i rëndë trupor nga neni 189 par.5. lidhur me par. 1 nën. par.1.1 të KPRK, dhe mbajtja në pronësi, kontroll, në posedim të paautorizuar të armëve nga neni 374 par.1. të KPRK, duke vendosur sipas kërkesës së Prokurorisë Themelore në Prizren.
Në njoftimin e Gjykatës Themelore të Prizrenit thuhet se masa e paraburgimit është caktuar në kohëzgjatje prej 1 (një) muaji i cili të llogaritet prej datës 05.08.2016 nga ora 23:15 dhe do të zgjasë deri me datën 04.09.2016, shkruan PrizrenPress.
I pandehuri dyshohet për shkelje të Kodit Penal, sepse me datën 05.08.2016 rrethë orës 22:35 minuta në Prizren në lokalin e natës “Korabi” i pandehuri për shkak të mosmarrëveshjes së mëhershme që ka pasur me viktimën – në vend publik e në prezencë të njerëzve, me armën të cilën e ka pasur me vete, në një afërsi gjuan në drejtim të viktimës-të dëmtuarës- me iniciale L.M. valltare e lokalit – të cilën e plagos në këmbën e djathtë duke i shkaktuar lëndim të rëndë trupor. /PrizrenPress.com/
Nga dje (e hëne), Klubi i Futbollit “Ujavara Malishevë”, i ka filluar përgatitjet për sezonin e parë të saj futbollistik. Klubi i futbollit, paraprakisht i ka përfunduar të gjitha procedurat e regjistrimit dhe pranimit në Federatën e Futbollit të Kosovës, dhe nga vjeshta e këtij viti, për herë të parë do të startoj me lojëra në kuadër të ligës e dytë të Kosovës..
Ky është një moment historik në sportin e Komunës së Malishevës, pasi deri më sot i ka munguar ekipi i futbollit të madh, edhe pse në vazhdimësi ka pasur shkollë futbolli, ndërsa talent tanë janë detyruara ti ndjekin klubet tjera, përderisa futbollistët nga Malisheva, luajnë edhe në ligat e ndryshme në Evropë.
Fillimin e stërvitjeve e kanë përcjellë edhe kryetari i Komunës së Malishevës, Ragip Begaj dhe drejtoresha për Kulturë, Rini dhe Sport, Blerta Krasniqi, të cilët ju kanë uruar suksese dhe ju kanë dhënë mbështetjen e Komunës së Malishevës.
KF “UV Malishevë”, do të garoj në ligën e dytë, dhe nga formimi në këtë vit, është kompletuar me futbollist të rinj, kurse trajneri i ekipit është Skënder Ulluri. Në themelimin e klubit nuk kanë munguar as donatorët, e sidomos nga bashkatdhetarët tanë, duke veçuar këtu kontributin e jashtëzakonshëm të Afrim Bytyçit, i cili është edhe kryetar i klubit. Drejtor sportiv i klubit është Kastriot Kafexholli. /PrizrenPress.com/
Me publikimin e këtyre përgjimeve të njëpasnjëshme, që po dalin në sipërfaqe, për komunikime nga më të ndryshmet të përfaqësuesve politikë të pushtetit, po shihet se afera e përgjimeve po bëhet edhe një lloj mode në shtetin e Kosovës, që mund të bëhet jo vetëm në linja zyrtare të institucioneve të ngarkuara për rend dhe ligj, por mund të zhvillohet edhe nga shërbimet e agjenturave të ndryshme të parapolitikës, politikës në pushtet.
Vetë opozitarët nuk e përjashtojnë fare mundësinë dhe rrezikun real të shfrytëzojë mekanizmat e vet të nëntokës dhe parapolitikës nga ana e pushtetit për t’i përgjuar dhe për t’i denigruar edhe liderët politikë të opozitës dhe kundërshtarët e tjerë të Qeverisë, përmes njerëzve të vet në kompani e në institucione publike, në mënyrë të paligjshme, që t’i shantazhojë ata më pas, qoftë për denigrim në kohën e zgjedhjeve apo në rastet të tjera, sikur që janë marrëveshjet e pritshme për Demarkacionin me Malin e Zi, apo detyrimi për pajtim dhe implementim të Asociacionit të Komunave me shumicë serbe. Opozita dhe analistët janë të bindur se pushteti i ka mundësitë ta bëjë edhe këtë skenar për arritjen e qëllimeve të tij, qoftë edhe përmes veprimeve të kundërligjshme, shkruan Gazeta Kosova Sot.
Populli duhet ta dijë me kënd ka punë
Deputeti Ismail Kurteshi nga “Vetëvendosje!” pohon se përgjimet e eksponentëve të rëndësishëm në PDK, që në të njëjtën kohë zënë vende të rëndësishme edhe në institucionet e vendit, përveçqë nxjerrin para opinionit keqpërdorimet e tyre dhe joseriozitetin që po e dëmtojnë shumë vendin tonë, mund të shërbejnë edhe si mjet për shantazhimin e këtyre njerëzve, që në momente të caktuara mund ta dëmtojnë shtetin. Ai thotë se publikimi i përgjimeve në prag të ratifikimit të marrëveshjes për kufirin Kosovë – Mal i Zi mund të ndikojë te disa deputetë, që deklaronin se marrëveshja është e dëmshme, se vija kufitare është shtyrë për disa kilometra etj. Ata mund ta votojnë marrëveshjen për shkak të shantazhit që vjen nga publikimi i përgjimeve, edhe pse nuk besojnë se marrëveshja është e drejtë. Mirëpo, ai thotë se nuk e përjashton që edhe pushteti të përdorë një sistem të përgjimeve ndaj opozitës me qëllim të shantazhit, denigrimit apo përpjekjes që ta bindë të pajtohet me ndonjë vendim të papranueshëm dhe në dëm të vendit, ndonëse është e pabesueshme që opozitarët të bëjnë aso gabimesh dhe të kenë aso sjelljesh, sikur që kanë pushtetarët e zhytur në krim e korrupsion, dhe nuk është e pritshme që opozitarët të nënshtrohen ndaj skenarëve të tillë.
“Përgjimi i opozitës nga pushtetarët nuk përjashtohet, nëse opozitarët janë të papërgjegjshëm dhe keqpërdorues si këta të pushtetit le të njoftohet opinioni, le të dëmtohet opozita, sepse ky vend ka nevojë për një qasje ndryshe të pushtetarëve, për një logjik shtetformuese, për pushtetarë që i respektojnë ligjet, kurse qytetarët i trajtojnë njësoj, pavarësisht përkatë- sisë politike. Populli duhet ta dijë me kënd ka punë”, tha Kurteshi. /Kosova Sot
Turisti rus që vdiq javën e shkuar në Himarë, këtë javë është lajm i vjetër për ne. Por jo për gruan e tij, për vajzën e tij, që e pritën atë ditë të dilte nga deti, prej nga nuk doli dot kurrë. I kam menduar gjithë këto kohë, si vinin vërdallë nga spitali në morg, të dyja, të mpira, të hutuara, të shkatërruara. Nuk e di nëse janë ende në Shqipëri, nëse e morën trupin pas autopsisë, nëse hipën në avion, nëse shkuan bashkë me arkëmortin në Rusi dhe e varrosen babain dhe burrin prej të cilit nuk u ndanë dot.
Kërkova informacion në mënyrë informale në Ambasadën Ruse, por nuk mora dot. Doja të dija ku ishin ato të dyja. I shikoja ashtu bashkë , dorë për dore, në mes të hiçit, vetëm dhe bosh. Nuk doja interviste, doja vetëm t’i ngushëlloja. Doja vetëm t’u thosha, më falni!
Unë hyj te njerëzit që shkruaj dhe bëj emisione për turizmin prej 14 vitesh e bindur se vetëm turizmi mund të na zhvillojë dhe përmirësojë. E shoh të vetmen mundësi ndryshimi të Shqipërisë. Çdo vit që shkon më bën më shumë të besoj se kjo ditë është e afërt.
Por nuk mundesha këtë të hënë, të sillja shkrimin e javës sikur asgjë nuk ka ndodhur. Ka ndodhur një vrasje. E paparamenduar, por e paralajmëruar. Sepse një turizëm pa rregulla, një vend pa rrugë, një det pa vijë ndarëse, pa roje bregdetare, pa polici kufitare, veç tragjedi mund të sjellë. Nëse më thoni, të gjitha këto janë, atëherë përse nuk funksionojnë, ku ishin atë ditë, kush e ka fajin që ndodhi ajo vdekje?
Ai që presupozohet ta ketë shkaktuar vdekjen e turistit, thotë se në fakt e ndihmoi, Kryetari i Bashkisë së Himarës thotë se turisti po notonte në ujëra të pakontrolluara prej tij, Ministria e Brendshme thotë se i ka dërguar 6 letra Bashkisë, autoritetet e bregdetit thonë se ky është hap prapa për turizmin, shoqëria civile thotë se turistin e vrau shteti dhe askush deri më sot nuk ka thënë, as fjalën më të thjeshtë, më njerëzore në botë; më fal!
Unë këtë doja t’ju thoja, gruas së tij, vajzës së tij, me falni në emër të vendit tim.
Nuk kam lidhje, përveçse morale me këtë gjëmë që i ndodhi asaj familjeje, sepse hyj te njerëzit që e promovoj këtë vend, ku ftoj gjithkënd të vijë, se do gjejnë një copë parajsë, me bukë e kripë e zemër të bardhë, ndaj ndjej përgjegjësi të them më fal.
Më fal nuk të humb autoritetin, nuk të lë pa post, nuk të sjell dorëheqjen, më fal nuk të merr gjë, vetëm i jep atij që lëndove. Nuk jam e habitur, jam e turpëruar që askush nuk e ka shqiptuar deri më tani, një më fal për këtë vrasje pushuesi. Vdiq, iku, u harrua.
Këtë ndjesi kam pasur, edhe disa verëra të shkuara, kur një vrasës qëlloi në mes të plazhit te Kalaja, në Vlorë, të lante hesapet e emigracionit dhe vrau një pushuese shqiptare, që kishte ardhur nga Gjermania të pushonte në Vlorë. Sa herë kaloj buzë atyre shkallëve, që nuk i zbres më kurrë, pavarësisht se më pëlqen deti, më kujtohet ish- Kryetari i Bashkisë së Vlorës, që nuk i doli nga goja një më fal, pas vrasjes së një pushueseje të pafajshme, në qytetin e drejtuar prej tij, ku kishte ftuar gjithkënd të vinin e ta shijonin, në hapjen e sezonit. Jo vetëm kaq, por tha pa ia bërë syri tërrt;gjëra që ndodhin, vazhdojmë pushimet.
Është as më pak, as më shume, e njëjta gjë që po ndodh edhe tani. Hajde vazhdojmë, shohim para, gjëra që ndodhin. E vërtetë, turizmi do të vazhdojë, vrasja nuk do të mbyllë portat tona përgjithmonë, por nëse e fshehim dhe groposim do e nxjerrë kokën, një ditë, ku e kur nuk e pret, do të ndodhë sërish, do të të ndodhë ty!
Kultura e mosndëshkimit, e braktisjes së fajit, është më e keqja, më vrastarja. Ajo po na ha përditë. A nuk vrau ajo dy fëmijë të vegjël, vëlla e motër në Qerret. A dha njeri dorëheqjen? A tha njeri më fal?
Në Prizren, një vajzë e vogël, tre vjeçe vdiq nën rrënojat e një shtëpie nga ato që i ka për detyrim Bashkia t’i rrethojë e shembë, si të rrezikshme. Por nuk e bëri, dhe e vogla e pafajshme, dha shpirt poshtë tyre. Asnjë më fal, asnjë dorëheqje. Kur më thonë, të shkoj në Prizren, më kujtohet fytyra e saj, jo mbledhja e dy qeverive, as Lidhja e Prizrenit dhe nuk shkoj.
Kudo ka vrasje, madje masive, ka frikë, ka pasiguri, por e gjitha është në emër të terrorizmit , ndërsa këtej e andej kufirit ku jemi prapë ne, ndodh në emër të banalitetit. Po na ikën jeta kot. Ky komb po bëhet banal nga mungesa e rregullave, e qytetarisë, e njerëzillëkut, që merr përsipër fajin, qe thotë më fal, që jep dorëheqjen, që ndjen përgjegjësinë, që merr masa të mos ndodhin më. Këtu të vrasin sikur nuk ke qenë kurrë dhe pastaj pa pikë turpi ftojnë edhe të tjerë. Për çfarë, t’i vrasim dhe ata?
Turizmi është mbi të gjitha çështje besimi. Valbona aty ka qenë, po aq e bukur përherë, por pyetja a është e sigurt, ia mbajti njerëzit larg , aq gjatë. Tani që frika ka ikur, shko kërko hotel në Valbonë, dhe shiko a gjen dot qoftë një krevat të lirë, në fundjavë. Edhe Thethi pa drita ka qenë dhe është, rruga është po mizerje, por plot të huaj, që nuk iu ndahet zemra nga ai vend, ku njohin çdo njeri e pemë.
Pa thuaji të shkojnë në Dukagjin! Do ju kujtohet fytyra e adoleshentit të çmendur që vrau dy cekë si yje pse donte t’i vidhte celularin. Mynxyrë, damkë. Ndaj ai vend vazhdon me hashashin, se turizmin e ka qarë. Nuk të vjen kush, po nuk të besoi.
Turizmin e shet besimi dhe jo logoja e konkursit me Bruno Vespën.
Ndaj ngjarja me turistin rus, mund te mbajë larg jo thjesht rusët, por gjithë turistët, prej jugut, që ka ardhur koha të mësojë nga veriu si bëhet turizmi. Siç ka ardhur koha të mësojmë rregullin nr 1, nuk ftohen njerëz në një shtëpi që nuk është gati.
Unë hyj tek ata që e kanë bërë, kam ftuar njerëz në këtë vend pa marrë parasysh përgjegjësinë ndaj tyre, vetëm në emër të dashurisë për vendin dhe nevojës për të ndarë atë që shoh dhe pëlqej vetë. Epo unë i detyrohem një më fal dhe kjo është më e pakta, asaj gruaje e asaj fëmijë që humbën burrin e shtrenjtë të jetës, në Jon. Nuk panë emisionin tim, as më lexuan mua, por unë ndihem përgjegjëse. Se kam folur para kohe.
