Policia e Krimeve Ekonomike ka filluar të hetojë skandalin e skadimit të afatit të stentave dhe materialeve tjera shpenzuese në Klinikën e Kardiologjisë.

Kjo, pasi gazeta “Zëri” ka publikuar para dy javësh një hulumtim që ndërlidhet me skadencën e afatit të stentave, pejsmekerëve, elektrodave, kateterëve, balonave dhe pajisjeve tjera që nuk janë përdorur brenda afatit në Klinikën për Kardiologji. Vlera e këtyre pajisjeve të skaduara besohet të jetë rreth 200 mijë euro.

E tëra është detajuar në një raport që i është dorëzuar Curr Gjocajt, drejtor i Shërbimit Spitalor Klinik Universitar të Kosovës (SHSKUK), nga u.d. drejtori i kardiologjisë Basri Sejdiu.

Ky raport, që “flet” në detaje për pajisjet që u ka skaduar afati e nuk janë përdorur në atë klinikë, siç konfirmojnë burimet në Policinë e Kosovës i është kërkuar menaxhmentit të SHSKUK-së nga ana e Policisë së Krimeve Ekonomike. /Zeri.info

Shtetin po e mbyt nepotizmi, i cili është shfaqur nëpër në të gjitha poret e jetës institucionale. Këtë nuk e thonë vetëm vendorët, por edhe ndërkombëtarët, pasi afera “pronto” ka shpërfaqur në mënyrë të hapur se si kurdisen vendet për familjarët e militantët partiakë. Një shtet nuk mund të ecet përpara me vende pune të rezervuara për miqtë, militantët, familjarët dhe ata që u shërbejnë politikanëve me devotshmëri. Dhe duket se nuk ka shpresë që në këtë vend ndonjëherë të shkatërrohet kultura e nepotizmit.

Profesori i së drejtës, Muhamet Kelmendi, në një prononcim për gazetën “Kosova Sot” ka thënë se është e qartë se shtetin po e mbyt nepotizmi në vazhdimësi, i cili po shihet çdo ditë. Sipas tij, nepotizmi, familjarizimi, përcaktimet politike dhe lidhjet grupore e krahinore lokale janë faktorët kryesorë, të cilët e dëmtojnë shoqërinë, duke mos e lënë që të ecë përpara dhe në drejtim të ndërtimit të një shoqërie demokratike dhe moderne ku njerëzit do të ishin të barabartë në konkurrim.

Kelmendi thotë se këtu nuk është fjala vetëm tek një mekanizëm të një segmenti të jetës siç është nepotizmi, por janë edhe lidhjet grupore, ato krahinore, familjare politike, të cilat të gjitha së bashku luajnë një rol shumë negativ në drejtim të ndërtimit të një shoqërie demokratike, gjë që më tej reflekton edhe në punësim dhe në kualitet të dobët të administratës publike.

“Nëse nuk kemi një konkurrencë të lirë në administratë, ekonomi, por edhe në fushat e tjera të jetës politike e shoqërore ku punë- sohen njerëzit e kualifikuar, Kosova nuk do të ecë para”, është shprehur Kelmendi.

“Kemi një strukturë të kontrolluar krejtësisht nga forca të tjera, e që ka qëllim thjesht të jetë në shërbim të udhëheqjes politike në drejtim të realizimit të synimeve që i ka”, është shprehur ai. Kelmendi më tej ka nënvizuar se kjo çështje nuk mund të shërohet shumë shpejt, dhe nuk mund të kalohet po ashtu shumë lehtë.

“Duhet të merren masa duke filluar nga ato të karakterit gjyqësor dhe deri tek masat e tjera, të cilat kanë për qëllim marrjen e përgjegjësisë politike, penale, morale etj., nga strukturat e ndryshme shoqërore apo shtetërore që e kanë grabitur pushtetin duke e degjeneruar dhe shkatërruar në tërësi”, spikat Kelmendi teksa shton:

“Ne e pamë edhe Joe Biden kryesisht porositë i drejtoi kundër korrupsionit dhe krimit të organizuar që me këtë donte të jepte për të kuptuar që pavarësisht se a kemi ndonjë Demarkacion apo Asociacion, apo kemi të bëjmë me një gjendje tjetër, shoqëria si e tillë nuk ka perspektivë për të ecur përpara nëse kemi të bëjmë me korrupsion e krim të organizuar e paorganizuar kemi të bëjmë me nepotizëm, me format më devijante të shoqërisë”.

Kelmendi shpreson se do të hiqet porse do të jetë shumë e vështirë për t’u eliminuar krimi e korrupsioni dhe për këtë do të duhet një kohë e gjatë.

“Do të na duhet një kohë shumë e gjatë në mënyrë që të kemi një ngritje politike e morale njerëzore të njerëzve që të kuptojnë se nepotizmi vërtetë është dukuri negative, e cila duhet të luftohet, dhe për fat të keq këtë ne po e shohin për çdo ditë se si po emërohen njerëzit, si po përcaktohen ata, pa konkurs, pa kualitet, dhe jashtë çdo norme juridike e shoqërore, e cila shoqërinë tonë e ka mbërthyer për së keqi”, është shprehur profesor Kelmendi. /Kosova Sot

Moskalimi i Demarkacionit me Malin e Zi, që është paraparë më 1 shtator, mund të shkaktojë një furtunë në koalicionin aktual. Analistët politikë nuk e përjashtojnë mundësinë që të prishet koalicioni artificial, i cili me qeverisjen e tij të deritashme është treguar gati tërësisht i pasuksesshëm dhe vazhdimi i kësaj qeverisjeje “alla Pronto”, korruptive, klienteliste e nepotike mund të ketë pasoja tepër të mëdha për vendin.

Por, ka edhe analistë që thonë se koalicioni PDK-LDK do ta kalojë Demarkacionin dhe njëkohësisht do ta fitojnë edhe në një fushë tjetër për ta rrënuar opozitën përpara faktorit ndërkombëtarë dhe para qytetarëve si fajtorët kryesorë për krizën. Eksperti i fushës së sundimit të ligjit, Blerim Burjani, u shpreh për “Kosova Sot” se skena politike pas 1 shtatorit pritet që të tensionohet.

“Mosgatishmëria dhe mungesa e konsensusit nacional për temën e Demarkacionit mund të sjellë situatë të pakëndshme politike dhe vështirësi të funksionimit të demokracisë. Pra ka një gjendje aktuale të pashpresë për t’u kapërcyer”, është shprehur ai.

Sipas Burjanit, Demarkacioni i kufirit me Malin e Zi duhet që të kalojë dhe kjo është ideja e këtij koalicioni, sepse kjo temë sikur edhe asociacioni janë tema ndërkombëtare, regjionale dhe globale.

Burjani është i mendimit se nëse në Kuvendin e Kosovës nuk arrihet që të kalojë miratimi i Demarkacionit me Malin e Zi, atëherë faktikisht ky koalicion pritet të mos mbajë përgjegjësi për këtë temë, edhe pse logjikisht do të duhej të organizoheshin zgjedhje të reja dhe të reformohet skena politike.

“Kjo klasë politike, pozitë dhe opozitë nuk mund të zgjidhin probleme të qytetarëve, por merren me inate mes tyre dhe luftë për pushtet”, është shprehur ai.

Sipas Burjanit, Kosova ka nevojë për një klasë të re politike jo me këto parti aktuale që e sollën shtetin deri këtu, duke mos bashkëpunuar me klasën intelektuale. Sipas Burjanit, nëse nuk kalon Demarkacioni, ndoshta do të ishte mirë që të riformatohet qeverisja dhe të ndërtohet një qeveri teknike e përberë prej ekspertëve deri në zgjedhje të jashtëzakonshme, që do të duhej mbajtur pas 6 muajve.

“Unë mendoj se shpresa në ndryshime duhet të orientohet te pjesa intelektuale e shtetit. Edhe shoqëria civile është e politizuar dhe përfituese”, shprehet Burjani.

Burjani thotë se kjo qeveri “alla pronto” funksionon për interesa partiake, individuale e familjare , e që nepotizmin e quajnë të ligjshëm.

“Pra, kjo klasë politike duhet të shkojë sa më para nga qeverisja me shtetin. ‘Pronto 1’ dhe ‘Pronto 2’ edhe shumë pronto të tjera janë rezultat i funksionimit të shtetit anarkik dhe partiak dhe njerëzve të varfër që merren me politikë e që kanë përfituar dhe janë bërë të pasur në saje të parasë publike, ngase këta politikën e shohin si përfitim, ndërsa partinë si kompani industriale”, shprehet Burjani.

Ai shton se Kosova mund të shohë ditën e vet, vetëm nëse klasa intelektuale dhe ajo e biznesit bëhen bashkë dhe ndërtojnë një alternativë politike, në të kundërtën do të mbetet e tillë qeverisja, me korrupsion dhe me fatkeqësi që do të përcjellin gjeneratat e tëra, ngase kjo çështje ka devalvuar shumë dhe skajshmërisht. /Kosova Sot