Lëvizja ‘Vetëvendosje’, ende nuk ka marrë vendim për kandidatin e Prizrenit.

Kryetari i VV-së në Prizren, Artan Abarshi, thotë se për kandidatin për kryetar të këtij, qyteti do të vendoset në muajt e ardhshëm.

” Nuk kemi caktuar ende ndonjë kandidat. Në muajt e ardhshëm nisin procedurat e brendshme për të interesuarit dhe kandidati për kryetar komuna zgjidhet me votat e anëtarësisë”, tha Abrashi për “Kosova Sot”.

Njëjtë mendon edhe Drita Millaku

“Meqenëse jemi subjekti që kemi një sukses shumë të madh në zgjedhjet e fundit, ne tani jemi në përzgjedhjen e kandidatit për kryetar të Prizrenit. Deri më tani nuk kemi vendosur ende në emër konkret. Së shpejti do të dalim me kandidatin, për të cilin do të njoftohen edhe mediet, por edhe opinioni i gjerë. Një gjë jam e bindur se fitorja e LVV-së është e pashmangshme”, tha Millaku për “Kosova Sot”.

Ndërkaq, emrat që janë lakuar si kandidatë potencial nga VV-ja për kryetar të Prizrenit janë: Artan Abrashi, Myhtaher Haskuka dhe Kujtim Shala.

Kryetarit të Nismës në Prizren, Zafir Berishës, i janë rritur shpresat e fitores, për postin e kryetarit të Prizrenit.

Ai, për gazetën “Kosova Sot” ka thënë se besimi i dhënë për herë të tretë që të përfaqësojë Prizrenin, në Parlamentin e Kosovës, është tregues i fitorës së tij për kryetar të Komunës.

“Në bazë të fakteve, dega e “Nismës” në Prizren ma kanë dhënë mandatin e plotë, kurse duke u bazuar edhe në lëvizjet e fundit politike, besoj se tashmë unë do të jem kandidat që do ta sfidoj këtë post për të parin e komunës”, tha Berisha për “Kosova Sot”.

Deputeti i sapozgjedhur, Driton Selmanaj, mund të jetë kandidati i LDK-së për kryetar të Prizrenit.

Emri i tij, ka filluar të lakohet pas votave që ka marrë në zgjedhjet e 11 qershorit.

Burimet e gazetës “Kosova Sot”, bëjnë të ditur se Selmanaj ka filluar të shihet si kandidati i vetëm që mund të rikthejë në pushtet LDK-në në Prizren.

Kryetar i degës së LDK-së në Prizren, Haxhi Avdyli ka thënë ndërkaq se pas diskutimeve të hapura për të parin e Prizrenit është vendosur që të kandidohet dr. Hatim Baxhaku.

“Dega e LDK-së me strukturat e saj ka hapur diskutimet e brendshme, ka bërë matjet e nevojshme të opinionit dhe ka ardhur në përfundim që kandidati i preferuar i degës tonë për kryetar komune të jetë dr. Hatim Baxhaku. Ishte deputet në dy mandate, i dëshmuar si profesionist dhe si njeri, andaj mendojmë që me dr. Hatimin Prizreni do të fitohet pa mëdyshje nga LDK-ja”, thotë Avdyli. /PrizrenPress.com/

Partia Demokratike e Kosovës(PDK) në Prizren ende nuk është përcaktuar për emrin e kandidatit për kryetar të këtij qyteti.

Zyrtari i këtij subjekti politik në Prizren, Kujtim Gashi tha se kandidati do të përcaktohet nga strukturat e partisë dhe kryetarin Kadri Veseli.

“Në konsulta me strukturat e degës dhe në konsultim me kryetarin Veseli dhe nivelin qendror do të caktojmë kandidatin për kryetar dhe 45 kandidatët për Kuvendin e Komunës, në kohën e duhur”, thotë Kujtim Gashi për Kosova Sot.

Ndërkaq, dy emra janë lakuar brenda PDK-së si kandidatë potencial për kryetar të Prizrenit.

Emrat më të përfolur janë ai i Kryesuesit të Kuvendit, Kujtim Gashi dhe deputetit, Nezir Çoçaj.

Edhe një herë tjetër ka dështuar të fillojë rigjykimi kundër të akuzuarës, Shemsije Sheholli, ish-gjyqtare dhe tani avokate në Prishtinë. Edhe në seancën e paraparë të mbahej të enjten, e akuzuara Sheholli nuk u paraqit në gjykatë, përkundër faktit se ndaj të njëjtës ishte lëshuar urdhër për sjellje.

Kryetarja e trupit gjykues, Raime Elezi për “Betimi për Drejtësi” bëri të ditur se e ka shtyrë shqyrtimin për 7 korrik 2017, në ora 10:00.

Ndryshe, me 12 shtator 2013, Prokuroria e Shtetit ka ngritur aktakuzë ndaj Shemsije Shehollit, të cilën e akuzon se në cilësinë e gjyqtares në ish-Gjykatën Komunale në Prishtinë, ka keqpërdorur pozitën zyrtare të saj.

Sipas aktakuzës, Sheholli ka aprovuar kërkesën e paditësve, Jetullah, Sherife dhe Naim Krasniqi, me të cilën ka vërtetuar se ata janë pronar të një prone, në vendin e quajtur “Kroi i Bardhë”, pa ftuar në shqyrtimin gjyqësor, palën paditëse.

Po ashtu, sipas aktakuzës, Sheholli i ka caktuar palës së paditur, përfaqësues të përkohshëm, pa u munduar që të sigurohet se i njëjti nuk  jeton në Kosovë, por se është mjaftuar me deklaratën e paditësve se i padituri, Ustun Sylejman, është shpërngulur në Turqi.

Tutje, Sheholli, akuzohet se nuk ka zbatuar ligjet pozitive që të shpallë në gazetën zyrtare, vendimin mbi caktimin e përfaqësuesit të përkohshëm, me çka i është mohuar e drejta e pjesëmarrjes në kontest, trashëgimtarëve ligjor të të paditurit Ustun, mbesat dhe nipat e tij, Zineta, Ifeta dhe Eroll Nikoqeviq dhe Emil Popoviq.

Me 27 maj 2016, e akuzuara Shemsije Sheholli, është shpallur fajtor për veprat penale me të cilat ngarkohet dhe është dënuar me 3 muaj burgim efektiv.

Ndaj këtij aktgjykimi, palët e dëmtuara dhe prokurori i rastit, kanë parashtruar ankesë në Gjykatën e Apelit, ku kanë kërkuar që të rritet lartësia e dënimit.

Po ashtu edhe mbrojtësja e të akuzuarës, avokatja Shpresa Berisha-Rexhepi, ka bërë ankesë ku ka kërkuar që të prishet aktgjykimi dhe rasti të kthehet në shkallën e parë për rivendosje.

Me 5 dhjetor 2016, Gjykata e Apelit, ka marrë aktvendim me të cilin ka aprovuar ankesën e mbrojtjes dhe e ka kthyer rastin në shkallën e parë, për rivendosje.

Sipas aktvendimit të Apelit, gjykata e shkallës së  parë nuk ka arritur që të vërtetojë në tërësi gjendjen faktike, pasi që nuk ka administruar si provë, lëndën kontestuese për të cilën bëhet fjalë në aktakuzë, ku do të vërtetoheshin nëse janë të sakta pretendimet e palës akuzuese apo asaj mbrojtëse.

Lënda penale në këtë rast, në korrik të këtij viti, arrin afatin e vjetërsimit, ndërsa nga janari i këtij viti nuk ka arritur të startojë rigjykimi.