Petrit Musolli

Prej mbas shpalljes së pamvarësisë, sidomos, n’Kosovë s’ka ekzistue ndonji paqartësi apo vështirësi rreth identifikimit të problemeve e kuptue shqetësimet që kanë rëndue e rëndojnë shoqninë. Kanë mungue adresat me i adresue! E, të njajtat probleme e shqetësime mbesin, ndërsa dera e trokitun vazhdon me qenë e gabueme!Turri në Turin e Kadri Veselit, asht ka i ngjan atyne tubimeve (në bardhë e zi) të kohës së Enver Hoxhës, ku propagandohej, e shtihohej tanë nji masë në nji ‘komunikim të sinqertë’ e qarje hallesh me partinë e liderin!

E, shkaktari/fajtori, gjithmonë, gjendej dikund jashtë partisë e liderit!Sado mundet me tingëllue i papërshtatshëm ky krahasim, edhe ata qytetarë e biznismenë e eksperta, i kanë të njoftuna shkaqet e shkaktarët e këtij degradimi ekonomik e social. Ndoshta, veç nji frikë (e natyrës së njajtë, si të kohës së naltpërmendun) mundet me i shtye me shkue e shtihue në tubime/takime të tilla!?

Gjithçka kish me tingëllue e sinqertë, sikur ta kishin pranue se kanë shkue me u përgjërue!Asht kjo klasë, kastë e mendësi politike që i ka katandis këtu këto ekonomi e këta qytetarë. E, në vend të guximit me i’u kundërvue, ata kanë zgjedhë me u përgjërue!Mjerim e dhembshuni për nji shoqni të dominueme me rini!Nji shoqni që ma para pranon me u shtihue sesa rezistue, luftue!

Nji shoqni e dominueme me rini, duhet marrë turr për nji Tur të nji Fillimi të Ri – të mosnënshtrimit para bosave të krimit, ekonomik e politik dhe, përgjëruesëve të tyne!Cili asht sot arsyetimi i këtij Turi?!Me e ndigjue të varfunin çka i mungon?! Me e ndigjue të papunësuemin çka kërkon?! Me e ndigjue të izoluemin çka dëshiron?! Me e ndigjue biznismenin e pambrojtun çka e rrezikon?!

Krejt ky banalitet, absurditet, tolerohet me lehtësi… nga nji shoqni e dominueme me rini!Nji shoqni e dominueme me rini që isht dashtë turr pikërisht këtyne partive e liderave, që për tanë këto 17 vjet ditën me prodhue veç varfëni, papunësi, izolim e pasiguri…Nji shoqni e dominueme me rini, s’kish me i hesht këtij ofendimi prej Turi! Ose, të paktën, s’kish me i brohorit!Koha asht për Turin e turrin e rinisë – dominantës së shoqnisë, me i dhanë fund epokës së vjetërueme ‘bardhë e zi’!Turin, ndoshta, duhet nisë me reformimin, rikonceptimin e riorganizimin politik. Kurse turrin, në kutiat e votimit, në vjeshtë!

SHKRUAN: FATON MEHMETI

Mendësia e abuzimit me pushtetin, liderët tanë pa personalitete të formuara e gjejnë politikën të vetmen mënyrë për të cilën janë ” të aftë ” të merren. Kjo edhe shpjegon mungesën e dorëheqjes së Hashimit dhe lidershipit shqiptar në përgjithësi.

Për të dalë nga izolimi i mungesës së relevancës në skenën politike të vendit, shpeshherë liderët shqiptarë, si në Kosovë dhe në Shqipëri, shpikin kauza apo situata nga me të ndryshmet. S’ka rendësi si do jetë fundi, mungesa e dhënies se përgjegjësisë në një shoqërie deri në skajshmëri e nënshtruar, udhëheqësit politikë mediokritetin e tyre mundohen ta shesin për trimëri, vizion të dobishëm për vendin. Një ndër politikanët më mediokër, që nuk shquhet për asnjë aftësi pas rrëmujës dhe intrigave është Presidenti i Kosovës, Hashim Thaçi. Pa dashur të përmend këtu veprimet e tij mediokre, po ndalem tek rasti i fundit, formimi i ushtrisë së Republikës se Kosovës. Hashimi ndërmori këtë iniciative, duke qenë aq i bindur sa edhe vuri bastin se ” o bëhet ushtria o jap dorëheqjen “. Derisa e para edhe mundet të ndodhë një ditë , kjo e dyta s’ka shanse të ndodhë. Gjithsesi për hir të korrektësisë së postit të presidentit të vendit duhet t’i përmend Hashimit se ushtria pa ndryshime kushtetuese nuk mund të bëhet, dhe kjo ka qenë e ditur që nga fillimi.

Mungesë lidershipi Derisa Thaçi ka dërguar në Parlament një Projektligj për krijimin e ushtrisë së rregullt, në bazë të së cilit ligji nuk do të kërkonte votat miratuese nga pakicat, ashtu siç i kërkojnë ndryshimet kushtetuese. Mirëpo, thirrja nga Zëvendësndihmësi i Sekretarit amerikan të Shtetit, Hoyt Brian Yee, që liderët kosovarë të mos miratojnë projektligjin, bëri që Thaçi të ndryshonte mendje. Kjo mungesë lidershipi, tip aventurier pa karizëm dhe ide përbën rrezik të futjes së vendit në një qorrsokak. Derisa Hashim Thaçi e humbi bastin do të duhej t’i qëndronte premtimit të tij për dhënie dorëheqjeje, të cilën e premtoi vetë. Dorëheqja është akt moral i preferuar të ndodhë pas çdo dështimi, dhe fakti që politika po injoron presionin publik, nga masa kritike e publikut, flet për mendësinë dhe aplikimin e politikës sipas formatit të lindjes, ndërkaq vlerat perëndimore janë vetëm pjesë e retorikës boshe.

Mendësia e abuzimit me pushtetin Më kujtohet ish- presidenti amerikan Bill Klinton, i cili në librin e tij thotë “Politika është një profesion i përjetshëm”… dhe ashtu është… ” ndodh që nëse ti nuk merresh me politikë,politika do të merret me ty ” Mirëpo , në politikë ka edhe rregulla të pashkruara, të cilat janë edhe bazamenti i funksionimit të demokracisë, ndër to edhe dorëheqja. Mendësia e abuzimit me pushtetin, liderët tanë pa personalitete të formuar e gjejnë politikën të vetmen mënyrë për të cilën janë ” të aftë ” të merren. Kjo edhe shpjegon mungesën e dorëheqjes së Hashimit dhe lidershipit shqiptar në përgjithësi. Për ta përmbyllur lajtmotivin me këtë thënie: “Dorëheqja është shprehje e denjë e kurajës. Jo gjithkush e zotëron atë”, kështu deklaronte Napoleon Bonaparta.

(Kosova Sot)