As Këshilli Gjyqësor dhe ai Prokurorial i Kosovës nuk mund të amnistohen për gjendjen e brishtë që po mbretëron tani e një kohë të gjatë në sistemin e drejtësisë, pasi edhe ata janë hisedar për të keq dhe kontribuues për një gjendje të tillë. Faji dhe përgjegjësia për degradimin dhe dështimin e sistemit të drejtësisë, bie edhe mbi Këshillat në fjalë sipas analistëve dhe njohësve të fushës së drejtësisë, pasi Këshillat e lartcekur, që monitorojnë drejtësinë, nuk i japin askujt llogaridhënie, derisa për rrjedhojë është vështirë se mund të funksionojë monitorimi pa llogaridhënie nga ta.

Ndaj, me të drejtë është shtruar edhe çështja se si e dështuan sistemin e drejtësisë, KGJK-ja e degraduar me ish- kryesuesin Peci dhe tani edhe me anë- tarë, me gjasë, të inkriminuar me pasuri milionëshe, por edhe KPKja, të cilat, si duket, nuk po munden asnjëherë që t’u shmangen lidhjeve të dyshimta të tyre me mafio- politikën dhe mafio- oligarkinë e inkriminuar dhe klanet e tjera të interesit? Profesori i së Drejtës Riza Smaka, në një prononcim për gazetën “Kosova Sot”, ka thënë se kurdoherë në këtë drejtim duhet kërkuar dhe identifikuar e definuar shkaqet e më pastaj pasojat, derisa, sipas tij, nëse shkaqet do të eliminoheshin apo evitoheshin e zhdukeshin, atëherë edhe pasojat do të binin automatikisht.

Edhe Qeveria e dëmtoi drejtësinë

Sipas Smakës, shkaqet e dobësive në sistemin e drejtësisë ndodhen pikërisht në Qeveri, por edhe në Këshillin Gjyqësor e atë Prokurorial të Kosovës. “Në Qeveri janë shkaqet, pasi ajo nuk e financon sistemin e drejtësisë, nuk jep të holla për plotësimin e vendeve vakante me gjykatës e prokurorë, ndërsa në anën tjetër vetë KGJK-ja dhe KPK-ja kanë treguar dobësi të mëdha, ndër të tjera po e zëmë, nuk kanë përgatitur akte nënligjore në funksion të zbatimit të ligjeve në fuqi, e që kjo është një dyshim i madh, pasi këtë punë kanë mundur dhe është dashur ta bëjnë, por nuk e kanë bërë”, theksoi ai.

“Më pastaj, këshillat në fjalë nuk e kanë praktikuar vlerësimin e performancës, që për çdo muaj të bëhej vlerësimi i cilë- sisë dhe sasisë së punëve të bëra, në mënyrë që më pastaj konform kësaj të vlerësohej puna e gjykatësve e prokurorëve, dhe përkitazi me punën dhe rezultatet e dhëna nga ta, edhe të ndërmerreshin masat e caktuara ndëshkimore apo stimulative, qoftë zvogëlimin apo rritjen e pagave, apo edhe atë të shkarkimit ndaj atyre që nuk japin performancë dhe nuk punojnë. Por, një gjë të tillë nuk e ka realizuar Qeveria dhe as këshillat në fjalë, ngase atyre mbase u përshtatet që të mos funksionojë gjyqësori e prokuroria për shkaqe korruptive dhe këto konsideroj, ndër tjera, janë edhe shkaqet e dështimit dhe degradimit të sistemit të drejtësisë”, tha Smaka.

Llogaridhënia duhet të qartësohet

Analisti Naim Kelmendi thotë se degradimi i sistemit të drejtësisë po ndodh në vazhdimësi, thuaja në të gjitha shkallët e këtij sistemi, por faji dhe përgjegjësia ligjore për këtë degradim sikur targeton drejt e mbi KGJK-në, si dhe mbi KPK-në. Sipas Kelmendit, këta dy Këshilla janë monitorues të sistemit të drejtësisë, por edhe këta dy Këshilla që monitorojnë drejtësinë nuk i japin askujt llogaridhënie, prandaj vështirë se mund të funksionojë monitorimi pa llogaridhënie, derisa, siç tha, as edhe Komisionit parlamentar përkatës për drejtësi, por as prezantimi para atij Komisioni nuk duket se rregullon tërësisht llogaridhënien dhe përgjegjësitë ligjore që u takojnë këtyre dy Këshillave të drejtësisë, ngase as aty, pos që do të mund bëhet ndonjë prezantim si obligim ligjor, tjetër llogaridhënie nuk ka. ” Kështu që, do të ishte i nevojshëm mbase krijimi i një mekanizmi ligjor që do t’u nënshtroheshin këta dy Këshilla, sidomos me llogaridhënie dhe përgjegjësitë ligjore, që u takojnë dhe i obligojnë”, është shprehur ai.

“Ky sistem mban brenda vetes mjaft gjyqtarë e prokurorë të inkriminuar e të lidhur me mafinë politike dhe oligarkinë, por dhe me grupet e interesit, e që kështu veprojnë për interesa të tyre dhe dëmtojnë interesat e qytetarëve, por që dhe kështu e zbresin në zero shkallë integritetin dhe pavarësinë e këtij sistemi, duke e humbur dhe duke e zbehur kështu edhe besimin e qytetarëve ndaj sistemit të drejtësisë”, ka spikatur për gazetën “Kosova Sot” analisti, Naim Kelmendi.

Ishte viti 2009 kur Ukë Rugova ishte kthyer nga Amerika. Po bëheshin tri vjet që nga vdekja e babait të tij, ish-presidentit Ibrahim Rugova.

Anëtarëve të familjes i duheshin vizat, por kontaktet e krijuara sa ishte gjallë presidenti, tashmë kishin humbur.

Ukë Rugova po bënte përpjekje për t’i rikrijuar ato.

Kishte takuar Skënder Hysenin, atëkohë ministër i Punëve të Jashtme.

“Aso kohe unë e takova Ministrin e Punëve të Jashtme Skender Hysenin, bashkë me vëllain tim Mendimin, dhe miqësisht i kërkuam Ministrit të na siguronte një kontakt me të cilin mund të flisnim lidhur me nevojat tona familjare”, tregonte Rugova para hetuesve të EULEX-it.

Hyseni ua kishte rekomanduar një emër.

Ishte ambasadori i Italisë në Kosovë, Michale Giffoni.

“Ministri Hyseni na sugjeroj që të caktonim një takim me Giffonin dhe kur unë dhe vëllai im shkuam ta takonim Giffonin e pamë se kishim përballë një shok shumë të mirë të babait tonë i cili tregoj gatishmëri të lartë për të na ndihmuar në atë aspekt. Zt. Giffoni kishte shumë njohuri mbi realitetin në Kosovë”, pohonte Ukë Rugova para hetuesve të EULEX-it.

Skënder Hyseni në vitin 2009 mbante postin e ministrit të Punëve të Jashtëm. Aktualisht mban atë të ministrit për Punë të Brendshme.

Hyseni është pyetur nga Insajderi lidhur me deklarimin e Ukë Rugovës para hetuesisë. Ende nuk ka dhënë përgjigje lidhur me pohimet e Rugovës.

Giffoni i kishte pritur mirë djemtë e Ibrahim Rugovës në takimin e zhvilluar në vitin 2009.

Kërkesa e tyre ishte pranuar. U kishte thënë se ambasada po aplikonte një politikë preferenciale për viza për figurat publike. U kishte thënë se shumë shpejtë një zyrtar të ambasadës do ta ngarkonte me punë shtesë, që ishte gatishmëria për t’u marrë me kërkesat e familjes presidenciale.

Kishte caktuar Florian Petanin, tregon Rugova.

“Pas disa ditësh ai (Giffoni) më thirri në telefon dhe më informoj se më duhej të kontaktoja me Zt. Florian Petani. Ky person ishte caktuar nga vet Ambasadori Giffoni për të kontaktuar me familjen time lidhur me vizat. Në rast se Ambasadori Giffoni nuk ishte i pranishëm atëherë dokumentet dorëzoheshin te Zt. Petani”, thoshte Rugova.

Pas atij takimi të zhvilluar më 2009, Mendimi, djali tjetër i ish-presidentit Rugova, nuk kishte vazhduar relacionet miqësore me ish-ambasadorin italian.

Ishte Uka që vazhdoi relacionin miqësor me Giffonin.

Por, relacioni miqësor mes këtyre të dyve ishte zhvilluar aq shumë sa që kishte rrëshqitur në krijimin e një grupi të madh të dyshuar kriminal.

Për këtë arsye Giffoni edhe ishte shkarkuar nga pozita e ambasadorit nga Ministria e Punëve të Jashtme e Italisë. Mbi të rëndon akuza se ka krijuar një kanal preferencial për Ukë Rugovën, duke ia mundësuar që njerëzit e afërt të tij të pajiseshin me viza duke anashkaluar departamentin e vizave.

Krijimi i këtij kanali preferencial, sipas autoriteteve italiane, ka mundësuar më pas krijimin e grupit të akuzuar kriminal.

Rugova: Skënder Hyseni ndihmonte për viza edhe në kohën e babait

I biri i ish-presidentit Rugova kishte përmendur Skënder Hysenin edhe njëherë tjetër gjatë intervistimit nga hetuesit e EULEX-it. Këtë e kishte bërë kur ishte pyetur për letër-garancitë në emër të familjes Rugova që ia dërgonte ish-ambasadorit italian, Michael Giffon.

Ukë Rugova kishte pohuar se praktika e dërgimit të letër-garancive aplikohej që nga viti 1990, në kohën e babait të tij.

Sipas tij, ishte një formë standarde që Zyra e Presidentit garantonte për të afërmit dhe bashkëpunëtorët e partisë dhe të Presidentit.

Ai tregonte për njerëzit që atëkohë merreshin me vizat. Ka përmendur Edita Tahirin e Alush Gashin, që të dy asokohe pjesë e seksionit të LDK-së për marrëdhënie me jashtë.

Përveç tyre, kjo praktikë ishte ndjekur më pas edhe nga Adnan Merovci, asokohe shef i protokollit të Presidentit Rugova, Skënder Hyseni, Naser Rugova e Sali Cacaj- këshilltar të Rugovës si dhe asistentja Lumturije Shabani.

“Në njëfarë mënyrë po përpiqem të shpjegoj se zyra e Presidentit Rugova ka qenë në njëfarë mënyre si zyre qendrore ku shkonte e gjithë popullata me kërkesa të ndryshme. Në mesin e atyre kërkesave ishin edhe ato për viza”, kishte thënë Rugova.

Djali i vogël i ish-presidentit do të dalë para gjyqit gjatë vitit të ardhshëm për t’u përballur me akuzat që rëndojnë ndaj tij.

Ai akuzohet se ka drejtuar e mbikëqyrur një grup kriminal që përfitonte shuma të mëdha parash nga njerëzit që kishin nevojë të pajiseshin me Viza Shengen.

Rugova akuzohet nga prokurori i EULEX-it, Allen Casnick, se prej muajit maj 2011, deri në muajin shkurt 2014, ka krijuar, organizuar, mbikëqyrur, menaxhuar dhe – ose drejtuar aktivitetet e një grupi të organizuar kriminal.

Po ashtu, akuzohet edhe për armëmbajtje pa leje. Një sasi armatimi i ishte gjetur në shtëpinë e tij, kur ishte bastisur nga pjesëtarët e EULEX-it. Përveç Ukë Rugovës, pjesë e aktakuzës janë edhe nëntëmbëdhjetë veta tjerë, përfshirë edhe mikun e tij të afërt, Izet Beqiri./Insajderi.com/

NISMA për Kosovën dega në Malishevë, me rastin e festave të fundvitit fton të gjithë qytetarët e komunës së Malishevës që të marrin pjesë në tubimin.

Në këtë tubim do të merr pjesë kryetari i NISMA për Kosovën, Fatmir Limaj, bashkë me deputetë dhe anëtarë të kryesisë së NISMA’s.

Ky tubim do të mbahet sot, me datë 27.12.2016 në ora 15:00, në Shtëpinë e Kulturës “Tahir Sinani” në Malishevë. Në fund të tubimit do të ketë edhe një koktej rasti në hapësirat e shtëpisë së kulturës. /PrizrenPress.com/