Edhe Partia e Drejtësisë(PD) në Prizren, ka uruar të gjithë qytetarët me rastin e Ditës së Pavarësisë së Kosovës

“17 Shkurti është datë e shënuar e të gjithë qytetarëve të Republikës së Kosovës, me ç’rast aspiratat shekullore për të qenë të pavarur dhe të lirë të shumë gjeneratave, kurorëzohen me Shpalljen e Pavarësisë së Republikës së Kosovës”, thuhet në urimin e PD-së në Prizren.

“Edhe në këtë përvjetor, në këtë ditë të shënuar, urojmë që vlerat morale , ekonomike, demokratike ,politike dhe kulturore të shoqërisë sonë të avancojnë përditë e më tepër dhe krenar të rreshtohemi në radhët e shoqërive të përparuara”.

“Për këtë na obligon e kaluara plotë sakrifica e popullit tonë dhe gjaku i derdhur i dëshmorëve në themelet e lirisë dhe pavarësisë së shtetit si dhe e ardhmja që u kemi premtuar gjeneratave pas nesh”.

“Të bashkohemi si kurrë më parë që të arriturat t’i ruajmë dhe vlerësojmë ndërsa çfarë nuk ditëm ose nuk bëmë , ta bëjmë”.

“Të gjithë qytetarëve të Republikës së Kosovës , këtu dhe në diasporë , të gjithë shqiptuarve kudo që janë. Urime 9 vjetori i pavarësisë !”, përfundon urimi i PD-së, nënshkruar nga kryetari Qemal Mehmeti/PrizrenPress.com/

Partia Demokratike e Kosovës (PDK) në Prizren, uron gjithë qytetarët për 9 -vjetorin e Pavarësisë së Kosovës.

“17 Shkurti 2008, do të mbetet përjetësisht në historinë e Kosovës, si kurorë e përpjekjeve shekullore të popullit tonë për liri, pavarësi, demokraci dhe dinjitet njerëzor”, thuhet në urimin e PDK-së në Prizren.

“Shpallja e Pavarësisë ishte akt historik, por të cilit i ka paraprirë një proces i gjatë çlirimtar, i mbuluar me lavdi, me gjak e sakrifica të panumërta, i ka paraprirë një luftë titanike për jetë a vdekje, që simbolizohet me Ushtrinë Çlirimtare të Kosovës, dhe komandantit legjendar Adem Jashari”./PrizrenPress.com/

Policia e Kosovës ka arrestuar dy persona pas pranimit të një informate inteligjente në Vraniq të Suharekës për posedim ilegal të armëve.

Hetuesit policorë bëhet e ditur se kanë kryer veprime të nevojshme operative-hetimore dhe me urdhër të gjykatës kompetente, këtë të enjte, rreth orës 07:30 minuta i kanë bastisur dy shtëpi, njofton Policia e Kosovës.

Në shtëpitë e kontrolluara janë gjetur nga një pistoletë: njëra Ekol Tuna e kalibrit 8mm dhe tjetra model dhe prodhim i panjohur i kalibrit 7.62mm. dhe disa fishekë.

Të dyshuarit janë intervistuar në polici dhe më pas janë liruar ndërsa provat materiale dhe shkresat e lëndës do t’i kalojnë prokurorisë së shtetit për procedura të më tejme.

Tre persona janë arrestuar në Prizren. Arrestimi i tyre është bërë me urdhër të Gjykatës Themelore.

Dy prej të arrestuarve janë dërguar në vuajtje të dënimit në burgun e Prizrenit, ndërsa i arrestuari i tretë është ndalur në mbajtje. /PrizrenPress.com/

Gjykata Themelore në Prizren, ka caktuar një muaj paraburgim të dyshuarit për vjedhje nga Kukësi i Shqipërisë.

Ai dyshohet se në vitin 2014 rrethe orës 03.57 minuta në rrugën “Agron Bytyqi” në Prizren , me përdorimin e forcës dhe kanosjes serioze për të sulmuar jetën apo trupin e të dëmtuarit me iniciale J.B. e përvetëson pasurin e luajtshme nga i dëmtuari me qëllim që t’i sjell vetës dobi pasurore të kundërligjshme.

“ I dyshuari hyn i maskuar me armë në kazino “Kajot” së bashku me një person të panjohur i cili me vete kishte mjetin e rrezikshëm – thikën dhe duke e kërcënuar grabisin një shumë të konsiderueshëm parash dhe një telefon mobil,,samsung,, dhe ikin nga vendi i ngjarjes”, njofton zëdhënësja e Gjykatës në Prizren, Afërdita Kicaj.

“Andaj duke e pasur parasysh peshën dhe pasojat që i ka kjo vepër penale, mënyrën dhe rrethanat nën të cilat është kryer ky veprim kundërligjor dhe i njëjti për një kohë ka qenë në arrati Gjykata i caktoj masën e paraburgimit në kohëzgjatje për një muaj”./PrizrenPress.com/

Përfaqësuesi ligjor i Komunë së Dragashit, Islam Rexhepllar, të mërkurën, në gjykimin ndaj kryetarit të Komunës së Dragashit, Salim Jenuzit, dhe zyrtarëve tjerë të kësaj komune, Bean Haxhihasani dhe Vetim Hasani, të akuzuar për korrupsion, tha se nuk i bashkëngjitet ndjekjes penale. Rexhepllar tha se në këtë rast penal, Komuna e Dragashit, nuk konsideron se është dëmtuar nga veprimet e të akuzuarve, andaj edhe nuk i bashkëngjitet ndjekjes penale.

Avokati publik Rexhepllar, tha se për të mos iu bashkangjitur ndjekjes penale, është bazuar në vendimin që ka marrë Komuna e Dragashit, më 31 janarit 2017. Sipas këtij vendimi, Nexhat Selajt, i cili akuzohet për uzurpim të pronës komunale, i ishte dhënë në shfrytëzim prona që pretendohet si e uzurpuar dhe ishte detyruar që në mënyrë retroaktive të paguante çmimin për shfrytëzim.

Në anën tjetër, prokurori Sefer Morina, në fjalën hyrëse tha se me administrimin e provave gjatë shqyrtimit gjyqësor, do të vërtetohet se të akuzuarit kanë kryer veprat penale me të cilat ngarkohen.

I akuzuari për korrupsion Salim Jenuzi, gjatë fjalës hyrëse tha se ai si kryetar komune, nuk ka mundur t’i dijë të gjitha çështjet e komunës, e sidomos ato juridike, andaj ka kërkuar që të shpallet i pafajshëm.

Drejtori i Urbanizmit në Komunën e Dragashit, i akuzuari Bean Haxhihasani, tha se aktakuza vetëm përmend ligjin për ndërtim, ndërsa nuk i cek saktësisht nenet e ligjit, të cilat pretendon se janë shkelur.

I akuzuari Vetim Hasani, tha se punën e inspektorit të ndërtimit, e kishte bërë me përgjegjësi sepse objektin e kishte inspektuar disa herë dhe se pronari kishte pasur të gjitha dokumentet e nevojshme. Ka pranuar se i akuzuari ka bërë pak zgjerim të objektit, por se për një gjë të tillë ka paraqitur dokumente se ka leje.

I akuzuari për uzurpim, Nexhat Selaj, tha se si investitor nuk ndihet fajtor pasi që posedon kontratën e shitblerjes e patundshmërisë dhe të gjitha dokumentet tjera që kërkohen me ligj. Tutje tha se në objektin e tij ka investuar mbi 100 mijë euro dhe se punojnë 10 punëtorë.

Gjatë leximit të provave materiale, të akuzuarit, të cilët nuk kanë mbrojtës, kanë paraqitur prova me të cilat pretendojnë se do të argumentojnë pafajësinë e tyre. Me këtë rast, i akuzuari Bean Haxhihasani ka propozuar që të administrohen disa dokumente me të cilat do të dëshmohet se objekti për të cilin bën fjalë aktakuza është blerë në vitin 1993. Poashtu edhe të gjitha aktet përcjellëse për lejimin e ndërtimit të objektit dhe legalizimin e tij.

Prokurori Sefer Morina ka kërkuar që t’i dorëzohen provat e pasi t’i analizojë, do të deklarohet rreth tyre.

Trupi gjykues, i kryesuar nga gjykatësja Ajser Skenderi, pasi konstatoi se i akuzuari Haxhihasani nuk ka bërë kopje të mjaftueshme të provave, ka urdhëruar atë që në afat prej tre ditësh, të furnizojë prokurorin dhe gjykatën me kopjet e këtyre provave.

Seanca e radhës është caktuar për 23 mars 2017, në ora 09:30.

Ky rast zhvillohet në bazë të aktakuzës së Prokurorisë Themelore në Prizren, e cila e akuzon  Salim Jenizin, se duke qenë kryetar i Komunës së Dragashit, në periudhën 2009-2016, i ka mundësuar Nexhat Selajt, përvetësimin e pronës komunale, të cilën ky e kishte uzurpuar paraprakisht.

Poashtu, Bean Haxhihasani, akuzohet se në cilësinë e drejtorit të urbanizmit në Komunën e Dragashit, ka leshur vendim me të cilin i është lejuar Nexhat Selajt, që të ndërtojë objektin afarist në pronë komunale.

Vetim Hasani, akuzohet se duke qenë inspektor i ndërtimit në Komunën e Dragashit, nuk ka vepruar për të ndërprerë ndërtimin e objektit afarist të Nexhat Selajt, me material të përhershëm.

Ndërsa Nexhat Selaj akuzohet se gjatë periudhës 2009-2016, ka uzurpuar në mënyrë të paligjshme pronën komunale të Komunës së Dragashit, në të cilën ka ndërtuar objekt afarist me karakter të përhershëm, megjithëse kishte leje për shfrytëzim të përkohshëm./betimiperdrejtesi/

Ish-drejtori i Drejtorisë së Inspeksionit në Komunën e Prizrenit, Bedri Bytyqi, tha se për objektin pa leje, për të cilin po akuzohet se nuk ka vepruar për ta rrëzuar, ishte njoftuar me vonesë. Bytyqi, të mërkurën, në Gjykatën Themelore në Prizren, gjatë mbrojtjes së tij, tha se për objektin që flet aktakuza, ka kuptuar përmes raportit të inspektorit të terrenit, në shtator 2015, kur veç ishin ndërtuar tre kate të këtij objekti.

Bytyqi, i akuzuar për keqpërdorim të pozitës zyrtare së bashku me inspektorin e ndërtimit, Bashkim Krasniqi, tha se me të marrë vesh për këtë çështje ka marrë vendim me të cilin e ka obliguar pronarin që ta rrënojë objektin brenda 30 ditësh.

Sipas tij, pronari Faton Hoxha, i cili poashtu akuzohet në këtë lëndë për uzurpim, ka bërë ankesë ndaj vendimit për rrënim dhe se deri më tani nuk ka një përgjigje përfundimtare sa i përket çështjes së rrënimit. Bytyqi, ka sqaruar se në momentin kur është bërë ankesa ndaj vendimit të drejtorisë, ekzekutimi i atij vendimi është pezulluar në mënyrë që të mos i shkaktohet palës dëm të pariparueshëm.

Kryetari i trupit gjykues, Xhevdet Elshani, pas përfundimit të mbrojtjes së këtij të akuzuari, ka ndërprerë shqyrtimin dhe vazhdimin e të njëjtit e ka caktuar për 27 shkurt 2017, në orën 09:00.

Në seancën e radhës pritet të vazhdojë paraqitja mbrojtjes nga të akuzuarit tjerë.

Aktakuza e përfaqësuar nga prokurori Metush Biraj, i ngarkon të akuzuarit për keqpërdorim të detyrës zyrtare dhe uzurpim të paligjshëm të pronës së paluajtshme.

Sipas aktakuzës, Bashkim Krasniqi, në cilësinë e inspektorit komunal për ndërtim, nuk ka vepruar për rrëzimin e objektit afarist-banesor të të pandehurit Faton Hoxha, të ndërtuar pa leje në pronë komunale.

I akuzuari tjetër Bedri Bytyqi akuzohet se duke qenë drejtor i Inspektoratit, megjithëse ka nënshkruar aktvendimin për rrënim të objektit, nuk ka vepruar për të realizuar atë, duke i mundësuar Faton Hoxhës që të vazhdojë ndërtimin.

Ndërsa i akuzuari, Ilaz Susuri akuzohet se ka uzurpuar në mënyrë të paligjshme pronën ku është ndërtuar objekti, ku të njëjtën, pa fletë-poseduese, ia ka shitur të pandehurit Faton Hoxha për 35 mijë euro.

Poashtu i akuzuari Faton Hoxha akuzohet se pa kontratë të vërtetuar dhe pa dokumentacionin përkatës ka blerë pronën në fjalë nga i pandehuri, Ilaz Susuri dhe më pas ka ndërtuar objekt afarist në atë pronë./betimiperdrejtesi/