Ndonëse nuk është thënë ende zyrtarisht, në kuloaret e vendit, nga të bëmat dhe implikimet e tyre në punët e pista, veçanërisht në fushën e gjyqësorit, llogaritet se një pjesë e avokatëve janë të implikuar në punë të pista. Analistë dhe deputetë opozitarë thonë se madje në shumicën e rasteve, apo në 99 për qind të tyre, avokatët janë ndërmjetësues midis krimit të organizuar dhe bandave politike që e kanë kapur drejtësinë. Profesori i së Drejtës Penale Ismet Salihu, në një prononcim për gazetën “Kosova Sot”, ka bërë me dije se oda e avokatëve e ka statutin dhe rregulloren e vet në të cilën parashihet respektimi i statutit dhe rregullores së saj dhe njëherësh edhe etikës së avokatëve. Aty, sipas tij, është paraparë se në rastet kur avokati e shkel etikën e avokatit, po ashtu rregulloren e Odës së Avokatëve, etj, ndaj të njëjtit, Salihu thotë se duhet të merren masa, si ajo e vërejtjes, apo para përjashtimit dhe përjashtimit, përkatësisht marrjes së licencës së avokatëve, dhe se kjo, sipas tij, është e paraparë shumë mirë në rregullativën juridike të Odës së Avokatëve.

Por, problemi në këtë drejtim, sipas tij, është se këto rregulla dhe dispozita nuk po respektohen, të cilat janë aprovuar nga Kuvendi i Odës së Avokatëve dhe si rrjedhojë tani, siç tha, ” kemi avokatë të cilët janë dënuar me aktgjykim të plotfuqishëm dhe vazhdojnë punën në profesionin e avokatëve. Po ashtu, kemi avokat të cilët kanë kryer krime dhe procedura është në procedim e sipër derisa ata vazhdojnë ta ushtrojnë profesionin e avokatëve, ku kjo në asnjë shtet të Evropës nuk lejohet, për shkak se edhe avokatët duhet të punojnë sipas rregullativës juridike.

Duhen masa disiplinore

Sipas Salihajt, këtu është edhe problemi, pra tek moszbatimi i rregullores së avokatëve, e cila si masë të fundit parasheh edhe marrjen e licencës dhe të drejtës për t’i përfaqësuar palët në gjykatë, dhe për këtë arsye, sidomos kjo pas luftës tek ne, është shumë e përhapur, prandaj këtu duhet të adresohet vërejtja tek Oda e Avokatëve, por në këtë drejtim është edhe inspeksioni i avokatëve, pastaj komisioni disiplinor, i cili duhet që t’i shqiptojë këto masa ndaj avokatëve të këtillë, apo edhe rasteve kur ata dyshohet se kanë shërbyer si sekserë apo ndërmjetës në kryerjen e krimit të organizuar, siç janë dyshimet e fundit me këto tokat e Kosovës, etj. “Mua më vjen mirë se tani në këtë sfer- ën politike është marrë qëndrim që ata bartës të funksioneve politike, siç ishte rasti i ministrit Agani, ose më parë edhe i disa deputetëve të tjerë, ndaj të cilëve është duke u zhvilluar procedura penale, dhe është ngritur aktakuza, ata nuk duhet të lejohen që edhe më tej të ushtrojnë funksionin e deputetit, ministrit, apo zëvendësministrit, etj., andaj kjo duhet të vlejë dhe të zbatohet tash edhe tek avokatët”, është shprehur, profesori i së Drejtës Penale, Ismet Salihu…

“Kryeministri Mustafa nuk po e ka guximin që të ballafaqohet me faktet dhe po shpik nga koka e tij kushtëzime të reja. Mirëpo, të gjithë duhet ta dinë që ka kaluar koha e njerëzve të tipit të Ahmet Zogut. Ai po duket që e ka harruar këtë fakt. Tani ky popull mund të bindet dhe të rehatohet vetëm me ballafaqim argumentesh në mënyrë transparente”, tha analisti Naim Maloku

Qeveria e Kosovës, përveç pranimit të iniciativës së deputetëve të Kuvendit për një debat me ekspertët e fushës, për ballafaqim të fakteve lidhur me Demarkacionin e kufirit me Malin e Zi, për gati një vit të plotë ka refuzuar që në çfarëdo forme të ulet dhe të bisedojë me opozitën e shoqërinë civile lidhur me shqetësimet e ngritura, për dëmin që i shkaktohet vendit me ratifikimin eventual të kësaj marrëveshjeje. Për më tepër, ekzekutivi nuk ka kursyer asnjë mjet presioni politik mbi ligjvënësit, që ta arrijë qëllimin për ta shtyrë përpara me çdo kusht ratifikimin e Demarkacionit të kufirit me Malin e Zi pa asnjë ndryshim të gabimeve tani të faktuara nga ekspertët e fushës, duke e ndërlidhur atë me procesin e mbetur peng të liberalizimit të vizave. Mirëpo tani, sikur nuk ka munguar kushtëzimi i liberalizimit të vizave dhe për ta arritur qëllimin e vet, ekzekutivi duket se ka shpikur edhe një arsye të re, për të cilën do të duhej kaluar marrëveshja për kufirin me Malin e Zi. Kryeministri Mustafa, për ta realizuar këtë qëllim, përveçse po e përmend si kusht të ri edhe kushtëzimin ndërkombëtar për transformimin e FSK-së në FAK, vetëm e vetëm që t’i bëjë trysni shoqërisë civile, opinionit të gjerë dhe opozitës kundërshtuese për ta pranuar gjithsesi si akt të kryer demarkimin në dëm të Kosovës. Ky është një konstatim, për të cilin janë të bindur përfaqësues të opozitës, por edhe njohës të fushës së sundimit të ligjit.

Ikje nga përgjegjësia

Deputeti Ismail Kurteshi, nga lëvizja ‘Vetëvendosje’, thotë se Thaçi dhe Mustafa këtë lojë po e bëjnë vetëm për të ruajtur pozitat e tyre në pushtet. “Të vetëdijshëm për gabimin që e kanë bërë me rastin e nënshkrimit, e më vonë edhe të mbrojtjes së marrëveshjes së Demarkacionit me Malin e Zi, këta dy udhëheqës të papërgjegjshëm do të mundohen ta bëjnë Demarkacionin kusht për ekzistencën e Kosovës. Për ata nuk janë më të rëndësishme interesat e vendit, por interesi i tyre personal, e kjo është mbijetesa në politikë dhe ikja nga përgjegjësia. Se pengesë e vërtetë e integrimit të Kosovës në Evropë dhe liberalizimit të vizave është korrupsioni dhe krimi i organizuar, e tha qartë nënsekretarja Amerikane, zonja Nuland, gjatë qëndrimit të saj në Kosovë”, tha ai. “Në fund të fundit askush nuk është kundër Demarkacionit, opozita dhe qytetarët e Kosovës janë kundër pazareve në dëm të territorit të Kosovës. Ne jemi për ballafaqim të fakteve, këto ditë 23 deputetë me nënshkrimet e tyre kanë kërkuar takim në mes të Komisionit shtetëror për Demarkacion dhe ekspertëve e deputetëve të interesuar. Për këtë nuk është përgjigjur pala që po e mbron këtë demarkim, që po refuzohet nga ekspertët, banorët e atyre zonave dhe një numër gjithnjë e më i madh i deputetëve të Kuvendit të Kosovës”, tha Ismajl Kurteshi për “Kosova Sot”…

Kalimi i ish-liderit të PDK-së, Hashim Thaçi në pozitën e të parit të shtetit, në Presidencë dhe largimi i tij nga të gjitha pozitat drejtuese në parti, sipas analistëve politikë, e ka zvogëluar në maksimum ndikimin e tij të drejtpërdrejtë jo vetëm në strukturat e proceset e brendshme politike në PDK, por edhe në politikën kosovare në përgjithësi. Tani ndikimi i tij në parti është shumë indirekt, derisa në politikëbërjen e përgjithshme në Kosovë është duke humbur në hapa, ngase që nga marrja zyrtare e mandatit të presidentit të vendit, nuk ka arritur të mbajë asnjë takim të përbashkët me përfaqësuesit e partive politike, bashkimin e pozitës dhe opozitës në një tryezë të diskutimit për çështje të interesit nacional.

Analisti politik, Faik Krasniqi thotë se ngritja graduale e Kadri Veselit në krye të PDK-së dhe zgjedhja eventuale në pozitën e kryeministrit, do të jetë edhe fundi i Hashim Thaçit në karrierën politike. “Hashim Thaçi e ka ditur nga fillimi që, nëse bëhet president, do të bjerë ndjeshëm ndikimi i tij në skenën politike, por edhe brenda PDK-së. Ai do të mundohet që deri në fund të mandatit të tij si president ta ketë ndikimin e tij, përmes njerëzve besnikë brenda PDK-së. Por, kjo gjë do të jetë shumë e vështirë, sepse deri në fund të mandatit të tij, Kadri Veseli do t’ia largojë nga postet vendimmarrëse të gjithë besnikët e tij, në mënyrë që atij mos t’i rrezikohet posti i kryetarit të partisë”, theksoi ai.

Plani i Veselit

Sipas Krasniqit, tentativa e Thaçit që pas 5 vjetëve të rikthehet prapë në krye të PDK-së do të jetë një mision i pamundur, sepse përballë ka një rival shumë të fuqishëm dhe tepër ambicioz.

“Me zgjedhjen e Hashim Thaçit president, Kadri Veseli ia ka arritur qëllimit të tij duke e nxjerrë në ”pension” kundërshtarin më të fortë në skenën politike të Kosovës. Kadri Veseli tash është duke u përgatitur që në një të ardhme të afërt të bëhet kryeministër i Kosovës”, tha politologu Faik Krasniqi. Sipas tij, qëllimi i Veselit është që pasi të kryhet puna e Demarkacionit dhe Gjykata Speciale të fillojë punën, ta prishë koalicion me LDK-në, vendin ta dërgojë në zgjedhje dhe vetë të zgjidhet kryeministër, derisa rikthimi i Thaçit në krye të PDK-së do të mund të ndodhë vetëm nëse Kadri Veseli do të jetë njëri nga të akuzuarit e Gjykatës Speciale, edhe pse shumë vështirë e besueshme që ai të jetë në bankën e të akuzuarve./kosova sot/

Kryesia e Kuvendit ka vendosur që më 3 gusht të organizohet një tryezë debati për çështjen e demarkacionit me Malin e Zi. Kjo tryezë, edhe pse vjen pas një viti, vlerësohet si mundësi e mirë për ofrimin e fakteve dhe për gjetjen e një zgjidhjeje për këtë çështje

Kryesia e Kuvendit të Kosovës e ka miratuar kërkesën e deputetit të Lidhjes Demokratike të Kosovës, Shpejtim Bulliqi, për organizimin e një tryeze në të cilën do t’i ballafaqojnë faktet për demarkacion me Malin e Zi Komisioni, që e ka negociuar këtë marrëveshje, me ekspertë të fushave të cilët kanë të bëjnë me çështjen e kufirit. Kështu më 3 gusht, në sallën alternative të Kuvendit, do të organizohet kjo tryezë, e cila vlerësohet si mundësi e mirë për të gjetur një zgjidhje për çështjen e demarkacionit, megjithëse vlerësohet se kjo tryezë ka mundur të organizohet kohë më parë.

Gjithashtu vlerësohet e nevojshme që Qeveria t’ua dërgojë deputetëve materialet për Demarkacionin në mënyrë që të jenë të informuar mirë para se të mbahet kjo tryezë.

Pas mbledhjes së Kryesisë së Kuvendit kryetari i legjislativit, Kadri Veseli, ka bërë të ditur se debati mes Kuvendit, Qeverisë, Komisionit për Demarkacion dhe ekspertëve do të mbahet më 3 gusht, në sallën alternative në Kuvend../zeri/

Debati televiziv i organizuar në transmetuesin publik të Kosovës, ku pjesë e panelit ishin ftuar zëvendësministri i Pushtetit Lokal, Bajram Gecaj, kryetari i Komunës së Pejës, Gazmend Muhaxheri, dhe juristi Xhevdet Shala e gjeografi Tomor Çela, ka nxitur reagimin e deputetit të Vetëvendosjes, Mytaher Haskuka.

Haskuka, përveç që theksoi se të ftuarit në emisionin televiziv “ishin që të gjithë pro Demarkacionit”, nuk nguroi ta krahasoi atë me një regjim diktatorial.

“RTK-ja paska thirrë 4 debatues, të gjithë PRO Demarkacionit. Çfarë pluralizmi? Kjo ndodh veç në Korenë e Veriut. Përndryshe nuk dëgjova asnjë argument valid pos fjalëve të thata” (sic.), deklaroi Haskuka.